تويت
ارحبي ساعات تال الليل يامحلا لقاها
ياهلا به لنّ فيها الشوق مثلي باشْفقانه
بانْتلاقا لهفتينٍ بالمواصل وش حلاها
لهفة العاشق ولهفة من تفرْعنْه هيمانه
نشتكي . نسمع بعضنا . نفضح احوال وغثاها
ونْتقاسم للدّموع بجوّ تحكمْه الميانه
كلّ واحد مدّ كاشه قال عِلّه مع دواها
قام بامْحاسب خفوقه ولْنصيبه مع زمانه
ياسويعات التّلاقي عجّلي باللي نباها
قولي الاشواق بيّا ضيّعت عقل ورزانه
نبّهي منهو هويته لايورّدني سِفاها
يقرب لمغليه وِدّ ويِنسي الهمّ وهوانه
ويادقايق مشتكايا سوقي اصناف الوِجاها
للجفول النادره بنت الحسب بنت التّكانه
وياثواني به تنخّي قولي ان مغليك تاها
من سهر طول الليالي يرتجي لذّة جنانه
صاحبي واحْذر لروحي لاتخيّب له رجاها
صاحبي وكّلتك الله بلّ ريقه من حنانه
ذا خفوقي هاك قفله طفّ به حامي لظاها
ماسواك اللي عطيته قلب يهدي لك عنانه
تعليق