خارج السرب حلق في سماك الفكر * * كان غنت طيور الليل من وكرها
لك تركت الفضا كله مساحة نشر * * تيه واطلع بنفسي فيك الى قدرها
يانزيه المواكر ياعزيز القدر* * ياوحش ياطليق الروح ياحرها
لا تدور لنفسك عن مرامك عذر* * النفوس العظيمة موتها عذرها
ويش معنى حياتك في ربيع العمر** كانك بتحسد الميته على قبرها
بالرجا بالتمني بالامل بالصبر** الليالي ليا طالت عليك اسرها
كنت اقدم قصيدي ورد واهل الشعر** ناقة تقطف الوردة وتجترها
لكن اليوم حنا في زمن في عصر * * ابن زايد محمد واكتمل درها
غن يامن بصدري لك زمانٍ تجر ** هات عجز القصيدة واعطني صدرها
ماهجرت الوزن والقافية من عسر ** لكن النفس ماكان الشعر خمرها
اشغلتني حياة ( الغندبه والفقر ** في مشاويرها واغنتني بفقرها
موتري يطوي البيد ويحوم النسر ** ويتسابق معي ظله على برها
يطلب الله رزقه من صلاة الفجر ** لين ماتستريح الشمس في خدرها
كن روحي بجنحانه عليها نذر ** ماتوقع بدار الا على نذرها
اعتزلت المدينه عن حياة الحضر ** في صحاح الفلا والعين ذا بصرها
خيمتي والنسايم بالنسايم تمر ** والثريا على جفني غفى بدرها
يسري الليل يسريبي وضوي سمر ** تنجذب له بنات الجن من سدرها
كان يطحن براسي حب صوت النجر ** ويتمايل بروس ابلي صدرى نجرها
ترزم النوق من حولي بضيقة صدر ** وانا مع فوحة الدلة على جمرها
اتقهواه فنجالي بحالة سكر ** واسأل الليل هالنجمات كم عمرها
شفت سر الوجود بسر حب التمر ** واكتشفت اكبر الاشياء من صغرها
به يلف الغموض الكون به ابتصر ** كل ايه تجي من اية كبرها
والنجوم القريبه في سماي شكثر ** لكن بقلبي الجوزا وياحرها
لي تلوح المدينه بالليوت الصفر ** من بعيدٍ سفينه والدجى بحرها
كنها في غياهب ليلها تحتضر ** تغرق ويغرق الانسان في قعرها
كل بيت سكنته في فناها قبر ** كل حلوٍ تذوقته بها مرها
لجو الناس فيها الهلال النصر ** التعصب يعل الروس ويضرها
ذاك عبدالاله وذاك عبدالخضر ** واتّشابه عقول ويختلف فكرها
والتطرف لمذهب دون مذهب كفر ** اشهد اني بريء النفس من كفرها
خارج اسوارها حلق سماك الفكر ** لاقيودك قيود ولانت في اسرها