السلام عليكم و رحمة الله و بركاته...

شخبار عرايسنا الحلوين؟ إن شاء الله بصحة و عافية...

الحلى اليوم عبارة عن cup cake بالشوكولاتة، و أخذت طريقته من Nigella Lawson...
الطريقة جداً سهلة ولا تحتاج مقادير كثيرة ولا خلاط...
و سويت عليه تغيير بسيط أخذت فكرته من موقع أجنبي... و النتيجة مبهرة بمعنى الكلمة...
و الكل أعجب بطعمه...

ما أطول عليكم و نبدأ بسم الله...

أول شي نحمي الفرن على حرارة 350... و نجهز صينية ال cup cake الحجم الصغير بالقوالب الورق...
و على جنب بيكون كاكاو نوتيلا للحشوة، و كاكاو هيرشيز الدمعات الصغيرة للزينة...

في وعاء عميق نخلط المقادير الناشفة:

4/3 1 كوب طحين منخول
2 ملعقة صغيرة بيكنج باودر
2 ملعقة كبيرة كاكاو بودرة
1 كوب سكر

نخلطهم مع بعض و نتركهم على جنب...







في وعاء عميق ثاني نخلط المقادير السايلة:

كوب حليب سائل بحرارة الغرفة
3/1 كوب زيت
بيضة
ملعقة صغيرة فانيلا

بالخلاط الشبك اليدوي، نضرب هذي المقادير مع بعض...







بعدين نضيف المقدار السائل على مقدار الطحين و نخلطهم مع بعض لحد ما يتجانسون...
و هذا شكل الخليط...







الحين نجيب ملعقة صغيرة، و ناخذ مقدار نص ملعقة من خليط الكيك و نصبه في القوالب اللي جهزناها...
بعدين نجيب كاكاو نوتيلا، و ناخذ منه مقدار ربع ملعقة و نحطه فوق خليط الكيك اللي في القوالب... و نحاول يكون في النص...







بعدين نرجع مرة ثانية ناخذ قد نص ملعقة صغيرة من مقدار خليط الكيك و نصبه فوق النوتيلا...
و في الأخير لما نخلص، نجيب حبات الهيرشيز و نحطها عالوجه... أنا حطيت 3 حبات في كل قالب...







الحين ندخلها الفرن في الرف الأوسط و لمدة ربع ساعة بالضبط...










و هذا شكلها من داخل مع الحشوة...







طبعاً عشان القوالب اللي سويتها صغيرة، فالمقدار بيكون كثير، أنا عبيت الصينية مرتين زيادة...
بس إذا حسيتوا إن المقدار كبير، و تعبتوا من تكرار الخطوات، صبوا باقي الخليط في القوالب الكبيرة و زينوه بحبات الهيرشيز و زيدوا على وقته بالفرن 5 دقايق...

إن شاء الله يكون عجبكم و عليكم بألف عافية



ملاحظة :الصور مجودة في المرفقات

منقول