قال لي ماتت الوردة نسى إحساسه اللي مات
نسى حبي وحناني وقسوته وكيف كان يعاملني

عطاني وردة حمرا الصبح وماتت بعدها بساعات
وحتى بموتت الوردة أعز الناس يعايرني

أكيد بتموت هالوردة تركتها بأحوج الأوقات
نسيت إنه العطش يذبح ذبحتها وجيت تذبحني

جزاك الله يا خلي خير فرشت لي دربي بجمرات
وأنا أمشي وأنا ساكت وأقول الله يصبرني

غريبة كيف أنا أسامح وإنته تزيد هالغلطات
واذا أخطيت أنا بلا قصد أشوفك ما تسامحني

غريبة كيف أسمح لك تطالعني بهالنظرات
واذا إني جيت أضحك لك أشوفك إنت تحرجني

تعبت أمشي أنا بدربك ودربك ممتلي ثغرات
وإنته تقول لي إصبر وغصب عني تصبرني

وكل ما قلت لك خلنا نريح تسرع الخطوات
يا خلي قول يعني ليش بهالقسوة تعاملني

اذا حبي وسط قلبك ذبل في يوم والا مات
أو إنك خذت ما تبغي وبعد هذا شبعت مني

تكلم قول لا تسكت وخلنا نجلب الصفحات
وكل واحد يروح بدرب بس لازم تصارحني

أنا مابيك تحس بذنب أو تندم على مافات
ولكني أبيك تقول إنته شفيك ريحني

أبسمع كل مافقلبك أبسمع لو بعض كلمات
وأنا متوقع إنك لو حكيت لابد تصدمني

واذا إنته تهمك الوردة تعال إسقيها لو قطرات
وصدقني بتتفتح بتعجبك وبتعجبني

واذا إنها ما تهمك لا تعيشها وسط ظلمات
بيديك إدفنها بالتربه عسى غيرك لها يحني

.
.
للشاعر
" طارق المحياس "