السلام عليكم ورحمة الله وبركاتة...

هذه نهاية كلامي يوم تجرحني بكلامك...




وش بلى حالك تغيّر .. ماخبرت انك عنيد
ماخبرت اتصد عني يابعد عمري .. علامك ؟

غبت يومين ورجعت وصار قلبك من حديد
وش خطاي اللي خطيته .. يوم تستكثر سلامك ؟

كان همسك لي قصيد .. وصرت ياروح القصيد
تجرح القلب بنظرك .. وتكمل الباقي بكلامك
انت مانت اللي عرفته .. انت متغير اكيد
لاهواك .. ولا هنّاك .. ولا فرحك .. ولا مقامك
وينها ضحكة عيونك ياعسى عمرك مديد
ما زهالي غير روض ٍ فاح به ورد ابتسامك

في غيابي عنك اسولف.. للقريب وللبعيد
واسرح بوسط السوالف بين جنتك وحمامك

في غيابي عنك ادور .. من بريد اليا بريد
عن مكاتيب ٍ توصل لي سوالفك وغرامك
ماهقيت انك نسيت .. وصار لك حبٍ جديد
كيف اصدق شخص غيري صار هو كل اهتمامك

خابرك صعب المنال .. وما تطولك أي ايد
خابرك مثل السحاب وكلنا نرجي غمامك
خابرك ظبي ٍ جفول .. وما تسعك الفين بيد
خابر ٍ لك نظرة ٍ تفرض على الكل احترامك

ماخطر في بالي انك عن مساراتي تحيد
او تبدي شخص غيري في عواطفك وهيامك
موقفك واضح امامي لاتعيد .. ولا تزيد
يكفي اللي صار منك . ومن خناجرك . وسهامك

فالمعاند خذ عنيد .. وفي الشدايد خذ شديد
ماقبل انصاف الحلول .. وموقفي واضح امامك

ليه تسقيني خصام .. وخاطري منك قصيد
ليه يسري بي جفاك .. ومنوة ادروبي غرامك

مثل ما قال المثل .. ماللحديد إلا الحديد
هذه نهاية كلامي يوم تجرحني بكلامك

كان شوفك يوم عيد .. وصار بعدك يوم عيد
روح عني .. يغني الله عن محبتك .. وسلامك


..............



القصيدة منقووله