قالت لي اسف يوم انا قربها احتجت
اليوم غير الأمس في كل الاحوال
وش عرّفك اني على العهد مازلت
ماتدري ان القلب كل حين في حال
كنا حبايب بس انا عنك هوّنت
ماعاد باقي للغلى منك مثقال
قلت ارحمي تكفين شوفي تكدّرت
ماصرت انام الليل اشغلتي البال
بُعدك خساره قولي تكفين غيّرت
خيّم علي الهم والدمع همال
من أوهمك يابنت اني تحسّرت
إن ماعرفتيني انا صفوة اجيال
انا الخطأ مني لمثلك تنازلت
اهديت لك حب وتلقيت غربال
لك الشرف ان كان فيكِ تغزّلت
انا فتى احلام عمرك وخيّال
انا شبيه البدر فوق الملا صرت
غيرك بغى قربي ولا شك ماطال
فيني مزايا أذهلت عقل كل بنت
من قابلتني فز لي قلبها ومال
كم من هنوفٍ شوقها قال وين انت
كني لوحدي بالبشر خوش رجال
كل الغواني خيروني ولا اخترت
مغرور يمكن بس للصدق ميال
قالت سكنت القلب ياعزوتي انت
ترا فداك الحب والروح والحال
تراني امزح والا والله ماهنت
حنا جمعنا الدرب ياطيِّب الفال