أميرة الغيد

ياناس والله قلبي اليوم بيطير
لجل الفرح بإحساس غالي وعالي

إحساس رجلٍ حيّر الوقت تحيير
ولقى مراده بعد طول الليالي

لقى مراده عند بنت المناعير
بنتٍ أصيلة ماتهاب العوالي

بنتٍ ثقيلة أصلها الطيب والخير
بنت الكرام الأسْد شهم الخصالي

إلى أقبلت لمّي لها شعري يدير
حرفٍ مثل صقرٍ بروس الجبالي

سطّر لها حرفي من المدح تسطير
ما طالها قبله كبار المعالي!

هي وصفها ماله قياس ومعايير
هي زينها إيفوق وصف الخيالي!

سبحان من صوّر بها الحسْن تصوير
لين أصبحت بالزين مضرب مثالي!

من زينها يبصر به أعمى النواظير
ويشهد على حسنه ملوك الجمالي

هي ريح مسك مقطّر بزين تقطير
وعيونها تسحر قلوب الرجالي

سهلة طبوع وما بها حب تعسير
أميرةٍ للغيد أصل الدلالي

لا من حكت أصبح بالأنفاس تعطير
أبيع لجله كل حالي ومالي

هي وجهها مثل القمر شعّ تنوير
وخدودها من زود نوره يلالي

هي قولها ما فيه كذبٍ وتقصير
وما فيه نم وحكي قيلٍ وقالي

يا غالية لك في حشا القلب تقدير
يفداك قلبي يا بعد عمر حالي

شانك بقلبي اعتلا دون تبرير
قدرك ثبت ماله فيومٍ زوالي

سخّرت لجلك حبي اليوم تسخير
وأرخصت لجلك كل من كان غالي

إذا غلطت أحمل لك أجمل معاذير
محال أزعلّك في وقتٍ محالي

وإلى بغيتي المدح جيتك بتعبير
مثل الشهد جذّاب حلوٍ وحالي

واللي يذمّك يا بعد قلبي إيصير
مثل الذي يذم عمّي وخالي!

أدعي عسى دايم تكونين في خير
والله يجّنب عنْكِ حزن الليالي (منقولة)