العين تدمع والرجاء شئ مفقود..
..ياويل شخصٍ ما يغير حياته
عايش على ماضي بحاضره موجود..
..كاسيه حتى كاتبه في وصاته
ماكنه إلا عن ثرى الكون مطرود..
..حاله نتيجة جور من ذكرياته
ايقول انا عن باقي الخلق مقصود..
..هم وعذاب ولا حصله مباته
ماهو بشي يطرد الهم موعود..
..ضاعت به الحيله وراجي مماته
يشكي زمانٍ فات والعالم ارقود..
..ياليت يرجع مامن العمر فاته
كم باب في وجهه من الدهر مسدود..
..ويلاه حتى يشتكي من عصاته
حاله نحيل وروح الجسم كالعود..
..ماعاد تفرق جثته من عباته
ماهو على مابه من الهم محسود..
..والله كفاته هم والله كفاته
هيهات بعد الموت وش ياكل الدود..
..اللحم لاصق عظم ضاعت صفاته
الصبر زين وربنا عز داود..
..بعد اللذي عاشه وزالت عناته
البيض ماهي صافيه .. تاتي السود..
..والعمر لولا الهم .. وش هو حلاته
الله يجلي حرقة الدهر بالجود..
..بالغيث يحيي ماضمر من فلاته
والطير يسرح خاوي البطن ويعود..
..شبعان مثله .. راجعاتٍ خواته
ياصاحبي .. كلن معه هم معقود..
..لكن كلٍ دبر الله ثباته
ان كان ودك يثبت القول بشهود..
..اللي غني وش لون ينفق زكاته؟؟
واللي غني حضه من المال ممدود..
..اليا مرض وش لون تنفع مياته!!
جاوب وتعرف عيش منته بمقرود..
..واحمده ربي واشكره في صلاته
خلك ذهين وكون شعله وبارود..
..لاتحسب اللي يزهم الارض جاته
ماكانت الدنيا كذا دون مجهود..
..ياويل شخصٍ ما يغير حياته