لا قلت تكفى .. فز لي ألف رجال
ذيبٍ وربعي كل أبوهم .. ذيابه

أدري .. ولكني على الحال احتال
مثل المسن اللي تصنع شبابه

لامن نشدني صاحبي كيف الأحوال
عقلي تبرمج دائماً.. بالاجابه

((أبشرك مبسوط .. وتسرك الحال))
وأحاول اخفي ضيقتي بالذرابه

وأنا لها .. والمتن للحمل شيال
والقلب .... غير الله ما حد يهابه

اضعف ..وامثل قوتي زي تمثال
شامخ .. ولو هالراس بالجد ما به

إلا..ضغوط ..وزعزعة فكر وامال
وصراع مابين الفرح .. والكابة

والحين أنا ..لياقتي بالصبر عال
لو كان من حولي نهشني بنابه

ما أقول أنا تكفى بس لو قلت تنقال
لك .. يابعد كل الأهل والقرابة

لك يا شعور العز..والجاه ..والمال
والذوق.. والفكر النقي والحبابه

أنا اشهد إن ما كل الازوال أزوال
ولوها تشابه..أنت مالك مشابه

أنت الغلا وأنت السعد وأنت الامال
وانته دعاء أمي.. بوقت استجابة

عقلي.. بنالك داخل القلب منزال
تسكن وماحد قبل مشيك.. مشى به

ملاذ روحي لا بلا القلب.. زلزال
وان ضاق وقتي شفت فيك الرحابه


بطلبك يا عشقي ويا راحة البال
أرجوك... وبجاه النبي والصحابه


انك تغاضى ..لو بدى مني إهمال
وعقلي سرح..في عزلته.. وبغيابه


في عزلتي ابحث مخارج ومدخال
وأحاول اكشف حل..!!وانزع نقابه


أسرني الهوجاس والفال..مازال
أقشر.. وهالهوجاس .. ينهب نهابه


مشغول في نفسي ولانيب محتال
والله يجعل كل ضيق ... أبثوابه

هذا اعتذاري ..قول وابشر بالأفعال
والله ...لأعوض خافقك ما عنابه

راق لي كثيرا ،، اتمنى ينال استحسانكم والرضا