يامعديت الأدب وين الأصول ويامعتقت العنب مانشتهيه

لونطول الغصن قلنا مانطول ولو نبي سكره قلنا مانبيه

كرم الله خشمي الشم الزعول وبيض الله وجهي المبيض .. أيه

وأن سألني من تطفله العذول وقال لي : يامكبر الهقوات ليه

قلت مابه شخص يشبهني واقول يعطي المحتاج في كلتا يديه

انوجدنا فالزمن !! حتى نزول والدروب اثنين محمود وكريه

النهايه شي مايعني الوصول والوصول بمجمله ماهو نزيه

والصبر ماهو مفتاح القفول دام ماللشخص شيٍ يحتريه

بين رفض العقل الاخر والقبول عقل ثالث ماله اسم إلا السفيه

وإن بغينا ناخذ الدنيا فصول الفصل بالضبط مثل اللي ياليه

ماقتنعت بفلسفه غير الميول كل ما مال الخفوق لمهتويه

واحدٍ يروي معاطيش الدحول لاتفجر واغدق العذب ارتويه

عاليٍ يبدع بتكتيك النزول كل ماحول يدوس معانديه

مابخل إلا ليا ذكر الرسول وهو مسترخي ولاصلى عليه

والحكم في مثل هالحاله يقول يعذر النائم ويسقط مزدريه

أستتبت الفكر واعلنت العدول عن قرار الطعن فالراي الوجيه

لوعرفنا نفتح ابواب العقول كان نعرف نفتح القدس ونجيه

شلت مدري !! بس شلت من الحمول واستمريت بعذابات المتيه

طاقتي للحزن تشبه للكحول كل مافني كاس ودي أبتديه

ليت رجمي ماتريث بالأفول وليت رجمي طاع يسقط من عليه

وليتني ماصرت حل من الحلول كل مغدي درب وده يهتديه

العصاء والخرج وخطام الرحول والطريق وكل ضلمٍ يحتويه

علمن صدرٍ المسافات الملول كيف ضلعه كل ما انفل يحنيه

الهدوء إحساس تقتله الطبول والفراق الله يلعن والديه

<<<<< منقوووول