ما تباطيت القصيد !! الا تباطيتك
والشعر في جيتك شكل وطعم ثاني ..

عانك اقبلت ولمحتك في شطر بيتك
(( فكره مجنونه تسلى بضيقة اوزاني !! ))

يا اعذب احساس ملكني علك وليتك
تفهم الشعر ان شربك بصحة لساني

يعلم الله في غيابك ما تناسيتك
بس في مره نويت انساك ممداني ؟!

قلت ابنسى وارتفع صوتك ولبيتك
واثر خفاقي بصوتك عنك ناداني

ويش اسوي دامني بالجوف ربيتك ؟
طفل تسوى هالحياه بعين : شرياني .!

تلعب .. وتكبر .. وتكبر .. لين عديتك :
بالغلا ( اخر نماي ) وكل ( شيباني ) ..

والله ان عمري بدا من يوم حبيتك
واعرف انه ينتهي لو قلت : تنساني !!

حط في بالك انا من عام خبيتك
ان صحيت بخافقي وان نمت باجفاني ..

ما بي غيري يلمحك حتى لغنيتك
غرت من صوت الصدى لا ردد الحاني !!

من كثر ما اشتقت لطيوفك تمنيتك
رمش عيني او تصير الشوف لا اعياني ..

وان تمادى هالحنين بجفني ضميتك
وقتها : القاك ! لكن ليه ما القاني ؟؟

والله انك من لفيت بنبضي حييتك
وكني بقولة ( هلا) بينت حرماني !!

هذا حالي يا الغلا من يوم خليتك
وانت طمني علي فالبعد وش جاني .؟

اذكر اني بالوفا صغتك وسمييتك
واذكر انك بالوفا كنت تحداني ..

وصرت اشكك في كلامك لين بكيتك
وقلت موعدنا يجي كان الله احياني ..

ويوم جيت بخافقي وبخافقك جيتك
كنت انا رابح مع اني ( خاسر رهاني !! )

والاكيد اني لقلبي بيدي وديتك
وعاد شوف اليوم وين الحب وداني ؟؟

يا عساني صدق ولعتك وهميتك
يا عساك بجد تعشقني وتهواني ..

ولو تقول اني بغيابي عنك عنيتك
انت همك صرت اعده (( حسبة اخواني !! ))

لا رقص جن القصايد وابتدى نظم القصيد
وارتفع جو المعاني وانحبك در الكلام

بعدوا اقرب خيال وقربوا ابعد بعيد
واسمعوا شعر سطابي عيفني المنام

شاعر بأول شبابه طوع القاف العنيد
اشهدوا له خيرة الشعار واهدوا له وسام

جابها بيمناه يوم انه تولع بالنشيد
وجنب الزلات والهفوات ودروب الحرام

عارف ربه وابوه معلمه راي سديد
جود وصاته لجل يبقى كريم ابن الكرام

مطابق اسمه اسم جده ولا يمكن يحيد
عن طريق اللي تسمى به ويبقى له امام

دامني (لمحمد ابن نهير) اتسمى حفيد
والله ان ابقى على شموخه وطيبه بالتمام

يا قصيدي اشهد ان هالموقف لشرواك عيد
شاقني مدح الرجال اللي بهم محد يلام

عزوتي ثم تاج راسي محزم الوقت الشديد
لابتي يا لابتي ياللي تظيم ولا تظام

سهول مجد العز ولا قالوا العز المجيد
يكفي لاقت سهلي يوقف لك الكون احترام

لابة من طيبها ربي خلقها للمفيد
في اثرها تلقى كل الناس تمشي بانتظام

طيبهم مخلوق معهم يسري في وسط الوريد
ينطح الماجوب واصغرهم ولو عاده غلام

جارهم داله وسالي مزبن الجالي الشريد
المشاكيل الحلاحيل الرجاجيل العظام

كانها بالطيش كم شيخ غدى منهم فقيد
وكانها بالسلم واخذ العلم هم رمز السلام

(قاتلين الروم) دون الحق وهم سد عتيد
عابدين الرب حلوين النبا روس الانام

لابة من فضل ربي كل مافيها حميد
اسمها لو تذكره في موقف زال الغمام

لابة تذكر وتتشرف بها ثم تشيد
صفحة التاريخ والعربان تخصيص وعام

بعدها يا افكار شعري ارسلي عبر البريد
السلام اللي يليق بربعي عالين المقام

صافحيهم بالمعزه خد خد وايد ايد
ياسلام الله عليهم ياسلام الله سلام

وارسلي اول تحياتي على ربعي وازيد
التحيه (للزقاعين) بتمعن واهتمام

منبع الجود بزمنا والكرم فيهم مديد
طيبهم طيباه درع العز للفزعه حسام

تجفل جبال وتهيج بحور ثم تجتاح بيد
لا تعزوي في (علي) حر تضايق ثم حام

وارسلي من بعدها من خاطر رايق سعيد
التحيات لبني عمي هل الصيت اللي دام

(للبرازات) ارفعيها(للمحيميد) بجديد
خطي زفيها و(للظهران) توقف باحتشام

و(للصعوب) و (ال محلف) تحية(ن) كنها(عقيد
قوم بحرب حمى فيها حلاله باحتدام

واعتلي لا(لاد سلطان) وسلام ما يهيد
وارقي يم (الاد قبان) بتحيات كرام

والسلام اللي في صدري ينجرف مثل الجليد
(للعبيد)و(ال منجل) سقته بكل انسجام

ياكبر حظي وانا اسمي اخره اسم فريد
لاد سهل شهمني لاصرتوا للشده حزام

ولا على كل القبايل زود للدنيا رصيد
تستحق المدح من صنعا الى اطراف شام

وختامها صلوا على الهادي شفيع للعبيد
كثر ماصلوا وسط مكه تراويح وقيام

من محمد بن جار الله بن محمد ال زيد
يا سلام الله على ربعي سلام الله سلام

مرات احس القصيد بدم شرياني
يضخه القلب لين يقوله لساني . !

واني كتبت الغريب الراقي النادر
وانه خلاصة علوم الفكر الانساني . !

ومرات احسه شي لا يمكن اصله
وان الصحافه .. مجرد مدح مجاني . !

واني ليا من قريت ( لعافت ) و ( مدغم )
هدت فيما كتبت وشابت الحاني . !

لكن واللي خلقني غير عن غيري
إني أحبه واعده ثالث اخواني . !

لذا يا شعار جيل ( الكل متمكن )
والكل مبدع .. و متميز .. و فناني . !

أخذو حقيقة مشاعر شاعر منكم
* وجهة نظر * والصراحه .. نبض قيفاني . !

المسأله كلها .. فكره وقافيه
وأبيات مسموعه من فلان و فلاني . !

نفس العتب .. و الغزل .. واللي قبل افضل
ونفس الفخر .. و اطيب العربان .. عرباني . !

نقول شي يقوله غيرنا لكن
الفرق بالحبكه .. و توقيت الازماني . !

يعني بلاش انتظاهر ( بالأنا ) واجد
ما فيه ( ابو الطيب ) ولابه ( لويحاني ) . !

ماني بعمم !! ولكن اغلب الاغلب
مستشعر .. مهايطي خلقه .. وقوماني . !

لو انه يعاتب الرعبوبه الحلوه
يقول ياطيب ابوي وطيب جداني . !

ومدام هذي حقيقة وضعنا الراهن
يمكن مع الوقت رب البيت يبلاني . !

فإن كان شفتوا اهياطي يا جماهيري
تجاهلوا كل اشرطتي .. و ديواني . !

خلوني احس في قيمة تواجدكم
واتعب على ذوقكم كان الله احياني . !

لكم علي اقلب الدنيا على شانه
والي عليكم تحبونه على شاني . !

وعلى العموم الغريب احساسي الليله
ماهوب باحساسي ان فارقت شيباني . !

عوايدي لا تركت ديار ( اخو مريم )
أشعر بضيقه واحس الشوق أضناني . !

لكني اليوم كني جالس فبيتي
مابين ربعي .. و خلاني .. و صدقاني . !

فيا أما * الكويت * موجوده هنا معنا
يا أما دار الخفوق ديار * ابن ثاني * . !

أحبها من قبل لاجيها واموت بها
واحسها غييير في فكري وجداني . !

واللي مزود غلاها شعبها كنه
يعطر الارض كمبودي وريحاني . !

من كثر ماهو ودود .. و سمح .. و يقدر
ماكني بضيف كن الشعب ضيفاني . !

والدار تبارك الرحمن ما شالله
دره وفيها الجمال اشكال والواني . !

هنا التطور صحيح بكلبوا حاجه
رياضي .. و فكري .. و فني .. و عمراني . !

الله يبيض وجيه شيوخ ديرتكم
يشهد لهم قاصي العربان والداني . !

في ضل قايد مسيرتكم * ابو مشعل *
و عياله .. و عزوته ذربين الايماني . !

امجادكم ما هي بسهله و حي الله
لا والله الا بحد السيف شاماني . !

ويكفيكم من الماثر .. موقف الخفجي
يوم الجموع اتداحم فعلكم باني . !

وعمار يا ديرة التاريخ والطيبه
في ضل شيخك ( حمد ) وامجاد ابن ثاني . !

يا طير دام الله خلق فيك جنحان
طالبك اكفخ بالسما فوق .. يا طير ..

وانصى سميي قبل لا يثور ( بركان
حزني ) ولادري عقبها ويش بيصير ؟

محمد انت ( ثاني محمد ) علي كان
عقب النبي يطري وسط ضيقتي مير !!

وشلون بحكي لك اذا الصوت بي خان
يا صاح .. شف اقسى ظما هو ظما بير !!

واليوم صوتي طرس واقلامي لسان !
بروي لك احساسي ومن غير تفكير ..

ماهي حكاية عشق وبيوت واوزان
ولاهي قصيده بالشقا ( نبضها غير ! )

الا كلام ما نطقته على شان
يبقى الكبير بناظري دايم كبير ..

احس كني منه ضايق وطفشان
واخاف يلقى فمد يمناي تقصير ؟!

ما هو عشاني ! بس .. مابيه ينهان
لان حالي ان هانوه بادق تصوير :

( حبكة حزن ) في اروع ابيات مشعان !!
او ضيق عارف لا بلوا ( ديرة الخير )) ..

ياطير ما عاد الصدر يورق اغصان !!!
اشلع وجيب لخافقي منه تفسير ..؟

أصعد ( المشراف ) يا شعري وذبه
أنت اكبر من محيطه وارتفاعه

مركبك هبايب افكاري تهبه
و( البحر ) ميت على فلة شراعه

و( السما ) تشتاق لك شوق الاحبه
لانك تحجم فضاها واتساعه

خش تقصيري !! عن عيوني وخبه
خلني كامل مع التفكير .. ساعه

لين اسوي منك : دافع للمسبه !!
لكل فارغ وده : يمارس ضياعه

اشهد ان بعض الشتايم .. مستحبه !!
الدليل القاطع لطيب البضاعه

يا تعب حالي ويا حالي وطبه
والله ان كنك اخوي من الرضاعه

اتنومس فيك وانوه وانبه :
انحدار الطرح في جيلي إشاعه

أعشقك .. ومخالفك ربي وربه
بيني وبينه مجافاه وقطاعه

الكراهيه ضريبه للمحبه !!
فلسفة شاعر وتوظيف لقناعه

كل شي نكرهه عكسه نحبه
مثل كره الخوف حبا بالشجاعه

جايز ارباك العقول المستتبه
بالدها و العنجهيه واللكاعه !!

مير قلب الشعر : ( غصن ) ما لعبه
غير ( نسناس ) الرقي والاستطاعه

يا أولي الألباب والإبداع لبه
في اكتشاف ( الدارج ) و ( حسن ) اختراعه

والأكيد : ان الدرر في كل غبه
وكل ونسبة ذكائه واطلاعه !!

والمهم : موت النهر فاخر مصبه
النهايه المنطقيه لاندفاعه !!

حمدان حب لي راس ابوي ان جيته
وقله : لا يحمل هم .. من زلوبي

الطيب يكفي ... مده ومديته
واني على دربه .. مشيت دروبي

ولا يهمه صاحب عديته
في ما مضى اقرب علي من ثوبي

ف المرجله والطيب ذايع صيته
ما اقدر اذمه واكسبه ف ذنوبي

لو حلفوني حلف .. ما ذميته
لاقول والله ضامنه ف جيوبي !!

والمشكله على البشر بديته
وف اللازمه صد وترك ماجوبي ؟؟

على اخر ايامه تردى .. ليته :
حشم بقايا عمره المحسوبي

يا كبرها بحقه اذا مريته
بيشوف تقصيره معي عذروبي ؟!

على العموم الاخ ( ذا ) شليته
من بالي ويانفس عنه توبي !

حمدان راس ابوي لا حبيته
خلك اوزانه .. سمعه مكتوبي

قله : محمد قال : فاخر بيته :
(( لا يستضيق وربعنا هلوبي ))

يا كم وفي بالوفا جازيته
بنفس الوفا جازاك .. في مطلوبي

وقله محمد مثل ما وصيته
على يدك .. واسلوبي هو اسلوبي

وان الشعر يبطي وانا ما اخطيته
هزله عدوي و اجزله محبوبي !!

وانه طرالي ذا المسا واهديته
بيتين صاروا .. ( مشرقي وغروبي )

لو كل شخص اصادفه خاويته
ما كان لا جيت العرب فزوبي !!

ولوكل مايطري علي سويته
غطا على طيبي كثير عيوبي !!

واسلم وسلم لي عليه ان جيته
والله يجازي كل .. من زلوبي ..

ول يا كبر القهر لا صار ما باليد حيله
والجروح من القرايب والخطا مني وفيني!!

ان نويت اشفي غليلي ما لقيت اية وسيله
كيف ابلقى دام جرحي سبته طعنه يميني؟!

وان نوت تبكي عيوني صارت الدمعه بخيله!!
كبرها لامن تجمع هم قلبي وهم عيني..

ياهموم(ن) بي تعدت حدهاصارت ثقيله
اخذي مني كم سؤال ولو سمحتي جاوبيني..

ليه من بعد الوفا والطيب وفعول(ن) جليله
من يدين اللي حشمته اول عوني تجيني؟؟

وليه لاضاق الفضا في عين من خانه دخيله
مالقيت الا الملامه انتهيها وتبديني؟!

ياهموي ياجروحي يا صدى الروح العليله
والله ان الظلم قهره قيد لساني ويديني!!

يوم قيل اظر حسودك زاد في قوله وقيله
ما طرالي غير قولت اخ يا دنيا ارحميني..

ان تكلمت وحكيت وجبت برهاني ودليله
ما تضرر كود منهو قد لفاني منتخيني!!

وان سكت وقلت هانت هم وسنيني تزيله
اكتشفت ان السنين تزول والهم محتويني!!

بس لجل اللي انتخى في جد جدي والقبيله
والله اني لاشرب المر واتحمل ما يجيني..

ودام ما بالكون صدر(ن) ارتمي به واشتكيله
ودام مابه عين تقرى حزني اللي مبتليني!!

ما لي الا بيت شعر(ن) اذكره في كل ليله
لا انتهى جدال المعاتب بين قلبي وبين عيني..

((ول.. يا كبر القهر لاصار ما باليد حيله..
والجروح من القرايب والخطا مني وفيني!!))

أمسيه واعلام واضواء وصحافه
وانا لاوقفت مابيني وبيني !

اتساقط ضيق واحباط وحسافه
كني اخنق حلم عمري في يديني !

واتسامى فكر واحساس وثقافه
واكسب التقدير والاعجاب فيني

يا طويل الحزن والواقع خرافه
كذبة ماهيب تسلتطف يقيني !

ليه ماغنيك تحنان ولطافه ؟
وانت نبض الروح وانفاس تحكيني

ماتهز الريح غصن لارتجافه
ينكسر صوتي ! وتستاحش يميني !

كل مامر المسا صدري وحافه
قلت له والشمس مشرقها جبيني :

من مشت رجله على درب السخافه
طاح من عقلي قبل قلبي وعيني

الرجل لاصار مابه دين : تافه
والعدو لاصار يعجبني : خديني

والفشل لاصرت ترضى بالوصافه
وانت قادر تستبد وتحتويني

وكان انا من لاربط فعله بقافه
جعل تبكيني عيون اللي يبيني

وجه صبح من حياه وعفافه
استحي من طيف زوله لو يجيني

نهر سكر من ضفافه لاضفافه
اغنيات الملح وانشودة حنيني

ناسي النسيان !! طبعه واختلافه
واصبح اللي راح واللي يحتريني

عاشقه .. وقف هنا والعمر طافه
هو متى يرجع وترجع لي سنيني ؟!

الفراق .. شعور من شدة جفافه
يبذر عيوني !! ويقطف دمعتيني !!

القلوب تعاف طاريه وتخافه
يعتريها شئ .. عانه يعتريني :

كل ابوي طعون واحزان وكلافه
لانتهاني جرح الاخر يبتديني

ليت حظي مارمى عمري خلافه
ولا ترك لي تمتمة وينه ويني ؟!

وليت مابيني وبينه من مسافه
مثل مابين السهر وجفون عيني !!

تناظرني واناظرها وكلن يرفع احجاجه
والوم الوقت والصدفه واعاتب بابها المردود

تفز من الحيا تبعد واشوف اليم وامواجه
على ذاك الجديل اللي تهادى ع المتن بركود

احبس الصوت في صدري واهون واعلن افراجه
عساها لا سمعت صوتي من اللهفه تجي وتعود

تذكرني واذكرها بزمانن حيل محتاجه
زمانن وقف بوجه الشجاع وحظه المقرود

تخيب امال عاشقها ويعود الصوت ادراجه
والا يا شينها لحظه لا عود صوتي المجحود

احس الحظ طوقني بسور الهم واسياجه
ومن طبعه يموت الحر ولا يحيا باسر وقيود

فمان الليل وهمومه يا روح الصب واسراجه
فمان الجرح لامنه تعلق في امل مفقود

صدح فيها خفوق اللي تعنى في رجى مواجه
تعنى شايلن وسطه غرامن ماله اي حدود

ولا حصل بعد شوفك يا كود جروح وهاجه
وذكرى خطوتن عجله ونظره من عيونن سود

انا تكفيني النظره وسلام احجاجي لحجاجه
بها بروي ضما روحي واصبر خافقي الموعود

ياللي تحد قلبي على اقصاه
ما عادبي حيله على الضيق ..
وقت الردى كل شي سواه
ارخوووومه تذم المطاليق ..
ما عاد اطيق الهم واقواه
شلت بشبابي فوق ما طيق..
ذي اخر احوالي وطراه
يومك تقول ان كني طويق ..
أي والله ان فيني مزاياه
وان بيني وبينه مواثيق ..
بس صاحبك ما جاه كفاه
مليت من قولت توافيق ..
حتى الشعر شكلي أبضماه
ماعاد تغري بلة الريق ..
كانت معاليقي تمناه
واليوم هو جرح المعاليق ..
يطري علي واقول عزاه
يانشوة الفرحه بتصفيق ..
واطري عليه ان تاهت خطاه
يلمحني بروس الشواهيق ..
حتيش لو انا حشمناه
ما تردع الحشمه مطافيق ..
في ذا الزمن ماتت بقاياه
روح امسح دموع الطواريق ..
غنالك اللي متعب غناه
لاجر صوته همه يفيق ..
ما يكتب الضحك ولايقراه
كنه لحزن القاف عشيق ..
بتصدق شعوري او انساه
بصرك !! ترى ما احتاج تصديق ..
قد قلتلك واوصيتك وصاه
لا تنبش جروح المخاليق ..
هالقلب لا تحده على اقصاه
مالك ومال الهم والضيق ؟؟