يقول من بدعه على غيره اصعيب \\\ راهي ونهجه مايغير مساره

شرد معانيه ماتحتاج تعريب \\\ امعربه ماعربتها الأثاره

صمخ البيوت اللي مافي بدعها عيب\\\ تطلق السان اللي براسه نعاره

فرايد مافندوها اللواعيب \\\ اللي شرايدهم على غير أداره

شعار تلفاز وطبايع رعابيب \\\ تحت شعار ان التقدم حضاره

وانا ماني ضد الحضاره ولانيب \\\ راضي على وضع الرقيب ورداره

الشعر أدب والبدع معنى وترتيب\\\ واللي يجيده ماينقص وقاره

اما يخلد بأسم راعيه فالطيب \\\ والا بلاش امن اللغى والعياره

ماهو بمقياس لعكف الأشانيب \\\ اللي مراجلهم تذب الصداره

لكن واهس .. والطواري غياهيب \\\ يسج معها اللي بصدره حراره

كثرة أعلوم اقريبين المحاضيب \\\ وكل بدع له سالفه من مداره

أحد يقول ان قولنا ماله امصيب\\\ واحد يقول انه كسرنا بغاره

وأحد نسب ساسه وهو ساسه ايعيب \\\ وأحد يقول ان فعلنا حكي حاره

وحنا ماننظر للحكي والأكاذيب \\\ نشوم من كلمة ردي العباره

لولا الحدب ومعكفات المشاعيب \\\ يمدي كلتنا السن كلاب المغاره

قوم خلقنا للمسير معازيب \\\ وعوق الحوار اللي تهيزع فقاره

كرمان مانخلف اسلوم المواجيب \\\ ولانحسب احساب ربح وخساره

وظفرين لامن غثربن المشاريب \\\ واليا تقدمنا مافينا بواره

خزنة ظفر ماحن بخزنة دواليب \\\ من قو مافي روسنا من سطاره

مقدامنا شافي حصان الأطاليب \\\ شيخ براسه حلم رأي وقشاره

لاشب ضوه فوق روس المراقيب \\\ ربط عدوه ماغلا من أقشاره

لاقاد جمع محمد والمخاضيب \\\ وشريف والنباب جتنا أخباره

ميرادنا يشبع به الطير والذيب \\\ وسو على اللي في فؤاده نماره

كم شيخ قوم حولته المعاطيب \\\ بكفوف عيال تزيد المراره

وكم من عقيد طاح واخلى المراكيب \\\ وعليه يبكن البني بغزاره

مانلتفت للي ليا قام ماهيب \\\ الا على اللي فوق راسه الاماره

خلان أشده مرويين المحاديب \\\ مانتقي لاصار للعلم شاره

اليا تعزوينا بحرش العراقيب \\\ سود عليها اوسوم ربع نداره

نرعى بها قفر لنبته نبانيب \\\ عشبه من الوسمي يشعشع خضاره

هواجر والساس ماعنه تجنيب \\\ من روس قحطان ومن قعر داره

ادروعنا اللي ضربهم صعب واتعيب \\\ وحنا محازمهم على اول شراره

حامين نجد امطوعين الاصاعيب \\\ وكسيرهم يبطي ماتجبر اجباره

مركاضهم منه البزر يلحقه شيب \\\ وتاريخهم مجد مايحجب استاره

للطيب ساس وللحرايب مشاهيب \\\ وكل قحطاني للوفا شب ناره

على مدايحهم تزيد المكاسيب \\\ وأشوش من بيت مايخدش أجداره

قحطان لا اهتزت اسروج المهاذيب \\\ اهتز نجد والعراق وجواره

افعالنا مانبتدعها من الجيب \\\ يشهد لنا التاريخ بأول قراره

ندرى الخوي من بد كل الاصاحيب\\\ ولانحسه فالحكي والنزاره

ولجارنا احلى من لبن شمخ النيب \\\ ندمح أكباره وأنتحمل اصغاره

الهاجري لا منه خاوا الاجانيب \\\ تلقى ضويه فوق راس الزباره

عجل على المخبا ولايعلم الغيب \\\ ونفسه على كسب المعالي امجاره

من غير قاصر في فالأصول المجاذيب \\\ الطيب ولعه والمراجل مناره

وفي فعلنا مافيه شك ولا ريب\\\ وقول بليا فعل عده خساره

مافالحكيا فود ياهل المكاتيب \\\ الشرح واضح .. والحقيقه شعاره

اليا بغيت الطيب يامدور الطيب\\\ رافق بني هاجر وتلقى شناره


قصيده للشاعر: فالح بن قشعم الهاجري