ديوان الشاعر أحمد الصانع

**زيــن الأطبــاع** · 19-07-2009, 06:30 PM

معجزه

:

ما هي .. قصة حُب , وإلاَّ ذكريات
لل مشاعر ( جيش ) .. وقلبي مَرْكِزَه

صرتي لي " خامس جهه " لأربع جهات !
وصورتك في وسط عيني مبرْوِزَه

كنَّ ربِّي .. ما خلق غيرك / بنات !!
إن طروا غيرك .. أحس ب " نرْفزَه "

وكنِّك إنتي جامعه .. كل الصفات !
الحلا ..
والزين ..
وعين مطرِّزَه ...

جاك قلبٍي وصرت عاشق تضحيات
و الهَدَف من شان " عينك " أحْرِزَه

إن خلطتي الماي في " سكَّر نبات " ..
وقلتي : " أحمد " إفرِزَه !!
راح أفرِزَه ...!!

في كلامك , يستلج فيني السكات
ومن جهل طبعك يظنِّك ( مخْرِزَه ) ..!!

واثق الخطوه .. وأمشي في ثبات
ويوم شفتك الخطاوي مهَزْهِزَه ..!

مو ب كيفي هي كذا والله جات
قلبي كرسي " صعب " غيرك يحْجِزَه

عيشتي
دونك ..
يساويها ..
الممات !!
وإنتي عيشي .. في حياتي " معَزِّزَه "

يعني قبلك .. كنت أنا , كلِّي شتات
وصرت أجمعلك شتاتي .. و .. أكنِزَه ..!

وشي طبيعي .. لو يغارون البنات
للجمال أخبار .. وإنتي " مُوجزَه " ..

ومن يشوفك .. اللِّي يتكلَّم لغات
قام يخربط وال ( إذا ) صارت ( إزَه ) ..!!

والثقيل اللي يسولف في سكات
من يشوفك عاش حالة / لعوَزَه ..!!

ولو
تبوسي
إنسان
له
أيَّام
مات
قام يركض !!
حَس قلبه ينْغِزَه ..!

وقلبي اللي نام في عز وسبات
غيرك إنتي .. ما أظن ( يفزِّزَه )

واللِّي قالوا لما جت : " الحلوه جات "
جنبك إنتي ..؟ صارت أكبر مَطْنَزَه

لا تغاري .. من كلام المعجبات
ماني مثل اللِّي .. يحب " الرَزْرِزَه "

ياما قالوا ( الحُب ) يصنع معجزات ..
وإنتي
حُبك ..
في
حياتي
" مُعْجِزَه " ..

:

**زيــن الأطبــاع** · 19-07-2009, 06:34 PM

سفينة نوح

:

يكلمني عن جروحه .. وأنا من سبِّته / مجروح !
يسولف لي عن (أحبابه) وأسولف (عنَّه) ل حاله ....
أحس في دمعة عيونه , وتطلع من بكاه الروح ,
وإذا يفرح مع غيري . . . بكى " قلبي " و / هنَّاله .
ياليت انا معاه اللي ركبنا في سفينة نوح
محد يقدر يفرقنا لا : عمِّي .. و لا : خاله
رسمته في قلم ناشف على قطعة خشب من لوح
و تهيألي يحاكيني !! ويبيني أرسم إظلاله
تحرَّك طيفه الدايم . ولَعَب في حسبتي بجْموح .
يحب الخيل , و , أشعاري .. عشانه صاروا خيَّاله
وصار ب عيني ( الأجمل ) مع إنَّ شوي هو / مملوح ,
ولا غيره ملا عيني وقلبي بس يصفاله
ذبحني قلبي الساكت ! ... متى قلبي عليه يبوح ؟؟
أحبه وماعرف إني أحبه , وأعشق وصاله . . .
كتمت , وهذا من طبعي , وتمنيت " الغلا " مفضوح
ببيِّن له ولا أقدر !! مع إنِّي جالس قباله .
أخاف إنّه بعد مُدَّه يطير ... ومن إيديني يروح !
هو نعمة من فضل ربي , ويقولوا : النعمة زوَّاله
لي قلبٍ من كثر حُبه على : فراش التعب : مطروح ,
لا هو " ميت "..ولا " عايش " .! ووالله إن مات أشواله .
وحبي من طرف واحد , غلا صادق بدون مزوح
وإذا هو طاح ؟ قدامي .. نزلَّه / قلبي / و : شاله .!!
شكالي وكنت له أسمع . . . وقلبي دوم له / مفتوح
يطمِّني عن " أخباره " , وشنهي اخر أعماله
وإذا شفته خطا ب حقي بدون أعذار ؟ .. هو مسموح ,
في نياته ولا يدري .! وطيبة قلبه همَّاله .
في جياته ...... . يروح الهم , ويبدِّل ( دمعتي ) ب فروح
تمنيت البشر مثله . . . وكل من حولي أمثاله .!
من الله حُبه في قلبي حشى مالي ترى مصلوح ,
عسى يكبر ويذكرني ويسمِّي ب " إسمي " : إعياله .

:

**زيــن الأطبــاع** · 19-07-2009, 06:41 PM

خيانة ملك

:

قبل أبتدي عندي طلب ركِّز طلب ماهو " رجاء " !
ما أبي تجاوبني .. ولا تستغرب إني أسألك

لا تنصدم من عزلتي , حالي كما : أبو العلاء
عندي سبب : ما تستحق إنِّي أجيك و أوصلك

لا تعتبر جمر الحكي من شاعرك يعني " هجاء "
لو كنت بهجي حضرتك ما خفت منِّك .. قلت لك !

هذي القصيده صُنِّفة في دفتري قصة " رثاء "
حبٍ يموت وتنولد .. وحبٍ يعيش ويقتلك !

ناديت لك ياما .. ولا لبِّيت لي , وضاع النداء !
إنبَح صوتي والصدى من كثر ما ناديت لك !

أقرب من ثيابي علي وأبعد من نجوم السماء
ورغم إبتعادك والتعب ..أرسم طموح وأمهلك ..

ما كنت لي الداء وأنا ما كنت ل جروحك " دواء " ..
ما عشت في دنياي لي !!عايش ولكن عشت " لك " !

علمتك القلب الوفي .., ما يخذلك فيه " إنتماء " !
وعلمتني كيف العشم في من تحبه .. يخذلك !!

علمتك إن أصل الهوى يرجع ل كلمة " إحتواء " !
وعلمتني إن الهوى , ما عاش يوم ب داخلك !

علمتك إنِّي لك بحر مدَّه وجزره لك وفاء !
وعلمتني كيف أنصدم وأغرق أنا في ..ساحلك !

ما تستحي ,, ودامك كذا ؟ - إفعل حبيبي ما تشاء !
توِّي عرفت إنِّي كثر ما أعْرِفِك .. كنت أجهلك !

ما كان قلبي بس لك ؟ يا لاعب أدوار الدهاء !
وما كنت لك أقرب من أنفاسك وأقرب من هلك ؟!

ما عاد تفرق غيبتك أو رجعتك .. عندي سواء !
كنت إهتمامي ورغبتي .., والحين دوري أهملك !

لا صار قلبي لك وطن .. أبسألك وين الولاء ..؟
وشلون حال المملكه ؟ - دام الخيانه من ( ملك ) !

إن كنت جاهل ..! " لعبتك قلبي " وما فيها ذكاء
حتى الطفل إن جبت له لعبه .. - ولاءه صار لك !

قبل أنتهي عندي - أمر ما هو طلب وإلا - رجاء ..
لا يشغلك ماضي إنتهى .. ركِّز على " مستقبلك " !

:

**زيــن الأطبــاع** · 19-07-2009, 06:52 PM

ممنوع !

تعال , دامه صعب قربك / دخيلك
وإلا السهل من حضرة الحُب ما أبيه
أقول أبيك ,, وقلت : ممنوع أجي لك
ما تدري كل ممنوع / لي رغبةٍ فيه

ممنوع أحب غيرك لأن الحقيقه ؟
مافيه " أحد " يسوى يجي في / مكانك .

ممنوع أنام إلا ب هذي الطريقة :
( أنام أنا ويَّاك .. و أحضن حنانك )

ممنوع أنا أنساك لو في – دقيقة - !
لازم ( أفكر فيك ) , و ( أعز شانك ) . . .

ممنوع أسمع : صوت : كل الخليقة ..... .
ويا زين كل كلمه تجي من { لسانك }

ممنوع أحس إنْ كنت ويَّاي ضيقه
ياللي خدمك الحظ .../ فيني و عانك

ممنوع أقول : القلب / شيٍ يعيقه
قهوة ( ظروفي ) .. حَلَّهَا , زعفرانك

ممنوع أقول إنَّ الزمن ما أطيقه
لأنه زماني صار " صدفه " زمانك !.

قلبي ( ذَهَب خالص ) , وحُبك بريقه
وكل ما أسوِّي في حياتي عشانك

دام .. المشاعر .. يا حبيبي , رقيقه ؟
و القلب خان أحبابه اليوم / .. صانك .

بردان ؟؟ شبّ إحساس " قلبي " حريقه
إدفا عسى تكسب ( دفاك , و رهانك )

" سيفك " إذا خان الرفيق ب رفيقه ,
يعني أشيلك , لو تعثَّر .. حصانك .. .

لو خان { كل } معشوق مرَّه عشيقه ؟
: مايخون قلبي لو خطا الكل و خانك ! :

دام " القوافي " في بحورك ../ غريقه
( شاعرك ) يبدع و إنت إطلق عنانك

ب أكتب قصيدي فيك وهذي الحقيقه
ياللي تِهِز أبيات شعري .. كيانك

:

مسموح كل إنسان يقرا المعاني
لكن شعور القلب يا ناس محفوظ
ما قلت من ( حظَّه ) لأنه لقاني
أقول أنا من يوم ألاقيه : محظوظ

:

**زيــن الأطبــاع** · 19-07-2009, 07:18 PM

كتاب الغلا

مات قلبك وانا أبيك تكون ~ حي ،
من كتب فرقاك في الصفحه الأخيره ؟

قصتي المفروض تتركها علي !
مو على كيف الفراق يكون خيره !

كنت لك مثل الغريب و إنت لي :
الحياة / الناس / يعني كنت ديره !

صرت مثل إللي فقد له كل شي
ضاعت أحلامه عشان عيون غيره

ماعرفتك ! وشفتك مثل : ريم الفلا ،
الكبر شين .. وإلا نور عيني ~ بخيل ؟

إي عرفتك ! حبيبي الأولي { يا هلا } ..

مرحبا فيك من بعد الغياب الطويل ،

فاتك الفوت ولما فات ، صوتك علا ..
لا تنادي المحبه { رجعتي } مستحيل !

ماتفيدك حلاتك .. ما يدوم الحلا ،
ليت روحك جميله دام وجهك جميل

قلت لك ياتحبْني حيل ~ وإلا - فلا
إللي مثلي ( أناني ) مايحب القليل

إنت هَمٍ { ثقيل } ومن حياتي إنجلا ،
صرت هَمْ بحياتك وأدري همّك ثقيل !

دايم اتقول ~ إنك ( غير كل الملا ) ..
وانا قايلك إني شخص ماله : مثيل

الدليل : إنه قلبي ~ في غيابك سلا ،
يوم غيري عيونه من فراقك تسيل !

إنت غلطه بحياتي في كتاب الغلا :
مامحيتك ولكن .. منجبر ع الرحيل

لا هلا ترد { قلبي } لا ولا مسهلا
شفت قاتل بعمرك يرضى عنْه القتيل !

رحت عنك وباقي لي أثر و البلا :
أدري دورت مثلي وما لقيت البديل ..

ماطفت ناري .. من أعذارك ( أبد )
لا تحاول إني أرجع لك ~ وأهدي

فوق شينك / عينك تخون الوعد !
غلطتك في حقي لا يمكن تعدي

ماني ناقص جرح من إيدك بعد
كل شي .. يصير لي ما كان ودي

فيه غيري - وفيه غيرك : ف البلد
مو معاي تكون يعني إنت ضدي

لو أعد جروحك أخطي ب العدد
ولو تحس شوي ما بيّحت سدي

روح دور لك .. على غيري .. أحد
دربك إللي جابك ل عندي يودي

{ خالد } { محمد } وناصرْك وسعد
عندهم قلبك .. مثل ~ ماكان عندي

ما إعجبك ردي ! ومن يزرع حصد
بذمتك ~ وش كنت ؟ تتوقّعْه ردي

منت قدي !! .. روح عني ~ وإبتعد
فكني من جرحك لأنك منت قدي

لا كبرت وشفت نفسك ( مستعد
للمشاكل ) إرجع / ونبدي التحدي

**زيــن الأطبــاع** · 19-07-2009, 07:31 PM

موانئ و باخره

دارت الدنيا وتبيني أعذرك !
______________ نامت عيوني وعينك > ساهره

إنت لي ماضي ومابي .. أذكرك
______________ و الغلط وياك ... ماني مكرره

قلت لك إحذر غرورك يكسرك
______________ ومن يحبّك واجب إنت تقَدّره

قبل لا تفكّر تهاجر ب أهجرك
______________ وعدّني غيمة حنان .. مهاجره

مثل ماجَمّعتك أقدر أن ث ر ك
______________ يعني راسك لو رفعته أكسره

كنت لك مثل المواني ~ أنطرك
______________ لين طاحت من عيوني الباخره

لا تظن أبكي عليك وأخسرك
______________ إللي مثلك ( لازم ) إني أخسره

يا القليل الباقي طاحوا أكثرك !
______________ في بحر - دمع العيون - الطاهره

أبقى أكبر شخص مر ب ناظرك
______________ وتبقى أصغر <~ من نويت أكبّره

في فراقك ماحزنت ابشرك :
______________ وكانت الفرحه معاك مسافره !

كيف ألوّح لك وأجبُر خاطرك
______________ وإنت إحساسي مكسّر خاطره

أشكر أعدائي كثير ~ و أشكرك
______________ من سبايبكم .. فقدت الذاكره .

دارت الدنيا وتبيني أذكرك !!
______________ شفت منّك خير لأجل أتذكره ؟

إكتب الشطر الأخير ب دفترك ،
______________ القلوب البيض .. جداً نادره

**زيــن الأطبــاع** · 19-07-2009, 07:43 PM

الأمور اللي تفور لي دمي

:

في عيوني , وش يساوي غيرك إنت ؟
ودّي اخر شي أشوفك . . و ( أنعمي ) !

أدري إن ضاقت عليك الدنيا خنت
وانا . . . . أخون الدنيا لك يا ادمي !

جيت عندي وبْ حمى قلبي إستعنت
ليه تطعني .؟؟ . . . . و فيني تحتمي !

حِسْ مَرَّه وحدَه في جَرحِي لاهنت
إرمِي طَلقَه . . وحِسْ ب اللي ينرمي

كيف ترميني وعلى قلبي زبنت
" البلا " . . لا صار ضدّي محزمي

كنت قاسي وللأسف مايوم " لنت "
أنتمي لك . . وإنت لي ما تنتمي !

كنت لي قبري وأنا فيك إندفنت
جيت لك كلّي ورجع لي معظمي

كنت لك واحد وكل الناس إنت
كنت صوتي كنت شوفي ونْسمي

أذكر إنيّ كنت بين إيدك وصنت
وإذكر إنّك في جروحي " حاتمي " !

أدري إنّك في غيابي . . . ما حزنت
و رغم هذا . . . تدري إنّك ملهمي

كيف أضمن لك شعوري وماضمنت
من كثر { دقِّك } - تفكّكْه لْ حمي

لك عقل يوزن بلد بس ما وزنت
الأمور . . . . , إللي تفوّر لي دمي !

في زوايا البيت وفي شعري سكنت
وفي حضن " أفكاري " دايم ترتمي

اهِ مِنْ قِيدِكْ . . . . وماهو قِيد كنت
اهِ مِنّك , كِيدِكْ ( أَدْمَى مِعْصَمي ) !

**زيــن الأطبــاع** · 19-07-2009, 07:52 PM

الأصيله

يحس فيني ... قبل لا أحكي ! ... عن إللي ب خاطري و فيني
وكل ماجيت أب تكلم , عن " الأحزان " ؟ هو / يبكي !

غريبه ! كيف يفهمني ؟ ويقراني ؟ وأنا عيني :
- أغمّضها إذا شفته . . . و أحاول . . . إنّي ما أشكي

عليه شلون أخبّي شي ؟؟ وأشوفه ( حافظ سنيني ) !!
إذا ب أضحك قبل لا أضحك ...... تسابق ضحكته ضحكي .

لأنه عارف أحوالي قبل لا يسأل ش فيني
لزمت " الصمت " في لحظة سؤاله . و أتركه { يحكي .}

قلت .. أبحكي .. ما رأيته .. وما سِمَعتَه للذينه /
يسمعُونِي , و يفهمُونِي , دَام خفَّاقِي كفَلها

" قصةٍ " صَارت و عِبرَه و " نُور دَرب " العارفينه
وإستَحَت ( كِل القِصَايِد والكُواكِب ) مِن خَجَلها

شاعره . لا يُمكِن إنهَا تِعترف مِثل : السفينه
لا بَغَت تغرق ؟ تِكابِر ! حتَّى تتناسَى خلَلها

, السهل فيها صَعَبهَا , وما تبي تِرسى في مينه ,
أبحَرَت رَغم العَواصِف . . . والصَّعَب فِيها سَهَلْها . . .

مِن تِغزَّل ؟ ما عِجَبهَا ... لو مِسَكهَا في يمينه .
ومِن عَرَفهَا ؟ ما فَهَمهَا . لو قراها في غزلْها ...

تكتِب " اللي صار فِيها " و " الجُروح المستكينه "
و القوافي / صَارت أجمَل ! لا بِدى فِيها زعلها /

ولو يكذِّب ؟ ما تِصَدِّق لو يقول إنْهَا : ثمينه
ولو وصَفهَا ؟ مِن خياله ؟ ما وصِفهَا في مثلها ,

تِنْصِدِم لا شافَت إنهَا - هَزَّت قِلوبٍ رزينه
صارت الوردَه ..الوحيده.. و النَّحَل ناوي ( عسلها )

مِن سَألهَا عَن خَبَرها قالت أشوى صِرت زينه
وإهيَه تدري في النهايه ؟ إنْهَا في قِمَة مللها !

ما شِكت تكْسر خواطر . . . وما بِكَت دَمع المهينه . . .
ما رجت { رغم المصايب }, و إنْعَدَم فِيها جهلها

ويُوم خان الحُب ؟ قالَت : ِيلعَن الحُب وسنينه :
نفسها نفسٍ - عزيزه و " ما إنوَلَد " مِن هو يذلها

ما بقى للِّيل داعي .... . بعد ما راحت حزينه
وما بقى للحب معنى . .... بعد ما حُبها خذلها

مِن قِدَر قلبه و جَرَحهَا ؟؟ مِن ذِبَحهَا في إيدينه ؟؟
ما عَرَف ( " قِيمَة وفاها " ) لِيته والله ما وصلها !

كِلْ شَي فِيهَا . ! يحبَّه ! . و ما تبي إلا / حنينه
كامله و الكامِل الله يا كِثِر و الله , خِصلها

... الأصيله يوم صَارت في وسط عينه رهينه ؟؟
قام - يضحَك مِن غلاها عِند ~ كِل اللي عَذلها ~

ويَسرِد القصَّه الطويله و يقلُب الزينه بشينه !
والخطا ؟ سوَّاه مِنْها . ما رَحَم " طِيبَة أصِلْها "

ولو أحَد عَنَّه سَألْهَا ؟؟ قالت : الله بَس يعينه :
ما تبي تحكِي , و تِذِمَه , لو سَألها مِن سألها ,

كانت ( أكبَر ) مِن جحُودَه يُوم عاشَت له سِجينه .
ما خَطَت مَرَّه !! في حَقه و - يا كبر والله عقلها

وكان ( أصغَر ) مِن صِغيرٍ عِندَه سِكينٍ سنينه ...
و لما صارت في إيدينه ؟ مادرى إنِّه قِتلها

عِزِّتي لِك يا وُفاها ,., ما رَحَمهَا مِن مدينه ,.,
كِل مِن فِيهَا " جَرَحهَا " و إنطُفَت شَمعَة أملها

ما عطاها الحَظ مَرَّه .! عَاشَت و مَاتَت / حزينه
والمشاكِل ؟ ما تِجيهَا إلاَّ مِن { أقرَب أهلها }

:

.
.

في البدايه .. قلتي : والله إنت فارق
وللنهاية " درب موحش " , وإختصرتي .

كان ما دمتي حبيبه ؟ لا إنتفارق
يعني لو ما صرتي / حُبي ؟ .. إخت صرتي !

.

**زيــن الأطبــاع** · 19-07-2009, 08:00 PM

عصامية جرح

كنت هادي ....
ومن هدوئك كنت خايف !
كنت عادي ....
لاشعور ولا عواطف !
وقتها حسيت إن هذا الهدوء ..
مستحيل يمر مايسبق
" عواصف " !
صاب ظني .. ليت ظني كان خايب !
غاب صوتك !!
وإبتعدت وصرت غايب ،
غبت عنّي ....
وغابت أفراحي معاك ،
ليش غبت ؟!

وليش ماعدنا حبايب

؟

:

لاتقول ف رميتك ماكنت رامي !
أشهد إنك . . .
راميٍ أحسن صنيعه !!

من عشقتك وإنت في جرحي عصامي !
ومن عرفتك . . .
وإنت لك ذمّه وسيعه !!

شايف وساكت ومتراكم ملامي
في حياتي شفت شغلاتٍ فضيعه

علمتني دنيتي { أكتِم } - غرامي
وإن لقيت - إنسان بايعني , أبيعه !!

وعلمتني كيف . . أحوّل / إنهزامي
لأنتصاري . . . واتحايل ع الخديعه !

مهما أعطي لل زَهَر كل إهتمامي
ما يفتِّح , غير . . . في موسم ربيعه

علمتني كيف " تتساقط " أسامي ,
وعلمتني كيف أبقى ب..الطليعه

علمتني أمشي و اطالع . . . أمامي ،
طيحة الشاطر . . تجي دايم سريعه !

علمتني كيف أفرِضْه إحترامي ,
ولي كرامه , يهمّني تبقى رفيعه

ليه أشيلك ذنب دام القلب سامي ؟
وليه أحمّل نفسي . . . ما لا أستطيعه !

ليه أتمتم وإنت ما تسمع كلامي ؟!
ولو يحرضني لساني ليه أطيعه !؟

صمت عنّك . . .
لا تجي وتجرح صيامي
عندي الفرقى , ترى صارت طبيعه !

:

ما أعاني ,
والحزن أصلاً نساني
رحت عنّي
تكفى لا ترجع . . . عشاني !
الأماني تحققت لحظة غيابك /
مات حبي ,
وقمت ما أسمع أغاني !
كنت ذنبي
وأحمد الله إنّه هداني

ديوان الشاعر أحمد الصانع

ديوان الشاعر أحمد الصانع

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget