يا ابن ادم كل ماكنت انظر الجرح العظيم
مالقيت اعظم من جروح الندم بين الجروح

ويا ابن ادم كل ماقلت الزعامه للزعيم
ينتشي بي كبريائي فوق شاهقة الصروح

والدروب يقودها درب الصراط المستقيم
واستقامات البشر بين الصراحه والوضوح

والغصون اللي فرحها غير لا هب النسيم
ماتسأل عن معاناة الحمام اللي ينوح

ياهل الزور ان حلفتو زوركم وجه الكريم
فاح ريحاً من الكذب والكذب له ريحاً يفوح

يارحيم الصدر ضايق حيل سترك يارحيم
والدروب طوال واقدامي من اللهفه جموح

اعطني من لدنك التوفيق والعقل الحكيم
والعزيمه والمعزه والمراجل والطموح

والقمر يغريني اغني على اللحن القديم
ويجذب البراق عيني كل ماشفته يلوح

والقساوه للرجوله والنعومه للحريم
ياكثر ناسا تجي في عيني وناسا تروح

اكثر اهل الارض خلاني وانا مالي نديم
يشتكون جروحهم عندي وانا كلي جروح