الجوع كافر و البشر ما تراعي=دمعة يتيمٍ حدّه الحزن و الجوع

يا سائِلٍ عنّي .. تجنّب سماعي=شعر السياسه أصبح اليوم ممنوع!!

أنا أعرف إني شاعرٍ إندفاعي=ومرّات أحس إني .. مهستر .. و .. مقلوع

شاعر غزل .. ما أكتب الاجتماعي=وإذا كتبته .. أبدع فْكل موضوع

ومن منطلق فن الهجوم الدفاعي=أستوحي أشعار من سيوف و دروع

أفكاري السودا .. تسبب صداعي=لكنّها في جدب صحراي ينبوع

تِتْرنّم بروحي وتحكم إِقاعي=يبقى وسط فكري لها حرف مطبوع

أكتب وأبقى طيْ ظلمات قاعي=لكنّني في القاع .. والراس مرفوع

يا من تِجي دايم .. بعد ألف ساعي=إن كنت شاري .. جيتك اليوم مبيوع

إسبوعك الاول سعى في ضياعي=أسعى لوصلك جاهدٍ طول الاسبوع

الصد منك .. و الهيام إختراعي=والشوق مني .. و الوصل حبل مقطوع

دايم تِأجل موعدي و إجتماعي=وإن قلت لك زعلان .. تعطيني بْكوع

ودايم تنمّي فكرتي وإبتداعي=لاحلى القصايد لو غدى الصوت مسموع

في كل رمشٍ في عيونك صراعي=وفي كل لفته للهدب موجة دموع

وفي كل نظرة شوق تغسل شراعي=إغسل .. وكسّر لي مجاديفي جموع

أصلا أنا لولاك .. ما ليّ داعي=يا لعنبو دربٍ بلياك متبوع

راع المشاعر دامني لك مراعي=والقلب حقّه في الغلا .. حق مشروع

ولا ترى باحط .. قلبي إصطناعي=يمشي على ما قول بالسمع والطوع

إن قلت له إنسى .. نسى ما يراعي=وإن قلت له إعشق .. غدى ليله شموع

لكننّي خايف يْضيع متاعي=والشعر سلوة خاطر لكل موجوع

لاجل الشعر بتمسك بْانطباعي=وببقى على قلبٍ طبيعي و مفزوع

وإن كانك مصمم تبدّي وداعي=بدّ الوداع و خل لي قلب مفجوع

ما دامني شاعر غزل و إجتماعي=أحلى القصيد ألقاه في الطرس مزروع

ودام الوطى .. كله .. يهاب إرتفاعي=ببقى وسط قاعي .. ولي راس مرفوع



طبعا منقول عجبتني مرررره