استلطف جروحي ومات الحب من طعنه دلع
واقسى نهايات الغرام اللي تجيك مدلعه!!
يوم انتفض جرحي عتب اتظاهر انه ما سمع
مدري غروره اوقساه اوطيب قلبي شجعه؟!
طفل(ن) تمرد بالحشا ثم جار فيني ثم طمع
عوايده: (لاشاء يصنع شئ) بالقلب صنعه!!
علمته كيف انساق له شوق وصباحات وولع
وعلمني كيف الحب في وقتي غداله اقنعه..
ان جيت من اقصى متاهاتي تناهيد وهلع
زاد الجروح جروح .. جمر الهم فيني ولعه..
وان طحت من حزني قدم عينه تعداني ورفع
كفه.. وصفق ثم نطق حزنك تصدق ما اروعه!!!
فنان وابدع بنكساراتي تمادى ماقنع
اتصوروا خلا: ((الملل فيني يمل)) واستمتعه!!
كنه يقول بحرفه التجريح غيري من برع
اوهو يقول الظلم في ذا الوقت شفني منبعه؟!
ياخافقي مافادني صبري ولاطيبك نفع
احنا انخلقنا في زمن يرتاحلك لو تخدعه؟!
يعني وفا! وين الوفا؟ يعني غلا! ياخي شبع
وقتي من همومي وانامليت دربك اتبعه..
تسوقني لقبري واعيش الموت بحساس(ن) جمع
طيب(ن) عمى وحلم(ن) ابى لا حققه او اقطعه!!
تغريني انفاس الحياه ولاني اول من خضع
كم لي اصيح بنيتي والصوت محد(ن) يسمعه؟؟
اسمحلي ارحل والعزا اني ما شفت اللي فزع
كل(ن) يقول: (عين الغبي ماضرها غير اصبعه!!)
اسمحلي رحل دام وقتي لا يحن ولاشفع
لشخص عابر من كثر مادل دربه ضيعه!!
( كم قلت لك ما يكسر الرجال غير طعن الدلع
وانا انكسر حلمي وكبري يوم جتني مدلعه!!)

ليت ما خانت دموعي بيوم كبري والمحاجر
وانكشف لك ضعف عاشق عذبه وقت عنيد..
كان يمكن ما تمادابي غرورك يا مهاجر
ورحت عني واثق في قلب تبقابه وحيد !!
قالوا الفرقى (خطيه!!) واشهد ان الصد (فاجر)
يوم زود في ذنوبه وابعدك عني بعيد ..
اه يا كبر الجروح ان صارت طيوفك خناجر !!
وين مالد بعيوني؟؟ تزرع بهمي وريد!!
يعتليني صمت (كافر) وتساقط بي حناجر
زغردي يا عيون همي ؟؟ انقتل صوت شهيد!!
فاضت الذكرى في بالي فيض (زمزم) بيد (هاجر)
وارتوى من (زمزمك) شوقي !! ولا حصلت أيييد؟!
كيف احصل؟! دامي افقر عشق ... والحرمان تاجر!!
يشتري ويبيع في جرحي.. وانا ... اتناثر قصيد!!
كبرها لا غاب منهو صار في دنياك حاجر
كل كل احساس فيك وعشت تذكره .. وتعيد:
ليت ما خانت دموعي بيوم كبري والمحاجر
ورحت عني واثق في قلب تبقى به وحيد !!

يا عمر ما ينسي كود الردي
ولا انا لا مت .. يبقالي ذكر
عارف قدري وما مدت يدي
وما يضيع الحق عند اهل الفكر
وان نسوا شعري عوافي يا سندي
شوف كم شعر قبل شعري نكر
يكفي اني قد كتبته بجهدي
ولا كسبته بالتلاعب والمكر
اكتبه ب ( سهيل ) ويغار ( الجدي)
وان نخيته ما فزع صوبي عكر
شفني باولها وانا دربي مدي
استحقيت الثنا فوق الشكر
يحتويني حزن والبيت يعدي
ارتبك .. ثم ارتكب .. ثم ابتكر !!
حسبي الله يا العذاب السرمدي
ليه في قلبي تشيخ وتحتكر
الغريب انك معي من مولدي
كل ما فريت.. طعناتك تكر
لين قمت اقول ذا الحزن اجودي
حر لطيبه غدى قلبي ( وكر )
يا عمر لو شفت بالعين سعدي
لسعاده كذب !! عيني بو بكر !!
كيف اقول ان ضحكة السن ولدي
والفرح في داخل اعماقي ( بكر ) ؟!
يا عمر والله لو حظي ردي
يكفي بشرواك يبقالي ذكر

راكب اللي وردوه البشر والجفالي
من ديار تكره المسلم ودين اسلامه
بانوراما ( s 500 ) ورد من تالي
الجوانب إنسيابيه .. وسقفه جامه !
صوت دقة سلفه ان دقه عريب الخالي
غصة اللي توه يعلم بحكم اعدامه
وان مشى بشويش كنه فارس مختالي
رزة الفارع وهيبة شيخنا العلامه
خشته .. خشة هنوف سببة غربالي
فاتنة جيل : ( العباه مخصره و لثامه )
من حلاها الصايم اليا شافها طوالي
يستشك انه جرح فيما يشوف صيامه
كن كبوته خدود الخشف بنت الوالي
ودك انهم صمموا له فالوكاله شامه !
وكن بين عيونه اليا منه صار قبالي
عربجي نكس عقاله على مرزامه !
والسكن (أجواء حانه) وان عطاك العالي :
شفت برج المملكه لونك غرب تهامه !
امبراطور الرفاهيه بدون جدالي
رحلة استجمام .. من صدامه لصدامه
داخليه يا بري حالي ويا عزالي
أرض خصبه .. للفقير ودمعته واحلامه !
كل حاجه فيه ( عاج ) من الشوائب خالي
نوع فاخر فالمواتر نادر استخدامه
وبين : سيته المريح وقيره الميالي
وشاشته والنور والجوال والرزنامه
وفلسفة طبلونه المتناسق الطوالي
من اضاءته الخفيفه لزين رسم ارقامه
تشعر بمتعة جنون ( الدوري الايطالي )
بنجومه وانديته وقوته وإعلامه
وفالدركسون اختصار السالف !! وبالتالي:
سايقه يعطي الاوامر كلها بابهامه !
( مرسدس) وصية الاجيال للاجيالي
( الملك ) وماتبقى جنده وخدامه
منوة اللي يركب الغالي لعين الغالي
لا نوت شوفة ربوعه نفسه الجزامه
وجهه على الرياض وثم عطاه الصالي
وفز فزة من توفى شايبه قدامه !
(نصف ساعه) عقبها ييغير الارسالي
وعقبها (باربع) يغني مرحبا يا ثمامه
ناصي من يستحق المدح واسترسالي
( سعد المشعان ) درع المبتلي وحسامه
شيخ ليا قالوا اسمه والشعر في بالي
تبرك جزال البيوت الشرد تحت اقدامه
الشجاع , الشامخ , الحر , نادر الافعالي
الوفي اللي غرامه بالوفا وهيامه
الكريم اللي يمينه كفها همالي
غاية اللي جرح وقطع جماه حيامه !
طيبه وفعله وصيته مضرب الأمثالي
هو علمنا .. لا تحاكوا فالكرم وأعلامه
كنه يقول : الطيب ثوبي والحميا عقالي
والشموخ عمامتي .. يا حيها من عمامه
الرجوله على جسمه فصلت تفصالي
هندم علوم المراجل واصبحت هندامه
من زبنه من الزمان الشين والأهوالي
والله ان يبطي زمانه ما قواه وضامه
سعد عين اللي يعده صدق راس المالي
وسعد عين اللي غداله مسنده وحزامه
وجعل يفداه البخيل الناقص المتعالي
شايف نفسه على الدجه .. حبيس اوهامه
عند روحه هو الاطيب !! جعل ماله والي
وعند خلق الله : عفن ومهايطي وهلامه !
والصحيح اللي غبن حسادي وعذالي
بيت يفطر كبود العالم النمامه
والله ان ما يستحق المدح واسترسالي
غير ابو مشعان ابن عمي رفيع الهامه

اي والله اني ضايق ومرهق ومخنوق وحزين
واما بموت من الوله ولا بموت من القهر
واللي لعب بحسبه ايامي وخلاها سنين
اني على ذا الحال ياشعري لي اكثر من شهر
بعت المدينه لاجل عين!وقالو:الخافي يبين
ودفنتك بجوفي!وقالو:وش بقابك ماظهر
يامطول الغيبه ياطول الشوق مير الله يعين
العاشق اللي عاش ظامي بين عدك والنهر
عيد بي غيابك سنه والليه من العايدين
ولاعاد عيدك يالجروح اللي بقلبي من دهر
ياصاحبي لو تعتذر عن غيبتك عذرك سمين
حبك بعد ماغبت عن عيني تمادى وازدهر
من يوم شفتك والنعاس بعينك النجلا سجين!
ومن نفس ذاك اليوم وعيوني سجينه للسهر
علقتني بالضحكه اللي تسبق الغمازتين
وتركت لي شاعر كتب فيك القصايد واشتهر
سيلت دمعك واستباح الدمع ستر الياسمين
وعلمتني كيف الندى يجمل خدود الزهر
ليتك عقب ماغبت غيبت اشتياقي والحنين
او ليتني ماقد دفعت احلام عمري لك مهر

دام الفجر يا ليل دايم يقتلك
وشلون يقفي ما دفع لك ديته ؟‍!
يقتل وتحمر السما في مقتلك
الدم كاسيها وكنها ميته
ليته يحس بضيقتي لا ضقتلك
لا سالت دموع الشجر من جيته !!
وليته يحس بوحدتي لا اشتقتلك
والهم دايم لا لفاني نيته:
يصبر علي : اروق لك وان رقتلك
ينزعك من جفن افراقك بيته ؟!
شفني بعد ما غبت كيف اورقتلك
غصن السبات وصرت كني فيته !!
مابين رمشين الشقا خنقتلك
النور لو العين بعدك حيته
لا صرت عم وخال قلبي سقتلك
قاف تجره للسواد حميته !!
برثيك ياليلي واذا نطقتلك
مرثيتي حس الضيا ابسيته
قله ترى في مطلعه علقتلك
قطرة ندى بجدار رمش امنيته :
ينهد على حد الشفق لا فقتلك
لا من جبرت الفجر يدفع ديته!!

يا الردي على الردى مثلك يشيب
تكبر ويكبر رداك وتمتلي
الجهل ما عالجه طب وطبيب
ذا بلا.. والله يعين المبتلي
باتغاظى عنك واتحاشى واغيب
عن شعيبن عافته قدم جملي
ماني مجبورن اعيشك كالنصيب
لا انته من ربعي ولا انته من هلي
واعرف ان ((ضيقي)) على شرواك طيب!!
واحسب احساب المعاني وزعلي
جابك الله وهاجس المعنى قريب
انتهض شعري وانا ماني خلي؟!
عندي فكرة بيت ما ودي تخيب
ولعت قافي.. وعانه يصطلي
وانت هالمره ابي تصبح لبيب
افهم احساسي وترجم ( مايلي
الذيابه ما تخاوي كود ذيب
و(الثعل) شرواك عنه تعتلي
فلاتحاول تعتبر نفسك صحيب
لان هالصحبه ترى عيبن علي
ذاكرك ضيقي مع الليل الكئيب
ولا تظن ذيك السحابه تنجلي
خلها على الولي.. والعيب عيب
واسترح وارتاح .. يا عبد الولي
وكان ( رمياتك ) مع غيري تصيب
فعرف ان العيب ما يصيب (( سهلي ))

يا محمد ابن طبير مارد الكريم الا البخيل
وان عودت يم الشعر سهله وسندها علي
شاعر وامثل لابتي واتعب على البيت الجزيل
واليا احتمى الماقف وقفت وسقت للمجد جملي
ابلا شعور ارتب ابيوت القصيد المستحيل
وان عيت بيوت القصيده تنحبك!! إبن علي
والله لخلي الشعر كله يسجد ويصهل صهيل
وانت التفت لمبارك الصامل وقله ما يلي
من طيب مطلق طاب فعل عيال مطلق والحصيل
مدهال عز وصيت جود وسمعة ما تنجلي
فيامرحبا يا شيوخنا ترحيب ما مثله مثيل
بأسم الزقاعين ارحبوا يا لابتي شلي شلي
يا اهل الكرم والمرجله والدين والسيف الصقيل
يا سعد عيني لا افتخرتبكم وقلت انكم هلي
يا لاد سهل العامري ماني بقول الا القليل
مدام أقل افعالكم فيه المعاني تمتلي
عقيدة الاسلام وحده واضحه واكبر دليل :
ما تختلف بالشافعي والمالكي والحنبلي
وحنا كرمنا كالعقيده ما يبدلها بديل
في حاضر الازمان والا في الزمان الاولي
من طيبنا لو نمتلك كل الحلال بظرف ليل
ما عاد باقي في البسيطه لا قعود ولا طلي
واليا انتخن فينا طوال القد والرمش الظليل
نارد على حياض المنايا والله الوالي ولي
من فعلنا يبكي خليل ما تهنا في خليل
ومن غينا من يبتلينا بات نقص ومبتلي
حنا هل الطالات والفزعات مزبان الدخيل
تامن قبايل في ذرانا وان وعدنا نفعلي
يشهد لنا من وحد الديره على الدين الجليل
وقفاتنا يشهد لها تاريخ حكم الفيصلي
ما نحسب حساب الظما مدام وادينا يسيل
وشلون يجف ؟! وفزعة ( الغلبا ) سحاب منزلي
حنا هل العارض بحد السيف والفعل الثقيل
حنا بني عامر بوجه القوم نار تصطلي
حنا ارتبطنا بالشرف والعز جيل بعد جيل
مثل ارتباط الدم مابين السبيعي وسهلي
وانا احمدالله حطني من لابة تشف الغليل
و يطيب شعري وافتخاري في لا طاب عملي
وختامها صلوا على نسل الذبيح ابن الخليل
وتقبلوها من ضميري والله الوالي ولي

من منطلق ما ينمدح غير الكبير ابن الكبير
بسم الله الرحمن ياقافي وبسم الله علي
سلام ياتاج الفخر من خافق وراس وضمير
تحيه تليق بمقامك يارفيع المنزلي
ياسيدي حمدان يا ابن الشيخ وبناخي الأمير
الشعر يسمو في سموك والمعاني تعتلي
اخطر محطات الشعر مدحك وانا شاعر خطير
جيت اكتب اللي ما نكتب وأفكار شعري تصطلي
ياسيدي قناعتي من عادني طفل صغير
أن ( الله الوالي ولا غير الله الوالي ولي )
يعني على الفطره احاسيسي ولا أحب أستشير
عفويتي تشرح طبيعة اخري قبل أولي
حبك من الله والقصيده غير في فزاع غير
يهلها صدري مثل هل السحاب المنزلي
وتربع فياض الخفوق من الغلا الجم الكثير
ويسيل وادي حشمتك وسط العروق ويمتلي
وبيوتي اللي تنكتب كل من الثاني يغير
يتسابقون لمسمعك لان مسمعك ماله حلي
الأول يغيظ الثاني / الثاني يناظر بالأخير
ويعتبر لأأن الأخير بغيرته يغلي غلي
واللي يقول الأختزال أبداع ليته يستخير
جيت أختصر حمدان ابن مكتوم وأثره مايلي:
المرجله والطيب والناموس والسيف الشطير
وطريق مجد ما كساه الا البساط المخملي
وقصايده فيها عذوبه قيس من طنخة جرير
وان قالها زاير أسد ماهو صفير البلبلي
وأصبح أبوه لليتيم وأصبح عيون للضرير
وبشرى الفرج للمستجير المستضيق المبتلي
ياشيخ يانسل الشيوخ وصوفك البحر الغزير
وأنا أفتخر في مدحتك وأنا أشهد أن الفخر لي
أن جيت مالوم العرب لو ذبحت مية بعير
وغيرك خساره فيه لو يذبح على شانه طلي
قصيدتي ماكر حرار أهدها لك طير طير
في خايع ماقد رعاه من الجمال ألا جملي
وابنيها بنيان الحجر وأفلها فل الحرير
وأخطط لمضمونها تخطيطي لمستقبلي
وشلون ما سوي كذا وأداحم الجمع الغفير
وانت الشلي ابن الشلي ابن الشلي ابن الشلي
وقصيدة كتبتها لجل الكبير ابن الكبير
أصدق قصيد الشاعر محمد جار الله السهلي

يا (نجد) شوفك عيد وزيارتك عيد
من بد بلدان الخليج ودولها
وفيافي (العارض) تحليك وتزيد
غلاك .. عند محدثك لا وصلها
قولي لها عني يا دار الاجاويد
لاهب غربيها وداعب نفلها
لا تحسبني فدار اخو مريم بعيد
واهي هنا بين المحاني باهلها
انا سليل معتقيين المصافيد
اللي حووا فيك الإمام وشملها
توافدوا للبيعه ابلا مواعيد
وقبل يراسلها لفت له رسلها
من منطلق دين وقناعه وتوحيد
نفوسهم كانت على العود ولهى
ما بايعوا بحصار ولا بتهديد
الله على فطره سليمه جبلها
كنا ولا زلنا الدهاه الاواليد
قوم اصطفاها ذو الجلال وجعلها:
يمنى معزي لا صفق حيد بحيد
دون الألف واللام وللام والها
أفعالنا تشفي كبود المضاهيد
لو ما أنخلقنا ماوجد من فعلها
وفطاعة ال سعود صم الجلاميد
نساوي قممها بوادي سهلها
وفطاعة ال سعود جراهد البيد
تنبت فخر من دمنا لا غسلها
وفطاعة ال سعود روس المقاريد
نجتثها قدام تدرك اجلها
حكامنا والنا الفخر والتماجيد
ان فعلنا السم الذحاح لزعلها
وحنا لهم فعل وقصايد واناشيد
واهم لنا معنى الحياه وأملها
وفشاعر المليون نهاية الميد
لرضاهم حصان العوامر كفلها
الشاهق / المطنوخ / سقم الحواسيد
فكره يعريها ويكشف جهلها
فيا اللي تزود فالسواليف وتعيد
دعاية (الصنوبري) من قبلها؟
بدعه.. ولا يذكر ورى المبتدع فيد
واغبى من اللي قالها من نقلها
نقد بلا معنى !! حصيله مناقيد
ما يقنع إلا روس جوفا وبلهى
وان كان تبغى راي وافي وتأكيد
لا جيت عقال الرياجيل .. سلها:
والله ما تبحل ولا يمكن تحيد
بتقول مال الحمله إلا جملها
والحمله اللي بركت كل صنديد
فرعونا ( ناصر ) يقوم بدبلها
شاعر علم : حنكه وجرأه وتجديد
ينزل قفار ماحد قد نزلها
فكر وشعر ناهي وراهي مواريد
وان مالت الدنيا بفعله عدلها
فرقه عن اقرانه .. ومن غير تعقيد
قصه ابشرحها وابضرب مثلها:
مطامع الشعار في ندر الصيد
تحثهم على السعي في سبلها
تقنص لها بسهومها والبواريد
وهذا رمى هذي وهذا نبلها
متزاحمين!! وصيدهم دايم زهيد
والنادره تشرد ولا احد قتلها
ومن خلفهم (ناصر) على حصان ابو زيد
واليا شرد منهن عصيه ختلها
ولا هي غريبه يا حفيد الاماجيد
لا شقت من عيا عليها خجلها
الكايده بنت الفخر قبلة الغيد
طرقا زهى منظر جسدها حللها
وانا معك دعم ومواقف وتأييد
حتى يبين جدها من هزلها
وان شحت فياض الزمن بالعناقيد
عادي يكفينا جنينا نخلها!!
وخلاصة الموضوع والشي الاكيد
جمله و من قبلي (فلاح) ارتجلها
من غير قاصر فالرجال الصناديد
(حنا معازيب القصايد واهلها )