لأنّ الله خلق للمجد من روس الرجال رجال
ماهوب كل المتون اللي تزمّ الحمل تقوى له

ولا يقوى على حمل التعب ويْحَقِّق الامال
سوى (محمد ابن زايد ابن سلطان) وامثاله

يمينه فخر واكرام ويساره عِزّ واستبسال
ولا منّه فَعَل يشهد له التاريخ بافعاله

ولا منّه وعد يوفي، ولا من قال.. قال وْطال
يِعِزّ المجد لا قال وْيزيد المنصب ان طاله

يقولون الفخر له لو لبس فوق الجبين عقال
وانا اقول الفخر ماهوب له.. الفخر لعقاله

هذاك اللي زَرَع له فالقلوب الطيّبه تمثال
تمنّت كل نجمة توصله وتصير تمثاله

لأنّ اللي مثل قَدره ليا منّه رقا وانهال
يطيح من الثرى صوب السما، والنجم يرقا له

وليا من عَوّت للفخر بالأعمام والأخوال
يجمّلها من الصوبين باعمامه وباخواله

كثير افضال، وشوي ان وصفناه بْكثير افضال
حشا نفس الفضايل نفسها ما تعمل اعماله

إذا الله خالق العِزَّه مراتب والعباد خْصَال
ابا اعرف هو بقى يا اهل الخصال اكرم من خصاله؟

كثيرٍ.. ما بعده الا المطر والغيث والهمّال
غزيرٍ.. ما حسده الا البحر والموج واهواله

قويٍ.. ما يهاب من الحدو والخيل والخيّال
شجاعٍ.. يرعب قلوب العدو لو إنّه لحاله

إذا عرش البطوله ما يليق الاّ على الابطال
من ابطاله إذا انتم يا "محمد" ما انتم ابطاله؟!

هنيّالك ثقة "زايد" سَنَد، واسم، وذرى، وظلال
وهنيّالك على حمل الثقه واسمك هنيّاله

خذ حروفي وانا "فزّاع" ما عقب الجزال هزال
لأنّ الشعر بامثالك تصير هزاله جزاله

قصيدٍ ينذبح يفداك، تنعاه الرفوف اجيال
وحرفٍ ينولد لرضاك يحلالك وتحلا له

رعودك.. أكّدت للغيم إن اصل المطر رجّال
سجودك.. يثبت ان الدين يبقى صلب برجاله

وجودك.. أثبت ان الله خَلَق للعنفوان اشكال
صعودك.. أثبت ان اللي تناله ما حدٍ ناله

أعرف ان السنين تزول لكنّ الأمل لا زال
وقليل من المتون اللي تزمّ الحِمل تقوى له

ولا يقوى على حمل التعب ويحَقِّق الاما
سوى "محمد ابن زايد ابن سلطان" وامثاله