جل منهو خلقنا من تراب = والأوادم يعرف اسرارها
ياعريب النسب خذ لك جواب = عن بني ثور هاك اخبارها
عزوتي جالهم فعل يهاب = يكرمون الغريب ان زارها
محتمين العوج شيب وشباب= وادي سبيع بيّن كارها
نحتمي بالسيوف وبالحراب = يوم عدل السنين وجورها
فعلنا فوق هامات السحاب = و المعادي يذوق امرارها
يوم عج الرمك مثل الضباب = كم عقيدٍ نزل من كورها
من عصور البنادق والركاب = والمنازل خذينا خيارها
الشجيعين سمحين الجناب = عزوتن ماتضيع اشوارها
غرسنا راسين بين العِذاب = وابلنا ترتعي بقفارها
والجبال المنيفه والشعاب = اسمها بسمنا واثارها
في وطنا سكنا مانهاب = والدلايل رسوس بيارها
مانزلنا بعاني واغتراب = لابتي حافظين اسوارها
المناعير معْتقت الرقاب = كل ربعي عزيزن جارها
ماعرفنا تميمٍ والرباب = دارهم ماجنينا اثمارها
مانذم الرجال اهل اللباب = مير ماإشعارنا بإشعارها
ومالنا في التميمي اقتراب = دارنا ماتقرب دارها
ويش جاب الحقايق للسراب = من رماها يحق عيارها
كلمة الحق ماعنها اجتناب = وشمعة العز نشعل نارها
فعل جداننا هد الصعاب = ترسي الخرمه بنا فأخطارها
من بغى دارنا حسّب حساب = تشهد الجوفا بفعل أحرارها
والحنو والزرايب والهضاب = فعل ربعي بماض أدوارها
بعالية نجد نسكن مانغاب = وفي المواقف نجي حضارها
أصلنا ثابت بحق وصواب = في سبيع الوفا مقدارها
ورث أبونا لنا درع وحجاب = واسمنا فوق شع أنوارها
مالنا في التميمي انتساب = نسل عامر تطول اشبارها
الاد الوجيرب عزوتي في قبيلتي = حماة الديار وهم ذراها حجابها
وفرسانهم تقهر جيوش مسلحه= ليا حميت الهيجا وقيف ضبابها
ليا دخن البارود تضحك صدورهم = عراض النحور اللي رحاب البابها
مصاويط عج الخيل في ساعة الوغى = مقابيل في حامي الوطيس التعابها
وفي حرزهم يلقى السعد طالب السعد = لهم راية بيضاء ولحدن شنابها
كرام الوجيه ومحذية مفلس السرب = سناد الصديق اللي لجا والتجابها
لهم ديرة شوق النظر في جمالها = عذاب مساقيها وطيب الكلاء بها
رواح الغمام وفيض الانهار سقيها = ثمار النخل فيها ونبت الغضاء بها
وحمر النعم ملك الكريمين نشرها = دوام عراب النوق ترتع شعابها
لها هيبة من يوم عامر نزل بها = غزال المها والريم رب الخلا بها
وهي جنة الدنيا وقومي نزولها = تحت فيها الخوداء تنقش خضابها
لحون الحمامه في شوامخ غصونها = طروب الربابه في لحون الغنا بها
سقى الله دار الجود منابع الصخا = وهي ديرة الغلبا سبيع الصخا بها
قبايل سبيع اهل الشيم واهل القيم = وكم نافله تاريخ الامه حكى بها
سلايل بني عامر سنادي ومسندي = تواريخهم لي منهل يقتدى بها
انا من قبيله فعلها شاهد لها = وجميع القبايل كل منهم له افعالي
انا من سبيع اهل الموجيب كلها = يورخ لهم بالطيب تاريخ الابطالي
سبيع اهل الطولات باللين والقسا= هل العرف والمعروف رجلي وخيالي
يسمون بالغلبا على شان مجدهم = ينومس ويفخر فيه مهما الزمن طالي
اقوله وانا ربعي بني ثور وافتخر = الاد الوجيرب كفو في سلم وقتالي
انا واحد منهم على اليسر والعسر = وماصابني جاهم وماجالهم جالي
بني ثور اساس الطيب والطيب ساسهم = خذوا طيبهم بالفعل مبطي ولا زالي
ذرا للخوي والجار والضيف عندهم = يلاقي المعزه والشحم والتبهلالي
هل السلم واهل الحرب موت على العدا =كلام ثبوت ويشهد اللي توحى لي
اهل مرجله واهل شجاعه واهل كرم = واهل مرحبا يوم القسا واشهب اللالي
هل الدين واهل العدل والعرف والوفا = اقول الصحيح وواجب الحق ينقالي
حمو دارهم من كل طامع ومعتدي = حموها بحد السيف من ماض الاجيالي
ليا جا عدو معتد طامع بنا = بني ثور تاقف صف حماية التالي
ليا قالوا ابن هليمه الصف جا واحد = مقام سوى مايبني المجد الاهمالي
ولاقالوا الحضبي نجرد سيوفنا = ذكرنا فعول منير والجيش زرفالي
يجي صفنا واحد ولا فيه تفرقه = ويصيب الخصم من صفنا ذل وذلالي
ولاقيل ابن ضبان ينشاف جمعنا = يهيل العدا ويعمهم خوف وجفالي
ولا قيل ابن ثامر ينومس مقامنا = نساند شيوخ الشمل لو الدهر مالي
ولانيب بقارنهم بماضي فعولهم = ولاني بجاحد فعلهم وقتنا الحالي
وباقي بدود ربوعنا نفتخر بهم = بني ثور عزوتنا هل المنزل العالي
هل الجاه والتقدير يازين دلهم = تعلو على عالي الشرف والشرف غالي
ذرايه وذخري واسندي واعتزي بهم = ذرايه بعد ربي في حلي وترحالي
عسى الله يسلمهم رفيع مقامهم = ووقفاتهم دايم شريفات وجزالي
وعيال الحمايل كفو ماني بذمهم =زحول الرجال اللي يمانيهم اطوالي


منقوووول