قالت مادام الهجر ما منه مصلوح
خفف من السرعه اشويه و حاسب

فكر قبل ما تنوي البعد و اتروح
هل القرار اللي خذيته مناسب؟

الكل عينه من الحزن دمع مسفوح
والكل قلبه من الضغينه رواسب

صحيح ما يقسم للانسان في اللوح
ما يقاس بالنسبه ولا بالتناسب

لا تحاسب اللي له في خفاقك جروح
الله سبحانه هو اللي يحاسب

شهوة جسد مكبوحه بعفة الروح
الحب ماله من وراها مكاسب

قلت النصيحه جات والدرس مشروح
مايصير في يوم الفراق انتحاسب

قالت هذا ماهو نصيحه لمنصوح
هذا بلا تجريح شخصي ولا سب

كان اختبار اشواق قدام ماتبوح
مع انك اذكى شخص , طلعت راسب

قالت مدام الهجر ما منه مصلوح
خفف من السرعه اشوي و حاسب