بشويش ياقلبي رغمْ قوّة الشوق
خفّف رجيفك لاتزيد العنا لي

شوقك ولو ناجاك في عذْب منطوق
كايدْ عليك وصوّره لك محالي

ياقلب وادْري صادق الوِدّ مدقوق
في لبّتك من ماضياتٍ طوالي

وادْري بنبْضك نوّخ بحور واطْروق
وابْدع وصِوّرْ عشْق راع الشمالي

عشقٍ سرى وسْط المعاليق واعْروق
وصار النفسْ له والغِذا والزّلالي

عِشْقٍ حكتْه الناس وابْدتْ له اشْفوق
وقالت يمين الله عشْقٍ خيالي

عِشْق الشّمالي مايضاهيه مخْلوق
يالْقلب وش رايك بْما حلّ حالي ؟

هل ياترى ؟ يالقلب 0 يالفكر 0 يالموق ؟
اقْتلْ محالي واسْتمرّ ابْجِدالي

واقول شوقي لي رغمْ عوْق مع عوْق
ورغْم الظّروف اللّي زِمتْ كالْجبالي

ورغْم المسافهْ والمتاهات بافْروق
واعْزومٍ اِغْتاله غِيابٍ لغالي

إلا أجاوبْك وخِذ العلْم موْثوق
شوقي غلاي وهِي جواب السّؤالي

رغْم الظّروف اللي له ارْعود وابْروق
ورغْم المحال اللّي بالاحْساس جا لي

للريم انا حيٍ وبالريم موثوق
وإنْ غابتْْ اتْحرّم عليّ الغوالي

والريم ياقلبي هي الكحْل والموق
واهْي اللّي برأْيِي بعاده زِوالي



الشمري