الحب ما يسكن قلوب ومحاني
الحب أسمى عاطفه تسكن الرّوح

يا حبّك اللّي كل ما أظما سقاني
سراب لال ودرب مهجور ونزوح

ما اقول منك اللّي لفاني كفاني
لأنّي أحبك هجر وعناد وجروح

إن غبت عنّي طال عمر الثّواني
تقول عمر الثّانية من عمر نوح

وان جيتني مرّت ليالي زماني
ما كنّها إلا البرد بعيوني تلوح

قبل الجفا عذرك سبقني وجاني
لا تعتذر ذنبك من العام مسموح

أبني على شوفك صروح الأماني
وشلون ما تبني على شوفي صروح

إن كان غيري عوّضك عن حناني
ما عاضني غيرك من الغيد مملوح

إنت الأخير .... وانته الأوّلاني
لو كان حبّك حد قلبي على الصّوح

والله ما باح بغرامك لساني
إلا عيوني دوم يطرونك تبوح

كتمت سرّك لين دمعي عصاني
راعي الهوى لو يكتم السر مفضوح

لا تلوم قلب جر فيك الأغاني
حتّى الحمام يجرّه الشوق وينوح