تويت
يانور من كدّر فراقك نوره
يامخرجه عقل الشقي عن طوره
ياكلّ من سلّمْك عمره كلّه
وقضّا بحبّك مابقا من شهوره
أهواك واللي صدّني عن غيرك
واشغلني بذكراك صوت وصوره
اذا اختفا زولك يجيني طيفك
ماكنّ غيرك يسكن المعموره
ياما تحمّلت المصاعب لجلك
وياما تحدّيت الزمن وشروره
سعيت لجْل ازرع هواي بقلبك
لكن عجاج الوقت شال بذوره
والأمر والنهي انحصر بيد الله
ولاّ البشر؛ منهيّةٍ ماموره
مشكوره إن حبّيتي اللي حبّك
وإن ماحصل حبّك.. بعد مشكوره
مع ان غرامك في حشاي اجباري
على غرامي منتي بمجبوره
وجودك بعمري ياعمري يكفي
معه احتمل ضيم الزمان وجوره
ابيك مثل الورد لامن فتّح
أشفق على شوفه، واشمّ عطوره
أشعر تجاهه بالحنين الصادق
ولايهمّ انّي أعَرْف شعوره
ثوري وحِبّي غيري، ولايهمّك
قلبي الحزين، وحالتي المخطوره
باسكت؛ وباكبح غيرتي وانا ادري
انْها بتاكل خافقي بقشوره
يا قربها من غيرة (ابن القيّم)
على تراث الفرقة المنصوره
أهمّ شيّ إن بسمتك ما تُمحا
لو يمحي الشاعر جميع سطوره
لانّي أضيق اليا شعرت بضيقك
وتسرّ روحي شوفتك مسروره
لاشتقت لك جيت المكان اللي به
أقامت جيوش الغرام الثوره
يوم التقينا رغم كيد الكايد
وأمست شياطين العذل مدحوره
في ديرةٍ مافاقها إلا الجنّه
عذبن هواها؛ قاعها ممطوره
قفرٍ ماغير اثارنا اللي فيها
كنْها عن عيون البشر مستوره
وأخذت فيها سَجّةٍ تنشلني
من واقعٍ حاصر هواي بسوره
أحاول أجبر خاطري بالذكرى
ويا صِعْب جَبر الخِطّر المكسوره
فقدت حبّك، والعزا في شوفك
وان ماحصل شوفك بعد...، مشكوره
منقووووووول
تعليق