السلام عليكم...

هذي قصيدة أعجبتني للشاعر محمد القثامي وحبيت أنقلها لكم....


ياحرفي اللي تحترق مما تشوفه إحتراق
أسرج خيولك والعرب تسرج أصيل خيولها

وان شفت لك حاجة خطا لاتختبي خلف الرواق
واجه وبيبان المواجه لاتصك قفولها

ومادام ساعة صفرها حانت وحان الإنطلاق
عندي قضية والقضية ساريٍ (ن) مفعولها

المشكلة في مجتمعنا زاد منسوب الطلاق
باسباب ناسٍ ماتميز فالصحيح عقولها

لأتفه سبب يبدا التباغض والتفرّق والشقاق
وِتْضيع أسره كامله دوب ابتدا محصولها

وأعظم وأطم ان جاتلك من بعد عشره واتفاق
وأطفال ماتقدر تشيل مع الفراق حمولها

والمعضله في مَنْ تزوّج ثم عزّم بالفراق
من دون شي وزوجته ماحال عنده حولها

واليا سألته وانفتح باب الردي عقب انغلاق
جاوبك اجابة من تشيل الخزي وسط حثولها

قال الصراحه عيشتي معهاجحيمٍ مايطاق
ماهي بمثل اللي على الشاشات تَعْرِض زولها

صحيح مافيها عيوب وعِدّها عذب المذاق
لكن ماهي فارسة حلمي ولاهي حولها

وقام يتعذّر وجه ابن فهره على ركبه وساق
باعذار مثلي يستحي بين الرجال يقولها

وهذا ومن مثله قسم باللي رفع سبعٍ طباق
ماهو كفو بنت الرجال الطيبين يعولها

وياهل البصيره والبصر مِنْ قبل تحديد الصَدَاق
قولو لهيفا بنت وهبي لاتدق طبولها

شبابنا مع رَكْب موضتها المزيّف في سباق
وتفكيرهم في شكلها وبعرضها وبطولها

تفكير ناسٍ فكرها اعوج ومحدودالنطاق
وتقلد اهل الغرب في اقوالها وفعولها

تحسب بنات الناس لعبه فالزواج وفالطلاق
ماتدريِ انْ اصل الخَلَل في فكرها وعقولها