رادوني ... أعوفك يا وطن ..
وشلون أعوفن أمي .. ومحبوبي
ورادوني .. ابيعك يا وطن ..
قدمولي (صينية ذهب) غازلوا بيها جيوبي
ما دروا حبك يا وطن ..
صينية متروسة رطب
وفياي سوباط العنب .. يلعب هواه جنوبي
رادوني .. اعوفك يا وطن ..
ما غني بحبك أبد .. لا نايل ولا جوبي
ورادوني اتغرب عمر ..
وذبح بكاسات الصبر .. مكتوبك ومكتوبي
وبعدوني عن حبك غصب ..
وانه أدري ما عندي ذنب ..
حب الوطن .. اول وتالي ذنوبي
ورادوني أعوفك يا وطن
ما سولف بحبك بعد
وكلت أنه ابن الوطن ..
كالولي (كش) حيلك برد
ورادوني ما سافر أبد ..
خاف ألتقي (بالريل) وكعد يم حمد
دفنوني حد أذني بكبر ...
ظليت بس راي وفكر
كل جسمي للغربة شرد
من هامتي . . . . . . المركوبي
ورادوني ابيعك يا وطن ..
لا كن .. وحياة .. وحليبك .. واللبن ..
ظليت ابيعن بالحبس (جاي .. وتتن )
والسوط يلعب عالظهر (شرطة .. وأمن)
وأنه .. عذابك يا وطن
نتظر طيور الصبح- .. هلبت يجن
هلبت خبر . .
من (غيده .. من حمود .. من فتنة .. وحسن)
بس كون سالم ياوطن ..
ما قصر الله .. والصبر وعيون (شنونة) العمن
دار الفلك .. دار الزمن
ورغم المصايب .. والمحن
رغم التضارب .. والمصالح .. و الفتن
رغم القنابل ... والمذابح بالصحن
طبيت أزورك .. يا وطن
طبيت ازورك .. وشتكي .. يا بو الفضل .. يا بو الحسن
ذبحوا صلاتي .. وأمي.. ومحبوبي
ورادوني .. اذبحك يا وطن ..
ورادوني .. ابيعك يا وطن ..
ورادوني .. أسمك يا وطن ..
دسولي سمك .. بالهوى .. وبزادي .. ومشروبي
وشلون أسمك يا وطن ..
سم الحسن .. موشيمتي .. ولا ثوبي .. !


تحياتي منقووول علاوووي الحبيب