تويت
.
.
.
.
.
.
.
.
.
.
.
.
بعد 11 يوم :
يوم الأربعاء 9 / 11 / 1427ه :
في جدة بعد العصر في بيت أحمد :
: والله أقولك أكبر منه بست سنين ..
قالت العنود تصحح لأختها : خمس سنين وشهرين ..
ضحكت سفانة وقالت : اش الفرق ؟؟
قالت أسماء بهدوء : يوم يفرق خلي عاد 10 شهور يعني 300 يوم ..
وقفوا عن أشغالهم للحظة قبل ما تهمس العنود بتعجب : ماششششششششاء الله , كيف حسبتيها بهالسرعة ؟؟
طالعت فيهم أسماء بحيرة وقالت : السنة 12 و ...
صرخوا كلهم يوقفونها عن الشرح ورجعوا يتكلمون في أمور وسام و سامر , قالت ريم وهي تطالع في ساعتها اللي أشارت للخامسة : أكيد ملكتهم حتبدأ بعد شوي ..
حطت العنود يدها موضع قلبها وقالت : لا تقولين ملكة لأني يوم أتذكر ملكتي ...
ضحكوا لمن تذكروا هبالتها ذاك اليوم وكيف كان الأمر صاعق لها , لفت ريم على سفانة وقالت برجاء : سفسف الله يخليك أصري على الملكة عشان يضطر عبد الإله ويسويها ..
ابتسمت سفانة بخجل وقالت وهي تلعب بطرف كيس البطاطس اللي فردته العنود بينهم : لا , ماكو ملكة انتهينا , بعدين الجواز تحدد خلاص ...
زفرت ريم وقالت : خسارة ..
قالت العنود بحزم وهي تبعد العصير عن فمها : والله أحلى , من زين الملكة ..
قالت سمية بتريقة وهي توزع أوراق الكوتشينة : ذاقت العسل ودحين تقول من زينه ..
قطبت العنود حواجبها وقالت وهي تسحب أوراقها وتبدأ ترتبها : والله والله والله وجع راس وصدعة , مكالمات ورسايل و كلمات تحاسبين عليها وتعالي شوفي سوء الفهم اللي ماله حدود و .... يعععععععععععععععععع , والله مشاكلها أكثر من محاسنها ...
قالت الخنساء وهي تتأمل أوراقها : هذا وإنتي شوية مكالمات ورسايل أجل لو بهذلك بالزيارات اش بتسوين ..
مطت العنود شفتها ورمت ورقة في الميدان وهي تقول : وععععع , أتخيل نفسي لبس ومكياج وتصنع ماله حدود , الحمد لله اللي أنا في غرب وهو في شرق ..
قالت سمية بتريقة : أحباب على أطراف الدولة ..
هزت الخنساء راسها وقالت وهي تسحب ورقة : عشاق على أطراف البحرين ..
لمن ضحكوا على الوصف ضحكت العنود ضحكة بارده وقالت : ما يضحك , أصلا هو مو على بحر , هو على خليج يا بنت الأدبي , انا علمي وجبتها صح ..
قالت تسكتها : اسم إنه , مويه وبس ..
قالت ريم وهي تحسب الورق اللي في الميدان : تصدقين إنه في ناس مو بس زيارات ..
وأشرت على الهنوف وقالت : هنوفه دورك يا نايمة ..
وكملت وهي تطالع في العنود المستمعة لها بإنصات : يخرجون ويتمشون ولا يقعدون عندهم رجالهم من المغرب للفجر ..
شهقت وقالت باستنكار : إيييييييييييييييييييييش , 12 ساعة ..
وبعدت بلوزتها وتفلت جوتها وهي تقول : برى وبعيد , برى وبعيد ..
هزت سفانة راسها وقالت : طالعوا اللي تقول على جده حمده إنها عندها معتقدات غريبة أجل هالحركة اش تسمينها يا ست عنود ؟؟..
لفت العنود بوزها وقالت وهي تطبق أوراقها مع بعض قبل ما تحط يدها على خصرها : طالعوا مين يتكلم , الست هانك اللي رفضت تتجوز يوم 21 محرم عشان سبب سخيف ..
قالت سفانة باستنكار : مو سبب سخيييييييييييف , بعدين هي أسباب مو سبب واحد بس ..
وطبقت أوراقها وبدأت تعدد على أصابيعها : أولا لو تزوجت في 21 بيكون مافي إلا أسبوعين بين زواج حسان و الهنوف وزواجي تعب وهلاك , ثانيا اش شعور رغد لمن نسرق اليوم اللي مفروض كان يكون يوم زواجها لمجرد إن القاعة ة ومافي يوم متفرغ في محرم إلا هاليوم ..
قالت ريم وهي ترتب الورقة اللي سحبتها : سفسف قلبي , عبد الإله بدأ وظيفته وإحنا بنأثث له في الرياض قدري إن الوقت ضيق والولد مستعجل والإجازة حتبدأ والناس تبغى تسافر , مو معقولة بنحجزهم في البلاد عشان جوازك ...
قالت سفانة بحزم وهي تفرد ورقها : خلاص هالكلام ماله داعي لأنه تحدد زواجي يوم 4/2 ..
وساد صمت في الجو قبل ما تصرخ سمية وهي تأشر على أختها الكبيرة : هذي متى فردت أوراقها ؟؟
قالت بهدوء : لمن كنتم تناقشون المعتقدات الغريبة اللي تسويها العنود ..
طالعوا فيها بصمت دام لثواني قبل ما يكملون لعبهم وسفانة تقول بتريقة : تراني بدأت حرب الجلسريد والليمون على الأكواع والركب , إن شاء الله تفيد إلى يوم الزواج ..
طالعت ريم في أكواعها وقالت : سفانة مايحتاج , ماشاء الله مو ذاك الفرق ..
طالعت سفانة في كوعها وقالت بفرح : بالله , يمكن لأني أستخدم هالخلطة من رمضان و بدأ مفعولها يطلع ..
رفعت العنود تنورتها وطالعت في ركبتها وقالت : وا شكلي أنا اللي أحتاج من جد , شوفي ..
قالت الهنوف باستنكار وهي تضربها على ركبتها : عنووووووووود و مايجوووووووز عورتك هذه ..
قالت الخنساء بتريقة : أنصحك تعالجين بشرتك وتنظفينها استعدادا لجلسات الليزر للشعر أحسن لك ..
تغيرت ملامح العنود لمن تذكرت الحلاوة ووجعها وقالت وهي تسبغ صوتها بنبرة بكاء مسرحية : أها , أحس جسمي يعورني من دحين ..
زفرت سفانة وقالت : المشكلة يوم زواجك مو بس يدينك ورجولك , وجهك وظهرك وبطنك و ...
قاطعتها العنود : خلاص ..
ضحكوا على العنود اللي ما تتحمل وجع الحلاوة , قالت الخنساء وهي تمد يدها : أجل أنا اش أقول !! طالعي ..
كانت الخنساء أكثر وحدة مشعرة فيهم بعد الهنوف , طالعت فيها العنود ورجعت طالعت في يدها لمن شافت الفرق سلمت على يدها ومدت جسمها وسلمت على خد الخنساء وربتت على كتفها وهي تقول بمأساوية : الصبر ضياء يا قلبي ...
ضحكوا على طريقتها , وبعد عدة أحاديث عن عذاب المرأة عشان تتزين لرجال ما يقدر تعبها سألت أسماء فجأة : إيوه صح , ريمان ليه ماجات عهود معاك مادام مابتروح الجواز مع الحريم ؟؟
قالت ريم بتهرب : يمكن عشان هي اللي بتسشور شعر أمي وبتمكيجها ..
قالت سمية : طيب خليها تجي بعد ما تخلص ..
كبتت العنود كل كلمات الكره والحقد اللي بتطلع من فمها وقالت تنهي الموضوع وهي ما تتخيل إنه إحتما تجيهم عهود لأنه أزهار وعدتها إنها بتجي لهم قبل ما يروح جاسم للجواز وبتتعشى عندهم ..
سرحت ريم بأفكارها وهي تفكر بأختها عهود اللي طلعت لها صديقة جديدة غير جيهان والمشكلة إنه شكلها مايطمن زي جيهان , ولمن تذكرت اتصالات أمها بعبد الرحمن اللي حن أخيرا ورد بعد أسبوع متواصل من المكالمات واللي بارك لها ببرود لمن دري بخطبة عبد الإله واللي أعلن بصريح العبارة إنه ما حياخذ إجازه عشان ينزل لجوازه لأنه لازم يجلس الخمس سنوات متواصلة عشان ياخذ الجنسية الأمريكية وهو مهو مفرط فيها عشان جواز على حد قوله ..
: ريمان ..
ابتسمت وقالت : هلا ..
: دورك ..
سحبت ورقة وهي تهتف بداخلها ~ يارب اهديهم عشان الضعيف المريض بالقلب , يا حبيبي يا أبويه , ياحبيبي يا أبويه ~ ..
****************************
بعد العشاء بوقت في الرياض :
في فيلا عبد الكريم :
: أنا أول مرة أشوف ملكة في بيت العريس ..
ضحكت هيام وقالت : عادي ..
زفرت وسام وطالعت في أرجاء غرفة سحر , كانت تحس نفسها في دوامة مالها قرار تحس كل شي حولها يجري جري , أولها موافقة خوالها وأمها اللي ما تدري كيف صارت وبعدها نتيجة تحاليلها اللي صدمتها كيف طلعت في خلال يومين فقط , مافاقت من هالموضوع إلا جاتها زيارة عبد الكريم الرسمية مع حنان وخلود والتوأم وهم جايبين هداياهم كصفعة تأكد لها إنه الموضوع مو حلم , ولمن وصلت بذاكرتها لسلطان اللي أصر قبل أسبوع إنهم يعقدون لهم على الورق ودفع مهر ثاني فوق مهر سامر قامت وهي تبعد طبقات الفستان عشان تشوف الأرض , وقفت وتحركت للمراية الطويلة المعلقة ورى الباب وطالعت في شكلها , مكياجها الخليط من الذهبي ودرجات الزيتي متناسب مع فستانها الفخم العاري اللي فصلت عليه جاكيت ناعم قصير واللي أصرت نجلاء تدفع عليه 2500 عشان يتخيط في أسبوعين , زفرت وسام وهي تتلمس نحرها مستحية من الفتحة اللي رجعتها للخياط مرتين عشان يرفعها شوية و تأملت تسريحتها المرفوعة والمتناثر منها بعض الخصلات ماكانت عاجبتها , تلمست الشال الصغير المربوط ورى قصتها الناعمة والمعقود عند إذنها اليمنى , قالت هيام : والله حلوه التسريحة , اش فييييييييك ؟؟
زفرت مرة ثانية ولفت على هيام وقالت بصوت مخنوق : أحسها مبالغ فيها , حتى المكياج ثقيل و الفستان ...
تحركت هيام ومسكت يدينها اللي انصعقت لمن لقيتها زي الثلج , رصتها بقوة وهمست : وسومه والله حلو , بالعكس إنتي حاطه مكياج عادي , رفضتي مكياج الملكة ناسية مضاربتك مع الكوفيرة ..
همست وسام : أحس كل شي خبط لزق , أحس نفسي في سباق خيل كإنه ...
وغمضت عيونها بقوة , صرخت هيام وهي تهف بيدينها قدام وجهها : لالالالالالا ...
وتلفتت تدور على منديل , جريت وسحبت واحد ولفته بسرعة وهي تقول : إرفعي راسك يا حماره ..
رفعت وسام راسها لفوق وهمست وهي تقاوم دموعها : أنا أكبر منك يا وقحة , اش ياحمارة ؟؟
حطت هيام المنديل في طرف عينها وهمست بحنان : عارفه , ومو بس أكبر مني اليوم إنتي عروسة ..
بعدت عنها وسام وضربتها وهي تقول بعصبية : شكرا هديتيني بشكل فعال ..
قهقهت هيام وقالت وهي ترجع تسحبها وتحط المنديل في طرف عينها : طيب ما بأقول عروس , مملكة مع إني ماني شايفة فرق ..
همست وسام : في مليون فرق , أولها لمن نخلص من هالمسرحية اللي مال أمها داعي بأرجع للبيت معاكم مو مع واحد غريب ..
انفتح الباب ودخلت منه نجلاء المتألقة بجلابية فخمة بلون ذهبي وأحمر وهتفت لمن شافت وسام رافعه راسها وهيام تمسح لها : اش فيه ؟؟
فتحت هيام فمها لكن وسام سبقتها وقالت بابتسامة رقيقة : دخل شي في عيني ومسحته ليه عشان ما يتخرب المكياج ..
تنهدت وقالت : أشوه , على بالي تصيحين ..
ضحكت وسام وقالت : وليش أصيح ؟؟
وكملت وهي تحس نفسها سخيفة : اليوم ملكتي , مو ؟؟
وتغيرت ملامحها لجزء من الثانية لكنها رجعت ضبطتها وهي تبتسم ابتسامة أوسع , تحركت نجلاء وضمتها وهي تقول : بسم الله ماشاء الله , والله أحلى عروس ..
هزت وسام يدها وقالت بتريقة : مين يشهد للعروس !! بعدين مو كل ما شفتيني تقولين أحلى عروس وما أدري اش شكله دحين يقولون فرحانه ببنتها ..
بعدت عنها نجلاء وقالت بابتسامة محبة : وهذا الشي الحقيقي , أنا فرحانه ببنتي ..
ولمن تذكرت قالت : أوووو صح , يلا تجهزي لأنه بنخرج للصالة عشان سامر بيجي ..
تجمدت كل ملامحها وحست بكل شي حولها واقف إلا قلبها اللي ينبض بسرعة , سحبت نفس عميق وهمست وهي تتمسك في هيام : حمام , أبغى حمام ..
هتفت هيام باستنكار : بالفستان , بعدين الحمام برا يعني لازم تخرجين قدامهم ..
قالت بصوت مخنوق : لو مارحت الحمام دحين بأسويها على فراش سحر هنا ..
اندق الباب ووصلهم صوت خلود وهي تقول : ها عمه , جهزنا شريط الزفة وكل شي ..
خرجت نجلاء لبنت أخوها وقالت وهي مبتسمة : دقايق بس ..
وكشرت وجهها وهي تكمل بهمس : متوترة شوية ..
ابتسمت خلود بمحبة وقالت : الله يعينها , أنا بطني مغصتني ..
ولفت على سحر اللي كانت تتأكد من الأشياء اللي على الطاولة , قالت سحر وهي تصب عصير الكوكتيل في الكاسة : أحححححسن فكرة سوتها سلافة ..
ابتسمت سلافة وقالت بتكبر وهي تجهز كاميرا هيام الديجتال : شكرا , أتلقى الشكر على شكل هدايا ..
ضربتها سمر على راسها وقالت : أخوك يالحمارة , لازم تتعبين في ملكته ..
وابتسمت وهي تطالع في الكرسي اللي غطته سحر بحرير ذهبي فوقه تل بنفس اللون متناسب مع عربية الملكة المزينة بورود خليط من الزيتي والأصفر والذهبي زفرت وقالت تأكد كلام توأمها : أحسن فكرة بعيد عن عيون الحريم عشان ما يقارنون وعشان ما تزعل وسام ..
رفعت سحر راسها وقالت : سمر , مو بس وسام اللي كانت معارضة إنها تنزف مع سامر قدام الحريم , بعدين مهي حكاية مقارنة ..
قالت خلود تأييدها : إيوه , كلنا كنا رافضين لأنه مايجوز الحريم يقعدون يتأملون في الرجال حتى لو كان عريس ..
وأشرت على الصالة اللي اقترحت عليهم سلافة إنهم يخلون سامر يدخل فيها على وسام قبل ما يزفونهم من الدرج ومن هناك تنزف وسام للحريم لوحدها ويخرج سامر , وما بيحضر المشهد إلا محارمه من الحريم وكملت : عشان كذا بنخليهم هنا و ..
سكتت لمن دق جوالها , خرجته ولمن شافت الاسم همست : عدنان , ياويلنا ..
وردت عليه وهي تقوله دقايق ويخلي سامر يجي , انفتح باب غرفة سحر وطلت وسام من وراه وهي معلقة قبضة الورد السكري بشريط ستان ذهبي حول معصمها اليسار , أول ما شافتها خلود غطرفت لها , ابتسمت وسام بخجل لمن بدأت الغطاريف تتوالى ونظرات الحريم الموجودات تنصب عليها , دنقت راسها وتلمست فستانها بتوتر , مسكتها هيام ومشتها إلين الكرسي اللي تم تفريغ الصالة من كل شي إلا منه ومن طاولة مقابلة له عليها كاسة العصير المزخرفة تتوسط شمعدانين كبيرة مزينة بنفس الزينة , بدأوا الحريم يسلمون عليها وهم يباركون وأولهم حنان وبناتها ..
******************************
صك جواله ولف على سامر الواقف جنبه وهو يتلمس جانب بشته الأسود بتوتر , ابتسم وقال : خلاص دقايق ويدخلونك ..
صرخة الشباب خلته يبتسم بتوتر وهو يهمس لماهر : إنت كنت تحس بشي من اللي يسوونه لمن كنت بتدخل على أريج ..
هز راسه وسأل بابتسامة عريضة : لا , ليه ؟؟
دنق على إذنه وهمس : أحسهم قاعدين يسوون لي إرهاب اجتماعي ..
قهقه وقال وهو يضربه على كتفه : الله يخسك يالملع .
وقطع لعنته لمن شاف عيون عدنان اللي تطالع فيه باستنكار , ابتسم وقال وهو يطبطب على كتف توأمه : بالتوفيق ..
جا دور سامر إنه يقهقه وهو يقول : تستاهل ...
رن جوال
في الفيلا :
: البنت حتنحرج ..
هزت سحر راسها بعناد وقالت : ما بتنحرج , غرفة عدنان تحت , حتى سامر وماهر نقلوا للغرفة اللي تحت عشان ياخذون البنات راحتهم ..
زفرت خلود وقالت وهي تلف على أمها : أميييي ..
قالت حنان بهدوء : خلود حبيبتي سحر معاها حق , مافي أحد في هالدور غير أبوك اللي أكيد بيكون طول الوقت في الديوانية مع عمك أحمد , الملحق مافي غرفة فاضيه إلا وحده لجاسم ومرته وين يروحون البنات ؟؟ مو معقوله بنومهم في نفس غرفة أبوهم اللي مجهزينها تحت ..
ابتسمت سحر وقالت : أصلا ما حتكون الجيه حلوة لو كنا معزولات , صح سلافه ؟؟
وذابت ابتسامتها لمن شافت سلافه مركبه سماعات ومربعة فوق الكنبه وفي حضنها لاب توبها , زفرت وقالت : ياربي ارحمني ..
وتحركت للمطبخ تشوف تجهيزات الضيافة , شافته واقف عند باب غرفته اللي كان خارج منها و يده الذابله ماسكه قبضته بوهن وهو مسرح في عالم ثاني , ابتسمت وقالت : يا عريس ..
ما التفت لها فضحكت وقالت : عدنان ..
لف عليها ببطء وطالع فيها بعيون خاليه من التعابير , ضحكت وقالت : لساعك في العالم الثاني ..
خرج من سرحانه و انتبه لحظتها لها , ابتسم وقال وهو يتحرك ويصك بابه : خير ..
حركت حواجبها وقالت : اللي ماخذ عقلك يتهنابه ..
ابتسم بهدوء وهو يقول : أمي عزمت مرة كمال ولد محمد ال ... , تراها مالها أهليه ..
قطبت حواجبها وشهقت وقالت : يافضييييييييييحة , نسيناها ..
ورجعت تطلع الدرج بتروح تخبر أمها ووقفت في نص الدرج ورجعت لفت عليه وطالعت فيه بخبث وهي تهمس بصوت ممطوط : هذا بسسس اللي كنت سرحان فيه ؟؟
اتسعت ابتسامته وهو يهز راسه ويتحرك للباب الخارجي , حست بفرح مفاجئ يغمرها ويبعث بداخلها طاقة عجيبة فقالت تغيضه : عنيييييد بتنام عنديييييييييييييي ..
لف عليها بشبه ضحكة وهو يقول بهدوء : روحي لأمي خبريها ..
وكمل طريقه , تأففت سحر وهي تهمس : يا برووودك ..
وطلعت تخبر أمها , أول ما خرج شاف باب الموقف المعدني يرتفع ببطء قبل ما يشوف مقدمة جيب أبوه تبان معلنة وصولهم , وقف للحظة إلين استقرت السيارة وتحرك بعدها لمن انفتح الباب الأمامي وخرج منه عمه أحمد , لكنه تجنب يقرب من السيارة مره , أول ما شافه أحمد تجلت كل ملامح الفرح على وجهه وهو يتحرك له وهو يقول : هلا , هلا والله بالغالي ولد الغالي , هلا ..
قال عدنان بابتسامة وهو يسلم عليه : المهلي ما يولي , هلا فيك , تو ما نورت الرياض يا عم ..
قالت الهنوف مستغلة نزول سامر وجاسم : بعض ناس ترحب وتهلي بحفاوة ما أدري ليش ؟؟ لا وواقفين عننننننننننند الباب ..
قالت أزهار بتريقه وبلغة عربية فصحى : حبيبتي , كرم الضيافة من شيم العرب منذ قديم الزمان ..
العنود اللي من لمحته و حست قلبها بدأ يسابق الريح من سرعة ضرباته قالت بتريقة وهي تضفي الثبات على صوتها المضطرب : لا والله , يعني دحين شايفين نفسكم تحشون زي الأوادم يا حبة الطماطم و أبلة العربي الجديدة ..
ضحكت أزهار وقالت بصدق : هذا تأثير منايا والله , كل تريقاتها باللغة العربية الفصحى ..
قالت بتريقه لمن حست ضربات قلبها بدأت تتباطأ بعد ما اختفى عدنان عن نظرها اللي أشاحته : يبغالكم مية سنة على بال ما توصلون للدكتوراه اللي حصلت عليها في المحشات , روحوا تعلموا أصول التحشيش بعدين تعالوا ..
نزلت الهنوف وساعدت أزهار , قالت العنود من بين أسنانها : تتحركون وتسيبوني أحلف بالله أفجركم ..
قالت الهنوف وهي تفتح المقعدة : ما قلت لك البنت صايرة إرهابية بشكل ..
نزلت العنود وتحركت معاهم للفيلا وهي تحاول قد ما تقدر تتجاهل أعصابها مشدودة ..
: يا أهليييييييييييييييين ويا سهلييييييييييييييييييييين ..
راح توترها أول ماسمعت صوت سحر , انطلقت من بين الهنوف وأزهار وهي فاردة يدينها على الاخر , ضمتها سحر بقوة وهي تقول من بين أسنانها : وحشتينييييييييييي ..
قالت العنود بصدق : وإنت أكثر يا دبه ..
همست سحر عشان مايسمعها أحد : ها كيف عديتي من عند أخويه ؟؟
همست العنود : أطالب بحقي في التزام الصمت حاليا ..
قهقهت سحر وابتعدت عنها وهي تقول : العنود هي العنود ..
ولفت ترحب بالهنوف وأزهار , حست العنود بكل الإحراج يرجع لها لمن شافت حنان وخلود , سلمت عليهم بهدوء , قالت حنان باستغراب : عنود حبيبتي , تعبت من الطيارة ..
ابتسمت العنود بأدب وهمست كاذبه وهي تسبل عيونها و تحط يدها على جبينها : ما عليك يا خاله , شوية صداع بس ..
تبادلت سحر والبنات نظرة سريعة وهم يكتمون ضحكهم على العنود اللي مو مناسبها دور الهادئة الخجولة , طلعوا لصالة الدور الثاني وهناك جاتهم سلافة تسلم عليهم ..
نص ساعة وأذن المغرب , قامت خلود وقالت لأزهار إنها تتفضل معاها عشان توريها غرفتها اللي بتجلس فيها , وأشرت لهم سحر على غرفتها وهي تفتح صندوق خشبي مزين بجانب طاولة التلفزيون الكبيرة اللي تتوسط كنب الصالة , أصدرت صوت مزعج قبل ما ترمي نفسها على سرير سحر , شهقت الهنوف وقالت باستنكار : عنووووووووود ..
ابتسمت سحر وهي شايلة السجاجيد وشراشف الصلاة وقالت : اش فيك ؟؟
قالت العنود بصوت مخنوق من المخدة اللي دافنة وجهها فيها : الأدب متعب ..
ورفعت راسها لمن ما سمعوها وقالت بهمس وهي تطالع جهة الباب خوف يدخل أحد : الأدب متعب ..
ضحكوا عليها وقالت سحر من وسط ضحكها : والله إنت اللي متعبة نفسك وقاعدة قعدة رسمية والأدب اللي مو لايق عليك نهائيا مشكل هالة حولينك , يختي أمي تعرفك وتعرف خبالك , كلنا نعرفك من قبل ما نخطبك وتصرين زوجة عدنان , بالمختصر ماله داعي هالمسرحية اللي معيشة نفسك فيها ..
ماوقفت الهنوف عن الضحك وهي تقول : لا , إنت ما تدرين عن اللي صار , وحده من جاراتنا جات ورمت صواعق وتوكلت على بيتها كنها ما سوت شي ..
قالت العنود بحقد وهي تجلس مربعة فوق السرير : والله ما أسامحها الكللللللللبة , يوم القيامة ربي بيحاسبها على الظلم اللي ظلمتني إياه ..
قالت سحر وهي تفرش السجادة على الأرض : وهي كمان ربي بيحاسبك على السب اللي سبيتيها إياه ..
زفرت العنود وقالت بقهر : من حر مافيني منها , جات رممممممت في الكلام وانقلعت بيتها وأراهنك بحياتي إنها شخرت وحلمت من زود الوناسة وأنا طول ليلي وأنا أحترق ...
قالت الهنوف تفسر لها لمن شافت عدم الفهم على ملامحها : شوفي يا حبيبتي , هذي جارتنا أم حمد ..
قالت العنود بغيض : أم نكد ..
هزت الهنوف وقالت تطاوعها : أم نكد , ولمن دريت إننا جايين الرياض عشان زواج أخوانك قامت ترمي في الكلام وإنه العنود أكيد مبسوطة وغيره كله عشان بتقابل عدنان وإنه أصلا هذا غرضها من الزيارة ..
رمت العنود نفسها على ورى ورافست بيدينها ورجولها وهي تقول بغيض : قاهرتنيييييييي قاهرتنيييييييييي ..
ووقفت عن الرفس وجلست زي الأطفال مفرقة رجولها وهي تقول بتريقة والغيض واضح في كل حرف من حروفها : لا واللي يزيدك قهر كانت تبتسم , تبتسم , ومو بس كذا , مضيقة عيونها بخبث يعني يعني كشفتك..
وابتسمت ابتسامة مسرحية وهي تهز راسها وتكمل : وأنا كان لازم زي الهبلة ابتسم بخجل وأهز راسي قبل ما أدنقه لزوم المسرحية وانا من جوة ...
وأشرت على صدرها وهي تقول بصوت ثقيل : غليان , ودي ببازوكة ولا ماجنوم عشان أفرغه فيها , تمنيت لو بيدي مطرقة أهد لها سنونها فيها ..
كانوا غرقين في الضحك وهي تشرح مشاعرها بحماس , قالت سحر بتريقة وهي تغمز لها : يعني يعني بكلامك تراني جاية للواجب يا سحر مو عشان سواد عيون أخوك , اعترفي اعترفي , لو مو عدنا ....
صرخت العنود تقاطعها وهي تسحب المخدة : يا حماره ..
شردت سحر لمن رمت العنود المخدة بكل قوتها , في ثواني تفادت سحر المخدة وضربت المخدة في وجه حنان اللي توها دخلت , صرخوا كلهم بصدمة وغطت الهنوف فمها بيدينها وهي تطالع برعب في حنان اللي طاحت المخدة عند رجولها , نطت العنود من السرير وجريت لها وهي تقول بتلعثم : وا خالتي أنا اسفة , والله قصدت سحر , والله , أنا , قصدي ..
وانحنت بسرعة وشالت المخده وضمتها لصدرها وهي تطالع في حنان بوجه محمر وهي مهي عارفه اش تسوي , انفجرت سحر بالضحك واستندت على دولابها وهي ماسكة بطنها من كثر الضحك وحمحمت الهنوف وهي تبلع ريقها مصعوقة من اللي صار , ابتسمت حنان وقالت : لا عا ...
قالت العنود بسرعة وهي ضامة المخدة بيد واليد الثانية تمسد فيها كتف حنان : خالتي والله ما شفتك وإنت داخلة و ...
قاطعتها حنان بلطف : عادي اش فيك ؟؟ أنا عارفه إنك ما شفتيني ..
وكملت بلهجة عادية عشان تبين للعنود إنه الموضوع عادي : صلوا وتعالوا عشان تشربون الشاهي ..
وخرجت , ~ أنا ليه كذا ؟؟ ليه دايما أطيح في هالمواقف ؟؟ ليه ... ~ خرجت من أفكارها على ضحك سحر اللي تحول لتأوهات وهي تمسك بطنها , لفت بحقد عليها وهي تقول من بين أسنانها : يا نذله ..
وجريت لها , صرخت سحر وحاولت تنط من فوق السرير لكن العنود مسكتها ورمتها على السرير وجلست فوقها بكل ثقلها وهي تقرصها وتقول : أوريييييييييييييك الضحك الزايد يا دببببببببببببببببببببببببببببببببب , قولي توبه ما عاد أضحك عليك ..
: ماني قايله ..
زادت في ضغطها على جسم سحر اللي تأوهت من كثر الإختناق وهي تقول : قولي تووووووووووبه ..
: ماني قا ...
وصرخت لمن قرصتها العنود : اي يا عمود الكهرب يالعصلا قومي عني ..
جريت الهنوف وصكت باب الغرفة خوف ترجع حنان وتشوف هالمنظر ..
****************************
بعد وجبة العشاء فيلا عبد الكريم :
في مجلس الرجال :
انتبه عدنان لنظرات منصبة عليه وهو يصب الشاهي الأخضر , التفت وانصدم لمن شاف أربع أزواج عيون تطالع فيه , قطب حواجبه وكشر في وجه التوأم وسطام وصقر ولف على جده سلطان و بدأ يباشر عليه وعلى أعمامه والموجودين , أبوه ذبح ذبيحيتين وعزم كل الأهل و الجيران ترحيب في أحمد وجاسم وأصر يسوي هالعشاء رغم إنه أحمد اعترض لأنه الزواج بيكون بعد يومين و بيكون فيه ذبايح وعشاء , لف وقال وهو يباشر على عمه عبد العزيز : خير تطالعون فيني ..
قال ماهر وهو مسمر عيونه على أخوه : صراحة أحييييييي فيك هالقوة ..
هز سامر راسه مؤيد له وهو يقول بسخرية : سجلني واحد من المعجبين فيك ..
ضحك ولف على سطام وهو يقول متسائل : اش يخربطون ذولي ..
ابتسم سطام بصمت وقال صقر بهمس : من أول نتكلم عن إنك ما اتصلت ترحب في بعض ناس ولا طلبت تقابلهم ..
طالع ماهر في ساعته وقال : ست ساعات ونص من وصلت وإلى الان متمالك نفسك ..
طالع فيه وكمل بهمس جدي : صراحة هي واحد من اثنين , يا إنك بارد ما عندك مشاعر أو إنك متضارب معاها ومخبي على الكل ..
انصدم عدنان من كلمته لكنه التزم الصمت , كشر في وجههم وتحرك , حط الصينية اللي فرغت من فناجين الشاهي على الطاولة وسرح لثانية قبل ما تتسع عيونه عن اخرها وصوتها يدوي من أعماق سحيقة ~ بارد لوح ثلج ~ رفع راسه بصدمة لمن تذكر وصفها له في المدينة بعد التصادم في المصعد , وفي لمح البصر استرجع عقله هالموقف اللي غاب عن باله ..
: عدنان ..
لف على جده اللي ناداه وتحرك بسرعة يتناول الفنجان من جده اللي قال : روح قولهم يسوون شاهي أحمر بالنعناع لي وللشياب ..
ابتسم عدنان وتحرك , خرج من المجلس وتحرك للمطبخ وهو يقول بصوت عالي : يا أهل البيت , طريق ..
كان حريص إنه يعلن وجوده لأنه عارف إنه البيت صار مزدحم , دخل المطبخ وابتسم لمن شاف أمه وخلود في المطبخ وقال : جدي يبغى شاهي ...
لفت خلود وهي شايلة الصينية وقالت بابتسامة : أحمر منعنش ..
تناول منها الصينية وهي تكمل : أمي جهزته من بعد الشاهي على طول ..
ابتسمت حنان وقالت : خلاص حفظت عمي حفظ ..
ابتسم وتحرك وبلا شعور وقف عن المشي وطالع في الدرج ~ يكون هي تفكر نفس تفكيرهم ,.... ما أظن , بسسسس .... ~ لمن انتبه لنفسه زفر ورص الصينية وتحرك وكلماتها تدوي بعقله مرة ثانية وثالثة , أول ما دخل المجلس سمع جده يقول بحده وهو يأشر بعصايته على عبيد و أسامة : تحركوا يمال العافية , قوموا تحركوا ساعدوا أولاد عمكم ..
قام عادل بسرعة وتناول الصينية من عدنان , لف أسامة بوزه وقال بتريقة : ماهر وسامر جالسين , نقوم إحنا ..
قال عبيد وهو يضحك : عرسان ما يتحركون ..
زفر وضرب صدره وهو يقول : ياحسرتي متى يقولون عني عريس ..
ضحك ماهر وقال بتريقة : هانت يا ولد الناس , كلها كم شهر ويتزوج سطام وكم شهر يخطب صقر وبعدها كم شهر ويتزوج و بعدها بكم شهر تخطب و بعدها بكم شهر تتزوج ..
ومسك سامر ضحكه وهو يقول بتريقة : لو جمعناها يعني بعد ثلاث سنين إن شا ..
قال أسامة بحدة : تفل من فمك , اش بيصبرني ثلاث سنين أنا ..
ولف على أخوانه وقال بعصبية : تجوزوا ..
قهقه الشباب عليه وقال جاسم من وسط ضحكه : والله ذكرني بحسان ..
لف سلطان بحده وقال : هي إنت , على إيش تصارخ ..
زفر أسامه وقال بحسرة : ودي أغني ..
زاد ضحك الشباب لمن قال جده : غني ..
كان معروف إنه صوته أحلى صوت بينهم , حمحم وقال بصوت رخيم : انصر عبادك , انصر عبادك , انصر عبادك ياربي انصر عبادك , أوقينا نارك , أوقينا نارك , أوقينا نارك يا ربي أوقينا نارك ..
أشر على أبوه وهو يكمل غناه : والعزوبية , العزوبية , العزوبية يا يبه طالت عليه ..
قهقه كل من في المجلسو وهو كمل بلا اهتمام : قوم أخطبلي , قوم أخطبلي , قوم أخطبلي يا يبه وحده حورية ..
حط عبيد يده على فمه يسكته وهو يضحك , قال عبد العزيز وهو يحمحم بعد ما قهقه من قلبه على خبال ولده : خلص دراستك الأول و ..
قال سلطان يقاطع ولده مخاطب أسامة : أشر على اللي تباها وتوصلك بكرة ..
وضرب صدره وهو يقول : والمهر والقصر علي ..
قال عبد العزيز باعتراض : أبويه , ومن فين يعيش بنت الناس , بالألف اللي ياخذها من الكلية , خله يتوظف وأنا أجوزه ثاني يوم من استلام الوظيفة ...
ولمن بدأ نقاش حامي بين الكبار عن الوظائف والبطالة وغلاء المهور , أشر سطام بيده , قال أسامة بعدم اهتمام : زين جبتلهم هرجة , قال فضحتكم قال ..
قال طارق بطفش : والله الزواج سجن ..
لف عليه أسامة وقال بحدة : هذا اللي دايم تقولونه يالمتزوجين , سجن , سجن , والله منتم حاسين بالنعمة اللي انتم فيها ..
قال عدنان وهو يضحك : هذا كلامك وإنت ما عشت حياة العزوبية المزبوطة ..
ولف على جاسم وهو يسأله : ولا ؟؟..
قال جاسم : الله يسعدك لا تذكرني بذيك الأيام , لا أكل زي الناس ولا ملابس نظيفة زي باقي الأوادم ولا ...... أففففف ما ودي أتذكرها ..
قال أسامة بسخرية : ما في اختلاف بين حياتي وحياتكم ..
سكت الكل وعلا الوجوم وجوههم وهم يفكرون بأمه ولمن شاف جاسم تعابير وجيههم التزم الصمت هو الاخر رغم إنه ما كان فاهم السبب في هالبرود اللي ساد الجو فجأة , قال أسامة بتريقة ينهي الجو اللي ساد بعد كلمته : خير , هذا كله حزن على حالي , جيبوالي عروسة وأنا أنبسط ..
رجعوا ضحكوا وعبيد يقول : يالله يارب تزوجه في أقرب وقت وتفكنا من رجته ..
*************************
في داخل الفيلا :
ضحكت العنود وقالت وهي تلعب في شعرها بدلع : طبببببببعا ودهم يشوفوني , مو انا العنود ..
قالت أزهار بتريقة : والله ودهم يشوفونك لأنك حرمممممممم السيد عدنان مو عشانك العنود ..
ضحكت الهنوف على وجه العنود اللي تغير وهي تضرب أزهار على فخذها يعني اشكتي وقالت سحر من وسط ضحكها : حرام عليك طيحتي خشمها ..
رفعت راسها بتكبر وقالت : لسه ماجابته أمه اللي يكسر خشمي ..
رموها بنظرات ساخرة , لفت بوزها وقالت بتساؤل : عندكم شك ؟؟..
قامت أزهار وقالت : يلا أستأذن , بأروح الغرفة ..
تبعتها الهنوف وهي تقول : استني بأجي معاك ..
طالعت فيهم العنود بعيون متسعة ولفت بحدة على سحر اللي ابتسمت وقالت وهي تقوم : أشوف أمي تحتاج شي و لا ...
مسكتها العنود وجلستها وهي تهتف : يا حمييييييييييييييير اش قصدكم بهالحركات ؟؟
ضحكت سحر وقالت وهي تهز أكتافها : أنا اش ذنبي تجريني , ما أدري اش قصدهم ,
أنا بريئة بأروح لأمي ..
حطت يدينها على خصرها وقالت : لا والله , على مين تكذب ...
وقطعت كلامها لمن شردت سحر من قدامها , صرخت وهي تلحقها : سحووووووروووووو ..
وتصنمت عند العتبة وهي تذكر نفسها إنها في بيته , حمحمت ورجعت للمرايا , عدلت وضع بلوزتها القطنية الصفراء المزينة بفراشات ملونة بالأسود و اللي لبستها على تنورة سوداء , تأكدت من شكلها ومسدت شعرها وخرجت , كانت تمشي بحذر وهي تقول : سحر , سلافة , خالتوووو ..
لمجرد إنها تبين وجودها , ابتسمت لمن قابلتها هند , قالت هند بابتسامة : سحر تحت في المطبخ مع عمتي وخلود ..
ابتسمت العنود شاكرة وتحركت نازلة وهي تقول بداخلها ~ ماشاء الله هالكشخة كلها وهي في عشاء عادي ما في أحد , اش بتسوي يوم الزواج ؟؟ ياربيييييييييي أكيد بيقعدون الناس يقارنون و ... عنيييييييييييد من متى تحسين بعدم الثقة و ~ وصلها صوت هند وهي تقول : انتبهي وإنت نازله لا يشوفك أحد من الرجال يكون جاي من المطبخ ولا شي , نبهي عن وجودك ..
ابتسمت لهند وطنشتها وكملت طريقها ورجعت خصلات شعرها اللي تركته طليق لورى بحركة مسرحية وهي تقول لنفسها : أنا عنيد مافي مني اثنين ..
لمن وصلت للدورالأرضي حست بخفقات قلبها تزيد فقالت بسرعة : سحر ..
: هنا في المطبخ ..
زفرت براحة لمن سمعت صوت سحر , تحركت وهي تمتم لنفسها بغيض : خببببببله اش هالخوف والتوتر يا غبية , خلي عنك الرومانسية الزايدة ما أظنه بيفكر إنه يتحين الفرصة عشان يشوفك , مالت عليه ..
دخلت المطبخ وابتسمت وهي تقول : أنا جييييييييييييت ..
لفت خلود وقالت بتريقة : أهلا وسهلا عنود , توك رجعتي العنود اللي نعرفها من أول ساكته و ..
ضحكت العنود بحرج أول ما قالت خلود كلامها وتحركت لداخل المطبخ وهي تستمع لباقي الحديث وأول ما قربت من خلود دعست رجلها وهي تهمس من بين أسنانها : اشششش لاتخليني أحطك في القائمة السوداء تراني لا صرت عدوة أصير شييييييييييينه ..
ضحكت خلود من قلبها , كانت تسمع عن العنود وحركاتها من سحر وسلافة أكثر الناس اتصالا بها وهي كمان كانت تعرف وتشوف بعض هالحركات أيام كانوا ساكنين في جدة قبل زواجها بكم سنة لكنها ما توقعت حركتها هذه , ابتسمت لها العنود ابتسامة رقيقة قبل ما تفتح عيونها على اتساعها تحذير , زاد ضحك خلود وكل اللي في المطبخ ملتفت لهم مو فاهم سبب ضحكها , قالت حنان بابتسامة : خير يا خلود , ضحكينا معاك ..
وسألت سحر بحماس : اش عندكم ؟؟
الفت عليهم العنود وابتسمت ببراءة وهي تهز أكتافها يعني ما أدري اش فيه , ضربتها خلود على كتفها وتحركت خارجة من المطبخ وهي تقول : تذكرت شي ضحكني ..
ضيقت سحر عيونها وطالعت في العنود , طالعت فيها العنود ببراءة مصطنعة , همست سحر : والله بعيد البراءة عنك ..
فرصعت العنود عيونها بحدة وهي تأشر براسها على حنان اللي كانت ماسكة المغرفة الكبيرة تحط بقايا الرز في قدر كبير , ابتسمت سحر وقالت : إيييييوه , دحين العنود ..
تجاهلتها العنود ولفت على حنان وهي تسأل : خاله اش تسوين ؟؟
قالت وهي تأشر لشغالة هند إنها تناولها القصدير : الزايد دايم أخلي منه شوية لبكرة والباقي أوزعه على عمتي أم عبد الكريم وأمي والجيران ..
ابتسمت وقالت : ذكرتيني بجده حمده , توزززززع على الخليقة كلهم وبعد ما توزع تتذكر إنها ما بقت لها ولا حتى ملعقة رز ...
ضحكت حنان وقالت وهي تلف عليها : لا مو لدرجة أنسى نفسي , أكلت الحمد لله ..
ضحكت العنود وقالت وهي تهز أكتافها : هذه جده حمده ولو ما سوت كذا ما تصير حمده ..
زفرت حنان وغطت القدر بالقصدير وهي تقول : ما في زي أم صالح ماشاء الله عليها ..
: القدور جاهزة ؟؟..
انصعقت العنود لمن سمعت الصوت الرجالي ولمن رفعت بصرها وشافته عرفته على طول , كان نسخة منسخة من اللي قابلته في المخزن لكنه بدون الأثر اللي في وجهه , شهقت وهي تجلس على طول محتمية بظهر حنان اللي قالت وهي تلوح بيدها : وراك ..
لف على طول وخرج وهو يقول : وأنا اش دراني ؟؟..
قالت سحر بحدة : يا سلام , مافي شي اسمه حمحمه ..
ضربت العنود خدودها اللي تحسها حاره من الفشلة وهي تهمس : شافني , شافني ..
قالت حنان بضحكه وهي تلف عليها : ماعليك منه هذا دايم الدوم طاير ..
ابتسمت العنود بإحراج وهي تلوم نفسها 100 مرة ليش جات المطبخ , قالت سحر وهي تضرب كتف ماهر : لف على هناك يعلك العافية , خلي البنت تعدي ..
لف وأعطى ظهره لها , أشرت سحر للعنود إنها تعدي عشان يمديه يدخل يشيل القدور , أول ما خرجت العنود وسمع حركتها قال : كيف حالك مرة أخوي ؟؟
ولمن ماسمع ردها قال : يخص عليك حتى مباركة ما باركتيلي ..
ضربته سحر على راسه وطلعت العنود وهي تحس الهوا اختفى من المكان من شدة الخجل , سمعت سحر تهزئه وهو يضحك , هفهفت بيدينها تضيع الحراره اللي تحسها من الخجل وهي تقول : ياربيييييييييي والله فشله , والله فشله ..
كانت تقابل أولاد عمانها وعماتها كثير لكن ما قيد حست بالخجل يقطعها زي اليوم ~ ياربي اش هالإحساس ؟؟ يمكن لأنه أخوه ؟؟ ~ ريحها هالتفكير , فعلا يمكن شعور الخجل كان مضاعف لأنه أخو عدنان وزادها يوم يناديها مرة أخوي ..
: your face is red ..
لفت على سلافة وقالت بعدم استيعاب : ها ..
ضحكت هند وقالت : تقول وجهك أحمر , مو أحمر بس إلا رايح فيها ..
قالت بخجل : قابلت أخوك عشان كذا أحمر ..
شهقت هند وهتفت : خالد ..
ضحكت سلافة على رد فعل هند وعلى العنود اللي هزت راسها بقوة وهي تقول بخوف : لا , ماهر ..
زفرت هند وقالت : أشششششششوه , حسبالي ..
ورجعت حطت يدها على خصرها وهي تقول : والله لا أعلم أرووووج قابلتي زوجها , لا وفاردة الشعر كمان ..
حست العنود في لهجتها شي غريب , رفعت واحد من حواجبها ورمتها بنظرة باردة وهي تقول بصوت غريب : لا قلتيلها قوليها إنه هو اللي دخل بدون مايحمحم ..
وأعطتها ظهرها وتحركت بغيض لغرفة سحر ..
هي من جات وهي حابسة نفسها في غرفة سحر وما تخرج إلا للصالة وبالقوة بعد ما نادتها حنان عشان الشاهي اللي هي أصلا ما تشربه ويوم خرجت تطيح في هالموقف وتجيها هالأفندية اللي ما دخلت لها من زور عشان تبين كإنها هي اللي رمت نفسها قدام ماهر عشان يشوفها , لفت بوزها وهي تجلس على سرير سحر , سحبت عدة أنفاس هدت نفسها فيها وتحركت خارجة للباب اللي يؤدي للدور الثالث اللي هو الملحق , كان عبارة عن صالة فيها بوفيه صغير فيه ثلاجة و حمام وغرفتين وحده محولة مخزن كله عفش و الغرفة الثانية لجاسم وأزهار , دقت الباب ودخلت , شافت أزهار منسدة على ظهرها وهي مغطية وجهها بذراعها اليمين وغارقة في النوم وجنبها الهنوف , ضحكت وتحركت بشويش وهزت الهنوف وهي تهمس : هنيف , هنوفي , بنت , قومي الله يفشلك لو جا جاسم وشافك نايمه مكانه ؟؟
فزت الهنوف من نومها برعب وطالعت فيها , لمن شافت العنود عيونها والحيرة اللي فيها همست خوف تصحى أزهار : إنت في غرفة جاسم وأزهار , إحنا في الرياض ..
ضربت الهنوف جبينها متذكرة , كتمت العنود ضحكها وهي تهمس : قومي يا تحفة نامي تحت ..
قامت عن السرير وهي تقول بصوت منخفض : استحيت أنام تحت وإنتم صاحيين ولمن جيت مع أزهار قالت بتتمدد لأنها تعبانه وما دريت بنفسي إلا وأنا نايمه معاها ..
لحفت العنود أزهار وطفت النور وصكت الباب بعد ما خرجت هي و الهنوف , سألت الهنوف : كم لي وأنا نايمه ؟؟
ضحكت العنود وقالت : ماكملتي ربع ساعه ..
ولفت بوزها وقالت وهي تمسكها : خلينا هنا شوية ..
وجلست في كنب الصالة , وزفرت بضيق وهي تقول : هذي الهند ما دخلت لي من زور ..
قطبت الهنوف حواجبها وقالت : عشان قالتلك قبل العشا انتبهي خالد في الحمام ..
لفت العنود بوزها لمن تذكرت هند وهي تقول لها هالعبارة بتنبيه وهي رايحة تغسل يدينها عشان العشاء وزفرت وهي تقول : لا , مو عشان هالشي , بسسسس ..
سكتت ورجعت قالت بحدة : يختي هي ليه حاطه في بالها إني جاية أستعرض نفسي , أصلا ماكان له داعي تقولي خالد في الحمام لأني ما كنت رايحه للحمام اللي فيه زوجها الأسطوري توم كروز ولا شاروخ خان ..
ضحكت الهنوف وقالت : الله يخس ابليسك لا تسمعك , بعدين اش جاب نصارني وبوذي إنتي وجهك عند واحد مسلم , صدق سخيفة ..
قالت العنود باستنكار : والله من جدي أتكلم , لا يكون بتقعد لي عالطالعة والنازلة قرفففففففففففففففف ..
جلست جنبها الهنوف وطبطبت على كتفها تهديها , سحبت العنود نفس عميق ولفت على الهنوف وقالت بهدوء : خلاص هديت , يلا نتحرك لا تستفقدنا سحر تقول شاردين ..
أول ما خرجوا من الصالة كان يقابلهم باب مقفول يؤدي للسطوح , نزلوا من الدرج واللي كان درج داخلي يوصل لباب في الدور الثاني , فتحت العنود الباب بشويش وهي تقول : سحر ..
ولمن ماسمعت صوت تحركت لداخل الصالة اللي تطل عليها بعض أبواب غرف النوم , خرجت سحر من غرفتها وقالت : وييييييييييييينكم ؟؟
قطعت الهنوف تثاؤبها وقالت العنود بتريقة وهي تأشر عليها : كانت نايمه ف ...
ضربتها الهنوف تسكتها , ضحكت سحر وقالت : إذا نعسانة تعالي نامي ..
ودخلت غرفتها معاهم , تحركت للكنبة الطويلة اللي نقلتها عشانهم لغرفتها وفتحتها وهي تقول : سرقتها من غرفة ماهر , مشتريها خصيييييييص عشان صقر لمن يجي ينام عندهم ..
قالت العنود وهي تتمدد عليها : واو من يومي أحلم بكنبه سرير عشان أفردها لمن تنام عندي سفانة ..
قالت سحر وهي تأشر على سريرها : لووووووو سمحتي إنتي بتنامي على السرير وانا والهنوف بنام على الكنبه ..
قامت وهي تهتف : ليييييييييييييييييييييييه ؟؟ كنت بأنام معاك ..
وحضنت سحر , دفتها سحر اللي ما تحب الأحضان وهي تقول : وخخخخخخخخري عنيييييييييييي , إنتي ما تنامين إنتي تصارعين وقت النوم , مستحيييييييييل أنام معاك ..
بعدت عنها العنود وقالت : لا تتريقييييييييييييين , مو عشانك تنامين وتصحين على نفس الوضعية تتريقين علي ..
شهقت سحر وقالت : قولي ما شاء الله ..
قالت بتريقة : أهبووووووووووووو كنك مصورة بكاميرا , زي ماتنام زي ما تصحى ولا تتقلب ولا ..
وشردت لمن لحقتها سحر وهي تقول باستنكار : لا تحسديني , قولي ما شاء الله ..
ضحكت الهنوف عليهم وتحركت بتعب وانسدحت على الكنبه بدون ما تسنى المخدة , كانت عارفه إنه سحر صادقة , لو هي اللي شاركتها ما بينزعجون لأنه ثنتينهم ما يتقلبون , لكن العنود زي عقارب الساعة تاخذ دورة كاملة حول السرير من كثر حركتها ..
توقفوا عن الصريخ والمصارعة لمن انتبهوا للهنوف اللي طوت يدها اليمين تحت راسها وغاصت في النوم بكامل لبسها وزينتها بلا لحاف أو مخدة , طالعوا في بعض وضحكوا , تحركت سحر وخرجت اللحف والمخدات اللي جهزتها من الدولاب ولحفت الهنوف وحطت مخده تحت راسها , قالت العنود وهي تفك شنطة المحمول : أموووووووت وأعرف هالبنت كيف تنام بكامل زينتها ما أدري , أنا لو ما أفك شعري وأتأكد إنه مافيه حتى بنسة وألبس بجامة قطنية ما أقدر أنام ..
أيدتها سحر وهي تجلس جبنها فوق السرير وهي تقول : مستحيل أنام كذا وبدون لحاف ومخده كمان ..
فتحت العنود محمولها وشهقت لمن تذكرت شي و قالت وهي تطالع فيها بحماس : ما وريتك اخر موقع طحت عليه ..
زفرت سحر وقالت وهي تسحب محمولها وتفتحه : لا ما وريتيني اخر مصايبك , اتحفيني ..
وضحكت على اعتراضات العنود ...
***************************
.
.
.
.
.
.
.
.
.
.
.
بعد 11 يوم :
يوم الأربعاء 9 / 11 / 1427ه :
في جدة بعد العصر في بيت أحمد :
: والله أقولك أكبر منه بست سنين ..
قالت العنود تصحح لأختها : خمس سنين وشهرين ..
ضحكت سفانة وقالت : اش الفرق ؟؟
قالت أسماء بهدوء : يوم يفرق خلي عاد 10 شهور يعني 300 يوم ..
وقفوا عن أشغالهم للحظة قبل ما تهمس العنود بتعجب : ماششششششششاء الله , كيف حسبتيها بهالسرعة ؟؟
طالعت فيهم أسماء بحيرة وقالت : السنة 12 و ...
صرخوا كلهم يوقفونها عن الشرح ورجعوا يتكلمون في أمور وسام و سامر , قالت ريم وهي تطالع في ساعتها اللي أشارت للخامسة : أكيد ملكتهم حتبدأ بعد شوي ..
حطت العنود يدها موضع قلبها وقالت : لا تقولين ملكة لأني يوم أتذكر ملكتي ...
ضحكوا لمن تذكروا هبالتها ذاك اليوم وكيف كان الأمر صاعق لها , لفت ريم على سفانة وقالت برجاء : سفسف الله يخليك أصري على الملكة عشان يضطر عبد الإله ويسويها ..
ابتسمت سفانة بخجل وقالت وهي تلعب بطرف كيس البطاطس اللي فردته العنود بينهم : لا , ماكو ملكة انتهينا , بعدين الجواز تحدد خلاص ...
زفرت ريم وقالت : خسارة ..
قالت العنود بحزم وهي تبعد العصير عن فمها : والله أحلى , من زين الملكة ..
قالت سمية بتريقة وهي توزع أوراق الكوتشينة : ذاقت العسل ودحين تقول من زينه ..
قطبت العنود حواجبها وقالت وهي تسحب أوراقها وتبدأ ترتبها : والله والله والله وجع راس وصدعة , مكالمات ورسايل و كلمات تحاسبين عليها وتعالي شوفي سوء الفهم اللي ماله حدود و .... يعععععععععععععععععع , والله مشاكلها أكثر من محاسنها ...
قالت الخنساء وهي تتأمل أوراقها : هذا وإنتي شوية مكالمات ورسايل أجل لو بهذلك بالزيارات اش بتسوين ..
مطت العنود شفتها ورمت ورقة في الميدان وهي تقول : وععععع , أتخيل نفسي لبس ومكياج وتصنع ماله حدود , الحمد لله اللي أنا في غرب وهو في شرق ..
قالت سمية بتريقة : أحباب على أطراف الدولة ..
هزت الخنساء راسها وقالت وهي تسحب ورقة : عشاق على أطراف البحرين ..
لمن ضحكوا على الوصف ضحكت العنود ضحكة بارده وقالت : ما يضحك , أصلا هو مو على بحر , هو على خليج يا بنت الأدبي , انا علمي وجبتها صح ..
قالت تسكتها : اسم إنه , مويه وبس ..
قالت ريم وهي تحسب الورق اللي في الميدان : تصدقين إنه في ناس مو بس زيارات ..
وأشرت على الهنوف وقالت : هنوفه دورك يا نايمة ..
وكملت وهي تطالع في العنود المستمعة لها بإنصات : يخرجون ويتمشون ولا يقعدون عندهم رجالهم من المغرب للفجر ..
شهقت وقالت باستنكار : إيييييييييييييييييييييش , 12 ساعة ..
وبعدت بلوزتها وتفلت جوتها وهي تقول : برى وبعيد , برى وبعيد ..
هزت سفانة راسها وقالت : طالعوا اللي تقول على جده حمده إنها عندها معتقدات غريبة أجل هالحركة اش تسمينها يا ست عنود ؟؟..
لفت العنود بوزها وقالت وهي تطبق أوراقها مع بعض قبل ما تحط يدها على خصرها : طالعوا مين يتكلم , الست هانك اللي رفضت تتجوز يوم 21 محرم عشان سبب سخيف ..
قالت سفانة باستنكار : مو سبب سخيييييييييييف , بعدين هي أسباب مو سبب واحد بس ..
وطبقت أوراقها وبدأت تعدد على أصابيعها : أولا لو تزوجت في 21 بيكون مافي إلا أسبوعين بين زواج حسان و الهنوف وزواجي تعب وهلاك , ثانيا اش شعور رغد لمن نسرق اليوم اللي مفروض كان يكون يوم زواجها لمجرد إن القاعة ة ومافي يوم متفرغ في محرم إلا هاليوم ..
قالت ريم وهي ترتب الورقة اللي سحبتها : سفسف قلبي , عبد الإله بدأ وظيفته وإحنا بنأثث له في الرياض قدري إن الوقت ضيق والولد مستعجل والإجازة حتبدأ والناس تبغى تسافر , مو معقولة بنحجزهم في البلاد عشان جوازك ...
قالت سفانة بحزم وهي تفرد ورقها : خلاص هالكلام ماله داعي لأنه تحدد زواجي يوم 4/2 ..
وساد صمت في الجو قبل ما تصرخ سمية وهي تأشر على أختها الكبيرة : هذي متى فردت أوراقها ؟؟
قالت بهدوء : لمن كنتم تناقشون المعتقدات الغريبة اللي تسويها العنود ..
طالعوا فيها بصمت دام لثواني قبل ما يكملون لعبهم وسفانة تقول بتريقة : تراني بدأت حرب الجلسريد والليمون على الأكواع والركب , إن شاء الله تفيد إلى يوم الزواج ..
طالعت ريم في أكواعها وقالت : سفانة مايحتاج , ماشاء الله مو ذاك الفرق ..
طالعت سفانة في كوعها وقالت بفرح : بالله , يمكن لأني أستخدم هالخلطة من رمضان و بدأ مفعولها يطلع ..
رفعت العنود تنورتها وطالعت في ركبتها وقالت : وا شكلي أنا اللي أحتاج من جد , شوفي ..
قالت الهنوف باستنكار وهي تضربها على ركبتها : عنووووووووود و مايجوووووووز عورتك هذه ..
قالت الخنساء بتريقة : أنصحك تعالجين بشرتك وتنظفينها استعدادا لجلسات الليزر للشعر أحسن لك ..
تغيرت ملامح العنود لمن تذكرت الحلاوة ووجعها وقالت وهي تسبغ صوتها بنبرة بكاء مسرحية : أها , أحس جسمي يعورني من دحين ..
زفرت سفانة وقالت : المشكلة يوم زواجك مو بس يدينك ورجولك , وجهك وظهرك وبطنك و ...
قاطعتها العنود : خلاص ..
ضحكوا على العنود اللي ما تتحمل وجع الحلاوة , قالت الخنساء وهي تمد يدها : أجل أنا اش أقول !! طالعي ..
كانت الخنساء أكثر وحدة مشعرة فيهم بعد الهنوف , طالعت فيها العنود ورجعت طالعت في يدها لمن شافت الفرق سلمت على يدها ومدت جسمها وسلمت على خد الخنساء وربتت على كتفها وهي تقول بمأساوية : الصبر ضياء يا قلبي ...
ضحكوا على طريقتها , وبعد عدة أحاديث عن عذاب المرأة عشان تتزين لرجال ما يقدر تعبها سألت أسماء فجأة : إيوه صح , ريمان ليه ماجات عهود معاك مادام مابتروح الجواز مع الحريم ؟؟
قالت ريم بتهرب : يمكن عشان هي اللي بتسشور شعر أمي وبتمكيجها ..
قالت سمية : طيب خليها تجي بعد ما تخلص ..
كبتت العنود كل كلمات الكره والحقد اللي بتطلع من فمها وقالت تنهي الموضوع وهي ما تتخيل إنه إحتما تجيهم عهود لأنه أزهار وعدتها إنها بتجي لهم قبل ما يروح جاسم للجواز وبتتعشى عندهم ..
سرحت ريم بأفكارها وهي تفكر بأختها عهود اللي طلعت لها صديقة جديدة غير جيهان والمشكلة إنه شكلها مايطمن زي جيهان , ولمن تذكرت اتصالات أمها بعبد الرحمن اللي حن أخيرا ورد بعد أسبوع متواصل من المكالمات واللي بارك لها ببرود لمن دري بخطبة عبد الإله واللي أعلن بصريح العبارة إنه ما حياخذ إجازه عشان ينزل لجوازه لأنه لازم يجلس الخمس سنوات متواصلة عشان ياخذ الجنسية الأمريكية وهو مهو مفرط فيها عشان جواز على حد قوله ..
: ريمان ..
ابتسمت وقالت : هلا ..
: دورك ..
سحبت ورقة وهي تهتف بداخلها ~ يارب اهديهم عشان الضعيف المريض بالقلب , يا حبيبي يا أبويه , ياحبيبي يا أبويه ~ ..
****************************
بعد العشاء بوقت في الرياض :
في فيلا عبد الكريم :
: أنا أول مرة أشوف ملكة في بيت العريس ..
ضحكت هيام وقالت : عادي ..
زفرت وسام وطالعت في أرجاء غرفة سحر , كانت تحس نفسها في دوامة مالها قرار تحس كل شي حولها يجري جري , أولها موافقة خوالها وأمها اللي ما تدري كيف صارت وبعدها نتيجة تحاليلها اللي صدمتها كيف طلعت في خلال يومين فقط , مافاقت من هالموضوع إلا جاتها زيارة عبد الكريم الرسمية مع حنان وخلود والتوأم وهم جايبين هداياهم كصفعة تأكد لها إنه الموضوع مو حلم , ولمن وصلت بذاكرتها لسلطان اللي أصر قبل أسبوع إنهم يعقدون لهم على الورق ودفع مهر ثاني فوق مهر سامر قامت وهي تبعد طبقات الفستان عشان تشوف الأرض , وقفت وتحركت للمراية الطويلة المعلقة ورى الباب وطالعت في شكلها , مكياجها الخليط من الذهبي ودرجات الزيتي متناسب مع فستانها الفخم العاري اللي فصلت عليه جاكيت ناعم قصير واللي أصرت نجلاء تدفع عليه 2500 عشان يتخيط في أسبوعين , زفرت وسام وهي تتلمس نحرها مستحية من الفتحة اللي رجعتها للخياط مرتين عشان يرفعها شوية و تأملت تسريحتها المرفوعة والمتناثر منها بعض الخصلات ماكانت عاجبتها , تلمست الشال الصغير المربوط ورى قصتها الناعمة والمعقود عند إذنها اليمنى , قالت هيام : والله حلوه التسريحة , اش فييييييييك ؟؟
زفرت مرة ثانية ولفت على هيام وقالت بصوت مخنوق : أحسها مبالغ فيها , حتى المكياج ثقيل و الفستان ...
تحركت هيام ومسكت يدينها اللي انصعقت لمن لقيتها زي الثلج , رصتها بقوة وهمست : وسومه والله حلو , بالعكس إنتي حاطه مكياج عادي , رفضتي مكياج الملكة ناسية مضاربتك مع الكوفيرة ..
همست وسام : أحس كل شي خبط لزق , أحس نفسي في سباق خيل كإنه ...
وغمضت عيونها بقوة , صرخت هيام وهي تهف بيدينها قدام وجهها : لالالالالالا ...
وتلفتت تدور على منديل , جريت وسحبت واحد ولفته بسرعة وهي تقول : إرفعي راسك يا حماره ..
رفعت وسام راسها لفوق وهمست وهي تقاوم دموعها : أنا أكبر منك يا وقحة , اش ياحمارة ؟؟
حطت هيام المنديل في طرف عينها وهمست بحنان : عارفه , ومو بس أكبر مني اليوم إنتي عروسة ..
بعدت عنها وسام وضربتها وهي تقول بعصبية : شكرا هديتيني بشكل فعال ..
قهقهت هيام وقالت وهي ترجع تسحبها وتحط المنديل في طرف عينها : طيب ما بأقول عروس , مملكة مع إني ماني شايفة فرق ..
همست وسام : في مليون فرق , أولها لمن نخلص من هالمسرحية اللي مال أمها داعي بأرجع للبيت معاكم مو مع واحد غريب ..
انفتح الباب ودخلت منه نجلاء المتألقة بجلابية فخمة بلون ذهبي وأحمر وهتفت لمن شافت وسام رافعه راسها وهيام تمسح لها : اش فيه ؟؟
فتحت هيام فمها لكن وسام سبقتها وقالت بابتسامة رقيقة : دخل شي في عيني ومسحته ليه عشان ما يتخرب المكياج ..
تنهدت وقالت : أشوه , على بالي تصيحين ..
ضحكت وسام وقالت : وليش أصيح ؟؟
وكملت وهي تحس نفسها سخيفة : اليوم ملكتي , مو ؟؟
وتغيرت ملامحها لجزء من الثانية لكنها رجعت ضبطتها وهي تبتسم ابتسامة أوسع , تحركت نجلاء وضمتها وهي تقول : بسم الله ماشاء الله , والله أحلى عروس ..
هزت وسام يدها وقالت بتريقة : مين يشهد للعروس !! بعدين مو كل ما شفتيني تقولين أحلى عروس وما أدري اش شكله دحين يقولون فرحانه ببنتها ..
بعدت عنها نجلاء وقالت بابتسامة محبة : وهذا الشي الحقيقي , أنا فرحانه ببنتي ..
ولمن تذكرت قالت : أوووو صح , يلا تجهزي لأنه بنخرج للصالة عشان سامر بيجي ..
تجمدت كل ملامحها وحست بكل شي حولها واقف إلا قلبها اللي ينبض بسرعة , سحبت نفس عميق وهمست وهي تتمسك في هيام : حمام , أبغى حمام ..
هتفت هيام باستنكار : بالفستان , بعدين الحمام برا يعني لازم تخرجين قدامهم ..
قالت بصوت مخنوق : لو مارحت الحمام دحين بأسويها على فراش سحر هنا ..
اندق الباب ووصلهم صوت خلود وهي تقول : ها عمه , جهزنا شريط الزفة وكل شي ..
خرجت نجلاء لبنت أخوها وقالت وهي مبتسمة : دقايق بس ..
وكشرت وجهها وهي تكمل بهمس : متوترة شوية ..
ابتسمت خلود بمحبة وقالت : الله يعينها , أنا بطني مغصتني ..
ولفت على سحر اللي كانت تتأكد من الأشياء اللي على الطاولة , قالت سحر وهي تصب عصير الكوكتيل في الكاسة : أحححححسن فكرة سوتها سلافة ..
ابتسمت سلافة وقالت بتكبر وهي تجهز كاميرا هيام الديجتال : شكرا , أتلقى الشكر على شكل هدايا ..
ضربتها سمر على راسها وقالت : أخوك يالحمارة , لازم تتعبين في ملكته ..
وابتسمت وهي تطالع في الكرسي اللي غطته سحر بحرير ذهبي فوقه تل بنفس اللون متناسب مع عربية الملكة المزينة بورود خليط من الزيتي والأصفر والذهبي زفرت وقالت تأكد كلام توأمها : أحسن فكرة بعيد عن عيون الحريم عشان ما يقارنون وعشان ما تزعل وسام ..
رفعت سحر راسها وقالت : سمر , مو بس وسام اللي كانت معارضة إنها تنزف مع سامر قدام الحريم , بعدين مهي حكاية مقارنة ..
قالت خلود تأييدها : إيوه , كلنا كنا رافضين لأنه مايجوز الحريم يقعدون يتأملون في الرجال حتى لو كان عريس ..
وأشرت على الصالة اللي اقترحت عليهم سلافة إنهم يخلون سامر يدخل فيها على وسام قبل ما يزفونهم من الدرج ومن هناك تنزف وسام للحريم لوحدها ويخرج سامر , وما بيحضر المشهد إلا محارمه من الحريم وكملت : عشان كذا بنخليهم هنا و ..
سكتت لمن دق جوالها , خرجته ولمن شافت الاسم همست : عدنان , ياويلنا ..
وردت عليه وهي تقوله دقايق ويخلي سامر يجي , انفتح باب غرفة سحر وطلت وسام من وراه وهي معلقة قبضة الورد السكري بشريط ستان ذهبي حول معصمها اليسار , أول ما شافتها خلود غطرفت لها , ابتسمت وسام بخجل لمن بدأت الغطاريف تتوالى ونظرات الحريم الموجودات تنصب عليها , دنقت راسها وتلمست فستانها بتوتر , مسكتها هيام ومشتها إلين الكرسي اللي تم تفريغ الصالة من كل شي إلا منه ومن طاولة مقابلة له عليها كاسة العصير المزخرفة تتوسط شمعدانين كبيرة مزينة بنفس الزينة , بدأوا الحريم يسلمون عليها وهم يباركون وأولهم حنان وبناتها ..
******************************
صك جواله ولف على سامر الواقف جنبه وهو يتلمس جانب بشته الأسود بتوتر , ابتسم وقال : خلاص دقايق ويدخلونك ..
صرخة الشباب خلته يبتسم بتوتر وهو يهمس لماهر : إنت كنت تحس بشي من اللي يسوونه لمن كنت بتدخل على أريج ..
هز راسه وسأل بابتسامة عريضة : لا , ليه ؟؟
دنق على إذنه وهمس : أحسهم قاعدين يسوون لي إرهاب اجتماعي ..
قهقه وقال وهو يضربه على كتفه : الله يخسك يالملع .
وقطع لعنته لمن شاف عيون عدنان اللي تطالع فيه باستنكار , ابتسم وقال وهو يطبطب على كتف توأمه : بالتوفيق ..
جا دور سامر إنه يقهقه وهو يقول : تستاهل ...
رن جوال
في الفيلا :
: البنت حتنحرج ..
هزت سحر راسها بعناد وقالت : ما بتنحرج , غرفة عدنان تحت , حتى سامر وماهر نقلوا للغرفة اللي تحت عشان ياخذون البنات راحتهم ..
زفرت خلود وقالت وهي تلف على أمها : أميييي ..
قالت حنان بهدوء : خلود حبيبتي سحر معاها حق , مافي أحد في هالدور غير أبوك اللي أكيد بيكون طول الوقت في الديوانية مع عمك أحمد , الملحق مافي غرفة فاضيه إلا وحده لجاسم ومرته وين يروحون البنات ؟؟ مو معقوله بنومهم في نفس غرفة أبوهم اللي مجهزينها تحت ..
ابتسمت سحر وقالت : أصلا ما حتكون الجيه حلوة لو كنا معزولات , صح سلافه ؟؟
وذابت ابتسامتها لمن شافت سلافه مركبه سماعات ومربعة فوق الكنبه وفي حضنها لاب توبها , زفرت وقالت : ياربي ارحمني ..
وتحركت للمطبخ تشوف تجهيزات الضيافة , شافته واقف عند باب غرفته اللي كان خارج منها و يده الذابله ماسكه قبضته بوهن وهو مسرح في عالم ثاني , ابتسمت وقالت : يا عريس ..
ما التفت لها فضحكت وقالت : عدنان ..
لف عليها ببطء وطالع فيها بعيون خاليه من التعابير , ضحكت وقالت : لساعك في العالم الثاني ..
خرج من سرحانه و انتبه لحظتها لها , ابتسم وقال وهو يتحرك ويصك بابه : خير ..
حركت حواجبها وقالت : اللي ماخذ عقلك يتهنابه ..
ابتسم بهدوء وهو يقول : أمي عزمت مرة كمال ولد محمد ال ... , تراها مالها أهليه ..
قطبت حواجبها وشهقت وقالت : يافضييييييييييحة , نسيناها ..
ورجعت تطلع الدرج بتروح تخبر أمها ووقفت في نص الدرج ورجعت لفت عليه وطالعت فيه بخبث وهي تهمس بصوت ممطوط : هذا بسسس اللي كنت سرحان فيه ؟؟
اتسعت ابتسامته وهو يهز راسه ويتحرك للباب الخارجي , حست بفرح مفاجئ يغمرها ويبعث بداخلها طاقة عجيبة فقالت تغيضه : عنيييييد بتنام عنديييييييييييييي ..
لف عليها بشبه ضحكة وهو يقول بهدوء : روحي لأمي خبريها ..
وكمل طريقه , تأففت سحر وهي تهمس : يا برووودك ..
وطلعت تخبر أمها , أول ما خرج شاف باب الموقف المعدني يرتفع ببطء قبل ما يشوف مقدمة جيب أبوه تبان معلنة وصولهم , وقف للحظة إلين استقرت السيارة وتحرك بعدها لمن انفتح الباب الأمامي وخرج منه عمه أحمد , لكنه تجنب يقرب من السيارة مره , أول ما شافه أحمد تجلت كل ملامح الفرح على وجهه وهو يتحرك له وهو يقول : هلا , هلا والله بالغالي ولد الغالي , هلا ..
قال عدنان بابتسامة وهو يسلم عليه : المهلي ما يولي , هلا فيك , تو ما نورت الرياض يا عم ..
قالت الهنوف مستغلة نزول سامر وجاسم : بعض ناس ترحب وتهلي بحفاوة ما أدري ليش ؟؟ لا وواقفين عننننننننننند الباب ..
قالت أزهار بتريقه وبلغة عربية فصحى : حبيبتي , كرم الضيافة من شيم العرب منذ قديم الزمان ..
العنود اللي من لمحته و حست قلبها بدأ يسابق الريح من سرعة ضرباته قالت بتريقة وهي تضفي الثبات على صوتها المضطرب : لا والله , يعني دحين شايفين نفسكم تحشون زي الأوادم يا حبة الطماطم و أبلة العربي الجديدة ..
ضحكت أزهار وقالت بصدق : هذا تأثير منايا والله , كل تريقاتها باللغة العربية الفصحى ..
قالت بتريقه لمن حست ضربات قلبها بدأت تتباطأ بعد ما اختفى عدنان عن نظرها اللي أشاحته : يبغالكم مية سنة على بال ما توصلون للدكتوراه اللي حصلت عليها في المحشات , روحوا تعلموا أصول التحشيش بعدين تعالوا ..
نزلت الهنوف وساعدت أزهار , قالت العنود من بين أسنانها : تتحركون وتسيبوني أحلف بالله أفجركم ..
قالت الهنوف وهي تفتح المقعدة : ما قلت لك البنت صايرة إرهابية بشكل ..
نزلت العنود وتحركت معاهم للفيلا وهي تحاول قد ما تقدر تتجاهل أعصابها مشدودة ..
: يا أهليييييييييييييييين ويا سهلييييييييييييييييييييين ..
راح توترها أول ماسمعت صوت سحر , انطلقت من بين الهنوف وأزهار وهي فاردة يدينها على الاخر , ضمتها سحر بقوة وهي تقول من بين أسنانها : وحشتينييييييييييي ..
قالت العنود بصدق : وإنت أكثر يا دبه ..
همست سحر عشان مايسمعها أحد : ها كيف عديتي من عند أخويه ؟؟
همست العنود : أطالب بحقي في التزام الصمت حاليا ..
قهقهت سحر وابتعدت عنها وهي تقول : العنود هي العنود ..
ولفت ترحب بالهنوف وأزهار , حست العنود بكل الإحراج يرجع لها لمن شافت حنان وخلود , سلمت عليهم بهدوء , قالت حنان باستغراب : عنود حبيبتي , تعبت من الطيارة ..
ابتسمت العنود بأدب وهمست كاذبه وهي تسبل عيونها و تحط يدها على جبينها : ما عليك يا خاله , شوية صداع بس ..
تبادلت سحر والبنات نظرة سريعة وهم يكتمون ضحكهم على العنود اللي مو مناسبها دور الهادئة الخجولة , طلعوا لصالة الدور الثاني وهناك جاتهم سلافة تسلم عليهم ..
نص ساعة وأذن المغرب , قامت خلود وقالت لأزهار إنها تتفضل معاها عشان توريها غرفتها اللي بتجلس فيها , وأشرت لهم سحر على غرفتها وهي تفتح صندوق خشبي مزين بجانب طاولة التلفزيون الكبيرة اللي تتوسط كنب الصالة , أصدرت صوت مزعج قبل ما ترمي نفسها على سرير سحر , شهقت الهنوف وقالت باستنكار : عنووووووووود ..
ابتسمت سحر وهي شايلة السجاجيد وشراشف الصلاة وقالت : اش فيك ؟؟
قالت العنود بصوت مخنوق من المخدة اللي دافنة وجهها فيها : الأدب متعب ..
ورفعت راسها لمن ما سمعوها وقالت بهمس وهي تطالع جهة الباب خوف يدخل أحد : الأدب متعب ..
ضحكوا عليها وقالت سحر من وسط ضحكها : والله إنت اللي متعبة نفسك وقاعدة قعدة رسمية والأدب اللي مو لايق عليك نهائيا مشكل هالة حولينك , يختي أمي تعرفك وتعرف خبالك , كلنا نعرفك من قبل ما نخطبك وتصرين زوجة عدنان , بالمختصر ماله داعي هالمسرحية اللي معيشة نفسك فيها ..
ماوقفت الهنوف عن الضحك وهي تقول : لا , إنت ما تدرين عن اللي صار , وحده من جاراتنا جات ورمت صواعق وتوكلت على بيتها كنها ما سوت شي ..
قالت العنود بحقد وهي تجلس مربعة فوق السرير : والله ما أسامحها الكللللللللبة , يوم القيامة ربي بيحاسبها على الظلم اللي ظلمتني إياه ..
قالت سحر وهي تفرش السجادة على الأرض : وهي كمان ربي بيحاسبك على السب اللي سبيتيها إياه ..
زفرت العنود وقالت بقهر : من حر مافيني منها , جات رممممممت في الكلام وانقلعت بيتها وأراهنك بحياتي إنها شخرت وحلمت من زود الوناسة وأنا طول ليلي وأنا أحترق ...
قالت الهنوف تفسر لها لمن شافت عدم الفهم على ملامحها : شوفي يا حبيبتي , هذي جارتنا أم حمد ..
قالت العنود بغيض : أم نكد ..
هزت الهنوف وقالت تطاوعها : أم نكد , ولمن دريت إننا جايين الرياض عشان زواج أخوانك قامت ترمي في الكلام وإنه العنود أكيد مبسوطة وغيره كله عشان بتقابل عدنان وإنه أصلا هذا غرضها من الزيارة ..
رمت العنود نفسها على ورى ورافست بيدينها ورجولها وهي تقول بغيض : قاهرتنيييييييي قاهرتنيييييييييي ..
ووقفت عن الرفس وجلست زي الأطفال مفرقة رجولها وهي تقول بتريقة والغيض واضح في كل حرف من حروفها : لا واللي يزيدك قهر كانت تبتسم , تبتسم , ومو بس كذا , مضيقة عيونها بخبث يعني يعني كشفتك..
وابتسمت ابتسامة مسرحية وهي تهز راسها وتكمل : وأنا كان لازم زي الهبلة ابتسم بخجل وأهز راسي قبل ما أدنقه لزوم المسرحية وانا من جوة ...
وأشرت على صدرها وهي تقول بصوت ثقيل : غليان , ودي ببازوكة ولا ماجنوم عشان أفرغه فيها , تمنيت لو بيدي مطرقة أهد لها سنونها فيها ..
كانوا غرقين في الضحك وهي تشرح مشاعرها بحماس , قالت سحر بتريقة وهي تغمز لها : يعني يعني بكلامك تراني جاية للواجب يا سحر مو عشان سواد عيون أخوك , اعترفي اعترفي , لو مو عدنا ....
صرخت العنود تقاطعها وهي تسحب المخدة : يا حماره ..
شردت سحر لمن رمت العنود المخدة بكل قوتها , في ثواني تفادت سحر المخدة وضربت المخدة في وجه حنان اللي توها دخلت , صرخوا كلهم بصدمة وغطت الهنوف فمها بيدينها وهي تطالع برعب في حنان اللي طاحت المخدة عند رجولها , نطت العنود من السرير وجريت لها وهي تقول بتلعثم : وا خالتي أنا اسفة , والله قصدت سحر , والله , أنا , قصدي ..
وانحنت بسرعة وشالت المخده وضمتها لصدرها وهي تطالع في حنان بوجه محمر وهي مهي عارفه اش تسوي , انفجرت سحر بالضحك واستندت على دولابها وهي ماسكة بطنها من كثر الضحك وحمحمت الهنوف وهي تبلع ريقها مصعوقة من اللي صار , ابتسمت حنان وقالت : لا عا ...
قالت العنود بسرعة وهي ضامة المخدة بيد واليد الثانية تمسد فيها كتف حنان : خالتي والله ما شفتك وإنت داخلة و ...
قاطعتها حنان بلطف : عادي اش فيك ؟؟ أنا عارفه إنك ما شفتيني ..
وكملت بلهجة عادية عشان تبين للعنود إنه الموضوع عادي : صلوا وتعالوا عشان تشربون الشاهي ..
وخرجت , ~ أنا ليه كذا ؟؟ ليه دايما أطيح في هالمواقف ؟؟ ليه ... ~ خرجت من أفكارها على ضحك سحر اللي تحول لتأوهات وهي تمسك بطنها , لفت بحقد عليها وهي تقول من بين أسنانها : يا نذله ..
وجريت لها , صرخت سحر وحاولت تنط من فوق السرير لكن العنود مسكتها ورمتها على السرير وجلست فوقها بكل ثقلها وهي تقرصها وتقول : أوريييييييييييييك الضحك الزايد يا دببببببببببببببببببببببببببببببببب , قولي توبه ما عاد أضحك عليك ..
: ماني قايله ..
زادت في ضغطها على جسم سحر اللي تأوهت من كثر الإختناق وهي تقول : قولي تووووووووووبه ..
: ماني قا ...
وصرخت لمن قرصتها العنود : اي يا عمود الكهرب يالعصلا قومي عني ..
جريت الهنوف وصكت باب الغرفة خوف ترجع حنان وتشوف هالمنظر ..
****************************
بعد وجبة العشاء فيلا عبد الكريم :
في مجلس الرجال :
انتبه عدنان لنظرات منصبة عليه وهو يصب الشاهي الأخضر , التفت وانصدم لمن شاف أربع أزواج عيون تطالع فيه , قطب حواجبه وكشر في وجه التوأم وسطام وصقر ولف على جده سلطان و بدأ يباشر عليه وعلى أعمامه والموجودين , أبوه ذبح ذبيحيتين وعزم كل الأهل و الجيران ترحيب في أحمد وجاسم وأصر يسوي هالعشاء رغم إنه أحمد اعترض لأنه الزواج بيكون بعد يومين و بيكون فيه ذبايح وعشاء , لف وقال وهو يباشر على عمه عبد العزيز : خير تطالعون فيني ..
قال ماهر وهو مسمر عيونه على أخوه : صراحة أحييييييي فيك هالقوة ..
هز سامر راسه مؤيد له وهو يقول بسخرية : سجلني واحد من المعجبين فيك ..
ضحك ولف على سطام وهو يقول متسائل : اش يخربطون ذولي ..
ابتسم سطام بصمت وقال صقر بهمس : من أول نتكلم عن إنك ما اتصلت ترحب في بعض ناس ولا طلبت تقابلهم ..
طالع ماهر في ساعته وقال : ست ساعات ونص من وصلت وإلى الان متمالك نفسك ..
طالع فيه وكمل بهمس جدي : صراحة هي واحد من اثنين , يا إنك بارد ما عندك مشاعر أو إنك متضارب معاها ومخبي على الكل ..
انصدم عدنان من كلمته لكنه التزم الصمت , كشر في وجههم وتحرك , حط الصينية اللي فرغت من فناجين الشاهي على الطاولة وسرح لثانية قبل ما تتسع عيونه عن اخرها وصوتها يدوي من أعماق سحيقة ~ بارد لوح ثلج ~ رفع راسه بصدمة لمن تذكر وصفها له في المدينة بعد التصادم في المصعد , وفي لمح البصر استرجع عقله هالموقف اللي غاب عن باله ..
: عدنان ..
لف على جده اللي ناداه وتحرك بسرعة يتناول الفنجان من جده اللي قال : روح قولهم يسوون شاهي أحمر بالنعناع لي وللشياب ..
ابتسم عدنان وتحرك , خرج من المجلس وتحرك للمطبخ وهو يقول بصوت عالي : يا أهل البيت , طريق ..
كان حريص إنه يعلن وجوده لأنه عارف إنه البيت صار مزدحم , دخل المطبخ وابتسم لمن شاف أمه وخلود في المطبخ وقال : جدي يبغى شاهي ...
لفت خلود وهي شايلة الصينية وقالت بابتسامة : أحمر منعنش ..
تناول منها الصينية وهي تكمل : أمي جهزته من بعد الشاهي على طول ..
ابتسمت حنان وقالت : خلاص حفظت عمي حفظ ..
ابتسم وتحرك وبلا شعور وقف عن المشي وطالع في الدرج ~ يكون هي تفكر نفس تفكيرهم ,.... ما أظن , بسسسس .... ~ لمن انتبه لنفسه زفر ورص الصينية وتحرك وكلماتها تدوي بعقله مرة ثانية وثالثة , أول ما دخل المجلس سمع جده يقول بحده وهو يأشر بعصايته على عبيد و أسامة : تحركوا يمال العافية , قوموا تحركوا ساعدوا أولاد عمكم ..
قام عادل بسرعة وتناول الصينية من عدنان , لف أسامة بوزه وقال بتريقة : ماهر وسامر جالسين , نقوم إحنا ..
قال عبيد وهو يضحك : عرسان ما يتحركون ..
زفر وضرب صدره وهو يقول : ياحسرتي متى يقولون عني عريس ..
ضحك ماهر وقال بتريقة : هانت يا ولد الناس , كلها كم شهر ويتزوج سطام وكم شهر يخطب صقر وبعدها كم شهر ويتزوج و بعدها بكم شهر تخطب و بعدها بكم شهر تتزوج ..
ومسك سامر ضحكه وهو يقول بتريقة : لو جمعناها يعني بعد ثلاث سنين إن شا ..
قال أسامة بحدة : تفل من فمك , اش بيصبرني ثلاث سنين أنا ..
ولف على أخوانه وقال بعصبية : تجوزوا ..
قهقه الشباب عليه وقال جاسم من وسط ضحكه : والله ذكرني بحسان ..
لف سلطان بحده وقال : هي إنت , على إيش تصارخ ..
زفر أسامه وقال بحسرة : ودي أغني ..
زاد ضحك الشباب لمن قال جده : غني ..
كان معروف إنه صوته أحلى صوت بينهم , حمحم وقال بصوت رخيم : انصر عبادك , انصر عبادك , انصر عبادك ياربي انصر عبادك , أوقينا نارك , أوقينا نارك , أوقينا نارك يا ربي أوقينا نارك ..
أشر على أبوه وهو يكمل غناه : والعزوبية , العزوبية , العزوبية يا يبه طالت عليه ..
قهقه كل من في المجلسو وهو كمل بلا اهتمام : قوم أخطبلي , قوم أخطبلي , قوم أخطبلي يا يبه وحده حورية ..
حط عبيد يده على فمه يسكته وهو يضحك , قال عبد العزيز وهو يحمحم بعد ما قهقه من قلبه على خبال ولده : خلص دراستك الأول و ..
قال سلطان يقاطع ولده مخاطب أسامة : أشر على اللي تباها وتوصلك بكرة ..
وضرب صدره وهو يقول : والمهر والقصر علي ..
قال عبد العزيز باعتراض : أبويه , ومن فين يعيش بنت الناس , بالألف اللي ياخذها من الكلية , خله يتوظف وأنا أجوزه ثاني يوم من استلام الوظيفة ...
ولمن بدأ نقاش حامي بين الكبار عن الوظائف والبطالة وغلاء المهور , أشر سطام بيده , قال أسامة بعدم اهتمام : زين جبتلهم هرجة , قال فضحتكم قال ..
قال طارق بطفش : والله الزواج سجن ..
لف عليه أسامة وقال بحدة : هذا اللي دايم تقولونه يالمتزوجين , سجن , سجن , والله منتم حاسين بالنعمة اللي انتم فيها ..
قال عدنان وهو يضحك : هذا كلامك وإنت ما عشت حياة العزوبية المزبوطة ..
ولف على جاسم وهو يسأله : ولا ؟؟..
قال جاسم : الله يسعدك لا تذكرني بذيك الأيام , لا أكل زي الناس ولا ملابس نظيفة زي باقي الأوادم ولا ...... أففففف ما ودي أتذكرها ..
قال أسامة بسخرية : ما في اختلاف بين حياتي وحياتكم ..
سكت الكل وعلا الوجوم وجوههم وهم يفكرون بأمه ولمن شاف جاسم تعابير وجيههم التزم الصمت هو الاخر رغم إنه ما كان فاهم السبب في هالبرود اللي ساد الجو فجأة , قال أسامة بتريقة ينهي الجو اللي ساد بعد كلمته : خير , هذا كله حزن على حالي , جيبوالي عروسة وأنا أنبسط ..
رجعوا ضحكوا وعبيد يقول : يالله يارب تزوجه في أقرب وقت وتفكنا من رجته ..
*************************
في داخل الفيلا :
ضحكت العنود وقالت وهي تلعب في شعرها بدلع : طبببببببعا ودهم يشوفوني , مو انا العنود ..
قالت أزهار بتريقة : والله ودهم يشوفونك لأنك حرمممممممم السيد عدنان مو عشانك العنود ..
ضحكت الهنوف على وجه العنود اللي تغير وهي تضرب أزهار على فخذها يعني اشكتي وقالت سحر من وسط ضحكها : حرام عليك طيحتي خشمها ..
رفعت راسها بتكبر وقالت : لسه ماجابته أمه اللي يكسر خشمي ..
رموها بنظرات ساخرة , لفت بوزها وقالت بتساؤل : عندكم شك ؟؟..
قامت أزهار وقالت : يلا أستأذن , بأروح الغرفة ..
تبعتها الهنوف وهي تقول : استني بأجي معاك ..
طالعت فيهم العنود بعيون متسعة ولفت بحدة على سحر اللي ابتسمت وقالت وهي تقوم : أشوف أمي تحتاج شي و لا ...
مسكتها العنود وجلستها وهي تهتف : يا حمييييييييييييييير اش قصدكم بهالحركات ؟؟
ضحكت سحر وقالت وهي تهز أكتافها : أنا اش ذنبي تجريني , ما أدري اش قصدهم ,
أنا بريئة بأروح لأمي ..
حطت يدينها على خصرها وقالت : لا والله , على مين تكذب ...
وقطعت كلامها لمن شردت سحر من قدامها , صرخت وهي تلحقها : سحووووووروووووو ..
وتصنمت عند العتبة وهي تذكر نفسها إنها في بيته , حمحمت ورجعت للمرايا , عدلت وضع بلوزتها القطنية الصفراء المزينة بفراشات ملونة بالأسود و اللي لبستها على تنورة سوداء , تأكدت من شكلها ومسدت شعرها وخرجت , كانت تمشي بحذر وهي تقول : سحر , سلافة , خالتوووو ..
لمجرد إنها تبين وجودها , ابتسمت لمن قابلتها هند , قالت هند بابتسامة : سحر تحت في المطبخ مع عمتي وخلود ..
ابتسمت العنود شاكرة وتحركت نازلة وهي تقول بداخلها ~ ماشاء الله هالكشخة كلها وهي في عشاء عادي ما في أحد , اش بتسوي يوم الزواج ؟؟ ياربيييييييييي أكيد بيقعدون الناس يقارنون و ... عنيييييييييييد من متى تحسين بعدم الثقة و ~ وصلها صوت هند وهي تقول : انتبهي وإنت نازله لا يشوفك أحد من الرجال يكون جاي من المطبخ ولا شي , نبهي عن وجودك ..
ابتسمت لهند وطنشتها وكملت طريقها ورجعت خصلات شعرها اللي تركته طليق لورى بحركة مسرحية وهي تقول لنفسها : أنا عنيد مافي مني اثنين ..
لمن وصلت للدورالأرضي حست بخفقات قلبها تزيد فقالت بسرعة : سحر ..
: هنا في المطبخ ..
زفرت براحة لمن سمعت صوت سحر , تحركت وهي تمتم لنفسها بغيض : خببببببله اش هالخوف والتوتر يا غبية , خلي عنك الرومانسية الزايدة ما أظنه بيفكر إنه يتحين الفرصة عشان يشوفك , مالت عليه ..
دخلت المطبخ وابتسمت وهي تقول : أنا جييييييييييييت ..
لفت خلود وقالت بتريقة : أهلا وسهلا عنود , توك رجعتي العنود اللي نعرفها من أول ساكته و ..
ضحكت العنود بحرج أول ما قالت خلود كلامها وتحركت لداخل المطبخ وهي تستمع لباقي الحديث وأول ما قربت من خلود دعست رجلها وهي تهمس من بين أسنانها : اشششش لاتخليني أحطك في القائمة السوداء تراني لا صرت عدوة أصير شييييييييييينه ..
ضحكت خلود من قلبها , كانت تسمع عن العنود وحركاتها من سحر وسلافة أكثر الناس اتصالا بها وهي كمان كانت تعرف وتشوف بعض هالحركات أيام كانوا ساكنين في جدة قبل زواجها بكم سنة لكنها ما توقعت حركتها هذه , ابتسمت لها العنود ابتسامة رقيقة قبل ما تفتح عيونها على اتساعها تحذير , زاد ضحك خلود وكل اللي في المطبخ ملتفت لهم مو فاهم سبب ضحكها , قالت حنان بابتسامة : خير يا خلود , ضحكينا معاك ..
وسألت سحر بحماس : اش عندكم ؟؟
الفت عليهم العنود وابتسمت ببراءة وهي تهز أكتافها يعني ما أدري اش فيه , ضربتها خلود على كتفها وتحركت خارجة من المطبخ وهي تقول : تذكرت شي ضحكني ..
ضيقت سحر عيونها وطالعت في العنود , طالعت فيها العنود ببراءة مصطنعة , همست سحر : والله بعيد البراءة عنك ..
فرصعت العنود عيونها بحدة وهي تأشر براسها على حنان اللي كانت ماسكة المغرفة الكبيرة تحط بقايا الرز في قدر كبير , ابتسمت سحر وقالت : إيييييوه , دحين العنود ..
تجاهلتها العنود ولفت على حنان وهي تسأل : خاله اش تسوين ؟؟
قالت وهي تأشر لشغالة هند إنها تناولها القصدير : الزايد دايم أخلي منه شوية لبكرة والباقي أوزعه على عمتي أم عبد الكريم وأمي والجيران ..
ابتسمت وقالت : ذكرتيني بجده حمده , توزززززع على الخليقة كلهم وبعد ما توزع تتذكر إنها ما بقت لها ولا حتى ملعقة رز ...
ضحكت حنان وقالت وهي تلف عليها : لا مو لدرجة أنسى نفسي , أكلت الحمد لله ..
ضحكت العنود وقالت وهي تهز أكتافها : هذه جده حمده ولو ما سوت كذا ما تصير حمده ..
زفرت حنان وغطت القدر بالقصدير وهي تقول : ما في زي أم صالح ماشاء الله عليها ..
: القدور جاهزة ؟؟..
انصعقت العنود لمن سمعت الصوت الرجالي ولمن رفعت بصرها وشافته عرفته على طول , كان نسخة منسخة من اللي قابلته في المخزن لكنه بدون الأثر اللي في وجهه , شهقت وهي تجلس على طول محتمية بظهر حنان اللي قالت وهي تلوح بيدها : وراك ..
لف على طول وخرج وهو يقول : وأنا اش دراني ؟؟..
قالت سحر بحدة : يا سلام , مافي شي اسمه حمحمه ..
ضربت العنود خدودها اللي تحسها حاره من الفشلة وهي تهمس : شافني , شافني ..
قالت حنان بضحكه وهي تلف عليها : ماعليك منه هذا دايم الدوم طاير ..
ابتسمت العنود بإحراج وهي تلوم نفسها 100 مرة ليش جات المطبخ , قالت سحر وهي تضرب كتف ماهر : لف على هناك يعلك العافية , خلي البنت تعدي ..
لف وأعطى ظهره لها , أشرت سحر للعنود إنها تعدي عشان يمديه يدخل يشيل القدور , أول ما خرجت العنود وسمع حركتها قال : كيف حالك مرة أخوي ؟؟
ولمن ماسمع ردها قال : يخص عليك حتى مباركة ما باركتيلي ..
ضربته سحر على راسه وطلعت العنود وهي تحس الهوا اختفى من المكان من شدة الخجل , سمعت سحر تهزئه وهو يضحك , هفهفت بيدينها تضيع الحراره اللي تحسها من الخجل وهي تقول : ياربيييييييييي والله فشله , والله فشله ..
كانت تقابل أولاد عمانها وعماتها كثير لكن ما قيد حست بالخجل يقطعها زي اليوم ~ ياربي اش هالإحساس ؟؟ يمكن لأنه أخوه ؟؟ ~ ريحها هالتفكير , فعلا يمكن شعور الخجل كان مضاعف لأنه أخو عدنان وزادها يوم يناديها مرة أخوي ..
: your face is red ..
لفت على سلافة وقالت بعدم استيعاب : ها ..
ضحكت هند وقالت : تقول وجهك أحمر , مو أحمر بس إلا رايح فيها ..
قالت بخجل : قابلت أخوك عشان كذا أحمر ..
شهقت هند وهتفت : خالد ..
ضحكت سلافة على رد فعل هند وعلى العنود اللي هزت راسها بقوة وهي تقول بخوف : لا , ماهر ..
زفرت هند وقالت : أشششششششوه , حسبالي ..
ورجعت حطت يدها على خصرها وهي تقول : والله لا أعلم أرووووج قابلتي زوجها , لا وفاردة الشعر كمان ..
حست العنود في لهجتها شي غريب , رفعت واحد من حواجبها ورمتها بنظرة باردة وهي تقول بصوت غريب : لا قلتيلها قوليها إنه هو اللي دخل بدون مايحمحم ..
وأعطتها ظهرها وتحركت بغيض لغرفة سحر ..
هي من جات وهي حابسة نفسها في غرفة سحر وما تخرج إلا للصالة وبالقوة بعد ما نادتها حنان عشان الشاهي اللي هي أصلا ما تشربه ويوم خرجت تطيح في هالموقف وتجيها هالأفندية اللي ما دخلت لها من زور عشان تبين كإنها هي اللي رمت نفسها قدام ماهر عشان يشوفها , لفت بوزها وهي تجلس على سرير سحر , سحبت عدة أنفاس هدت نفسها فيها وتحركت خارجة للباب اللي يؤدي للدور الثالث اللي هو الملحق , كان عبارة عن صالة فيها بوفيه صغير فيه ثلاجة و حمام وغرفتين وحده محولة مخزن كله عفش و الغرفة الثانية لجاسم وأزهار , دقت الباب ودخلت , شافت أزهار منسدة على ظهرها وهي مغطية وجهها بذراعها اليمين وغارقة في النوم وجنبها الهنوف , ضحكت وتحركت بشويش وهزت الهنوف وهي تهمس : هنيف , هنوفي , بنت , قومي الله يفشلك لو جا جاسم وشافك نايمه مكانه ؟؟
فزت الهنوف من نومها برعب وطالعت فيها , لمن شافت العنود عيونها والحيرة اللي فيها همست خوف تصحى أزهار : إنت في غرفة جاسم وأزهار , إحنا في الرياض ..
ضربت الهنوف جبينها متذكرة , كتمت العنود ضحكها وهي تهمس : قومي يا تحفة نامي تحت ..
قامت عن السرير وهي تقول بصوت منخفض : استحيت أنام تحت وإنتم صاحيين ولمن جيت مع أزهار قالت بتتمدد لأنها تعبانه وما دريت بنفسي إلا وأنا نايمه معاها ..
لحفت العنود أزهار وطفت النور وصكت الباب بعد ما خرجت هي و الهنوف , سألت الهنوف : كم لي وأنا نايمه ؟؟
ضحكت العنود وقالت : ماكملتي ربع ساعه ..
ولفت بوزها وقالت وهي تمسكها : خلينا هنا شوية ..
وجلست في كنب الصالة , وزفرت بضيق وهي تقول : هذي الهند ما دخلت لي من زور ..
قطبت الهنوف حواجبها وقالت : عشان قالتلك قبل العشا انتبهي خالد في الحمام ..
لفت العنود بوزها لمن تذكرت هند وهي تقول لها هالعبارة بتنبيه وهي رايحة تغسل يدينها عشان العشاء وزفرت وهي تقول : لا , مو عشان هالشي , بسسسس ..
سكتت ورجعت قالت بحدة : يختي هي ليه حاطه في بالها إني جاية أستعرض نفسي , أصلا ماكان له داعي تقولي خالد في الحمام لأني ما كنت رايحه للحمام اللي فيه زوجها الأسطوري توم كروز ولا شاروخ خان ..
ضحكت الهنوف وقالت : الله يخس ابليسك لا تسمعك , بعدين اش جاب نصارني وبوذي إنتي وجهك عند واحد مسلم , صدق سخيفة ..
قالت العنود باستنكار : والله من جدي أتكلم , لا يكون بتقعد لي عالطالعة والنازلة قرفففففففففففففففف ..
جلست جنبها الهنوف وطبطبت على كتفها تهديها , سحبت العنود نفس عميق ولفت على الهنوف وقالت بهدوء : خلاص هديت , يلا نتحرك لا تستفقدنا سحر تقول شاردين ..
أول ما خرجوا من الصالة كان يقابلهم باب مقفول يؤدي للسطوح , نزلوا من الدرج واللي كان درج داخلي يوصل لباب في الدور الثاني , فتحت العنود الباب بشويش وهي تقول : سحر ..
ولمن ماسمعت صوت تحركت لداخل الصالة اللي تطل عليها بعض أبواب غرف النوم , خرجت سحر من غرفتها وقالت : وييييييييييييينكم ؟؟
قطعت الهنوف تثاؤبها وقالت العنود بتريقة وهي تأشر عليها : كانت نايمه ف ...
ضربتها الهنوف تسكتها , ضحكت سحر وقالت : إذا نعسانة تعالي نامي ..
ودخلت غرفتها معاهم , تحركت للكنبة الطويلة اللي نقلتها عشانهم لغرفتها وفتحتها وهي تقول : سرقتها من غرفة ماهر , مشتريها خصيييييييص عشان صقر لمن يجي ينام عندهم ..
قالت العنود وهي تتمدد عليها : واو من يومي أحلم بكنبه سرير عشان أفردها لمن تنام عندي سفانة ..
قالت سحر وهي تأشر على سريرها : لووووووو سمحتي إنتي بتنامي على السرير وانا والهنوف بنام على الكنبه ..
قامت وهي تهتف : ليييييييييييييييييييييييه ؟؟ كنت بأنام معاك ..
وحضنت سحر , دفتها سحر اللي ما تحب الأحضان وهي تقول : وخخخخخخخخري عنيييييييييييي , إنتي ما تنامين إنتي تصارعين وقت النوم , مستحيييييييييل أنام معاك ..
بعدت عنها العنود وقالت : لا تتريقييييييييييييين , مو عشانك تنامين وتصحين على نفس الوضعية تتريقين علي ..
شهقت سحر وقالت : قولي ما شاء الله ..
قالت بتريقة : أهبووووووووووووو كنك مصورة بكاميرا , زي ماتنام زي ما تصحى ولا تتقلب ولا ..
وشردت لمن لحقتها سحر وهي تقول باستنكار : لا تحسديني , قولي ما شاء الله ..
ضحكت الهنوف عليهم وتحركت بتعب وانسدحت على الكنبه بدون ما تسنى المخدة , كانت عارفه إنه سحر صادقة , لو هي اللي شاركتها ما بينزعجون لأنه ثنتينهم ما يتقلبون , لكن العنود زي عقارب الساعة تاخذ دورة كاملة حول السرير من كثر حركتها ..
توقفوا عن الصريخ والمصارعة لمن انتبهوا للهنوف اللي طوت يدها اليمين تحت راسها وغاصت في النوم بكامل لبسها وزينتها بلا لحاف أو مخدة , طالعوا في بعض وضحكوا , تحركت سحر وخرجت اللحف والمخدات اللي جهزتها من الدولاب ولحفت الهنوف وحطت مخده تحت راسها , قالت العنود وهي تفك شنطة المحمول : أموووووووت وأعرف هالبنت كيف تنام بكامل زينتها ما أدري , أنا لو ما أفك شعري وأتأكد إنه مافيه حتى بنسة وألبس بجامة قطنية ما أقدر أنام ..
أيدتها سحر وهي تجلس جبنها فوق السرير وهي تقول : مستحيل أنام كذا وبدون لحاف ومخده كمان ..
فتحت العنود محمولها وشهقت لمن تذكرت شي و قالت وهي تطالع فيها بحماس : ما وريتك اخر موقع طحت عليه ..
زفرت سحر وقالت وهي تسحب محمولها وتفتحه : لا ما وريتيني اخر مصايبك , اتحفيني ..
وضحكت على اعتراضات العنود ...
***************************
تعليق