تويت
طعون الظهر
بسم الله الرحمن الر حيم
السلام عليكم ورحمه الله وبركاته
انا صديقتكم مزاجيه السلام عليكم ورحمه الله وبركاته
جايبه لكم اليوم قصه حلوه وانشالله تعجبكم
هي مو حقيقيه لكن فيها حكمه وموعظه للجميع
بدايه القصه:
كان في حطاب يجلب الحطب من الغابات ويترزق به ...
في يوم من الايام قرر بأن يغير الغابه ويروح الى غابه ثانيه...
لعل الحطب يكون هناك افضل فيكسب مبلغ افضل من اللي كان يكسبه في الغابه التي اعتاد عليها
فلمن راح الى الغابه شاف ابو سرحان (الذئب) كان يسمى الذئب ابو سرحان لانه اذا نام كانه الانسان اذا سرح فيغمض عين ويفتح عين حتى يشوف اذا كان هناك عدو فيتنبه له... فتعرف الحطاب عليه وصار صديق حميم له ( كان من الخرافات ان الذئب يفهم الانسان ويتحدث له)
فصار الحطاب يتردد على الغابه وياخذ الحطب ويترزق به
في يوم من الايام الحطاب عزم الذيب في بيته على الغدا بس ماقال حق اهله ان الضيف ذيب علشان مايخافوا
وقال للذيب اذا وصلت قريتنا عطني اشاره علشان اعرف انك وصلت
فوصل الذيب واعطاه اشاره والحطاب امر زوجته وعياله انهم يدخلوا غرفهم ومايطلعون حتى يطلع الضيف اللي هو بو سرحان(الذيب)
فنصب الحطاب الوليمه وبدا الذيب بالاكل بس الحطاب ماقدر ياكل بس اكل كم لقمه مجامله للذيب لان مثل ماتعرفون الذيب ياكل جيف فريحه فمه كثييير خايسه فخلص الذيب الغدا وشكر الحطاب وقرر الرحيل الى غابته لكنه احس بانه منهك ومتعب فقرر انه يستريح شوي تحت الشجره اللي قريبه من منزل الحطاب ...
في هالوقت طلعت زوجه الحطاب واولاده وبداوا ياكلون وكان الحطاب ياكل معاهم بشراهه
فزوجته استغربت شلون قاعد تاكل بشراهه وتوك ماكل مع الضيف قال والله ماقدرت اكل معاه ريحه فمه ماكانت طيبه فسمعه الذيب وتضايق كثييير ان شلون صديقه يتكلم عليه من وراه...فقرر انه يروح غابته في هالحين...
في يوم من الايام كالعاده راح الحطاب بياخذ حطب من الغابه اللي فيها ابو سرحان فلمن التقى به سلم عليه...
بو سرحان راح وجاب خنجر وقال حق الحطاب تجرحني ولا اجرحك قاله الحطاب ليش اجرحك والله ماقدر اجرحك انت صديقي واخوي شلون اجرحك...
ومره ثانيه قاله الذيب تجرحني ولاجرحك...
قاله الحطاب والله ماقدر اجرحك انت صديقي لكن بعد اصرار الذيب وافق الحطاب يجرحه لكن مو من قلبه طبعا...
قام الذيب ولف الجرح برباط .. واستاذن الحطاب بو سرحان وراح قريته...
بعد فتره رجع الحطاب غابه بو سرحان علشان ياخذ رزقه كالعاده فلمن شاف بوسرحان قاله ها يبو سرحان شلون الجرح
قاله فكه وشوف فلمن فكه شافه برى وتحمد للذيب بالسلامه بعدها قال الذيب (جرح السيف تبراله الايادي....لكن كلام السوء يبرح في القلب دامي)...
قال الحطاب ليش تقول كذا يبو سرحان قاله بو سرحان السبب وانه سمعه وهو يتكلم من وراه ...
تفاجئ الحطاب وتضايق كثيييير وقبل مايرجع قريته قاله بو سرحان انا احذرك انك ترجع مره ثانيه لانك ماراح تسلم مني...
رجع الحطاب وقال السالفه حق زوجته تفاجئت زوجته وقالت الحين شلون نعيش ونعيش عيالنا...
مرت سنييييين طوييييله وتدهورت حاله الحطاب ففكر وقال حق زوجته ليش مارجع حق غابه بو سرحان اكيييد الحين نسى واروح اترزق الله بدال هالعيشه هذي لكن زوجته حذرته انه يروح لان بوسرحان حذره انه مايرجع.....
لكنه اصر وراح الغابه وشاف بوسرحان وقاله هايبو سرحان لالحين انت شايل علي ...
قاله ليش جيت انا ماحذرتك انك ماترجع لانك ماراح تسلم...
قاله الحطاب: يبو سرحان السالفه صارت لها سنيييين وانت مانسيت...
لكن الذيب ظل مصر على موقفه... وفعلا راح ورفع ظفره وانتوا تعرفون اظافر الذيب وشق الحطاب نصين
وركبه على حماره ... ورجع الحمار بالحطاب الى منزله في القريه وشافت زوجته المنظر وعرفت السالفه ان بو سرحان
اخذ ثاره ...
انتهت القصه ياحلوين...
والحين ياعضاء هذا المنتدى في قسم القصص والروايات انا ماراح اكتب لكم وش الحكمه من القصه...
بس ابقى منكم شغلتين ياكتاب ياحلويييين:
1- وش رايكم في القصه:
2- وش الحكمه من القصه:
تحياتي لكتاب منتدى عبير...
اختكم"مزاجيه"
تعليق