تويت
مرحبا
اتمنى ان تنال اعجابكم هذه القصيدة
؛
؛
؛
لا تنتفض يا قلبيْ ما عادِ يَمديكْ
إللي تبيهم .. روَّحوا.. من شِقاهم !!
راحوا.. و لا لك بعدُهُمْ مِن يواسيكْ
إلا دموع ٍ ساكنه في غَلاهم
ما ظلِّ غيري لك بهَمَّك يعزّيكْ
و ما ظلِّ غيركْ لي بوقت ٍ خَذاهم
غَمِّضْ عيونكْ باحْضِنَكْ لجل أنسّيكْ
و انسى معاك إللي ذِكرته مَعاهم
يلَّهْ خفوقي .. حُبي لك ما يكَفّيكْ ؟!
و إلا انتَ حالفْ ما يحبَّك سواهم ؟!
خلَّك كبير ٍ لا يِخيب الرِّجا فيكْ
خُبري بَك اعندْ من جروحي وراهم
راحوا ترى .. و إن بُعدُهم يَبْ يبَكّيكْ
طول العمر .. لا ترتجي بَه لقاهم !
يا قلبي اصبرْ وش بلاك اللهْ يَهْديكْ
أدري تعبت ِ امن النَّوى في هواهم
و ادري بشوق ٍ فَزِّ يَرجفْ بياديكْ
ساعة مِشوا تتبع عيونك خُطاهم
و ادري- بَعد- بَسْبابها حَسرتك ذيكْ
لَنْهُمْ كفاهمْ - هُمْ بعدْ - ما كفاهم !!
بس إنتْ قلِّي كيف أنا الحين أبرضيكْ ؟
لا اتقول أبيهم .. رَوَّحوا.. وشْ تباهم ؟!
القصيدة للشاعرة.... عاشقة الشعر
تعليق