الهرج فضه والذهب مايشبهه غير السكات
والطيب أقدر سواليفه واحسب منطقه

والشاعر اللي ضاقت بوجهه وسيعات الجهات
وش فيه شخصيته مهتزه ولا عنده ثقه

حنا سرجنا الخيل لاتفخر بسرج العاديات
وشوف الزمان اللي يسابقنا قدرنا نسبقه

ولا نحب الثرثره والمعمعه والالتفات
والكذب ليله ينجلي والحق شمسه مشرقه

مايصنع الانجاز رجال بلا عزم وثبات
الانجاز يبغى له جبين يروي الخد عرقه

طموحنا يسمو على بدع القصايد في البنات
واكبر من بيوت القصيد اللي على صدر ورقه

حنا نفكر نجمع التاريخ من بعد الشتات
وانته على الماضي عيونك كل يوم مبلقه

الاسماء والالقاب والتقدير وانواع الصفات
ينعم بها ربي على عبده واذا شاء رزقه

واعذب من النهرين نهر النيل او نهر الفرات
طموح رجال تحدداه الزمان وحققه

لا ترتفع يا طيرنا بين النجوم الساريات
ويعانقك صلف الهوى والشمس ريشك تحرقه

لاتحسب انك معجزه الا خليفة معجزات
تراك انسان ذنوبه كل ما امسى تورقه

ولا تفلك البندق مادام انك تهاب الانفلات
تركت للرعيان مايصمل ويفلك بندقه

وانا اعرف عيال الفقارى واعرف عيال الذوات
نفس البحر يغرق عباد الله وهي ماتغرقه

ابوي علمني ماسولف غير بالشي الثبات
لو موتتي بالسيف والبندق وحبل المشنقه

ياليت مانت بحرف في غصن شجرة سبع اللغات
اللي تقول جذورها للنصر لا للتفرقه

ياليتك اللي مت واللي مات للحينه ما مات
وعساك فدوة سندسه وديباجته واستبرقه