واعلّمك وش الحديث المنطقي
من شان تعرف كل شي ٍ تجهله

خدمه .. بقدمها بلا شرط وثمن
يا صاحب افاق الخيال الممحله

وماهيب من باب الموّده والغلا
لكّن من باب احتواء البلبله !!

كنت احسب ان سود الليالي ربّتك
واثرك على نفس العلوم الاوله

موّسوس وحالتك حاله مزريه
الحلم قدامك وعاجز تاصله

على مدار العام من قل الثقه :
بينك وبين الشك والريبه صله

ذكائك المزعوم حاجه مؤسفه !!
تضحك على تفكيرك وتستغفله

سويت نفسك فاهم الوضع وذكي
وكليتها يا بو الشباب مفلفله !!

ما احد ٍ جبرك تضيع وسط المعمعه
وتستصعب الموقف ولا تستسهله

القصد واضح والمعاني واضحه
ليه اتمادى في الحكي وتؤّله ؟

طويق ثابت والجبل يبقى جبل
فلنعتبر هذا سؤال وعلله ؟!

شفت ان مالك بالثقه موطأ قدم
كب الغرور المفتعل ولاّ اقتله

وان عوّدت نهج وقناعات وفكر
الاجوبه ترضي غرور الاسأله

المرجله لا صارت هايط وشعر
ما عاد ابيها لعنبوها مرجله

وان كانها مواقف وقول وفعل
ماعندي الا : تم وابشر وازهله

خذ لك نصيحه كانت تسام بجمل
يا مسيلمه او بالاصح يا عبهله !!

لا عاد تخطب في شباب المجتمع
ريّح .. وخل الدين والنصح لهله

ولا عاد تشهد زور فارجاء البلد
وتبقى كذا من مرحله لا مرحله

حتى ابليس بيستحي من كذبتك !!
من كبرها ما هيب من ضمن عمله

واليا بغيت الجد سجّل مايلي
واستحمله واستوعبه واتقبله

ماهوب عيب انك تغيّر منهجك
العيب وانواع الخطا والمهزله

انك تجي كلك وتستنقد فئه
على فعل وانت اول اللي يفعله !!

راجع حساباتك وفكّر واتعض
واضرب على نفسك جميع الامثله

ان كان ما انت بكلها مثل مثل
ماوالله اقول الشعر واسترسله

خلاصة الموضوع كله ( من - إلى )
بيت ٍ يوضح لك غموض المسأله :

أنا .. لو اني ما لعبت بحسبتك
ما كان يسبب لك قصيدي مشكله !!
::::::::::::::::::::::

وقت الردى كل شي سوّاه
رخومه تذم المطاليق

ماعاد اطيق الهم وأقواه
شلت بشبابي فوق ما اطيق

ذي اخر أحوالي وطرّاه
يومك تقول إن كني طويق

إيه والله إن فيني مزاياه
وإن بيني وبينه مواثيق

بس صاحبك ماجاه كفّاه
مليت من قولة (( توافيق )) !!

حتى الشعر شكلي أبظماه
ماعاد تغري بلّة الريق

كانت معاليقي تمنّاه
واليوم !! هو جرح المعاليق

يطري علي واقول عزاه
يانشوة الفرحه ابتصفيق

واطري عليه ان تاهت اخطاه
يلمحني بروس الشواهيق

حتيش لو إنّا حشمناه
ماتردع الحشمه مطافيق

في ذا الزمن ماتت بقاياه
روح امسح دموع الطواريق

غنّى لك اللي متعب اغناه
لاجر صوته همّه يفيق

لايكتب الضحك ولا يقراه
كنه لحزن القاف عشّيق

بتصدق شعوري !! أو إنساه
بصرك ترى ما احتاج تصديق

قد قلت لك واوصيتك وصاه
لاتنبش جروح المخاليق !!

هالقلب لاتحده على أقصاه
مالك ومال الهم والضيق !؟

جيت لك والقلب ماهو بالمحاني !
شف قبل لوصلك سابقني وصوله !!

ووالله ان لو لا الغلا ما جاك عاني
يا بعد منهم بكوله و ضحكوله ..

عاشقك سوّاح !! وعيونك مواني :
اخذني ّ .. من الحزينه .. للخجوله !!

أبتسم خلني افضفض لك عشاني
الحكي غصن ٍ عجز صوتي يطوله ..

تعقد احجاجك وتعقد لي لساني !!
المطر يا غيم ضميّان لهطوله !!

خاطري مكسور من قسوة زماني
وانت ( كنْك إياه ) وفعولك فعوله !!

تعتبرني .. شخص مغرور وأناني
واعتبرك .. الكون في عرضه وطوله ..

اه لوّ تحسّ بجروح الأماني
كان ما تزعل علي ّ بهالسهوله !!

حط ( عمرك ) يابعد ( عمري ) مكاني
وان لقيت قصور ؟؟ قول اللي تقوله ..

وأنتبه يا سيّد الغيد الغواني
التشّره والمعاتب له أصوله ..

لا تساومني ولا تجرح كياني
كل شي ّ إلا ّ الكرامه والرجوله !!
::::::::::::::::::::::