جفت حرورف القصايد وارتعش بيدي القلم
يوم مرت تبتسم لي (( بعضها يحسد بعضها))
كل عرضن للحلا في عيني ولى وانهدم
من بعد شوف اللي بيده الحلا قام وعرضها..
من يقول انها تشابه للقمر حظه ظلم
ومن يقول انه خيالي لة يحاول ما افترضها..
فتنتن كل من نظرها اشهد ان عقله جزم
من فرض سبع العجايب كيف معهم ما فرضها؟!
في هدبها مختلط صدق المشاعر والوهم
اجذبتني وابعدتني بنظرتن قلبي نبضها!!
وبحكيها كل حرفن يبتعد عنها ندم
ياهني ذي الحروف اللي ثغرها قد لفظها..
موعظه للي يشوف ودايم لربي حكم
حكمتن منهو يتهنى في هواها ويتعظها؟!
شتتني كيف مدري؟ حتى فكري ما سلم
والحقيقه ما قويت اني اقوام واعترضها..
اسالتني وطلبتني ولا مشتبي القدم
والمعاني اللي في بالي وقتها لساني بغضها
كني في لحظه نداها صايرن (( خير الامم))
وكنها(( القدس الجريحه )) وشعبها اللي ينتفضها
وقفت فيني تناظر في رجى مني نعم
او اشاره وابتسامه .. شي يوصلها غرضها
وارتعش حرف القصيد وللاسف جف القلم
لين راحت تبتسم لي بعضها يحسد بعضها!!

ياضيق صدري كل ما هبت علي من الجنوب
نسايم ماملت طعوني وقلبي ملها
وارقى على مرقاب حزني واتحرى للغروب
وامسك جدايل هالحياه المدبره وافلها
واشوف وشلون الليال ادور في الوقت اللعوب
واجمع مسائل هالبشر في دفتري واحلها
والعن ابو الحظ الردي !! واستغفر المولى واتوب
واقول يا ربي تعين اللي صبر ثم شلها
ويا سعود قرب لي مدام الوقت والعمر محسوب
واسمع يا خوك ابيات من جوفي نويت اتلها
لا صارت الدعوه مابين : ( ضلوع صدري ) و(الهبوب ) !
بقولها و : (( اللي عقد روووس الحبال يحلها ))
وش عاد نرجي من زمن صارت به كبار الذنوب
انك على الباطل سيوف الحق توني سلها !!
اسلامك اصبح (( متهم ! )) والنور غيب ومحجوب
دروووبهم يا كثرها ؟؟ وادروبنا يا قلها !!
خوينا تصلاه نار الكفر ونشوفه يذوب
وحنا نترجى من (( عجوز الغرب )) ترهي ظلها !!
لا عادبه فزعه ولا غيره ؟! وحيلتنا يا دوب
( نشجب ونستنكر ) عساها تنسمع او علها ..
صار التنافس بالطرب من اولويات الشعوب !
(( الغانيه صفقلها ؟؟ والراقصه طبلها !! ))
والموضه تحاصر تقاليد العرب من كل صوب
تفوح دلتنا زعل واعوانهم تزلها
والكل منا يشوف نفسه بالتخاذل مغصوب
احلوقنا ماتت عطش ! يالله طلبتك بلها
يالله سترك من علوم في خواطرنا تجوب
رحماك سهلها علينا دقها مع جلها
ويا سعود اخذها من نمط (حكي على لسان القلوب)
اربع نصايح لحياتك يا عسى توصلها
المرجله هي ( البلد ) وافعال يمناك ( الدروب )
والادمي يولد ( غريب ) ولاتسنع دلها
والكايده تبغى ولد ماهوب طماع وكذوب
والرابح اللي نفسه لربه قدر يذلها
وترى الكرم عند العرب يغطي الاف العيوب
وانك بخيل تساوي عيوب العرب ذي كلها
واحذر تحسب ان كل بير ابدنيتك به ( ما ) شروب
واذا تجاهلت العواذل ابتموت بغلها
وانا بودع راس مرقابي اذا حل الغروب
وبقول يا ربي تعين اللي صبر ثم شلها !!

وين اودي وجهي من نفسي ؟! واعديها واسامح
غيمتين ما حفظت قدرك وراحت تمطرك ؟!
وكيف ابدمح زلتي بك لا حشى ماني بدامح
دام عطر خيانتي من زود ضعفي عطرك !!
صدق ان مرايتي ما عاد تلقى بي ملامح ؟!
خانها وجهي تشتت في دروبك ينطرك !!
وصدق ان الحزن من لحظه صدفني كان لامح
في عيوني شي اعمق قال : لابد اخطرك
ما هو من طيبه ولكنه عرف هالقلب جامح
ما يأثربه حزن او خوف ما بين اسطرك
يعني بترضى بترضى دامني لرضاك طامح
وانت تدري لذة ( صيامي ) اذا جيت ( افطرك !! )
لو عتق ليلي عيوني شافت ان النوم سامح
يلزم انعاسي شطاره !! وانت يا خي مشطرك
لا تجاهلني طلبتك ولا انا ماني مسامح
غيمتين ما حفظت قدرك وراحت تمطرك ؟!

الدمع لا منه نزل من ناظرك كنه :
طفله تسولف للحزن عن ثوبها البالي!!
اهديت عطرك للغياب وقمت اباكنه
لجل اتنفس به ( غلا ) ثم ينشرح بالي
يا ما رجيتك لا تخلي غيبتك سنه
صعبه : اخليني معك ؟؟ واتركني لحالي!!
والحظ من يومي عرفته ما ضحك سنه
حالي زهق من زود ما اشكيني على حالي
لا تبخل بدمعك حبيبي ما بها منه
سيلت في غيابك ( بحر ) ولا نثنى ( جالي ) ؟!
هالرمش تقطفني معه .. او اقطفك منه !!
مليت من قولت : يجي لي مير ما جالي
جفن(ن) نفيته للسهر قلي متى تحنه ؟
لا صرت سلطان العيون وحضرة الوالي..
لا من ذكرت العقد.. والسلسال.. والحنه
يسوق لي ليلي طواري ( مالها والي!!)
المسأله : ماهي (عنا) قلبي معك عنه
اغلب حنين المغترب للشارع الخالي؟!
المسأله : انك موقف(ن) مالي مصد عنه
لا رضيتبه (عمي) زعل من موقفي (خالي) !!

عسفت القلب عالفرقى تناهيد وشقى واحزان
وجبرت الصمت ينطقني فراق وخابت ظنونك..
ابرحل عن مدى حسك وشوفك واعلن النسيان
مدام ان التعب علم عيوني كيف يرثونك!!
تعبت افسر الموقف سجين ونفسي السجان
تعبت اشكي قسى قلبك وارد اشتاق لطعونك!!
تعبت اتجاهل اجروحك واقول اقوى على الكتمان
وهي اول ما يطريلي لقيل محمد .. شلونك!!
لو اقدر اكتم اعتابي واساير كذبتك يافلان
ما اقدر اكتم الشرهه لجت من عيني لعيونك!!
ولو اشعل صمتي بجرحي واطفي ثورة البركان
مادفى ونار صمتي بك رماد(ن) ما رضى يخونك؟!
رويت من الظما!! يكفي تعبت اراقب الميزان
لا رجح كفتي ولا انصف ثقل جرحي من جنونك!!
بلاش من العنا والهم ولوحه مالها عنوان
رسمها كذبك الجارح بلون(ن) شابه ل..لونك!!
مدام ان الهوى جنه حكمها بوقتنا شيطان
تمكن فيها واستفحل وغنى للوفا دونك..
ومدام ان العمر يمضي وكل مابه غدى خوان
ابعزف اخر امالي على ترنيمه الحونك..
سوالفنا لمن صرتي حكايه من زمان(ن) كان
امانه لايموت الحق.. امانه لا ينسونك؟!
ترى ما هي ابد صعبه يخون بهالزمن انسان
ولكن كيف بحيا كيف ؟؟ اذا ذكراك وتخونك؟!

اضحك.. وخل البشر من فرحتك تدري
مبروك جرحي.. عساك لطعنتك سالم؟!
لعبتها صح وجبت العيد بي بدري
مولمن سيفك وطبع الزمن والم..
من قبل اعرفك وحظي عادته فقري!!
من خلقتي معذب ولا انته معي ظالم !!
دام الغدر غربه ودام الوطن صدري
كم خنجرن للوطن مشتاقن وحالم؟؟
لا الليل ليلي و لا ذاك الفجر فجري
الكل ضدي وانا المبلي وانا مسالم..
لا ابنتقم منك ولاني معتزي بصبري
من جدك اهتم؟! وانا في حالتي عالم؟!
لا والله اضحك وخل الناس بك تدري
مبروك جرحي عساك لطعنتك سالم!!

دام عذري اقبح من الذنب في عين الهوى
اسجدي يا اطهر خطايا الشوق قدم المغفره..
واسكبي دمعك مدام الضحك توه ما ارتوى
وامشي في درب التواضع كبرياء وبختره..
واعلني موت العداله بلحظة(ن) فيها استوى
ذنبي وعذري .. وعشق بظلم.. مامنه ثمره..
وانت يومنك تصد ولادري قلبك وش نوى!!
اذكر ان طبعي اجيبك ضعف ولا عنتره..
يا اول احبابي وانا لي قلب عنك ما قوى
لا جرحته ضم جرحك حشمة(ن) لك وشكره!!
يرتجي منك الوصل لوكان وصلك قد حوى
هم شيب عين قلبي وانحنى منه ظهره..
هام بك حد الهدايه لانساك ولا نغوى
صان حبك وانت ادرى ( ائمن الحب اخطره!!)
بنصحك شفت الحكي لافاق حد المستوى
مثل ما جايز يكون ابداع جايز ثرثره!!
لا يغرك حكي عذالي وانا اول من طوى
دون كبرك حلم ببقى طول عمري اذكره..
وكان ردت للعتاب ومنهو فينا اللي لوى
ذراع خله بالخطا حتى تمادى وكسره..
بكتب لفكرك عباره وافهم انت المحتوى
فيها بشرح موقفي واللي جرى بفسره..
الروايه وش خطاها دام راويها روى
نصها بوقت اعتلى جهلك اعالي منبره؟!

قصايد تنكتب في روعة وصوفك
في كل خايع فكر تلقى لها جره
والشعر كانه قدر يخطرك ويطوفك
ما هوب لله .. لا دري ولا دره
يا غايب رجعك عقب البطا خوفك
في كل مره تجي وتعاود الكره
اتكبر العذر قبل اتكثر حلوفك
ولا ضر قلبي كبر عذرك ولا سره
قلبي نسيته سنه في راحت كفوفك
طالبك رده علي ولا اكفني شره
الله لا يسامح الاشواق وطيوفك
ويا ويل قلبي من الحرمان والحره
يا ليتها في يدي واغير ظروفك
او ليتني ما عرفت الحب بالمره
العام في كل لحظه اقدر اشوفك
واليوم ما اقدر اشوفك بالعمر مره !

ياعين كن الدمع ما عنه مجناب
ولا كل رجال فقدناه نبكيه
تغورقي بالملح والملح لا ذاب
المحجر اللي جف بيسيل واديه
وأن كان حر الدمع ما جرح أهداب
ليه البكا والحزن يا مدمعي ليه
ذيب الشقا يقنب على راس مرقاب
يامصبرين القلب في موت غاليه
الموت نرضابه بلا شرح وأسباب
نرضى بحكم الله ونصبر وندعيه
يغفر ذنوب الفيصلي ستر وحجاب
أمة محمد دون شي تحاتيه
يا نجد عم الحزن وديان وهضاب
ويا حجاز كل جبالك اليوم تنعيه
وحايل كست سلمى من الهم جلباب
وعرر حكت حزن الشمال ومعانيه
ونجران من زود العنا تفتح كتاب
حزن الجنوب وتنقل أصدق تعازيه
وهل الخليج الدمع في راس مشعاب
والبحر الأحمر كن جده تواسيه
وياكويت حزنك غير ومصابك مصاب
في موت من حرر قيودك بأياديه
اللي فتح للفزعه بيوت وأبواب
ولعيون أرض الخير غامر بأراضيه
وأنا مابين الحيره وفقد الأعصاب
عجزت لا أكتب بيت واحد وأغنيه
كني من البارح من الشعر مرتاب
شاعر وفاقدله وطن كيف يرثيه
ماهي بلحية تعزية شعب أقراب
لا والله الا كل مسلم نعزيه
هذا مليك المجد فكاك الأنشاب
ياقرب فزعاته ومبعد هقاويه
عل السحاب يهل من اب لا اب
على قبر فهد الجزيره ويسقيه
اللي مرض وقلوبنا حوله أسراب
ومات ودعاوينا لربه تخاويه
وسع حرم / طبع كتاب / حارب أرهاب
ومكه وطيبه تفتخر في مساعيه
مثله يغيبه القدر مير ما غاب
ومثله يموت ولا يموت الفخر فيه
يا كثر ما راحوا مع الوقت غياب
وياقل من باقي على الأرض طاريه
سجل يا تاريخ الشرف صفحة أعجاب
للي يعيش الحاضر بخير ماضيه
وللمرجله موقف وللنار شباب
وللحكم أبو متعب وأبايع ويكفيه
من قبل تعلن بيعته بين الأقطاب
قامت تبايعه القلوب وتزكيه
والجمله اللي ماهي بحاجة أعراب
ما كل رجال فقدناه نبكيه

الموت موت القلب ودموع الاعيان
توصل الإحساس بأصدق وسيله
والشعر بوح الصدر والشاعر أحيان
مايدري بحزنه سوى طول ليله
ومن طول ليل البارح وثقل الاحزان
عرفت وش معنى الليال الثقيله
ما والله اصعب من شعورك بفقدان
اللي معلمك الحياه الجميله
الا انك تحاول تترجم على (لسان
شعرك) مشاعرك الجسام العليله
وشلون اغني لا نشف ريق الالحان
وشلون ابكتب والمعاني بخيله
في موت امير قلوب ومعلم اذهان
وريث مجد ال الصباح وسليله
مفني حياته بالمكارم والإيمان
العادل اللي راح ما بان ميله
حتى خبر موته قبل صوت الاذان
كنه يصحينا لكسب الفضيله
يا جابر العثرات والدمع هتان
ليت الدموع ترد خل لخليله
يا سيدي مت ومعك مات نسيان
طيبك وقدرك والفعول الجليله
غبت وبقيت لطيبة القلب عنوان
وغبت وتركت الخير يفقد عميله
وغبت وحكت (الابراج) عن حزن (دسمان)
وسيل دموع (السيف) حزن (المسيله)
ورغم اختلاف الشعب بعروق واديان
في حب جابر كلبونا قبيله
ابو اليتامى والأرامل والإحسان
راع الجمايل واليمين الطويله
من طيبه بشعبه تمنته الاوطان
يا كثر من وده بحاكم مثيله
وان قارنوا ما بين ذربين الايمان
تفرق يمينه بالعطايا الجزيله
ويوم انطعن من كف غادر وخوان
سوى السواه الصعبه المستحيله
قام الشجاع وعدها كبوة حصان
واحيا بلد كانت خراب وقتيله
يا عل قبره روض جنه وبستان
وعسى كتابه في يمينه يشيله
وعسى العوض في أميرنا عالي الشان
ويجبر مصاب قلوبنا في بديله
ونبايعه بالحب قايد وربان
دام الاصيله للشيوخ الاصيله
وتبقين يا كويت الرخا عبر الازمان
درة خليج ودار خير وفضيله