يشتكي هاجوس من قسى وجور الحبيب
له ثمان أيام متغير ولادري وش دهاه
مدري وش علمه حبيبي وان دعيته مايجيب
مدري ويش اللي مخلي خلي عني دوم لاه
مادرى انه في غيابه قلبي مجروحٍ عطيب
ولادرى ان الجرح يبرى لابتدت لحظة لقاه
أشهد ان الحب بلوى والهوى سهمه يصيب
مير مشكايه على اللي عاليٍ باعلى سماه
كامل الأوصاف خلي يمتلك عقلٍ لبيب
والله انه عن جميع البيض زايد في حلاه
لاتثنى عوده اللين خطر عقلي يغيب
داعج العينين عينه كنها عين المهاه
ليتني أقدر أضمه علها اوجاعي تطيب
وارتشف من ريقه المعسول في جمرة شفاه
والله انه علتي ثم والله انه الطبيب
ياعسى ربي يجيبه ياعساه وياعساه
مسكنه ذيك المدينه واسمها ماهو غريب
ديرته رس المحبه زادت بقلبي غلاه
يالله انك تجمع الخل بخليله يامجيب
بالحلال ويشهد الله قلبي ماحن لسواه