شايف دها حوّا المعتّق على اصول
خلاّني اصل للسحاب وحذفني

لدّت وهّدت لين حسيتها تقول
شفتك وهديت الخطاوي وشفني

وانا خويّك قلت ماهوب معقول
نسيت ورضيت وقتها من يصفني

عاتبت نفسي بين واعي ومذهول
ورميت لك في بحر هالسّود سفني

كم كنت قاتل قلت كم كنت مقتول
من صوبّت صدر الحنين ونزفني

وشكبر عذري فرحتي بس اناحّول
بقيت الأول وانت ساذج ياجفني

تغيرت ماهو دلع بنت وزعول
تبي بعد عمرٍ طويل تعسفني

دوب اتلاحق واصلق القوم بالقول
معيوفةٍ توحي للانظارعفني

أنا أقترفت الذنب الاوّل ومسؤول
لا والهوى صادف جهل واقّترفني

الٌعود انالطفل وعلى خبرها الغول
العود انا ماكل بنت تعزفني

الريح انا ماعاند الريح غرمول
بارجع بكل أشياءها تكتشفني

باسهر على العناب واسهر اللوّل
وابرد ونفس أنفاسها تلتحفني

بس اعترف في عظمة لساني اقول
لها عليّ وحده والايام تفني

غنج وجرجرني وسايست مشغول
برمشٍ يقول اياك الاخر.. وخفني

بسمة نظر مني وصدت على طول
ماكنها بنت الحرام تعرفني