ديوان الشاعر فهد معتوق - ساقي الشوق

**Є7šaš** · 26-06-2008, 10:17 AM

زبّال

يا من تجيني مثل طاووس تختال
و تقول عن نفسك رهيب و خرافه

أسعدني قولك يوم قلت اني ( زبّال )
يعني نظيف و كل حياتي نظافه

الفرق شاسع بين شاعر و طبّال
و صحيح بيني و بين مثلك مسافه

وقت الشدايد أصبر .. و وقت الأهوال
دوم احمد الله .. ما اغني ( حسافه )

ما اقول ماما و اشتكي مثل الأطفال
و ان جاه برد الليل .. بلل لحافه

فاهم غلط يا صغيّر ٍ معنى رجّال
خل عنّك الطاري .. و خل اللقافه

مستخسر ازعل و اتْفل بوجه الأنذال
لان الزعل لجل السخافه .. سخافه

دامك تقيس القوه بقصار و طوال
شوف الأسد لي لاعب اطول زرافه

يمناي قوس و يسْرتي حزمة نْبال
لا تستهين بصحتي و النحافه !

السيف انحف .. و ملمسه ملمس الشال
لكن اذا سلّيته من ما يخافه ؟

ما اقول كان و كان لي عم ٍ و خال
و ما اطري شي ٍ ما حد بيوم شافه

أقول انا .. و ان قلت انا .. تشهد رجال
و واقعي ملموس .. ماهو خرافه

**Є7šaš** · 26-06-2008, 10:20 AM

دكتور

دكتور يكفيني انا عفت لحبوب
و جسمي من الإبره غدا اليوم مشخال

قطّعْت مصراني من دْواك مشروب
للناس في غرشه و انا دْواي بدْلال !!

لا فادني وصف ٍ بقرطاس مكتوب
و لا ياني من شوفتْك يا غير غربال

وش لك تشوف الكبد و العوق هالصوب
ما هو يمين ٍ سيّدي عوقي ْشمال !

غرب الصدر .. شوف الجمر وين مشبوب
بين الضلوع المايله ميلة هلال

قبل الجمر.. سكناه من كان محبوب
و اليوم ما ينبض سوا لحن الأطلال

الله يا وقت ٍ قضيناه ف دروب
اطهر من الدمع البري ف عين اطفال

يا من لقلب ٍ ما نوى عنّه يتوب
مليون غيره .. بس ما منّه امثال

هذا الدوا دكتور في الحال مطلوب

ان ما لقيته ياني الموت في الحال !

**Є7šaš** · 26-06-2008, 10:24 AM

غيابك

يا صوتك اللي لا سمعته تعافيت
من علة ٍ في القلب سبة غيابك

كل ما تغيب اكثر .. ف حبك تماديت
لين الذي ما قد سمع بك.. درى بك !

لامن طريتك دون مشْعر .. تفدّيت
بان الألم فيني .. و لذة عذابك

و ان جيتني في النوم .. دندنت و غنيت
( ليت الذي ودّاك يازين جابك )

لا تحسب اني بعد فرقاك حبيت
قلبي الوفي لازال حاسب حسابك

الليل .. و شموعك .. و اغانيك .. و البيت
ما فارقوا بالي .. و لا الهجر عابك !!

جيت المسا زاير .. و يا ليت ما جيت
لكن مصيبه لا غدا الباب بابك !

حسيت بوجودك .. ولا كنّي حسيت
حتى ف حضورك .. صرت احس بغيابك !

**Є7šaš** · 26-06-2008, 10:26 AM

كذاب ابن كذاب

و قالت لي متى تترك طباع ٍ عاطله و شينه؟
ما بين العصر و المغرب اشوفك واقف ٍ بالباب !

تناظر كل من مرّت .. تركز بس ع الزينه
تحب الحسن من يومك .. و انا منّك خفوقي شاب

قلت استغفري ربك .. كلامك لا تكملينه
في عيني حسنهم صفحه و في قلبي غلاك كتاب

تشكّين ف غرامي كيف بعد ما طالت سنينه ؟
انا واقف مثل غيري .. و هذي حالة العزّاب

ترى معشر رجال الكون جنس ٍ زايغه عينه
ولا يقدر يغض الطرف و حتى لو بقلبه احباب

و لكنه وفي بحبه .. دخيلك لا تلومينه
اذا حسن العذارى كان.. ملفت .. طاغي .. و خلاب

روحي و اسألي جدك و ابوك و من تعرفينه
و قولي من قدر منكم يباري الحسن و ما قد ذاب ؟

و اذا واحد رفع ايده .. نصيحه لا تصدقينه
ترى كذاب ابن كذاب ابن كذاب ابن كذاب

**Є7šaš** · 26-06-2008, 10:30 AM

عالمنا

اول يوم : تلاقينا .. قال اوعدني ما تهجر
و انا بوعدْك ما اهجر .. حتى لو تخاصمنا

اذا أخطيت تعذرني .. و اذا أخطيت انا أعذر
مدام انّا من اول يوم على هالشي تفاهمنا

ثاني يوم : رحت القاه .. بس فاجأني المنظر
لقيته في حضن غيري .. ولا كَنّا تنادمنا !

سألته .. قال ( اعذرني ).. نسيت اوعدْك ( ما اغدر ) !
أول يوم .. اصبح امس .. يضحّك حيييل .. عالمنا !

**Є7šaš** · 08-07-2008, 03:00 PM

الاعتزال

حبيت اشوفك قبل ما اشد الرحال
كيف الوسيله و انت معْ غيري لهيت

يا قو قلبي من بعد غدر الليال
اسأل و اجي ما كني من غدرك شكيت !!

راحل و اردد اغنية ( صعب السؤال )
وش لي بزرع ٍ من ثماره ما جنيت !!

تبكي عيوني من حزن نبرة ( طلال )
كنه يغنيني و يدري بما خفيت

لا قالها ( انتي الجنوب و انا الشمال )
والله ثم والله احس اني انتهيت

محتار انا في قلبي اللي لا يزال
يهوى الذي ساكن مع غيري في بيت

ادري نصيب ٍ قد جمعهم بالحلال
و ادري خطاي اني مع وقتي وفيت

و ادري اللقا اقرب صديق ٍ للمحال
و ادري الدموع بلا رجا مهما بكيت

بس اعذروني لا تعلقت بخيال
فيني طفل ما مل من كلمة ( ياليت )

كل ما نهرته غمض عيونه و قال
وش للزمن يقسى و يهدم ما بنيت ؟

محتار اجاوب ولا امسح دمع سال
يا من يبيع الصبر .. في الحال اشتريت

الناس تحسب فيني القسوه خصال
بعض القصايد في زواياها قسيت

من لام شخص ٍ فوق طاقة قلبه شال
ربي يلومه .. و انا من قلبي دعيت

لا تحسبوني مهتني بعطف و دلال
ولا اقضّي الليل ويا اللي هويت

ميت و ارتب قافي من تحت الرمال
من يوم راح اللي نكر كل ما عطيت

لكن بقى مني بعد موتي ظلال
للي قتلني يوم انا بحبه ابتليت

يمكن يتعبه الزمن لا حظه مال
يرجع يدورني بعد ما انا قفيت

يلقى وفاي و طيبتي وكلمة تعال
قبل العذر يسمع صدى كلمة ( رضيت )

يمكن اقول انها ( قصيدة الإعتزال )
و يمكن ارد اكتب اذا لنفسي قريت

دمع الشعر يمطر من عيوني همال
و هذي القصيده قبل ابكيها بكيت

لا شافكم قولوا له شديت الرحال
حبيت اشوفه لكن اني ما قويت

و اذا سأل قولوا ترى ( صعب السؤال )
ودك بزرع ٍ من ثماره ما جنيت ؟؟!!

**Є7šaš** · 08-07-2008, 03:52 PM

لاتقولوا كان زايد

عظّم الله اجر عالم من جنوبه للشمال
في وفاة اللي تربّع في القلوب اغلى حبيب

والله اني في حياتي ما فتحت ايّة مجال
للدموع و للهموم و للجروح و للنحيب

ياما مرتني بلاوي و كنت ثابت كالجبال
ما بكيت ولا شكيت و كل جرح ٍ بي يطيب

لكن اني يوم قالوا مات صار الحال حال
هزني زلزال حزني و الشعر غطاه شيب

ابكي كل ما مر اسمه ..دمعي من عيني همال
من بعد ما كنت اقول الدمع للرجّال عيب

خايف اكفر لو اقول الموت هو رابع محال
حق من رب البريه و كل بيومه يغيب

لكن اني كيف اصدق شي ما يخطر في بال
من كثر ما كنت احبه كنت متناسي النصيب

الحزن كان بحياتي بس مجرد احتمال
ما هقيت انه يجيني و ينقلب ليلي كئيب

اه يا مصعبها جمله ( شيخنا شد الرحال )
اه يا مقواها صدمه سهمها عيا يخيب

صابني و اختار يبقى بقلبي لو طال المطال
منهو منا بعد موته ما شكى قلب ٍ صويب ؟

كان زايد .. لأ لحظه .. قصدي زايد لا يزال
شمس ما تعرف غروب و لا تدل درب المغيب

نخله ما وقّف عطاها من ثمر ولا ظلال
غيمه في كل الفصول و دونها سهل ٍ رطيب

حكمة ٍ نمشي عليها تصد عن درب الظلال
نعمةٍ من رب عالي للقريب و للغريب

نسألك يا رب رحمه يوم ناديته تعال
يوم خذته في جوارك يا سميع و يا مجيب

بالبرَد و الثلج و الما تغسله يا ذو الجلال
كلنا ندعيك يالله و لدعانا تستجيب

تسكنه جنات عدن ٍ يرتوي شهد و زلال
يهنى في رحابك و فرشه مسك ٍ وعنبر و طيب

لأنْ زايد شخص غالي و الغلا مابه سؤال
و كلنا راضين عنه و في القلوب اغلى حبيب

عاش كل عمره مْتواضع .. حط معنى الإعتدال
كم عطانا من يمينه ما مسك عن شعبه جيب

شيخ ٍ بكل المعاني للعروبه و الرجال
ضايع ٍ وصفي و مقصر و ما بهالتقصير ريب

و القصيده اللي توفّي حقه( هي رابع محال)
و الشعر بعد الله يشهد وصف من مثله صعيب

راس مالي دمع غالي هل من عيني همال
اعترف غيرت رايي دمعتي ما هيب عيب

دامها جت من فراقه ببكي سنين ٍ طوال
و ادعي بركعات فرضي جهر كانت ولا غيب

و انتوا ياللي تسمعوني رددوا صبح و ليال
يرحم الله بو خليفه و يشفي الجرح العطيب

و لا تقولوا كان زايد .. قولوا زايد لا يزال
شمس ما تعرف غروب و لا تدل درب المغيب

**فراشه غزه** · 16-07-2008, 10:39 PM

مشكووووووووووووره يا حلوه
يسلمووووووووو

**وردة العمر** · 19-07-2008, 05:37 PM

مشكووووووورة مرة حلوة

ديوان الشاعر فهد معتوق - ساقي الشوق

ديوان الشاعر فهد معتوق - ساقي الشوق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget