تويت
الشاعر العراقي عريان سيدخلف
يا قمر..(شعر شعبي عراقي)بهيده على بختك يا كمر .. مساهر واريد اشكيلك
انه غريب ابدنيتي .. مضيّع وادور ابليلك
عن ربعة اهلي ، ودلّة الديوان ، ومواويلك
عن ضحكة البربين لعيون الدلو
عن رقصة الصفصاف والماي الحلو
عن صحبتي، وخلاني , وعيون النهر
بهيده على بختك يا كمر
***
يا غربتي ...
غربة عصافير التودع اعشوشها... برفّة جنح
ويا دمعتي ...
دمعة الكاع التبكي موت اهروشها... بجيت الملح
يا دار اهلنا الطاهره ... مر العمر
عيون اليحب امساهره ...ومامش خبر
بهيده على بختك يا كمر
***
وك يا كمرنه مروتك ... حنّي الشواطي بدمعتي
كلهم كبرت اعله الصبر...والونّه صارت غنوتي
مشتاق ابوسن دجله... واشرب مايها
واعزف ترانيم المحبّه بنايها
دجله الهوى ، والسوق ، والحب ، والسهر
بهيده على بختك يا كمر
0 0 0 0 0 0 0 0 00 0 0 0 0 0 00 0 0 0 0
0 0 0
إللي إمضيٌع ذهب
بالغربه شِفتْ التَعب وإتعلٌمت معناه
وإتعلٌمت عالسهر .. والسكته .. والصفناه
ذلٌيت ذلْ النهر من ينكَطع مجراه
وإعرفت كل شي إعرفت
حتىٌ النخل ينحني الريح السفر من يجي
وجايب غريب إوياه
ألله !! يا هالوطن شمسٌوي بيٌه ألله
نيرانه مثل الثلج
كلما تدكَ عالضلع
أبرد وكَول إشٌاه
إللٌي إمضيٌع ذهب!!
بسوكَ الذهب يلكَاه
وإللي مفاركَ محب ...
يمكن سنه وينساه
.. والطاح منٌه الكَلب
قلب إصطناعي إنلكًه ويشكٌلونه إهناه
بس إل مضيٌع وطن
وين الوطن يلكَاه ؟ ؟ ؟
* * *
اه ياوطن يا خبز يالشارتك تكتل !!
اه يا وطن يا طفل .. هِنياله منْ صاغ إلك نبض الكَلب جنجل !!
يا وطن .. زٌفة كَمر
ياعراق زَفة كَمر
ونجوم إله إتهلهلْ !!
عذبٌني ما عذبٌك ..
إكتلتني ما أكتلك ..
طبع اليحب ينكتل موش اليحب يكتل
***
اه يا وطن يا جَذِر !!
والجذر هم بيه طبع ..
لو مات من العطش للوادي ماينزل !!
علٌمني إل فراق
أعزف لحن غربتي إبقيثارة أشواقْ
أسهر \ وحن\ وأنفعل
وأتمنىٌ واشتاق
مامش مثل ديرتي
لو نمشي طول العمر !!!
مانلكًه مثل إعراقنا إعراق
تعليق