وقفت أبكي على بابه وهو مرتاح وسط الدار
حسايف مادرا للي وقف يبكي على بابه
أحس النار في قلبي من أسبابه وياهي نار
تشب وتحرق ضلوعي من تغليه وغيابه
أنا أدري إن الهوى مقدر ومشوار الحياه أقدار
وجميع إنسان مايسلم من المكتوب وكتابه
عشقتك ياصغير السن عشقتك ياشذى الأزهار
عشقتك وإنت ماتدري عن المشتاق وش صابه
طروبن تلعب وتضحك وتسبق كل طيرن طار
تحب تراجع دروسك وكل كتاب تقرابه
تنام الليل من بدري ولالك بالغرام أسرار
تصحي الطير من عشه وجمع الورد تشقابه
وأنا من خلف بيبانك أجاذب وانثني وأحتار
شبابن شاب من حبك وقربك ماتهنابه
مبين البرد ورياح وهبايب عاصفه وأمطار
أشوفك داخل وراجع وروحي حيل منصابه
حبيبي الحب عذبني ويبسني يباس أشجار
ومن حبك أشوف الصبح ونصف الليل متشابه
حبيبي والهوى حربن وعشاق الهوى ثوار
جيوشن تحرق الدنيا حريق النار للغابه
على عمرك تبليتك ولابيني وبينك ثار
خطا الإحساس والنظره وقلبي من تجازابه
أنا عن أهلك وناسك ومن تعرف غريب الديار
ولاحدن جابني لاكن نصيب المبتلي جابه
أنا بسألك دامنك فبحر المعرفه
بحار
وبعرفك تجيب اللي خبير العلم ماجابه
سؤالي ليه إذا شفتك أولع واحترق وانهار
ورعشت كفي وقلبي ودمعي وشهي أسبابه
أنا مسير ماني مخير تخير يالغضي واختار
وشخصن طق بيبانك تجمل واحسب احسابه
يأما اختار له الجنه وإذا معجبك هات النار
ترى المشتاق ماتفرق عذاب أوجنة أحبابه