رواية ((طلبتج لاترديني))كامله

***مزون شمر*** · 05-11-2008, 07:38 AM

قبل صلاة اليمعه
اتصل منصور بخالد
منصور:مرحبا
خالد:مرحبتين
منصور:تبغيني امر عليك
خالد:يكون احسن
منصور:انا في الطريج خمس دقايق وبتشوفني عند باب بيتكم
خالد:ان شا الله

وبعد ماركب مع منصور
منصور بابتسامة:لا..اليوم شكلك احسن
خالد: الحمدالله
وعقب صلاة اليمعة صلوا ع عبدالله
خالد وهو يتأمل عبدالله وهو ملفوف بالجفن(فخاطره):هاي اخر مرة اشوفك فيها..اخر مره... وماتحمل المنظر ونزلت دمعه حاره من عينه
وصلوا عليه وادفنوه
رجع خالد البيت ودخل غرفته وماله مزاج يكلم حد
وبعد ساعة دقت غاليه باب خالد
غاليه:عظم الله اجرك اخويه
خالد:الدوام لله
غاليه:شحال ابوه واخوانه
خالد:الحمدالله...صابرين
غاليه:رحت مع خالتي مريم العزا
خالد:زين سويتي
غاليه:امه تعبانه..
خالد:الله يعينها
غاليه:شفت زوجته...تكسر الخاطر
خالد:الله يلهمهم الصبر...غاليه
غاليه:نعم
خالد:عندج بندول
غاليه:هيه....لحظة

اخذ خالد اجازة لمدة شهر من دون راتب يحاول يحصل شغل ثاني في مكان ينسيه عبدالله
ام سلطان يالسه مع بوخالد
ام سلطان:انت ليش ساكت عن ولدك
بوخالد:شوتبغيني اسويله؟
ام سلطان:عايبتنك حالته..لاشغل ولامشغله
بوخالد:الولد يالس يدور شغل وبعدين هو ادرى بصلحته
ام سلطان:استغفر الله العظيم
بوخالد:انا اعرف ولدي..انسان حساس وصعب يتألقلم مع الوضع اليديد
ام سلطان:هاي الدنيا ..حياة وموت
بوخالد:وين غاليه؟
ام سلطان:فغرفتها
بوخالد:ازكريها
ام سلطان(بصوت عالي):غاليه..يو غاليه
غاليه:نعم
ام سلطان:ابوج يباج
غاليه :يايه
بوخالد:تعالي ايلسي حذالي
غاليه:نعم ابويه..
بوخالد:انتي مارديتيلي خبر
غاليه:عن شو؟
بوخالد(باستهزاء):عن شو؟شورايج بسيف؟موافقه عليه؟
غاليه(والويه بدا يحمر):مادري
بوخالد:انا عطيتلج 3 ايام والحين صارو 3 اسابيع ...شورايج؟
غاليه(بخجل):.......
بوخالد(بابتسامه):السكوت علامة الرضى
غاليه:عن اذنك ابويه
بوخالد:هههه...ع بركة الله

وانتشر خبر خطبة غاليه في العايله
بعد يومين في بيت سالم بوسلطان رن تلفون البيت وسلطان في المطبخ التحضيري فقام ورد ع التلفون
سلطان:الو
غاليه:الو السلام عليكم
سلطان(بطير من الفرحة):وعليكم السلام والرحمة..شحالج بنت عمي
غاليه:الحمدالله بخير ...شحالك وشحال الاهل؟
سلطان:الحمدالله بخير ويسرج الحال
غاليه:عاشه موجوده؟
سلطان:نعم..لحظة
سلطان(بصوت عالي):عواش...عاشه
عاشه(وهي تركض صوبه):شو؟
سلطان:غاليه تبغيج
عاشه:اوكي...بس لحظة شوي بسير اشرب ماي ريجي ناشف من الرياضة
سلطان:الوو
غاليه:نعم
سلطان:بنت عمج هاليومين تسوي رياضة اونها تبغي تحافظ ع جسمها
غاليه:ههه..اخاف تختفي
سلطان(اتذكر انها مخطوبه):.....هذي عاشه
عاشه:الف الف مبروووك
غاليه(بخجل):الله يبارك فحياتج
عاشه:واو...وناسه اخيرا بتعرسين ياغليووه
غاليه:عقبالج ان شا الله
عاشه:امين
غاليه:ههههههه...ان شا الله يشوفونج فعرسي ويخطبونج
عاشه:شو؟؟؟؟اترياج لين ماتعرسين!
غاليه:بسم الله...هالكثر مستعيله
عاشه:هههه...اسولف معاج
هالوقت رجع سلطان للمطبخ التحضيري وعاشه في الصاله اللي مجابله المطبخ
سلطان فخاطره:
لاتزيد المواجع خلني جد نسيتك****لاتقلب بقلبي صفحة الذكريات
انته الحب وانته من حياتي انتهيت****وكل منا تخير له طريج الحيات
ما اريد اتذكر ماضي به شقيت****منيتي بس انسى ماتعدى وفات
لاذكرتك حبيبي من فؤادي بكيت****وامطر الدمع الاحمر وجنتي والشفات
ليتني ماعرفتك،ليتني ماهويتك ولارسمتك بعيني اجمل الامنيات

عاشه:غليوووه...ماقلتيلي
غاليه:عن شو؟
عاشه:عن زوج المستقبل...شويشتغل؟شونوع سيارته؟
فهاللحظة انتبه سلطان لعاشه وكان ماسك كاس العصير فحطه ع الطاوله
غاليه:انا ماتهمني هالسوالف...المهم اخلاق الريال ودينه
عاشه:عدال...يعني انا تهمني هالسوالف؟
غاليه:اسالي عمرج
عاشه:انزين...شفتيه
غاليه:اففففف
عاشه:غليوه..اخر سؤال..حلو؟
سلطان هاللحظة في قمة القهر
غاليه:ماعرف
عاشه:علينا؟
هاللحظة ظهر سلطان من البيت وصك الباب بالقوو
عاشه:بسم الله
غاليه:شوهالصوت؟
عاشه:سلطون ودفاشته
غاليه:هيه صدق..خطبتوله؟
عاشه:هيه..بس احس انه مايبغيها
غاليه:اذا مايبغيها لاياخذها
عاشه:ماشفتيها يا غليوه كيف متخبله عليه..
غاليه:اسمها ميرة..صح؟
عاشه:هيه...تصدقين اني مابغيه ياخذها
غاليه:ليش؟
عاشه:مادري احس انها دلوعة وماتنبلع
غاليه:يمكن تتغير عقب العرس
عاشه:اتمنى...شواخبار خالد؟...سلطان يقولي انه وايد متاثر بوفاة ربيعه
غاليه:وايد...والحين يبغي يغير شغله
عاشه:لهذي الدرجة؟؟؟غليوه اخوج حساس...ياريت هذا اخويه
غاليه:انا وين؟وانتي وين؟
عاشه:غليوه برد ع الخط الثاني، بتصل بج بعدين..يلا مع السلامة
غاليه:مع السلامة

سلطان عقب ماظهر من البيت راح بيت يدته
سلطان :هوود هوود
ام عبدالرحمن طايحه ع الارض ومتلحفه:هدا هدا..اقرب ابويه
سلطان:السلام عليج امايه
ام عبدالرحمن:وعليكم السلام والرحمة...زين ذكرتني
سلطان:افا..انتي دايما ع البال
ام عبدالرحمن:باين
سلطان(وهو يحب راس يدته):كيف ارظيج
ام عبدالرحمن:تزورني كل يوم
سلطان:ان شا الله
ام عبدالرحمن:هيه..خذني ع قد عقلي..ياهل جدامك
سلطان:ياربي..
ام عبدالرحمن:يقولون خطبت
سلطان(بويه متكدر):هيه
ام عبدالرحمن:شواسمها بنت خالك؟
سلطان:ميره
ام عبدالرحمن:هيه...كان بخاطري تاخذ بنت عمك..بس شونسوي ..نصيب
سلطان(فخاطره):اه..نصيب
ام عبدالرحمن:شواسمه اللي خاطب بنت عمك؟
سلطان(من دون نفس):سيف
ام عبدالرحمن:سعيد؟
سلطان فيه ظحكة(بصوت عالي):...سيف
ام عبدالرحمن:سيف...
وبعد ربع ساعة دخلت حرمه من سناين ام سلطان
الحرمة:مرحبا ام عبدالرحمن
ام عبدالرحمن:يامرحبا وسهلا بام محمد
سلطان هاللحظة قام من القنفة اللي كان يالس عليها
ام محمد:والله ماقمت من مكانك
سلطان:لاتحلفين..خالتي
ام محمد:ايلس
سلطان(وهو يرد مكانه):ان شا الله
ام عبدالرحمن:انتي شحالج ؟شحال محمد وديمه؟
ام محمد:الحمدالله كلنا بخير وسهاله
ام عبدالرحمن:ولدج وين يشتغل؟
ام محمد:في البحريه
ام عبدالرحمن:الله يوفقه..
ام محمد :امين
ام عبدالرحمن: هو معرس؟
ام محمد:هيه..من سنتين وعنده بنت
ام عبدالرحمن:ماشا الله ...الله يبارج فيهم
ام محمد(وهي تصد صوب سلطان):انته احمد؟
سلطان:لا..سلطان
ام عبدالرحمن:هذا بجر سالم ولديه
ام محمد:سلطان!!..تعرف اني راظعتنك مع ولديه محمد
ام عبدالرحمن:راظعتنه؟
ام محمد:هيه..اذكر يوم هو ولد 9 شهور انه 8 شهور امه تعبت فيابولي اياه وانا اربي محمد ولد 8 شهور
ام عبدالرحمن:قوم حب راس امك
سلطان(بابتسامه):ان شا الله
ام محمد:فديتك ابويه...اذكر يومها كنت فبيت يدك ابو امك ورضعتك انت وبنت خالك ميره
ام عبدالرحمن(مصدومة):ميره؟
ام محمد:هيه..ميره بنت المرحوم
ام عبدالرحمن:متأكده
ام محمد:هيه..ميره ..امها كانت مع ام سلطان في المستشفى ومخليه بنتها عندي
ام عبدالرحمن:نحن خاطبين سلطان لميره
ام محمد(باندهاش):شو؟اخوان..كيف تخطبونهم لبعض؟
سلطان(مو مصدق اللي يسمعه):اختي؟
ام عبدالرحمن:لاحول ولاقوة الا بالله ...شوهالسالفه؟
سلطان:ميره تصير اختي؟

***مزون شمر*** · 05-11-2008, 07:40 AM

الجزء الثامن عشر

سلطان عقب اللي سمعه استأذن وظهر من البيت ،وام عبدالرحمن ع بالها انه زعلان
رجع سلطان البيت وشاف عاشه يالسه تشوف برنامج (بالصراحة احلى)
سلطان:عواش
عاشه وهي مندمجه:انت من وين تظهر؟
سلطان:قومي سويلي فحم
عاشه وهي تشوف الساعة:جيه..ورالك عرس؟
سلطان فخاطره:هيه عرسي ان شا الله
:قومي ولاتطولين في الرمسه
عاشه:الحين بيخلص البرنامج خلني اشوف البنت كيف بتظهر
سلطان:شوتشوفين؟؟
عاشه:بالصراحة احلى
سلطان:شورايج تشتركين فيه ؟
عاشه:الحمدالله..مب ناقصني شي كل شي فيني حلوو
سلطان وهو يغير القناة:قلت قومي
عاشه:تصدق انه عدنا خدامه
سلطان:وانتي شو خانتج؟؟؟
عاشه بحواجب معقده:احلف انت
وبدخلة سلامة:شوفيكم؟
عاشه:ابغي اشوف بالصراحة احلى وهو مومخلني
سلامه:لاتخافين كل شي ينعاد
عاشه وهي ترد ع القناة من الرسيفر
سلامة:عاشوه ..غيري القناة
عاشه:جيه بعد؟؟
سلامة:تشوفين هالبرنامج جدام سلطان؟
سلطان:لاتخافين حبيبتي انا هالاشكال ماتجذبني،انا باخذ وحده من قبل تعرف الحلاة
عاشه:ياعيني
سلطان:قومي احسن لج قبل لا افلعج بالريموت
عاشه:سلامه..قومي سويله فحم..حشرنا
سلطان:انا قلت عاشه يعني عاشه
سلامه تبتسم
عاشه:ان شالله
سلطان:انتو ماينفع معاكم الا هالاسلوب...سلموه
سلامة:لبييييه
سلطان:سلامة الغاليه
سلامه:الله يستر..نعم؟
سلطان:ابغي عوده وعطر يشل البيت شل
سلامه:جيه؟شوعندك اليوم؟
سلطان:مايخصج

اليوم الثاني
من صباح الله غاليه تتمشى في حوي او حوش بيتهم تتأمل الشير والورد والنخل وعايبنها الجو الربيعي والغيم المنتشر في مساحات واسعه في السما،وبعد ربع ساعة شافت اخوها خالد طالع يحر سيارته
خالد(والعين منتفخة):صباح الخير
غاليه:صباح النور والسرور
خالد:شوعندج اليوم ناشه من وقت
غاليه:ماشي...صليت الفجر وماياني رقاد
خالد:هوا الصبح مفيد للرئه
غاليه:هيه...هوا منعش ويرد الروح
خالد وهو يتأمل التربه:سبحان الله اليوم ندوسها بريلنا وباجر بتدوسنا
غاليه وهي تصد صوب اخوها:.....
خالد(بابتسامه خفيفة):سمعتي اخر الاخبار؟
غاليه:لا...سمعنا اياها
خالد:تعرفين انه سلطان خطب بنت خاله
غاليه:هيه..ميره..ليش؟
خالد:خلاص انتهى الموضوع ..ماراح ياخذها
غاليه(باندهاش):شو؟؟؟ليش ..سلطان غير رايه؟
خالد:هههه
غاليه:شو اللي يضحك؟
خالد:ولد عمج طلع خاطب اخته
غاليه(بصوت عالي):اخته؟؟كيف يعني؟
خالد:طلعو مرضوعين مع بعض
غاليه:سبحان الله...كنت متأكده انه ماراح ياخذها
خالد:ليش يعني؟
غاليه:مادري...مجرد احساس
ورجعت غاليه لغرفتها وشلت موبايلها المحطوط ع التسريحه
غاليه وهي تدق للعاش:مايندرابها جانها واعيه هالوقت
:الوو
عاشه(بكسل):الو
غاليه:صباح الخير
عاشه:حد يتصل بخلق الله هالوقت؟
غاليه:هيه..انا.....المهم صدق اللي سمعته
عاشه:شو سمعتي؟
غاليه:عوووش صدق ميرة مرضوعة مع سلطان؟
عاشه:هيه..ههههه
غاليه:شوفيج؟
عاشه:طافج اللي صار البارحه
غاليه:شوصار
عاشه:امي ماصدقت وراحت لعند اللي راضعته...مادري شواسمها ام محمد ..ام احمد
غاليه:وبعدين؟
عاشه:وخلتها تحلف انهم مرضوعين مع بعض
غاليه:انزين..
عاشه:ويقولج ميرووه صابتها صدمه...هههههه
غاليه:تضحكين يا الهبلة
عاشه:اللهم لا شماته..ماتعرفينها هاي اكبر دلوعه
غاليه:وسلطان شحاله عقب الخبر؟
عاشه:سلطان!سلطان بطير من الفرحة
غاليه:احلفي
عاشه:اتخيلي..امس دخن غرفته بعوده ،وراح يفصل له 5 كنادير من عند المدني
غاليه:ليكون بيخطب غيرها؟
عاشه:اشك فيه..

سلطان عقب ما خلص الدوام قرر يروح لولد عمه خالد فنص الطريج غير رايه ورجع للبيت
وهو رايح صوب غرفته زكرته امه
ام سلطان:ابويه الغالي ..انجب لك الغدى؟
سلطان:لا امي..ماشتهي ..تعبان وفيني رقاد
ام سلطان لاحظت من ويه انه تعبان فخلته ع راحته
دخل سلطان غرفته و طاح ع القنفة المتعود يرقد عليها
سلطان فخاطره:ميره وافتكيت منها،لكن العله سيفوه كيف افتك منه؟؟باقي شهرين ويملجون....(حس بظيجه فقلبه وهو يلفظها فقلبه...الملجه)
سلطان وهو حاط اييده ع يبهته:انا لازم انساها...بس كيف؟
"قلت اوقفيني وارفعي البوشية ... خليني اروي ضامي العطشان..قلت اوقفيني وارفعي البوشيه...
وبعد لحظات سمع حد يدق ع الباب..
عاشه(بابتسامة عريضة):مساء الخير ياخويه(بالمصري)
سلطان:مسا النور...ماروم اظهرج
عاشه:منو قال اني ابغيك تظهرني؟
سلطان:غرييبه
عاشه:يايه اسولف معاك
سلطان:انا تعبان وفيني رقاد..حرام عليج
عاشه:هذا الشيطان..عشر دقايق ويأذن العصر
سلطان(فاتح عينه بكسل):اففف..اسكتي خليني اريح ولو خمس دقايق
عاشه:بقولك شي حتى ماتكون غيبه..
سلطان(وهو صاك عينه):جيه ..شوقلتي عني؟
عاشه:ماشي اليوم يالسه اسولف مع غاليه عنك
سلطان(فج عينه عقب ماسمع اسم غاليه):عرفت سالفة الرضاعة؟
عاشه(بابتسامة):ههه..هيه ،خالد خبرها
سلطان:وشو قالت؟
عاشه:سألتني عنك وكيف كان موقفك..يلا اخويه بخليك ترتاح
سلطان:انتي شوقلتيلها؟
عاشه:قلتها انك فرحان بالخبر
سلطان:...
عاشه:هههههههه
سلطان:جيه تضحكين؟
عاشه:شكت لتكون بتخطب غيرها
سلطان(بابتسامه خفيفة):ياريت
عاشه:شوقلت؟
سلطان:اقول اطلعي وصكي الباب وراج
عاشه:ان شا الله...سلطان
سلطان:نعم
عاشه:ممكن توديني البحر؟
سلطان(وهو يفر المخده اللي راقد عليها):دريولج انا؟؟؟؟

خالد قرر انه يتغدى في القصر الهندي اول مادخل شاف الطاولة المتعود يتغدى فيها مع عبدالله،شاف ثلاث رياييل يتغدون عليها فيلس ع الطاوله اللي ع الزاويه..كالعاده طلب لحم سلطاني..يلس لدقايق ينتظر ماعرف شويسوي فاتصل بسلطان لكن سلطان غالق موبايله..لكن فيه شي غريب حس فيه خالد..حس بعيون متجهه صوبه كان شاب يالس ع الطاوله اللي مجابلتنه،لاحظ انه هالشاب يبتسم له وماخازت عينه بالرغم انه خالد صد صوبه
خالد فخاطره:يمكن يبتسم لحد يالس ورايه..بس محد ورايه...عفانا الله
الحمدالله وصل الغدى ..حصلت شي التهي به
وبعد لحظات وخالد حاط اول لقمة فحلجه،شاف الشاب ماسك صحنه وياي صوبه
خالد وعلامة الاستعجاب فويهه:....
الشاب:ممكن اتغدى معاك؟
خالد:تفضل

***مزون شمر*** · 05-11-2008, 07:41 AM

الشاب:انا ما احب اتغدى بروحي..اتصدق مرة كنت بروحي في البيت فاتغديت مع الدريول
خالد:هههههه
الشاب:تتريا حد؟
خالد:لا
الشاب:بسم الله
خالد(بابتسامه خفيفة):بسم الله
الشاب:لا اليوم شكلك احسن
خالد:عفوا اخويه..انا ماعرفك ..اظنك مشبه عليه
الشاب:بالعكس اعرفك..انت اللي ذاكرتك شي فيها
خالد:ذكرني
الشاب:انت اللي كنت راقد ع الرمله..صح؟
خالد:انت..عرفتك
الشاب:اعرفك ع نفسي..اسمي عمران
خالد:والنعم
الشاب:الله ينعم بحالك
عمران:احس اني اعرفك من فترة طويييلة
خالد:سبحان الله..
عمران:شوتشتغل؟
خالد:لوساءلني من شهر جان جاوبتك لكن الحين ماشتغل
عمران:وين كنت تشتغل؟
خالد:في الاتصالات
عمران:امم...يعني انت الحين ماتشتغل
خالد(فخاطره):هذا غبي والا يستغبى؟
:ماشتغل..لكني مقدم فكذا مكان وانتظر ردهم
عمران:شوف ..بصراحة من غير لف ولا دوران انا ارتحت لك
خالد:تسلم اخويه
عمران:بصراحة انا من بوظبي وعندي اشغال فدبي..يعني فاتح كذا محل اترزق الله فيهم
خالد:نعم
عمران:وانا تعبت من الطريج..كل يوم ماسك خط بوظبي دبي دبي بوظبي
خالد:الله يعينك
عمران:وهالايام ادور ع واحد امسكه الشغل وارتاح
خالد:ليش ماتحطي اعلان في الجريده؟
عمران:مافكرت فيها..المهم شرايك انتاللي تدير الشغل؟
خالد:انا؟؟
عمران:هيه..إنت
خالد:وشو اللي يخليك واثق فيني لهذي الدرجة وانت توك تتعرف عليه؟
عمران:شوف انا انسان اثق باحساسي من اول نظرة لاي شخص اشوفه
خالد:بس انا ماعرف للبزنس و..هههه كيف تامن شخص ماتعرفه ع خيرك
عمران:شوف البزنس بس يباله ممارسه ومن البدايه بس بخليك تمسك محل واحد وبعدها بخليك تشرف ع المحلات كلها
خالد(وهو مب مستوعب الموقف):محلات شو؟
عمران:محل اثاث ومحل الكترونيات والثالث في الطريج
خالد:ماشا الله
عمران:كلهم فشارع زايد
خالد(فخاطره مايبين عليه):موقع استراتيجي
عمران:هذا العنوان وهذا رقمي
خالد(باستهزاء):وكم المعاش؟
عمران:من البدايه 7تالاف درهم
خالد:بس..في الاتصالات كنت احصل فوق العشرة
عمران:هذا بس اذا مسكت محل واحد
خالد(حس ان الريال يتكلم جد):بفكر في الموضوع وبرد لك خبر عقب يومين
عمران:الغالي مايبالها تفكير
خالد:انت ليش مستعيل؟
عمران:خير البر عاجله
خالد:انت بصراحة ..عجيب
عمران:ههه
خالد:عندي سؤال واحد
عمران:تفضل
خالد:جيه ماتنتقل وتعيش فدبي
عمران:والله بودي ..بس الوالده هب طايعه
خالد:اها
عمران:يلا..شوقررت؟
خالد:ومنو بيعلمني اصول الشغل؟
عمران:انت روح محل الاثاث هذا اول محل بتشتغل فيه وراح تشوف واحد لبناني اسمه انطوان،انت روحله وهو بفهمك
خالد:وشعرفه فيني؟
عمران:لاتخاف،انا بتصلبه
خالد وهو يفكر:ماعرف شواقولك...شي غريب وعجيب
عمران وهو يمد يده لخالد:نقول ع بركة الله
خالد(فخاطره):يلا مابنخسر شي
: ع بركة الله.
خالد عقب ماظهر من المطعم ركب سيارته وهو واقف جدام الاشارة
شل موايله الثاني المحطوط في السده واللي كان يستخدمه بس في الشغل
خالد:خيييبه 5مس كووول...رقم غريب
فكر انه يتصل بالرقم لكن فكره طول الوقت كان مع عمران والكلام اللي دار بينهم ففر موبله ع السيت الخلفي وكمل طريجه..

***مزون شمر*** · 05-11-2008, 07:42 AM

الجزء التاسع عشر

بعد ماوصل خالد البيت اكتشف انه سلطان هو اللي داق عليه كذا مرة،فاتصل به
سلطان:مرحبا
خالد:مرحبتين..وينك ياريال؟ماتنشاف هالايام؟
سلطان:انت اللي وينك؟
خالد:خير متصل خمس مرات
سلطان:مغلط
خالد:خمس مرات ومغلط
سلطان:كنت بتصل باحمد فاتصلت بك..
خالد:المهم،شورايك نتعشى اليوم فاي مطعم تختاره؟؟
سلطان:اكيد انا اللي اختار لانه الحساب انا اللي بدفعه
خالد:نعم؟ليكون ع بالك اني فلست
سلطان:ههه..اسولف انت ماتحب حد يسولف معاك؟
خالد:المهم..موافق؟
سلطان:أكيد..بس وين؟
خالد:شورايك بعشا في السفينه
سلطان:هيه والله الجو روعة هالايام..بس انا وانت
خالد:منصور مسافر لوفي البلاد جان بتحصله اول واحد يركب السفينه
سلطان:هههههههه ..ولهت عليه
خالد:الساعة 9 بشوفك
سلطان:ان شالله

سلطان عقب ما كلم خالد راح لغرفة عاشه
سلطان:عاشه
عاشه:ادخل..الباب مفتوح
عاشه يالسه ع النت تكلم ربيعتها ميسون ع المسن
سلطان:شو تسوين؟؟
عاشه:اكلم ربيعتي
سلطان:انا ساير دبي تبوني اوصلكن بيت عمي
عاشه:اف كوووورس..بس اصبر عليه شوي توها ادخلت المسن
سلطان:وانتي سلامة ؟
سلامة :لا مابسير
سلطان:جيه مبوزه؟
سلامة:اف ..عندي امتحان وبذاكره
سلطان:جيه تذاكرين وهو مب محسوب
عاشه:ونعم الاخ
سلامة:ماقدر لازم اذاكر الامتحانات قربت
سلطان:ع راحتج..عويش عندج نص ساعة بس وبعدها بروح عنج
عاشه:اوكي ..سلامة حبيبتي
سلامة:كأني سمعت اسمي
عاشه:سلموه ..الله يخليج ودي عباتي عند ايفلين ختكويها
سلطان:ماحيدها تشتغل عندج
عاشه:اسكت الله يخليك..وبعدين هذا يسمونه احترام الكبير
سلطان:اها....المهم ،لا تتاخرين
عاشه:حشى..خلاص طلعت عنها
سلطان:احسن
عاشه:اووه اول شي بتصل بغاليه، يمكن اظهرت
سلطان(فخاطره):غاليه

عقب نص ساعة

في سيارة سلطان
سلطان:اتصلتي بغالية؟
عاشه:لا بخليها مفاجأة
سلطان:يا سلام..أحلى مفاجأة
عاشه:اكيد..
وفجأة سمعوا صوت مسج
مرحبا باللي ابيه وقلبي
يوده..
واللي غلاته عندي محدن
وصلها..
طلبتك طلب وعسى
ماترده..
"لاتتركني وحيد"وصحبتي
لاتملها..

سلطان (مستانس ع المسج):من يملك يا منصور
عاشه بخبث:هذا المسافر
سلطان:نعم هو بعينه
عاشه:هههه ..درس عربي ومتى بيرجع؟
سلطان:احتمال عقب شهر بيتم في البلاد اسبوعين وبيرجع
عاشه:بس اسبوعين ؟؟
سلطان:اتخيلي فهالاسبوعين بيملج وبيعرس
عاشه(مصدومة):بيعرس؟
سلطان:هيه ..احسن له..يحصل له حد يتونس معاه ويهتم فيه
عاشه:وهو خطب مرة ثانيه؟
سلطان:هيه..اظن بنت يرانهم
عاشه والنار تشتعل فقلبها:بنت يرانهم؟وهو متى لحق يخطب؟
سلطان:قبل لايسافر خطبها..تصدقين؟

***مزون شمر*** · 05-11-2008, 07:43 AM

عاشه:شو؟
سلطان:تصدقين ماشافها ولا يعرف شكلها
عاشه:غريبه؟عيل منو خطبها له
سلطان:امه
عاشه:واذا ماعيبته مابياخذها
سلطان:اصلا منصور مايفكر بالشكل كثر مايفكر بالاخلاق خاصة عقب خطبته الاولى
عاشه:اها
سلطان:تدرين ليش اعزه
عاشه(بضيق):ليش؟
سلطان:لانه يملك شخصية قوية
عاشه(بفضول):كيف يعني؟
سلطان: هو الوحيد اللي يعرف شويبغي وما يوقف عند اول عقبة تواجهه
عاشه فهاللحظة كانت تحس بالغصة من كلام سلطان اكثر من خبر خطبته لانها فهاللحظة كانت محتاجة لكلمة تذم منصور حتى تنساه مب تكبره فعينها
سلطان:تفضلي الشيخة وصلنا
عاشه:يزاك الله خير
سلطان:سلمي ع الموجودين
عاشه:الله يسلمك...يبلغ
سلطان عقب ما شاف اخته تدخل البيت يلس دقيقة كاملة يتأمل البيت .

سلطان:مع السلامة يالغالية
وراح

وعقب ماوصل سلطان للسفينه اتصل بخالد
سلطان:وصللللت..انت وينك؟
خالد:بتشوفني عند اخر طاوله ع ايدك اليسار
سلطان:اوووكي

ركب سلطان السفينه ومشى صوب الطاولة اللي حاجزينها تفاجأ باللي جدامه
قبل لايشوف اللي جدامه كان مزاجه حلو لكن الحين العكس تماما
سيف:مرحبا اخويه
سلطان:مرحبين
خالد:اتاخرت عشر دقايق
سلطان:المهم وين الاكل
خالد:بسم الله عليك اصبر شوي
سلطان:حبيبي انا مش شراتك لاشغلة ولا مشغلة ورايه دوام
خالد:بدينا بالمعاير
سيف:سبحان الله رغم انكم عيال عم لكن ماتتشابهون
خالد:الحمدالله
سلطان:انت تتمنى..
سيف:ههههه
خالد:المهم اعرفكم ع بعض سلطان ولد عمي سالم و سيف خطيب اختي غاليه
سيف:والنعم
سلطان:الله ينعم بحالك
خالد:سموا
سلطان+سيف:بسم الله
سيف:خالد
خالد:نعم
سيف:بعدك تدور شغل؟
سلطان(فخاطرة):هذا شله؟
خالد:بصراحة ..انا حصلت شغل وان شالله ببدا باجر
سلطان:وين
خالد:واحد من بوظبي يبغي يتشارك معايه
سلطان:كيف يعني؟
خالد:يبغيني ادير شغله لانه مب متفيج
سلطان:اها..
سيف:شو اسمه؟
خالد:عمران هذا اللي اعرفه
سيف:عمران..عمران بن عبدالله
خالد:تعرفه
سيف:هذا تاجر معروف..والحين فاتح كم مشروع فدبي..تعرف ياخالد رغم انه مش كبير في السن لكنه تاجر شاطر والكل يرتاح في التعامل معاه
خالد:الحمدالله
سيف:كيف تعرفت عليه؟
خالد:القدر
سيف:القدر؟
خالد:القدر جمعني فيه
سلطان:الله يعطيك خير هالريال ويبعد عنك شره
سيف:خالد..
خالد:نعم
سيف:بصراحة..انا ابغيك تقنع الاهل بأن نقرب يوم الملجه
سلطان(وهو يحاول يبلع اللقمة بصعوبه):...
خالد:متى يعني؟
سيف:عقب اربع اسابيع
خالد:ان شا الله..بحاول
سيف:يزاك الله خير
خالد:الله يوفقكم
سيف:اجمعين ان شا الله..وانت يا خالد متى بتتزوج؟
خالد:هههههه...خلني اشتغل اول وايمع لي كم فلس وبعدها يصير خير
سيف وهو يلتفت لسلطان:وانت يا سلطان ماتفكر بالزواج ؟
سلطان فخاطره:انت السبب
:افكر بالزواج...لكن كل شي فوقته حلو
كانت الدقايق تمر مثل الساعات على سلطان،وكان باين ع ملامح ويهه انه ظايج لدرجة انه خالد حس انه مو على طبيعته..وبعد ساعة من لمتهم
سلطان:اسمحولي يا جماعة
خالد:ليش..بعدها ماستوت عشر ونص
سلطان:راسي مصدع،وبعد ورايه درب
خالد:الشارجه جريبه..أي درب هذا
سيف:عندي حبة بندول في السيارة جان تبا بييبلك
سلطان:لا..مشكور
خالد:ع راحتك
سلطان:مع السلامة
خالد+سيف:مع السلامة
خالد:لاتسرع
سلطان:انت اخر من يتكلم
سيف:ههههههه
ركب سلطان سيارته بعد عشر دقايق كان عند بيت عمه ..اتصل بعاشه حتى تظهر له عند الباب
عاشه(وهي تفتح باب السيارة):بنرجع البيت؟
سلطان:شوهالسؤال الغبي؟هيه بنرجع البيت
عاشه حست انه معصب فسكتت عنه
طول الطريج مانطق باي حرف وعاشه قلبها بدا يوسوس
عاشه(بتوتر):تبغي ماي؟
سلطان:عاشه
عاشه(بابتسامة):نعم
سلطان(بهدوء):ليش كبرنا؟
عاشه باستغراب:نعم؟
سلطان:كنا مرتاحين..لاهم،لا حزن..
عاشه:هاي الدنيا..مثل الامتحان
سلطان:امتحان صعب
عاشه:بس فيه اشيا حلوة فهالحياه..لكن الانسان هو اللي عامي عينه عنها
سلطان:شوتقصدين؟
عاشه:يعني ..عندك مثلا الصحة، الوظيفة، الام، الاب،السيارة اللي تسوقها
كثير من الناس ماعندهم اللي عندك
سلطان(وعينه ع السكان):الحمدالله
عاشه:الانسان هو اللي بيده انه يكون سعيد او حزين
سلطان:صحيح
سلطان(فخاطره):انا لازم انساها..لازم
دخل خالد البيت الساعة 11 ونص والبيت هادي الكل راقد الا غاليه
راح لغرفة اخته ودق الباب
خالد:غليوووه
غاليه:نعم؟؟
خالد:تعالي ابغيج شوي
غاليه:خير
خالد بابتسامة خبيثة:اليوم تعشيت مع المعرس
غاليه:سبحان الله
خالد:هههه..طلب مني شي وانا مابرده
غاليه:شو؟
خالد:انا قلت اقولج اول وبعدها اخبر الوالد
غاليه:افففف
خالد:هههههه
غاليه:حرقت اعصابي
خالد:سيف يبغي يجدم يوم الملجه
غاليه(بصوت عالي):شو؟؟؟؟
خالد:بسم الله
غاليه:لا مابغي
خالد:انتي شبلاج؟شوالفرق بين اليوم وباجر؟
غاليه:هذا ليش مستعيل؟
خالد:هذا؟هذا له اسم
غاليه:متى يعني؟؟
خالد:عقب اربع اسابيع
غاليه(بدا بطنها يعورها):شو؟؟
شاور ابويه..
خالد:ماعتقد انه ابويه يرفض
غاليه:خالد
خالد:نعم..امري
غاليه:يعني انته تحس انه الريال المناسب لاختك؟
خالد:بصراحة يا غاليه..سيف اعتبره شرا اخويه واكثر
غاليه بابتسامة راحة:ريحتني الله يريحك دنيا واخره
خالد:يعني ..موافقه ؟؟
غاليه هاللحظة احمر ويهها وقامت من ع القنفة وادخلت غرفتها
خالد:اه منكن يا البنات
دخلت غاليه غرفتها وظهرت البوم الصور اللي حافظتنه في السده
ويلست تجلب الصور وتتذكر المواقف الحلوة اللي صارت
وفجأة طاحت عينها ع واحد يلست تتأمل الصورة لمدة طويله
كانت صورة احمد ولد عمها سالم كانت متصوره معاه جدام البحر
ظهرت الصورة من الغلاف ،كانت بتاريخ 1993
غاليه:اللي مايبغيك لاتصيح تبغيه..ودر هواه ويوز عنه
اليوم الثاني
انطلق خالد للشغل اليديد وكله امل وتفاؤل،بركن سيارته ودخل

***مزون شمر*** · 05-11-2008, 07:43 AM

خالد:صباح الخير
انطوان:صباح النور..ممكن ساعدك؟
خالد: انا اسمي خالد
انطوان:تشرفنا
خالد:الله يخليك..انا ياي من طرف الاخ عمران
انطوان:انت الشب اللي راح تشتغل هون
خالد:نعم
انطوان:يا اهلا وسهلا..تفضل ..من هون المكتب
خالد:بغيتك تساعدني ..
انطوان:من عيني
خالد:تسلم..(ودخل المكتب ويلس ع الكرسي)
:ماشوف الملفات؟
انطوان:في المكتبة..لحظة...تفضل
خالد:هذي الحسابات؟
انطوان:لا..هذي اسامي الشركات اللي عم نتعامل معهن
خالد:اها
يلس انطوان يعلم خالد اصول الشغل حوالي ساعتين وطبعا الشغل محتاج ممارسة اكثر من النظر للملفات والبحث فيهم

الساعة 2 الظهر سيف يالس فمكتبه متملل تام ع الدوام ساعة،شل موبايلة من ع الطاولة واتصل بربيعه
سيف:مرحبا بوخالد..جيف حالك؟
وليد:الحمدالله بخير ويسرك الحال
سيف:شورايك تمر عليه الشركة؟
وليد:اسمحلي سيف..ريلي تعورني
سيف:عسى ما شر؟
وليد:الشر ماييك..اتخيل كنت اركض فحديقة الممز(الاخ رياضي)
وبحركة سريعة التوت ريلي
سيف:هههههه..يمكن حد ظربك بعين
وليد:ههههه..اشك فيك
سيف:حرام عليك..إنت في البيت؟
وليد:نعم..حياك
سيف:عقب ساعة ونص بتشوفني عندك
وليد:حياك الله
سيف:الله يحيك
سيف ووليد اصدقاء من ايام الاعدادية، صحيح ان وليد على قد حاله لكن هذا الشي مافرق مابينهم بل بالعكس سيف يرتاح فبيت وليد رغم صغر حجمه.

عقب ساعة ونص سيارة سيف واقفة جدام البيت

سيف:مرحبا الساع..جيف حالك؟ان شالله احسن
وليد:الحمدالله..مثل ماتشوف،امشي بالعكاز
سيف:الله يعينك
وليد(بابتسامة):شو اخبار معرسنا؟
سيف:بعدني..لين الحين ماملجت
وليد:ياريال لاحج ع العرس وصدعته
سيف:اللي يسمعك يقول ماخذ اربع
وليد:ههههههه
سيف:وين رايح؟انا مابغي شي
وليد:والله انا يوعان وابغي اتغدى
سيف:ما اقدر اقول شي..خذ راحتك
ظهر وليد من الميلس وراح لاخته عليا
وليد:عليوه ..انجبيلنا الغدا
عليا:اففف..انا هب متفيجة وبعدين وين لاتوه
وليد:تعرفين انه اليوم لاتا فبيت عمي..
عليا:مب حاله هاي..عنبوه مايرومون ييبولهم شغاله
وليد:عن الرمسه الزايده،سيف في الميلس..لاتفشليني
عليا:سيف..جيه ماتقول من الصبح
وليد:عليا استعيلي شوي
عليا:ان شا الله ان شا الله
سيف:جيه معذب نفسك يا ريال انا ياي اطمن عليك مب اتعبك معايه
وليد:تعبك راحة
سيف:اممم..اروح ريحة المجبوس
وليد:ههه..توك تقول ماتبغي شي
سيف:شو أسوى،مجبوسكم لايقاوم
عليا هالوقت طايره من الفرحة وراحت المطبخ انجبتلهم الغدا وسوتلهم عصير برتقال طازج وحطت الصينية عند الباب ودقت الباب ورجعت للمطبخ اللي مجابل الميلس
تنتظر طلعت سيف من الميلس بس فهاللحظة عمتها زكرتها
عليا:افففف..هذا مو وقته...يايه
عمتها انسانه طيبة لكنها مريضة ،صحتها تدهورت عقب وفات اخوها من 3 سنين،وهي عايشه معاهم عقب طلاق امهم وابوهم من 18 سنة ،فامهم من جنسية عربيه عقب طلاقها سافرت بلادها وتزوجت،وعمتهم رفظت الزواج من كل اللي تقدمولها حتى تربي عيال اخوها.

عليا:نعم؟
العمه:منو في الميلس؟
عليا:هذا سيف ربيع وليد
العمه:اها..الله يحفظة
وبعد عشر دقايق دخل وليد غرفة عمته
عليا بنبرة حزن:راح؟
وليد:هيه
عليا فخاطرها:ياخسارة
وليد:ياي يطمن عليه
العمه:فيه الخير..متى عرسه
عليا(بدقات قلب سريعة):هو بيعرس؟
وليد:هيه..ان شا الله عقب اربع اسابيع ملجته
العمه:الله يسعدهم
وليد:امين
عليا(فخاطرها):مستحييييييل..
واظهرت من غرفة عمتها معصبه والشرار بيظهر من عينها
قبل اذان العصر بساعة خالد ظهر من مكتبه اليديد وركب سيارته يبغي يوصل البيت باسرع وقت ويحطي راسه ع المخده ويروح فسابع نومه
خالد(بصوت عالي): لله يا وقت مضى وأيام مرت وين ..أيام عهد الوفى ويقال ياعونك...تغنم زمانك وأكسبه دام وقتك زين...تراى العمر يفنى مثل زرعاً يحشونه

ووقف عند الاشارة حوالي دقيقة كامله
خالد:يلا ارجوج يلا ..احسن لي اذكر الله ويلس يستغفر وطاحت عينه على شي تحت الكرسي..شو ممكن يكون؟؟؟؟

***مزون شمر*** · 05-11-2008, 07:44 AM

الجزء العشرون

كانت مثل العلبة طايحه تحت الكرسي اللي حذال خالد،حاول خالد ان يمسكها لكن الهرنات اللي وراه مارحمته
خالد:الحين تفيجتي
وانتظر الى ان وصل البيت،شاف كيس مجوهرات منخش تحت الكرسي وحذاله علبه،فتحها خالد،شاف داخلها
خاتم رقيق
خالد وهو يتذكر اليوم اللي اشترى فيه عبدالله هالخاتم
(وهو يتنهد):الله يرحمك..الله يغفر لك
صك الباب وشل الكيس،ودخل البيت وسلم
بوخالد:تغديت؟
خالد(فعالم ثاني):لا
ام سلطان:انجبلك الغدا؟
خالد:ياريت
ام سلطان:ان شالله
بوخالد:انا بعد ..اغرفيلي شوي
ام سلطان:توك متغدي
بوخالد:الله اكبر عليج..قبل شوي غرفتيلي ملاس واحد بس
ام سلطان:انت اللي قلت ..ماتشتهي
بوخالد :الحين اشتهي
سلطان:يالله الحين بتسوون سالفة ع غدا؟الله يستر هذي بوادرالشيخوخة
بوخالد:شيخوه تاخذك ان شالله
سلطان:هههههههههههه...
ام سلطان:استح ..خيل،هذا ابوك
سلطان وهو يحب راس ابوه:سامحنا بوخالد
بوخالد:روح ذاكرلك كلمتين تنفعك
سلطان:ان شالله
بوخالد:يلا خالد ،قوم نتغدا
خالد:ان شالله..
ع الغدا
بوخالد وخالد بس يالسين ع الطاولة
قام خالد وبلح لابوه ولعمره السمج وجدم صحن التمر لابوه ويلس
بوخالد وعينه ع الصحن:انا زعلان منك
خالد باستغراب:ليش يابويه؟
بوخالد:اسمع من الناس انك اشتغلت وانا ياغافلين لكم الله
خالد:انا ماقصدت
بوخالد:الحين عرفت معزتي عندك
خالد:يابويه لاتكبر السالفه..انا قلت اذا عيبني الشغل واستقريت عليه بخبركم
اخاف افرحكم وبعدها اطلع من الشغل
بوخالد:كم صارلك وانت فهالشغلة؟
خالد:هذا الاسبوع الثاني
بوخالد:مرتاح؟
خالد:الحمدالله
بوخالد بابتسامه خفيفه:الله يوفقك
خالد:امين اجمعين..بعدك ماخذ ع خاطرك مني؟
بوخالد:لا..بس كنت اتمنى اني اكون اول واحد يعرف
خالد:والله يابويه كل شي صار فجأة
بوخالد:اخافك تعرس من ورانا وتقول صار فجأة
خالد:هههههه..لاعاد ماتوصل لهذي الدرجة..باين انه بعدك زعلان
بوخالد:لا انا هب زعلان
خالد وهو يقوم من كرسيه:وهذي بوسه ع الراس
بوخالد:بعيد عني..ريحتك هسس
خالد:ههههه

دخل خالد غرفته وظهر الخاتم ويلس يتامله

ودي اموت اليوم واعيش باجر..
واشوف منهو بعد موتي فقدني..
ومنهو حملني لين ذيج المقابر..
واشكر كل من كرمني ودفني..
شخص تعنالي مع انه مسافر..
وشخص قريب للأسف ماذكرني..
ومنهو يرتب غرفتي والدفاتر..
وان شاف صورة لي صاح وحضني..

عقب صلاة المغرب
خالد و غاليه يالسين ع الطاولة ياكلون بقسم مع حليب
غاليه:شواخبار الشغل اليديد؟
خالد:ماشي حاله
غاليه:شو سالفتك اليوم؟كله سرحان
خالد:انا؟؟؟
غاليه:هيه ..انت..اللي ماخذ عقلك يتهنابو
خالد:اه ..انا وين وانتي وين
غاليه:ههههه
خالد:اليوم صارلي شي عجيب
غاليه:شو؟
خالد :اليوم وانا واقف عند الاشارة شفت ....الخ
غاليه:سبحان الله!!
خالد:شو اسويبه؟كيف اوصل الامانه لمرت عبدالله
غاليه:احسن شي تسويه انك تروح لاخوها وتعطيه الامانه
خالد:بس انا ماعرف رقم اخوها
غاليه:اسال مايد اخ عبدالله
خالد:هيه والله..كيف راح عن بالي
غاليه بخبث:اقولك انا... اليوم بالك مب عدنا
خالد:هههه...اقول...صبيلي حليب
غاليه:خلصت الحليب كله ...ماتم شي في الدله
خالد:الله اكبر عليج..سلطون شارب كوبين
بدخلةام سلطان البيت:شبلاه سلطان؟
خالد(قلبه وقف):ما مافيه شي..اقصد سلطان ولد عمي
ام سلطان:هييه
غاليه:هههههههه

***مزون شمر*** · 05-11-2008, 07:46 AM

بعد اسبوعين

عليا: الو...سبيت
سبيت بدون نفس:نعم... شو تبغين؟
عليا بدلع:سبيت بليييييز ابغيك فخدمة
سبيت:اففف..هذا مب وقته انا في البيت بعدين بتصل فيج
عليا:اوكي..لاتنسى
سبيت:اوكي اوكي..باي
عليا:باي
عليا فتاة في 23 من عمرها ،متوسطة الجمال عقب الثانوية يلست في البيت
لانها مش فالحة في الدراسة ،حاول معاها اخوها تكمل دراستها لكن ماشي فايده،عنيده وراسها يابس..

فيوم الجمعه الكل تجمع فبيت ام عبدالرحمن...البنات وام سلطان بن عبدالرحمن وام سلطان بن سالم...
عاشه وغاليه يالسين فغرفة ام عبدالرحمن يسولفن..غرفة اليدة غرفة بسيطة مفروش فيها سجاده خمريه حرير واثاث خشبي من الزين وتنتشر في الغرفة ريحة العود والطيب..

عاشه:غليوه
غاليه:نعم
عاشه:متى ملجتج؟
غاليه:الخميس الياي
عاشه:يالله..قريب
غاليه:لاتذكريني
عاشه:اونج عاد مب مستعيله
غاليه:عاشوه..اقبظي لسانج احسن لج...بنشوفج شوبتسوين؟
عاشه:فديتني انا..اصلا خطبتي وملجتي كلها فيوم واحد
غاليه:ههههههههه..خسج الله انتي المستعيله ع العرس هب انا
عاشه:اسولف حرام حد يسولف؟
غاليه:خذي راحتج حبيبتي
عاشه:شو بتلبسين في الملجه..فستان جاهز او تفصيل؟
غاليه:انا اتفاجأت يوم جدموا الملجه عسب جيه اشتريت جاهز
عاشه:ماخذتيني معاج..الله يسامحج
غاليه:ان شا الله يوم بفصل فستان العرس باخذج معايه..كله ولازعلج يا الشيخة
عاشه بابتسامه عريضه:وناسه اسمينا بنحوط حواطه
غاليه:هذا اللي هامنج
عاشه:بالعكس ..اخذ خبرة
سلامة (بابتسامه):غليوه..محلوة
غاليه:اووه..جان استحي
سلامة:ههههه..غليوه متى العرس؟
غاليه:ان شالله عقب شهرين
سلامة:امسات عقب صلاة الفجر ييتي(جئتي) فبالي
غاليه:عسى دووم اطري ع البال
عاشه:ياللي على البال تطري وانت ماتدري...وش ذنبه اللي يحبك وانته خليته
سلامة:متفيجه..غليوه عقب ماتعرسين لاتقطعينا
غاليه:ههههههه..جيه انا وين سايره؟
ام عبدالرحمن: قوموا يابنيات الغدا زاهب
الكل:ان شا الله امي...
ام عبدالرحمن(وهي تصد وراها والبنات يسولفن ):ماشبعتوا من هاللغوة الزايده؟
عاشه(وهي حاطه ذراعها ع جتف غاليه):نتشبع من العروس يام عبدالرحمن
ام عبدالرحمن:فديتها وفديت ريحتها
غاليه وهي تحب راس يدتها:فديت روحج..
ام عبدالرحمن:حبيبتي
عاشه(وعينها ع السقف):اه ..متى اعرس ؟وشوف هالحب
ام عبدالرحمن:خسج الله ياعويش صدق مافيج خير..على منو بتظهرين ؟ابوج جدامج
عاشه:ههههههه...بخبر ابويه
ام عبدالرحمن:خبريه..
سلامة:شو مسوين غدا؟
ام عبدالرحمن:مالح وصالونة دياي
سلامة:واو..يلا يلا قوموا
غاليه:قمنا
يوم الملجة

فبيت بوسالم عاشه فغرفتها يالسه تتزهب بتروح عند غاليه
سلامة(وبيدها الكتاب):ياحظج..
عاشه:ذاكري احسن لج الحين الرياييل يبون وحده تشتغل وتكد عليهم
سلامة:الله ياخذ الثانوية
عاشه:تعرفين شو احلى شي في الثانويه
سلامة:شو؟
عاشه:الهدايا اللي بتحصلين عليها
سلامة:اه..هذا اللي مصبرني
عاشه:سلموه..وين حلقج اليديد؟
سلامة:أي واحد؟
عاشه:الأزرق..
سلامة:داخل الصندوق
عاشه:الحمدالله ..اتجهزت قبل الوالده
سلامة:امي بتسير؟
عاشه:اكيد
سلامة:حرام عليكم..كلكم بتستانسون الا انا
عاشه:افففف...اذا سرتي شو بتسوين؟بتغرفين العيش؟
ام سلطان:عاشه...عاشه
عاشه(بصوت عالي):يايه
ونزلت عاشه وراحت غرفة امها
عاشه:انا زاهبه
ام سلطان:اخوج في البيت؟
عاشه:مادري..ليش؟
ام سلطان:التاير فاش..
عاشه فخاطرها:كله من عينج ياسلموه
فهاللحظة دخل سلطان البيت
ام سلطان:سلطان
سلطان:نعم
ام سلطان:الغالي ..بغيتك توصلنا بيت عمك

ام سلطان:التاير فاش
سلطان:انا ماروم..اتصلي بولدج سيارة موقفة عند بيت يدتي
عاشه:هذي امك اللي ربتك ..تردلها طلب؟
سلطان:انتي اسكتي يالسوسه..مافيج خير
ام سلطان:عطنا مفتاح سيارتك بخلي الدريول يوصلنا
سلطان:عطيني عشر دقايق وبوصلكم
عاشه:نفسي اعرف شوهالحب للسيارة
ام سلطان:صخي..ماصدقنا

في السيارة
ام سلطان:الله يوفقج يا غاليه ويسعدج
عاشه:امين
سلطان(فخاطره):بحظر زفافك ياحبيبي ..بحظر زفاف اللي هويته
سلطان:وصلنا
ام سلطان:مابتنزل؟
سلطان:لا
ام سلطان:عمك بيفرح ان شافك
سلطان:راسي مصدع ماقدر
ام سلطان:ع راحتك
سلطان هالوقت حس بظيجه فقلبه،نزلهم وراح الريف مول
يلس فأحد المطاعم وطلبله عصير ليمون يبرد ع قلبه
عاشه:غليوه...الفستان يجنن عليج
غاليه:شكرا حياتي
عاشه:بس مكياجج وايد خفيف
غاليه:احسن...حتى اكون مختلفه وانا عروس
عاشه:ياعيني
غاليه:ههههه
عاشه:اليازية يايه معاهم؟
غاليه:لا..اتصلت فيني قبل ساعة واتعذرت
عاشه:غريبه؟ملجت اخوها وماتحظر
غاليه:ريلها امريظ
عاشه:الله يعافيه...مادام جيه خلها تيلس مع ريلها
غاليه:هههههه..انتي داهيه
عاشه:حرام عليج
فهاللحظات مريم وام سلطان في المطبخ يزهبون العشا
مريم:شو يام سلطان...ماخطبتي لولدج؟
ام سلطان:لا والله..كان بخاطري ايوزه لميره..لكن الله ماكتب
مريم:الله يفرحج فيهم...

***مزون شمر*** · 05-11-2008, 07:46 AM

في بيت بوسيف

بوسيف وهو يعدل سفرته:وين ولدج؟اتأخرنا عن العرب
ام سيف بتوتر:ممكن تيلس حتى افهمك؟
بوسيف:شو اللي صاير يا فاطمه؟
ام سيف (وهي ماسكه طرف شيلتها بالقوو):ولدك مايبا يعرس
بوسيف وهو غير مستوعب:نعم؟شوقلتي؟
ام سيف:الزواج قسمة ونصيب
بوسيف(بصوت عالي):سيف..سيف..سيفوه
ام سيف:ولدك مو في البيت
بوسيف:الجبان..وين شرد؟..ارمسي(بصوت عالي)
ام سيف(وهي تبلع ريجها):ماعرف؟
بوسيف والشرار بيظهر من عينه:وين ولدج؟؟؟؟
ام سيف:والله العظيم ماعرف وين مكانه
بوسيف:الله ياخذك الله ياخذك...وين اودي ويهي عن العرب
ام سيف:لاتدعي عليه..حرام
بوسيف:حرمت عليه عيشته
ام سيف وهي تصب له كاس ماي بارد:اشرب..برد ع فادك
بوسيف:مالي نفس...حسبي الله ونعم الوكيل..اتصلي بولدج
ام سيف(السماعه ع اذنها):...مغلق
عقب ثلاث دقايق من الصمت
بوسيف:فاطمه
ام سيف:نعم؟
بوسيف:انتي جبرتي الولد ع غاليه؟
ام سيف:لا والله ابد..هو بنفسه مختارنها
بوسيف:انتي شرتي عليه يجدم يوم الملجه؟
ام سيف:لا..
بوسيف:عيل ليش مايباها؟هو ع باله بنات الناس لعبه؟؟؟
ام سيف:اكيد فيه سبب
بوسيف:هذا اصعب موقف اواجهه فحياتي...كيف ابلغهم بهذا الخبر السعيد؟ولديه خلاص مايبا بنتكم..
ام سيف:لاحول ولا قوة الا بالله العلي العظيم
بوسيف(وهو يشل موبايله من ع الطاوله الزجاج):مب عارف بشو انطق؟...
فهاللحظة بوخالد واخوه سالم وخالد يالسين في الميلس ينتظرون بوسيف وسيف
سالم:صلينا العشا وهم بعدهم ماوصلوا
بوخالد:الغايب عذره معاه...
وبعد خمس دقايق رن موبايل بوخالد
بوخالد:مرحبا بوسيف
بوسيف:مرحب باجي...شحالك بوخالد؟
بوخالد:بخير ونعمه...عسى ماشر وينكم؟
بوسيف وهو حاط يده اليمين ع يبهته :..........

فغرفة غاليه
عاشه:اتأخروا..
غاليه:وايد
عاشه:من الحين اتحاتينه؟
غاليه وهي تبتسم من ورا خاطرها:....
وفجأة سمعوا بو خالد يدق ع الباب:غاليه؟؟؟
غاليه:تفضل ابويه
بوخالد وهو يبتسم لعاشه ابتسامه باهته:عاشه..امج تبغيج
عاشه وقلبها مب مطمن:ان شالله
غاليه (بضربات قلب متسارعه):ليش واقف يابويه؟تفضل
بوخالد:غاليه
غاليه (وهي تبلع ريجها): نعم؟؟

***مزون شمر*** · 05-11-2008, 07:48 AM

الجزء الحادي والعشرين

في المسيد وعقب صلاة العشا في الريف مول
كانت عين سلطان ماتفارق هالشاب اللي يالس يذكر الله واللي البسمة ماتفارق ويهه رغم اعاقته اللي جعلته اسير للكرسي المتحرك..
سلطان وهو يتقرب للشاب:السلام عليكم(وهو ماد يده)
الشاب :وعليكم السلام والرحمة
سلطان بابتسامه:عندي سؤال اذا ممكن؟
الشاب:تفضل..
سلطان:تقدر تقول اني فضولي لكني بسالك
الشاب:هههه..تفضل يا الغالي..شو ...سؤالك؟
سلطان:شو سر هالابتسامة اللي فويهك؟حتى اكون صريح معاك..انا انسان ولله الحمد كل شي متوفر لي لكن ..مش سعيد ،وانت رغم اعاقتك سعيد؟
الشاب:تبغيني اقولك اياها وباختصار؟
سلطان:ياريت
الشاب:الامل..
سلطان : الامل؟؟
الشاب:نعم..الامل
وفجاة وصله مسج من عاشه يقول: تعال حالا
سلطان:دريول ابوج يا عويش
سلطان وهو يوقف سيارته جدام بيت عمه حذال سيارة ابوه:الوالد موجود!!
واتصل باخته عسب تطلع
سلطان هالوقت يحاول يلهي عمره حتى مايتذكر غاليه ،فيلس يلعب في الموبايل...لكن
سلطان فخاطره:لين متى بتظل كابت ؟لين متى؟؟؟خلاص يا سلطان
غاليه راحت ..راحت الى الابد
بصوت عالي:مستحيييييل..مستحيل(وضرب السكان بييده).
وحرك السيارة ورجع للشارع العام مرة ثانية،بس هالمرة بسرعه جنونية وطاف الاشارة الحمرا
عاشه وهي تفتح باب الحوي:وين راح؟ قبل شوي متصل بي يقولي اظهري
ام سلطان:اتصلي به مرة ثانيه..
عاشه:ان شالله...
سلطان (بعد ما ارتاحت نفسيته):اوووه..عاشه
عاشه:اخيرا وصل
ام سلطان:وين رحت؟
سلطان:خذتلي لفه ورجعت

رواية ((طلبتج لاترديني))كامله

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget