اشك ثوب الحزن بيدية كل يوم
واكولن هذا حدي وياك حزني


وأتأمل فرح لمن اغط بالنوم
اشوف الفرح بأول حلم خانكني


وأرد أنة على حزني ومنة اخيط هدوم
البسنّة واكل للروح عاجبني


موبيدي أچذّب ردت اصبر الروح
بس روحي ذكية تكول جاملني


وعلى الموال هذا انترس عمري غيوم
ولانور الشمس فد يوم كابلني


اصبر والصبر خيط أعلى شمعة ضيم
لا هية طفت لاصبري يسعفني


واستسلم واكول لعاذلي لوم
عمت عين الوكت وياك يحرجني


انة الجبت عمري مباطح وية الاه
ما افاخر ابد كل يوم تهزمني


واحس مسجون انة والفرح سجان
قفل باب السجن خلة وشرد مني


ومن عني أبتعد كتلة شجرالك عود
نزلتة دمعتة وجاوبني اعذرني


كلالي الحزن تارس دربنا الغام
اذا اجيلك نموت وياهو يدفني


كتلة بدفنتك حاير ولك بس عود
الف خيّر الاكي وياك يحشرني


فشلني ويكلي منين الك خيرين
عذالك غنم ياذيب فهمني


ومشة وخلاني دايخ والقهر بركان
دخت مو چي تركني الكالة دوخني


صحيح الكالة بس الخوف كل الخوف
اذا شامت يمرني أبيش يعيرني


لذلك راح اضل بسجني حد الموت
واكض ثوب الحزن لايوم يتركني