من سبوع إلى سبوع ومن شهور إلى سنين
والصبر ماعاد يقوى بانتظار القافلة

كان يتصبر على مستلزمات المسلمين
كاد أن يأتي بضيفه والجواري غافلة

وكل ما غنى مغني والقمر توه يبين
ثورة الأفكار صارت كالخيول الجافلة

وين ولا وين ولا وين ولا وين ووينوين
أروح وباب حظي يا زماني قافله

كل ما قلت أفتحه قلت المشاكل فرض عين
و إن قضيت الفرض قلت الفرض بعده نافله

كافل جرحي مثل كافل يتيم الوالدين
و أنت ما قدرت دمعات اليتيم وكافله

والجروح أنواع جرح واضح وجرح دفين
لكن أغزر جرح جرحك يالسنين السافله

يا مقوي الأقوياء رحمتك بالمستضعفين
ولا تخلي نجمتي بين النجوم الافله

ولا تخليني من الأيام والدنيا حزين
واعطني طموح شيخ حققه وانضاف له

والدروب طوال وإن طالت عسى ربك يعين
والليالي من خلقنا بالمشاكل حافله

من عصور الخيل والناقه وسيف ما يلين
لين عصر القنبلة والطائرة والحافلة

الله الي حطنا سادة عالمتسيدين
والرجوله والعدل والحق والإنصاف له