تويت
تباشير القدوم
على بقايا ليل فيه الشمع مل من الظلام
لا الشمع ذاب ولا انتهى ليلي ولا حصلت نوم
وشوشت شمعه وانثنى يمي وتمتمت بكلام
رسمت فيه الدرب للافراح من بين الهموم
ورتبت ربكة حلم ضميته على صدري ونام
وصحيت باقي هم صبحه ينتظر ميلاد يوم
ومابين حلم وهم قادتني مشاوير الغرام
لاطلال جرح وفلسفة شاعر تساقيه الغيوم
حتى تنامت ذكرياتي في محطات الهيام
على يقين يقول حلو الحال حاله مايدوم
بأجمع شتاتي واستدر البوح من بيض الغمام
واركز بقايا عزتي رايه على روس الرجوم
والوم عثرات الزمان اللي تحولني حطام
والا انت ياشعري ورب البيت مايلحقك لوم
لأنك اجمل شي في عيني ولك عندي مقام
إليا تنفستك من الالام والالام كوم
يسيل صبحي في وداع الليل ويطيح اللثام
عن وجه تكتب من تفاصيله تباشير القدوم
الشاعر/ مستور الذويبي
تعليق