على عيوني غمامة حزن تمطر هموم
ولا انبتت في خفوقي غير عشب الزهر

والحال هذا لو يطول معاي ولو يدوم
أخاف يزرع بساتين ويكون نهر

يا سارقة من عيون المحب (حمدان) نوم
الليل رجَع علي النوم .. ليه السهر ؟؟

ليه السهر دام قلبي من غلاك محروم ؟؟
وأنا في حبك أذوب !! وعاشق ومنبهر

العام كنت أستلذ الشوق في كل يوم
واليوم!! ماغير مرة واحدة بالشهر

تروم تزعل علي؟؟ لكن أنا ما أروم
لايمكن أزعلك في سر ولا جهر

جمالك "المحتشم"خلاك شخص محشوم
و"عفافك" النادر يزيدك في عيني" طهر"

مثل القمر نور "وجهك" في الظلام الكتوم
واذا تبسمت مثل الشمس عند الظهر

لو ان عمري مُهر قربك أنا قبل أسوم
أنا اللي باسوق العمر لأجلك مهر

ولا تصير خصمي أنا ماني باهاب الخصوم
وشلون أهاب البشر ؟؟ وأنا ما أهاب الدهر

الله خلقني على الدنيا "حصانٍ" عزوم
عسفني ~ محمد المكتوم ~ وأنا مُهر

لو النجومية تورَث عيال النجوم
من باب حب الظهور الشخص منهم ظهر

الشهرة تغير العالم بوجه العموم
لكن ما غيرت (حمدان)يوم اشتهر