نزف لم يكتمل .. لك امي

صعب اخبي دمعتي بين البنات
لابدت كل (ن) تسولف فأمها


الفراق اول تفاصيل الشتات
بعده الايام يثقل دمها


من ظلمني جعل عينه ماتبات
تبتله بهمها و بغمها

،،،،
للشقا في عالمي حظ و نصيب
صار له عامين من عمري معي


فالنهار يكون من ظلي قريب
والمسا جثم ورى حدب اضلعي


من بعد وارى الثرى اغلى حبيب
وابتدا شوف المعزي و انعي

،،،،

ياطيف الحباب لاتشكيلي ابكيلك
ويضيق صدري علي و تذرف العبره


بعدين ياطيفها لاضقت ياويلك
يتكدر الميت اللي في وسط قبره


من كبر قدره وحبيله و حبيلك
ودي اكون الشموخ اللي على خبره

،،،،،

كيف اسلي خاطري بعد الاحبه
واتحدا واقع يكسر جناحي


كل مافتح باب انس الحزن ضبه
سجن همي مانوى يطلق سراحي


شمعة الضحكه غدى منهو يشبه
وراحت الضحكه مع أدراج الرياحي


جعل ذاك اللي رحل مغفور ذنبه
روح روحي نور عيني وارتياحي


جعل بيت مارثاه ولا انكتبه
أكتبه باليل و انساه الصباحي

،،،،،

تدري متى تفقد حبيبك وغاليك
لاصرت وسط مناسبه مع قرايبك


ياخذك تفكيرك عن اللي حواليك
وتذكر طيوف اللي تحبه وغايبك


وتقول ياحظي انا وين اوديك
يوما بختي منك دايم مصايبك

فرقا و حزن وموت هذي لياليك
محاسنك تقلب عليها معايبك

،،،،

دفتر قصيدي و الوله والمعاناه
وانا... غدينا فالزمن مثل الاخوان


نترجم الحرمان و الحزن والاه
وتبوح بالاشعار بأنغام والحان

،،،،

لو اتظاهر بالفرح بعض الاحيان
لابد مايظهر بأني حزينه


غديت انا للحزن مرسى و عنوان
وامسيت له مخدع و خدر و مدينه

،،،،

يمه وفاتك تحط القلب بحزانه
والله والله يايمه وحشتيني


الوقت بعدك يايمه مال ميزانه
ياليت انا الميته وانتي رثيتيني

بنت عز وشمريه

ادري اني بنت عز وشمريه
والثقه من فضل ربي تاج راسي


من جبال اجا وسلمى شي فيه
الشموخ الل مخليهم رواسي


وارثه من ربعي النفس الابيه
والوفا من طبع ابوي وطبع ناسي


من هل الاحقاد ماوالله عليه
شامخه رغم التحدي و الماسي


مادخلت النت ادور للحميه
او ادور من يحن او يواسي


ومادور لا حبيب ولا خويه
الشرف ستري و ثوبي مع لباسي


والعلوم الناقصه ماهي ليه
كاسها من فضل ربي غير كاسي


جيت من دافع غلا نجد العذيه
والتراث و حبها الشي الاساسي


القنعه هي غنى النفس الغنيه
وكبريائي منبعه من طيب ساسي


بس ياللي تستغل اني بنيه
انتبه ماودي تطيح متواسي


اعرف اني غير عن هاذي و ذيه
لو تجي بابيه عاملي سياسي


لاتدور عندي اية نرجسيه
لو بحلم الليل من بعد النعاسي


ويوم اغض الطرف عن بعض الاذيه
في طروحاتي و في بعض اقتباسي


مانقص مني كبير ولاشويه
لو حذف نزفي ولو يقلع غراسي


التزم بالصمت كله طيب نيه
مابي كثر السوالف و الحساسي


والا انا على قناعاتي قويه
واعرف اني صعبه وصعب مراسي


واعرف اني صح ماجبت الخطيه
واتحد الاصمعي و ابو نواسي


ما ابي منهم كثير ولا بليه
ما ابي منصب ولا موقع رئاسي


جيت من دافع غلا نجد العذيه
والتراث و حبه الشي الاساسي


القناعه هي غنى النفس الغنيه
وكبريائي منبعي من طيب ساسي

يمه

يمه عسفت الحرف لرضاك يمه
يمه رحمك الله ياأغلى عباده


يمه و ليل الجرح ياثقل دمه
بين بعيني و اكتساني سواده


أموت في صمتي و احبه و أضمه
دايم وحيده ماعرفت السعاده


سود الليالي أكدت لي متمه
جرح لجى بالقلب و أعلن عناده



فرقاك يايمه صعيبه و سمه
ساري بدمي ماتفيد العياده



ماهمني من عاش من غير ذمه
ولاهمني وقت عطاني نكاده


أبوعدك يمه وصاتك لصمه
تبقى على صدري و سام و قلاده