حمد بن راجح

بسم خلاقي اببدا بذو النعم رب الجلاله
صاحب افضال ومكارم كاسية كل البريه

العظيم اللي كريم الطيب من جوده وفاله
والله انه فالسما والخير ياتينا هنيه

الشعر اسرج خيوله والقلم فلة عقاله
والمعاني من خفوقي والنظم شغلة ايديه

والقصيد علوم طيبٍ تحتوي علم ٍ بحاله
سردها لو ان يطول ماتحوطه الأبجديه

والشكاله غير والله . غير عن معنى الشكاله
الشكاله في ( حمد راجح ) مواريها قويه

اصلٍ وفصل ومبادي والعلا فخرٍ يناله
عزوة للي تعزوا وانتخى يطلب خويه

وصله للشامخ المعروف واسرد هالرساله
قول بنه ماورد مثله ولابه حد زيه

الكريم اللي عطت يمناه واخفت عن شماله
السخي اللي يحب الجود ويدينه نديه

لاعطا مدة كريم حالف يفني حلاله
كن مابين الحلال وبينه حروب وقضيه

اشهد انه عند عينه صاغر قيمة رياله
مومن ان الله وهب له وهبة عظمى جليه

فاتح بيته سبيل وتارك ماله سباله
لانصاه الضيف لافي ماسأل سبة مجيه

وان شكى ضيفه سنينه او تشكى من لياله
فز ( ابو راجح ) بكبره يابخت من صار فيه

ينهض لضيفه ويفزع قبل لايحط البياله
وقبل لايرتد طرفه يخجله طيب العطيه

كل صعب يجيه مقدور ٍ من الخالق سهاله
باذن ربي الطيب عنده والعلوم الأجوديه

أبشر أبشر كلمة له دايم تختم مقاله
قبل لاتطلب عطيتك واستمع لي لو شويه

لو يجور الوقت مره او يطوّل في الأماله
لاتعداني فديتك دون ماتميّل عليه

وكان ماتقدر تجيني والزمن عقد حباله
جيتك لبيتك أخ فزاع مايطلب جزيه

قلت ابمدح طيب كف غرق الكل بهماله
غيمة من عند ربي بالعطايا موسميه

جعلني ما ابكي عليه وجعلني ما ابكي عياله
وجعل روحي دون روحه دام ذا الدنيا مديه

وقلت انا هذي الشكاله. غير عن معنى الشكاله
الشكاله في ( الفهيدي ) غير عن كل البريه

الخطا وارد وكلن فيه حقه
وأنت قلب كل نبضاته خطايا

أستحق الود وإلا ما أستحقه
ذا نصيبي منك ياراعي الهدايا

أنت ياللي تهدي الثوب وتشقه
ما تخاف الله وضلوعي عرايا

كل جرح منك دقه فوق دقه
دقة جروحك مثل وشم الصبايا

البلا أني شفت في الدنيا مشقه
والشقا غيث مغاتيره روايا

أذكر إني قلت دوك الما وبقه
وأثرني سقت المطيه والعطايا

حسبي الله كيف خفاقي تعقه
تنثر الما كن ماحولك ظمايا

قوم وق القلب وإلا قم توقه
ياموردني على حوض المنايا

يارفيق الدرب قلبي ضاع حقه
وأنت ما تبغي مشاريه ووصايا

ذا قراري وأنت لو تسمح تلقه
لا تعذر مابقى عندي بقاي

الغلا لأهل الرياض ونجد وشيوخ الزعامه
والولا مني لشيخ مايجيب إلا الزعيمه

في زمنا من مثل"مشعل"ومنهو في مقامه
لامس عباب السما بالراس والكفين غيمه

وبارك الله في هنوف كل مافيها فخامه
من قدمها لين تاصل هامة الراس العظيمه

جادل منها يغار البدر لو هو في تمامه
وجهها ملح يسولف للبحر قصة نديمه

الله اكبر من عيون كل مافيها رسامه
قبلها والليل ماله في عيون الناس قيمه

كنها شمس تسوق الليل وتبدد ظلامه
كامله والكامل الله والجمال اكبر جريمه

طيبها شيخ يسولف للكرم سر الكرامه
من مثل نوف بسخاها من مثل نوف الكريمه

الكرم يا"نوف"لو هو شيخ ويلبس عمامه
والله ان يرمي العمامه تحت رجلينك غنيمه

الخوال"بوارديه"ذروة الطيب وسنامه
من وفاهم ذعذع الغربي وذعذع لك نسيمه

عز يابنت لها في المجد هامه فوق هامه
الجدي من دونها وسهيل ينشد عن غريمه


بنت مجد وبنت عز وبنت تقدير وشهامه
والله انك في سمانا برق نو..هل ديمه

الفخر انتي فخرنا والفخر مسكة زمامه
في يدينك مثل منتي في حنايانا مقيمه

والغلا لأهل الرياض ونوف وشيوخ الزعامه
والولا مني لبنت للعذارى جت زعيمه

أنا ماجيت ابي منك السموحه وابدي الأعذار
ولا جيت التمس لا صغر ذنوبي عندك التوبه

اعرف ان الضلوع العوج عوج والضلوع قصار
وأعرف ان الخفوق اللي كفر ماتغفر ذنوبه

وأعرف أن القضيه والسوالف هي قضية ثار
واعرف اللي تعرف وتنكره لو تستر عيوبه

أنا ماني مثل ذاك السفيه الخاين البوار
أميز خاين الذمه وأعرف أقلده ثوبه

أنا بنت تعرف الشعر وتكره فتنة الشعار
لها في الشعر باع وتكره النماق وأسلوبه

طعون الحقد جتني يا الطنايا والخطايا عار
وانا ودي بفزعتكم مدام النار مشبوبه

انا ودي بفزعة واحد ما تخلفه الأشوار
صمايل هقوته تاصل شمال الجرح وجنوبه

عليه من المواري خصلتين الباس والاصرار
من افعاله غدى حلم ينومس كل رعبوبه

الا وين المراجل وينها هي عودت للدار
الا وين النشامى والسنع والحق ودروبه

ابقصر عنوة الدنيا وابقصر عنوة المشوار
واريح خافق صدقه مع اهل الكذب عذروبه

توكل مابقى الا هي ادور للذنوب اعذار
توكل مايعرف العذر قلب يرفض التوبه

علومني العشق عيب وظليت وحدي
علموني عشق الأمطار في النصف الهزيل

جيتهم والصدر ضايق وليلي سو مدي
كني اللي يطلب القرش من كف البخيل

جيتهم وسهيل غاية وزعلان الجدي
وانتثر سمن السواليف وأنشق الصميل

يا جماعه لا تحسبون قلبي بيعدي
والله ان يبطي خفوفقي وهو ماله دخيل

جرهدي ياهل الكيف قلبي جرهدي
حالف مايفك سبقه ولا يشفي غليل

يوم جارت سود الأيام جيتك يا بعدي
كني اللي ذل نفسه ولا عز الذليل

جيت كني ضحى العيد باصير الهدي
جيت لك أبغي أقيل ولا جاد المقيل

هو صحيح ان الليالي لها وجه ندي
مير مانبدي جبينك إذا شفت العليل

شاعري إلي متى المزن هطال بردي
شاعري وش يروي الغصن غير السلسبيل

ضاقت الدنيا بوجهي وانا صرت الفدي
لا ذبحني طول ليلي ولا طال الطويل

شاعري والظن الأخر اعرف انه ردي
رح فمان الدرب الأغبر ودور لك بديل