يقول بعض الناس ما بالفقر عيب
وأقول أنا إلا فيه عيب ومذلة
لاو الله إلا فيه عدة عذاريب
إلا الفقر فيه العذاريب كله
إلا الفقر يسقيك خبث المشاريب
ومنه النفوس تهيم من زود غله
يكفيه عيب انه يحدك عن الطيب
ويحط في كبدك ثمانين عله
أولهن اللي لا بغيت المراقيب
تكفخ وفي رجلك سبوقٍٍ تتله
ودام الفقر يردني عن المواجيب
أيام عمري كثرها مثل قلّه
طيّب!إذا كانك رجل خالي الجيب
ويأتيك من يطلب قضي لازمن له
ليا قال0( لك وإلانقطه على الذيب)
والسالفة مابين ( ِشلّه و خله )
وأنت الذي لانته تودي ولا تجيب
تعال فهّم ثور عنتر و قله
ابي اسأل اللي ماضياًله تجاريب
عن قول مابه عيب سائلك بالله
ابيك تكتب لي عن الوضع تعقيب
وتناول الموضوع دقه وجله
ودقق وفكر وانتبه قبل ما تجيب
وكلمه تقوله اثبته بالأدله
الفقرماهو (عار) لكن به (العيب)
إعرف معاني العيب يافاطنلّه
كم واحدٍ له بالثريّا مطاليب
مار الفقر عن مطلبه واقفٍ له
وكل شيٍ أمره بأمر ربك مواهيب
وانا على ما يقدّره شاكرٍله

هذه قصيدة أعجبتني ونقلتها وإن شاء الله ما تكون مكررة
حفظاً للحقوق هي للشاعر : سطم فهد ال خليل