قالت قصيمي قلت فخر ومعزه**اهل الفخر والعلم والحلم والبأس
قالت قصيمي قصدها بس تهزأ**ماتدري اني بفتخر وارفع الراس
الحمدلله روسنا دوم رزة ** اللي خلقنا بس نحني له الراس
صافي نسبنا والحسب فية عزة ** أصلٍ أصيل وفصل والعرق دساس
أهل الوفاء والدين صافي منزه ** عن كل ماشاب العقيده من أدلاس
حنا العقيلات ننشد رجال غزه ** حنا اهل الدنيا وللدين حراس
حنا سنايد نجد في كل حزه ** لاخانت حلوق الرجاجيل الانفاس
حنا جبال يعجز الريح هزه ** حنا لنجد حزام وعصابة الراس
لاراد حياض المرجلان ونلزه ** مانمشي دروب الرذيله والادناس
من يغلط لسانه علينا نجزه ** واللي يحقر قدر الرجاجيل ينداس
منالعدو تكفيه بالعين خزه ** يقضي عليه الخوف من كل هوجاس
من ذكرنا في قلبه تثور نزه ** من طاري القصمان يبلاه وسواس
نومه كوابس وروعه وفزه ** دقت نواقيس الخطر له والاجراس
منهو لقاله من علينا يوزه ** هون له الصعبات وابليس خناس
مايدري انه للمهالك يدوه ** عجل على مبناه يمحى من الساس
يابنت حنا من نخانا نعزه **قامن بنا الملهوف وتهاب من الناس
مرسولنا للخير دايم نكزه **ولصرخة المحتاج نرخي بالاكياس
تاريخنا مجد لبسناه بزه **نمشي بوسط السوق ماندحم الساس
لتس ماتركنا بكاس الامجاد مزه **واجد عليك ومثلتس حثالة الكاس
وش جاب حر الطير لفريخ وزه** منهو يساوي جوهر الماس بنحاس
لاتحسبين انتس لنا مستفزه **وش ياخذ الباعوض من ريش قرناس