كلما بنيت الحلم في القلب وكمل
قبل أعلنه يظهر صدى عداوته

وضحت همومي من ورى الخافق همل
وأحجامها حسب الوضع متفاوتة

و أنا العزيز اللي تشبث بالأمل
عسى يشوف من الزمن طراوته

درس الحياة القاسية لو اشتمل
على الجبابر لعرفوا قساوته

تلقى بعض تجارهم يمشي ثمل
مع الفقارى يرتشف حلاوته

والقاضي اللي في كلامه ما صمل
فاضي عمل مسترسل في فضاوته

كيف المطوع يخلف في قول وعمل
والمصحف الطاهر نسى تلاوته

قال المثل خل الجمل بما حمل
صافح عدوا ما يبين نقاوته

رجلا ضلوعه للحمل ما تحتمل
يحرم على رجلي حشى ما خاوته

مثل النعامه راسها تحت الرمل
ومن ظلها تشكي مدى ضراوته

جرح الصداقه في الظهر ما يندمل
عيت سنيني كلها ما داوته