وين الباقي لو القصة لهنا وخلصت نبي تكمله

يسلمو على القصه




ننتظر الباقييييي

يلا عاد

كملي تحممممممممممسسسسسسست

وايد رووووعه

تسلمين على القصه .....

بس نبا التكمله.....

ننتظر

كانت أمنية دانة أن خالد ينطق بهالجملة ..وأمنية خالد بعد ...بس للأسف ..الأمنية ماتحققت لأي منهم ..
خالد...... كلام دانة كان وقح معاه ...شلون تتكلم بهالطريقة عنه؟؟ ما أبيك؟؟ مو قادرة أتخيلك زوج!!! ششايفته علشان تتكلم معاه بهالطريقة ؟؟ سواقهم ولا الصبي ؟؟
أما دانة فغمضت عيونها ناطرة الوعد ..
خالد ما علق ..خذا كوب الحليب اللي حطته قدامه وطلع من المطبخ..سمعت دانه خطواته ..وانصدمت ..توقعته يقول لها اي شي ..يوعدها ..وهي كلمته بطريقة استفزازية علشان يرد بعصبية انه مايبيها..ليكون زعل؟؟ يمكن أن يكون خالد رجل حساس؟؟ خليني أخذ منه الوعد ..هذا هو المهم ..
خذت كوب الحليب مالها ...ولحقته ..
خالد ..خالد ..
كان على الدري ..وقف ..صعدت دانة علشان ماتصرخ ..
دانة خالد ..لا تاخذ كلامي على انه اهانة ..أنا كان قصدي انك مثل أخوي ..وما أشيل بقلبي أي مشاعر تجاهك تنجح هالزواج ..
خالد وانتي ليش واثقة اني بتزوجج؟؟
دانة أنا أعرف ..وبس ..وأنت مو مثلي تنغصب على هالزواج .
خالد نعم؟؟ .تعرفين وبس ؟؟ دانة أنا ما أقدر أوعدج بشي..بس أنا واثق من شي واحد..أني أكره فكرة أنج تكونين زوجتي ..
انصدمت دانة ..الاشمئزاز اللي على ويهه ...والتحقير اللي مغلف كلماته وصل لها ..حست باهانة ..راحت غرفتها بهدوء.. رجعت للسرير ..وتمت لين الصبح والارق رفيجها ...
أما بالنسبة لخالد ...حط راسه ونام ...ولا فكر في الموضوع أبد ..
*******************
ابتدا مارثون الامتحانات..ودانة مرتبكة وايد ..عبير قد ماتقدر تساعدها..كان محد يشوف دانة في البيت..كانت كله حابسه عمرها في الغرفة تدرس .
بالنسبة لخالد ..كان مركز بشغله.. (محد كان يحبه في القسم اللي يشتغل فيه..لانه كان وايد جاف معاهم ولا يعرف شي اسمه دبلوماسيه ولاشي اسمه مجاملات..كان انسان صريح جدا لدرجة السخرية..عنده كل شي جد ..مافي شي اسمه هزل أو وقت راحة ..فالكل يتحاشاه .(
الممرضة دكتور حالة تسمم ...
خالد مرريها بدكتور بهاء ...خلي يسوي اللازم ..أنا عندي هنا حالة حرجة ..
الممرضة تمت واقفة تراقب خالد وهو يحاول ..
خالد وليش واقفة ؟؟ ماتروحين؟؟ المريض لايموت وانتي اتتفرجين ..
انتهى خالد من الحالة اللي عنده ..وراح لمكتبه ..
شي واحد كان الكل يمدحونه في خالد ...انه رجل يعتمد عليه ..في الاوقات الحرجة..رغم أن عمر تعامله معاهم ماتعدى الثلاث أسابيع لكنهم اكتشفوا هالميزة فيه ..
وفي المكتب كان موجود ...
فهد قالوا لي أنك رجعت ..لكني ماصدقت ...
خالد فهد؟؟ وينك ياريال؟ ماشفتك من زمان ...
فهد صار لي ثلاث أسابيع في الدوحة ,,واستخسرت أشيل التلفون أكلم ربعي .
خالد لا عاد ...بتلومني أنا ؟؟؟ التهاني ملت الجرايد برجوعي ...ماعرفت تتصل تهني؟؟
فهد قول نطرت الاتصال الاول منك ..
خالد شخبارك يا ريال؟؟ شسوت فيك هالدنيا؟؟
فهد رفيجك صار مدير بنك ..وأبو سالم ..
خالد صحيح؟؟ مبرروووك ... وأنت متى عرست؟؟
فهد من سنة ونص ..أحسن من رفيجك مناحي المسكين تزوج من ست سنوات ..أول ماتخرجنا من الثانوية ..
خالد انت من صجك؟؟
فهد اي والله والحين عنده ماشاءالله أربع أطفال ..
خالد أربع؟؟ وهذول من وين بيوكلهم؟؟
فهد يمشي حاله لاتخاف عليه ...أنت شخبارك ياريال ..ماصدقت لما قالوا لي انك ييت هنا الدوحة من كم سنه .
خالد لاتشتط وايد .. ييت يوم واحد بس ورجعت أكمل دراستي ..وماطبيت الدوحة إلا هالسنة !!!
فهد زين خلصت شغلك؟؟
خالد لاء ..ماخلصت ..
فهد الساعة سبع ..وماخلصت شغلك؟؟
خالد أنا اليوم مستلم الشفت لين الساعة 12 ...لان اثنين من الدكاتره خذوا اجازات اضطرارية ..
فهد لا ...وأنا كنت متأمل بسهره صباحي؟؟؟
خالد ليش وين ام سالم عنك؟؟
فهد اليوم بتبات عند أهلها ..فقلت أسهر معاك ..
خالد أنا من الساعة عشر الصبح وأنا هنا ..ما تزحزحت من المستشفى والمكان الوحيد اللي بروح له بيكون البيت ..بس مشكور على العزيمة ..وانشاءالله قريب ..نتلاقى ..
فهد أنا كنت مار عليك ..اخذك في طريقي ..بس بما أنك مابتطلع من هنا ..بروح بروحي للديوانية ..الربع ناطريني ..ولاتنسى ..مرة ثانية انشاءالله ..
خالد وأنا على الوعد ..
**********
الساعة 1:37دقيقة .. في غرفة الطعام .. الكتب كلها مفروشة جدامها ..
دانة خلاص انهارت ..القواعد هي فاشله فيها امية في المية ..وماتقدر تدرسها ..بكره الامتحان .. ما مسكت دموعها .. لان خلاص النعاس أهلكها .
ومافي وقت ..عندها بس خمس ساعات ..
ليش تصيحين؟؟
عدلت شيلتها ومسحت دموعها ..
مافي شي ..أنت الحين رجعت؟؟
خالد اييه يا زوجة المستقبل !!!
انقبض قلب الدانة ...وحست أنها ماتتتحمل أي شي ...انهارت في الصياح بقوة ..
خالد اخترع ..مفعول كلمة جي خلتها تصيح؟؟
خالد دانة شفيج أنا أتطنز ..
دانة صاحت أكثر وهي منهارة خلاص ..
خالد والله اني أتطنز خصوصا لما سألتيني عن يياتي وروحاتي ..
دانة انت مالك شغل فيني والله ماني ناقصتك فارج عاد ..وراي بكره امتحان ..وماعندي وقت ..
خالد فهم السالفة ..امتحان ..ثانوية ..
خالد امتحان ايش؟؟
دانة انجليزي ..
خالد لهالسبب كنتي تصيحين؟؟
دانة اي ..ولا ..
خالد عجيب هالجواب ..(تذكر أن عبير طلبت مرة منه أن يدرس الدانة بس هو طنش ..حس بالذنب انه ماساعدها إلا في الوقت الضايع ..(
خالد دانة أنتي مادرستي شي؟؟
دانة درست كل الكلمات وتدربت على المواضيع والريدنغ كل شي .بس في قواعد ما أقدر أفهمها ..ما تدخل مخي .. وبيركزون عليها عاد ..
خالد وريني يمكن أقدر أساعدج ..
دانة هذي وهذي وهذي ...
خالد سهله ..بشرحها لج ..
دانة لا ...حرام توك رجعت من الدوام ..لا ..أكييد أنت تعبان ..
خالد لاء ...ماني تعبان ..وبعدين مابتاخذ من وقتي شي .. وريني ..
الساعة 3:50
خالد دانة ..دانة ..
دانة ها ..
خالد انتي نمتي مرة ثانية؟؟
دانة ها .؟؟
ضحك خالد ...
دانة ليش تضحك مع هالويه ؟؟
خالد روحي نامي ..عندج امتحان الصبح ..روحي ..
دانه لا ...ماخلصت ..
خالد روحي يلا .... خلصتي كل شي ..روحي ..
دانة زين ..
راقبها خالد وهي تطلع على الدري ومات من الضحك لانه خذت ربع ساعه يلا وصلت غرفتها ..حس انه مرضرض.. ..ومحتاج ينام ..قام لغرفته ,..وحط راسه ونام ..
*****
الساعة 6:40 صباحا ..
عبير دانة ..دانة ..قومي الحقي بتتأخرين عن المدرسة ..
فتحت دانة عيونها بالغصب ..ولا اراديا نطت من على السرير رجعت شعرها الطويل لين نص ظهرها في المشبك الكبير اللي تستعمله والبست بسرعه ومالبست جوتي البست شحاطة البيت والشيلة والعباة وشالت شنطتها الصغيرة..ونزلت تحت لغرفة الطعام ...لقت كل أوراقها مرتبة والريوق زاهب ..ماكلت شي من الخرعه .. خذت أوراقها وطلعت للسايق اللي كان مجهز السياره ..
دانة راجو ..بسرعه راجو للمدرسه ..
مسكت أوراقها وهي مختبصه ..راجعت أشياء بسيطة ...
راجو ماما .وصلنا ..
نزلت بسرعه ..وكانت قمر واقفة عند الباب وهي مختبصه ..
قمر الحقي دانة ..الحين اوراق الامتحانات تتوزع ..ركض أمانه ..
دانة قمور وأنتي ليش مادخلتي لجنتج؟؟ شخصج فيني ؟؟
قمر أنا استأذنت ..دقيت على جوالج لين عيزت مارديتي كلمت عبير ..اللي كانت نايمه ..اركضي ..
وأخييرا وصلت لللجنه ..دخلت قمر للجنتها ..ودخلت دانة اللجنه مالتها ..
لساعة كامله حاولت دانة حل الريدنغ والرايتنق والكلمات ..ولما خلصت راجعت وتأكدت وبعدين طلعت ..

تريقت وهي تبتسم ..طول ماهي تتذكر جلستها مع خالد أمس ..كان زيين وايد معاها لأول مرة,,وكان ذكي ..شرح لها كل القواعد مع أمثله بسيطة ..بعدين تعمق فيها بأمثله صعبه .. والحلات الشاذه ..ولما يا عند الاشياء البسيطة قفلت هي ونامت ..
ليلى اللي ماخذ عقلج ..يتهنى به ..
دانه عقلي موجود .محد يتجرأ ياخذه مني ..
ليلى هذا الباين ..وينج اليوم خرعتينا ..قلنا هونت عن الامتحان ..
دانة راحت علي نومه .. كنت أدرس لين الفير ..ونمت ..ومحد في البيت اللي أنا فيه صحى بدري ..
ليلى يعني قمور هي اللي أنقذتج ..
دانه اي والله فديتها بنت أخوي ..قلبها عل عمتها ..مب مثل أختها ..
ليلى بدر البدور؟؟ أول ماخلصت الامتحان اطلعت مع ربيعتها يتريقون بره ..وبعدين بترجع للفتره الثانية ..
دانه لو تدري منور مرت أخوي بتذبحها ,,
ليلى ما سوت شي ..راحت تتريق ..
دانه شيسوى لها لو صار لها شي (اسم الله عليها) وماحضرت الامتحان؟؟ أو يات أمها تسأل عنها؟؟ أنا ما حب منها هالتصرفات ..
ليلى ياحبج حق تغيير المواضيع ..ماعلينا من هاذي بدر ...قولي لي ليش كنت تبتسمين؟
دانه اقولج وماتقولين لقمر؟؟
ليلى أكيييييد ..شصار؟؟

عبير خالد ..بسك رقاد ..قوم ..
خالد ذلفي عن ويههي ...ماحطيت راسي إلا الفير ..
عبير كيفك ..
خالد وهو يتثاوب دانه راحت امتحانها؟؟
عبير اييه ..وأنت من متى تهتم للدانه ؟؟ حسب معلوماتي انك ماتطيقها؟؟
خالد ماعلق ...وسكت ..ورجع ينام ..
***
ليلى شمعنى اللي صار؟
دانه ما أدري ... يمكن ماله أي معنى ..بس كسرت خاطره وساعدني ..
ليلى الحين هو يبيج ولا يبي قمر ؟؟
دانه المتأكده منه أنه يبي قمر ..بس تصرفه معاي أمس كان غريب ..شككني ..خصوصا لما قال لي زوجة المستقبل وكأنه واثق ..
ليلى ولو كان يبيج؟؟
دانه بس أنا ما أبيه ...ما أبيه أكرهه ..انسان ما أطيق أشوف ويهه ..
ليلى يعني بتظلين على اسلوبج القديم معاه؟؟
دانه اييه ..لين يكرهني..هو يكرهني ما أقولج يحبني ..بس أبيه ينسى أني موجوده ..بس أول خليني اشكره على موقفه أمس معاي ..
ليلى اه ..عيل السالفه جي ..
وابتسمت ..عقدت دانه حواجبها ... ليش شاقة الحلج ولا بوزو؟؟ شنو اللي جي؟
ليلى أنتي تحبين خالد ..
غصت دانه بالعصير اللي كانت تشربه وكحت بقو ..
ضحكت ليلى ,,,
دانه ومرض يالحماره ..شتقولين؟؟ أنا أحب هالخايس؟؟
ليلى ترددج هو اللي بين لي هالموقف منج ..
دانه أي تردد أي زفت ..اقولج ما اطيق شوفه ويهه تقولين حب؟؟
ليلى شوف دندون...وحده من اثنين ..يا انتي تحبينه وهو يحبج ..ياهو يحب وانتي تحبينه ..
دانه يا سلام ..شالفرق العجيب !!
ليلى ماقلت يحبج ..قلت يحب يمكن يحب قمر وانتي معصبه من هالعلاقه فكرهتيه ..
دانه ليلى ..واللي يخليج . يا دكتورة زمانج ..جب ..
ليلى بتقولين بعدين ليلوه قالت .
دانه زين قومي ..الفتره الثانية بتبدأ وأنا ضيعتها معاج في سوالف مالها داعي ..خليني اراجع اللي قاله خالد ..
ليلى اليوم خالد ..بكره حبيبي ..
شردت ليلى من جدام دانه ..اللي طنشت كلام ليلى وركزت في المراجعات ...
***********
استغرب خالد وين حط الملف اللي يابه معاه أمس في الليل..دور عليه ما حصله ..دور في الصاله ماحصله ..وشك أنه بيكون بين أوراق دانه ..دخل غرفه دانه.. هي غرفة العنود..قبل لا تكون غرفه دانه ..بس ..دانه ماشاءالله عليها معطتها لون خاص وترتيب خاص.. احتار في الاوراق اللي موجوده ..ماعرف وين يدور ..لقى ملف لونه أسود ..شبيه بملفه قرب السرير ..استكشفه ..ماكان ملفه..بس كانت فيه أوراق كثيره ..وخط رهيب ..جميل بمعنى الكلمة ..مالحق يقرأ الكلمات ..لان دانه ادخلت الغرفه ..
دانه خالد؟؟
خالد اهلا دانه ..شسويت اليوم ؟؟
دانه ارتباك ممتاز ....
وعطته نظره معناها شتسوي هنا!
خالد توني دخلت ..لاني بروح المستشفى..
دانه عطته نظره ثانية معناها وبعدين؟؟
خالد أمس يبت معاي ملف شبيه بهالملف ..أدور عليه ماني محصله ..
عضت دانه شفايفه وهي تفكر ..فتحت شنطتها ..ولقت ملف أسود بين ملفاتها ..
دانه هذا ؟؟
خالد أيوه ..عليج نور ..ما أقصد أي تطفل ..بس خط مين؟؟
دانه خطي ..
خالد ماكان خطج أمس بهالروعه ..كان مثل نقش الدياي ..
دانه ..لا والله؟؟ . لاني ما أحب الانجليزي ..فما أضيع وقتي في التفنن ..
خالد مط شفايف مو عذر ..عن اذنج الحين ..
دانه خالد...حبيت أشكرك ..لانك أمس ساعدتني ..
خالد لاشكر على واجب ...مع السلامه ..
خالد نسى أن الملف كان بيده مال دانه..وخذه مع الملف الطبي ماله ..ودانه ماكان مخها مركز في شي فنست أن الملف عند خالد ...طبعا شيكون شعور البنت لما تلقى شخص غريب يبعثر في أغراضها؟؟ وبعدين ينتقد خطها؟؟
وسبب ثالث كانت فرحانه وايد انه لاول مره في حياتها تقدم زين في الانجليزي ..
*******
طالع الساعه كانت ست وشي ..حس أنه يوعان ماكل شي من الصبح ...راح الكافتيريا وشل له سندويتش وعصير ..
وهو في طريقه لمكتبه ...كانت في وحده حاضنه ولدها وتصيح بقوة..
استغرب ..
عسى ماشر اختي؟؟
الحرمه ولدي يادكتور في سرطان في المخ بهالعمر وفيه سرطان في المخ ولازم عمليه ....
كان الطفل سبع سنوات بس ..استغرب خالد ..
عند أي دكتور ؟؟
الحرمه دكتور محمود ..
خالد شوفي ..قبل لاتاخذين أي قرارات ...أنصحج بالسكند أوبينين..
الحرمه وش هذا؟؟ دوا جديد؟؟
ابتسم خالد ..
لا ..روحي لطبيب ثاني علشان تتأكدين ولاتقولين له عن الحاله ..وشوفي اذا اعطاج نفس التقرير ..ولا تكتفين روحي لطبيب ثالث ..تأكدي انه ولدج عنده هالمرض قبل لا يصير شي لا يحمد عقباه ..
الحرمه تنصحي اسأل دكتور ثاني؟؟
خالد أنصحج تروحين لمستشفى ثاني ...واذا نفس التقرير هالحاله علاج هنا غير مضمون شيلي ولدج وعالجيه بره .
اسكتت المره وهزت راسها بزيين.. راح خالد لمكتبه لما دخل عليه دكتور محمود معصب أنت ازاي تقول كده للست ؟؟
خالد اول شي لاتصارخ ..وثاني شي ..أي ست؟؟
محمود أنا شفتك دلوقتي تقول لها تروح لطبيب تاني ..اييه دكتور خالد أنا مش مالي عينك؟؟
خالد لا دكتور محمود ..ماشاء الله عليك طول في عرض ..شلون ماتملاها؟؟
زأل سندويش وشرب من العصير والدكتور محمود رافع حواجبه منصدم ..
خالد لا تطالعني جيه.. كلنا نعرف مسأله السكيند ابونين ..وخاصه في حالات مثل هذي لازم في رأي ثاني ..والمسكينه كانت واقفه بروحها وشكلها على نياتها..خليها تتأكد أن ابنها مريض على الاقل..قبل لا تسوي اي عمليات أو اجراءات..
محمود اييه يعني انا بتبلى على ابنها؟؟
خالد كلنا نعرف كم تاخذ ورى العمليه الوحده من هالنوع ....
محمود دكتور خالد أنا مابسمحلكش ..
خالد البلد بلدي ..وهذول أهل بلدي تسمح لي ماتسمح لي ..هذا الموضوع مفروغ منه ..
محمود يعني حضرتك تتهمني في اخلاق المهنه ؟؟
خالد أنا ما أتهم ..حد ..بس الحرص واجب ..
طلع الدكتور محمود معصب من المكتب ..وخالد كمل أكله ولا كأنه مسوي شي ..
دخل عليه الدكتور فارس ..وهو دكتور كبير في العمر من أهل البلد ..
فارس مو جن اللي سويته غلط في حق الدكتور محمود؟؟
خالد وقف على ريوله احتراما له ليش يالك يشتكي؟؟
فارس دكتور محمود من زمان معانا ..من سبع سنوات .. مو من اسبوعين ..ولا مره غلط في حق أي دكتور ثاني ولا شكك في اخلاقيات المهنه اللي عنده ..
خالد دكتور فارس..أنا ماغلطت في شي..كل اللي سويته نصحت ام مريض بالسكيند اوبنين ..خاصه ان طفلها صغيير في العمر ..
فارس بهالطريقة تشكك من مصداقية المستشفى ..
خالد اسف .. اذا كان كلامك صحيح ..بس اللي بيشكك صدق في مصداقية المستشفى فحص غلط ولا تحليل خاطئ..
فارس استاذ خالد ,,لو سمحت..التزم في شغلك بس.. وتذكر انك تشتغل هنا ...في هالمستشفى ..مب ضدها ..
رجع خالد وكمل أكله ..طبعا من السيء انه دكتور مثل الدكتور فارس يوجه له ملاحظه ..بس خالد ما يحس بأي ذنب.. لانه ماسوى شي غلط ..


الحلقة الرابعه
اخر امتحان بكره ..تنهدت دانه ,,,وأخيرا ..بتطلع من هالبيت ..حست انها تختنق هنا ..مع انها ماتشوف خالد وايد ..بس هالاسبوع كانت وحيده فيه..عبير كله في السوق ..وزوجة خالها ماتسأل وايد عنها ..حتى خالها نفسه ..راعي قهاوي ودوواين ماتشوفيه دايما..على الاقل يوم كانت في بيت نايف كانت تتكلم مع البنات وتتكلم مع نايف ...وحتى منيرة كانت معاها زينه ..ماكانت تحس بالوحشه اللي تحس فيها الحين ...
رتبت أغراضها كلها ..وحطتها في الشنطه اللي يات فيها ..واستغربت وين الملف الاسود؟؟
طول ساعتين وهي تدور عليه مالقته .. اخترعت ..في اشياء المفروض محد يطلع عليها . متى اخر مرة شافته؟؟ متى ؟؟ لما كان خالد موجود ..اييه ..
على طول لغرفة خالد ..لكنها ماقدرت تتدخل ..رجعت لغرفتها ...ماتحب تنحط بموقف حرج ..لما يدخل ويلاقيها تعبث بأغراضه لانها نفسها ماتحب حد يعبث باغراضها ..رجعت ..وحطت الكتب كلها في الشنطه ..وبالاخير مسكت كتابها وادرست ..
*************
اتصل ...
ألو ..
خالد شخبارج يا شيماء؟؟
شيماء خالد؟؟ وأخيرا فكرت تتصل فيني؟
خالد وشفيج معصبه؟؟
شيماء شهر يالظالم؟؟؟
خالد شيوم ..أنا قلت لج مجرد ما أرجع البلاد انسيني ..
شيماء خالد ...انت من صجك؟؟
خالد لا كنت أمزح معاج!! طبعا من صجي ..
شيماء عيل ليش متصل فيني الحين؟؟؟
خالد وصلج واجب على ايميلي ..
شيماء مو عذر ..كنت تقدر تدزه لايميلي ..
خالد ماترتاحين الا اذا سمعتيها مني يعني؟؟
شيماء وأنت لمين تبي تخشها؟؟ مافيها شي لو سمعتني كلام حلو ..
خالد ............ حبيت اسمع صوتج ..
شيماء خالد ..انخطبت من سامر ..
خالد ....................
شيماء مثل ماتوقعت ..هالخبر مايهز فيك شعر ...مو مشكله ..أنا مابتزوج سامر ..على الاقل لين اخلص الدراسه ..
خالد احسن لج ..مع السلامه ..
ماردت شيماء ..وصكت التلفون ..تنهد خالد ..انسانه مثلها لازم تفهم موقفه ...هي انحرمت من عايلتها ..لازم تعرف ششعور الانسان لما يفقد عايلته ..وهذا ماكان خياره ..أجبر على هالشي ..وردت ذاكرته لهذاك اليوم ...
....
انفرد فيه ابوه بعد مالصدمة طيحت امه المسكينه ...
بو خالد من هذي اللي يبتها معاك؟؟
خالد هذي شيماء يبه ..
بو خالد شيماء منو؟؟
احتار خالد في هذيك اللحظة شيرد على ابوه؟؟
بوخالد من وين يبتها من الشارع؟؟ شسم أهلها وليش يبتها هني؟؟
خالد يبه شيماء يات معاي من الاردن ..هي تعيش في ملجأ هني ..لانها كانت لقيطه ..
انصدم بو خالد ..واختفى اللون من ويهه ..
بو خالد كانت لقيطه؟؟ ليش لقت اهلها الحين؟؟
خالد لا ..بس بتزوجها ومابتصير لقيطه بعد اليوم ..
ما توقع خالد ان ابوه يضربه كف على ويهه وهو في هالعمر ..
بوخالد لاتحسب اني راضي بخرابيطك قبل يعني اني راضي تسوي اللي تبيه في حياتك..ياي على اخر عمري تبي تتزوج وحده ماعندها لا حسب ولا نسب؟؟ وحده ماتدري انها بنت حلال ولا حرام؟؟ وبكل ثقة تقولي لي انك تبي تتزوجها علشان ماتصير لقيطه؟؟ انت صاحي ؟؟
خالد سكت وماعلق ..
بو خالد لا تقولي حب وتفاهات ...خالد ...ماسألت نفسك بكره لا يبت عيال وين بتحطهم؟؟ وين بيروحون من كلام الناس؟
خالد بس يبه شيماء بنت زينه...
بو خالد ومن حكم عليها بهالكلام ؟؟ أنت ؟؟ انت لو كنت بعقلك مايبتها لي هنا ..وأخواتك في البيت ..خالد ..اذا كنت تبي ترجع للبيت هذا مره ثانيه انصحك تنسى الموضوع ..
خالد بتطردنا يبه؟؟
بو خالد بقوم معاكم بواجب الضيافه لمده ثلاثة أيام ..وبعدها ..اذا لقيتك موجود في البيت مع هالبنت .. ما بيصير خير ..لا لك ..ولا لها ...
خالد ماله داعي واجب الضيافه اللي ذابحك ..حنا طالعين الحين .. توقعت انها بتكسر خاطرك لانها يتيمه ..
بوخالد لا حشى ..هذي مو يتيمه ..هذي لقيطه ..
خالد وشو الفرق؟؟
بو خالد اليتيمه ماتوا عنها أهلها يا دكتور ..وهذي ... لا اهل ولا اصل ..من الشارع ..
طلع خالد من غرفة ابوه ...ومسك يد شيماء وركبوا السياره ..
خالد والعبره خانقته زين انا مانزلنا الشنط ..
شيماء ماعلقت ..بس خمنت سبب اللي صار ..
قلت لك ..مابيتقبلوني..انت أصريت ..خالد ..ارجع لهلك ...صدقني ..أنا عشت بدون اهل طول عمري ..وما أقدر أوصف لك شقد كانت اتجربه أليمه ..وما أبيك تعيشها ..
التفت لها خالد ..وكانت تبتسم بيأس ..الكلمات اللي كان بيقولها نساها ..نزل عيونه ..
خذنا المطار ..
تحرك التاكسي . وشيما نولت راسها ,,وقالت بطريقة مستسلمة فيها ..
نزل شنطك على الأقل ..بدل ماتروح وتيي فيهم ..
خالد مابرد من دونج ...
شيماء بس يا خالد ..
خالد ادري ..ما بخسر هلي ..لا تخافين ..بس عندي اربع سنوات ..لما اخلص بفكر ...
خيبه امل على ويهه شيماء من بعد ماكانت عيونها فرحانه ..حس فيها ا خالد بقوة ..
....
دكتور ...في حالة مستعجله في الطواري ..
التفت خالد للممرضه وحط السماعات في جيبه وبسرعه . لحقها ..
*******
عبير ليش تدرسين في الصالة؟؟
دانه ناطره خالد ..بساله كم سؤال ..
عبير سؤال؟؟؟ في ايش؟؟ ما اعتقد الماده صعبه ..
دانه لا ..مو عن الماده .. عن شي ثاني .. ما عليج مني روحي نامي ..أنا بدررس لين مايي ...
عبير ايش امتحانج بكره فلسفه؟؟
دانه لا علم نفس ..
عبير تصبحين على خير ..
دانه وانتي من هل الخير .
**********
مسكينه دموعها علىخدودها اربع اربع ..
خالد دكتورة هيام .. لي متى بتمين تصيحين؟؟ المصاب كان جبده متفتت ..مافي شي يمكن ينقذه خصوصا ان تأخروا يلا يابوه ..
تدخلت الممرضه المسكينه خايفه يلومونها بموت المريض .أهله وايد متشددين ..وعندهم المره فاشله ..وحصل معاها هالشي كتيير ..
خالد خلاص دكتورة هيام ..أنا بستلم الشفت انتي روحي البيت ..
هيام هزت راسها بأوكي ..وراحت ..
طالع خالد جثة المصاب ..انتفاخ في بطنه كبير ..نتيجه تفتت جبده ..شاب بأول عمره ...بتكون صدمه عنيفه لهله ..
طلع خالد ..وسأل عن أهل المريض ..ونقل لهم الخبر ..وكرهه اللحظه هذي ..ولما سأله الابو شلون ..شرح له بشكل مبسط ..اللي صار ..
************
الساعه 6 الصبح ..
خالد دانه ..دانه ..
افتحت عيونها ..كان خالد واقف جدامها ..عدلت شيلتها ها؟؟
خالد الساعه ست ..وبيدج كتاب اكيد عندج امتحان .
دانه انت الحين رجعت؟؟
خالد اييه .. استلمت شفت زميلتي ..
دانه زين صحيتني ..كنت صاحية ا لين الفير ..
كانت بتقول ناطرتك ..بس ما حستها مناسبه .. أدرس ..
خالد انا بروح انام ..
قامت الدانه وهي تتثاءب ..اه ..اليوم اخر يوم من المدرسه ..تنشطت ..وخلت الشنط كلها في السياره ...على طول من المدرسه لبيت ناصر
...**************
قمر والله انج أنانيه ..
دانه أنا الحين انانيه؟؟ الحين حطي خيارات بين راحتي ووناستج ..قمر ..تعبت من كلام امج اللي يغث ..
قمر ويهون عليج تتركيني بين كلام امي و غطرسه بدور؟؟
دانه عندج أخوي ..
قمر أخوج ما اشوفه .كله برا ..هو يهرب من البيت ..وأمي تتفرعن علي أنا وبدور ..ولا تنسين انها حامل ..يعني غصبا علينا نسمعها بدون أي كلام ..بدور ناوية تسافر مع بنات خالتي .وأنا ما أطيقهم ..
دانه قمور ,,تعالي بيت ناصر .عمج ..
قمر علشان تذبحني امي؟؟ عيال عمي اصغرهم أكبر مني بثلاث سنوات !!
دانه يمكن ترتاحين ويخطبونج انتي واختج ..
قمر انخطف ويهها .. لا ..لا تقولين ..
دانه قمور .. وين شردت الالوان من ويهج ..
قمر عمتي .ما ابيهم ..أبي خالد بس ..
دانه خالد واحد شايف نفسه ..ووتعامله مع الناس جاف ..وراعي مشاكل .
قمر عمتي ..انتي تكرهينه ..بس هو غير ..
دانه شوفي قمر ..لا تسوين مشاكل لنايف اخوي ..هو يبيج لابن اخوه ..امشي ورى ابوج وارضي بنصيبج ..
قمر يعني انتي بترضين بنصيبج؟؟
دانه وأنا شدخلني في الموضوع؟؟
قمر خطبج ضاحي ..وابوي شكله موافق ..
دانه ضاحي منو؟؟
قمر خالي ..
دانه شلون؟؟؟
انهارت دانه ..
قمر شوفي ..أنا مالي خص ...ماقلت لج شي ..
دانه ليش؟؟
قمر ما ادري .اعتقد السبب كله من مرت عمي ناصر الحيه ..
دانه هناء؟؟
قمر امي اتصلت فيها وقالت لها انج بتروحين لها بعد الامتحانات ..فاقترحت عليها هالموضوع ..
دانه وناصر بعد؟؟ وثامر ..ماعرفت شرايه ؟؟ وسعود ..بيرضون يقطوني في هالزيجه؟؟
قمر للحين محد قال رايه النهائي ..ناطرينج تخلصينن امتحانات ..
دانه كل هذا يصير من وراي؟؟
قمر المصيبة الادهى ..ضاحي ما يبيج ..
دانه بعد!!!! عيل ليش خاطبني؟؟
قمر ما ادري ..
قامت دانه من مكانها ..وهي مصدومه ..اركبت على طول السيارة ..
راجو ..خذني بيت ناصر ..
قمر دانه ما بتحضرين الحفله؟؟
دانه لا ..خلاص قمر ..مالي بارض للحفله ... يلا اوصل بيت ناصر ..الطريق بعيد ..
قمر بس انتي يبتي الاكل وكل شي ..
دانه اغرقتت بدموعها ,,
قمر .أرجوج .. اتركيني ...
********
دكتورة هيام ليش داومت؟؟
خالد دوامي ليش ما اداوم ؟؟
هيام زوجي يوصل سلامه ويشكرك ..والمفروض انا استلم دوامك اليوم ..
خالد لا ..ما احب حد يناوب عني ..بلا اهانه ..بس ما احب ....
خالد بينه وبين نفسه مايحب حد يناوب عنه في شغله لانه مسؤوليه وهو ما يوثق بحد ..
مر من جانب استراحة الاطباء ..
((يتصرف يهالطريقة وهو ما كمل ا شهر ..عيل بعد كم سنه شلون بيتصرف ؟؟((
صوت دكتور ..(( واثق من نفسه ..شعليكم فيه ((
صوت ناعم علق ..(( أهم شي ..أنه دكتور ممتاز ..مو مهم طريقة تعامله ..مع اني أييد أنه ياخذ كورس فن الاتيكيت والمجاملات ..((
))مجاملات؟؟ لو يرضى اطرشه على حسابي يدرس اربع سنوات ..في هالموضوع ..صدقوني ..بس الشي اللي يحتاجه انه يكون لطيف مع الناس ..انا مستغربة كل طبيب عرفته يكون متسامح مع الناس لطيف معاهم ..أما هذا الدكتور خالد ..غير ..تعبت من كلامه الفظ ..((
رجع خالد لمكتبه ..وهون عن استراحة الاطباء ((..يبوني أكون لطيف؟؟ ليش وين أنا ؟؟ في مسلسل مكسيكي؟؟؟ ولا ذا بولد اند بيوتفل؟؟ ما يعرفون أني ياي اشتغل بس؟؟))
السكرتيرة دكتور خالد ...استاذ فارس يبيك في مكتبه ..
خالد الحين انا دكتور وفارس صار استاذ؟؟
الممرضه مسكينه ..توها متعينه ..كانت تشتغل في وزارة التربية ..
ابتسم خالد ..يمكن هذا هو السبب ..
*******
دكتور فارس تفضل ..
دخل خالد ..
فارس ما انكر ان اللي صار ..من مصلحة المستشفى ..بس ..ما ابيك تتخذه كأسلوب لك ..
خالد ؟؟؟؟ اللي صار؟؟ ما فهمت دكتور خالد ..
فارس اتصلت فيني اليوم ام طلال ..
خالد مافهم شاللي دخله في الموضوع؟؟
فارس ام طلال..ابنهما طلال كان مريض عند الدكتور محمود ..اتصلت فيني مثل ماقلت .. ووصتني اتشكرك شخصيا..
رفع خالد حواجبه استنكار ..مافهم أي شي ...
فارس الولد طلع عنده ورم حميد..بالكاد يبين ..وما يستاهل أي عمليه جراحيه ..لان ماله اي اثر ..واللي كان مسبب له المرض والصداع فقر دم حاد ..
خالد فرح للولد الصغير ..ولكنه ضبط ملامح ويهه وهو يقول والدكتور محمود؟؟
فارس الحين بين عياله بدون مشاكل ..
فهم خالد انه الدكتور محمود تسفر ..
فارس ما حبينا ننهي مستقبله ..ويمكن ما كان يقصد ..بس السؤال ..شلون شكيت فيه؟؟
خالد لاني كنت أشوفه دايما في المختبرات ...ولاحظت انه يختم أشياء بدون مايكون أي حد موجود ..من مسؤولي المختبر ..
فارس ما علق ..وخالد قال لا تلومني ..أول ما شفته ..تعمدت أمر من جدام مكتبه ..وكانت ام طلال ..
فارس بامكانك تتفضل لمكتبك ..وأنا فخور انه المستشفى اكسبت شخص أمين ..ودكتور شاطر ..وبالنسبه للمختبر ..أنا بتصرف ..شكرا ..
خالد هذا كان من واجبي ..
محد يعرف شقد كان خالد فخور بهاللحظة ...فرح لام طلال ..ولطلال ..
**********
فترة الاستراحه ..استغلها في ترتيب ملفاته ..ولفت نظره ملف اسود ..فتحه ..كان ملف الدانه ..ما قاوم فضوله ..وقرأ اول صفحه ..
((لك بس انت ...
محدغيرك انت ...
في الكون بس انت ..
ولاحد يستاهلها غيرك انت ..
والجدير فيها انت ..
حمار ((
ضحك خالد..وحس انه مو من حقه انه يقرأ الملف ....اذا رجع اليوم بيرجعه لها انشاءالله ..صك الملف ..ورجع يرتب أوراقه ..
*****************
اليوم الثاني ...الصبح..
ما كانت تبي تطلع من غرفة حمد ...
حمد عمتي قومي ابوي يبيج ...
(حمد اكبر منها بسنتين ..(
دانه ابوك؟؟
حمد قومي عمتي وصدقيني ما بيصيرالا الخير ..انا معاج ..
دانه حمد معلش ..ما ابي اشوف حد ..أنا مصدعه تعبانه قل لبوك اني بكلمه على العشا انشاءالله ..
حمد دانه ...لا تتصرفين بعناد..أبوي مايحب العناد..ودامي موجود ..
دانه شعناده؟؟ حمد أنا تعبانه قول لناصر لقيتني نايمه ...
حمد أنا رايح دوامي ..وبرجع في الليل انشاءالله ..بقول لبوي انج تعبانه .بس في الليل بتواجهينه ..
دانه اسمع نفسك لما تتكلم ...جنك في مسلسل مصري ..شمواجهته؟؟ انا ماسويت شي ..أبوك هو اللي تصرف من وراي ياب معرس ..انا ما ابي اتزوج ..
حمد دانه لا تكلميني بهالاستخفاف ..لاتنسين اني اكبر منج ..
دانه انا عمتك اكلمك مثلما ابي ..
حمد انتي قدها؟؟
دانه اي ..
حمد بسرعه هجم على عمته وصار يدغدغها ودانه من النوع اللي ماتتحمل تنفجر ضحك ..بس تبي تبعده عنها..بس هو أقوى منها ..
دانه ههههه هههههههههههههههههههههه بس حمد اسفه اسفه ماطلعت قدها ..بس حموووووود ..
حمد ابتعد عنها وعدل شعره ولبس طاقيه الشرطه مالته ..
علشان تستهينين فيني مرة ثانية ....
دانه الله ياخذك يالحمار ...اه ذبحتني من الضحك ..
قرب منها حمد..
دانه أنا حماره خلاص ...خلاص انا حماره ..
حمد احم احم .. اي هالشكل تعدلي ..انا عمج ..
دانه لا والله؟ ؟؟
حمد ها شقلنا؟؟
دانه قلت قول لبوك اني نايمه وتقلفع لشغلك..
حمد لمارجع بأدبج ..انطري علي ..
دانه انطر ...ماوراي الا ضاحي بن محمد ...
حمد الريال زين ..
دانه بس انا ما ابي شي من ريحه منور اكرهها ..
حمد كيفج ..سلمان اليوم في الشاليه ..وحسن في سيلين مع ربعه ... خالد عنده مباراه اليوم ..والبنات الصغار في بيت خالتي ..لاتخلينهم يستفردون فيج ..صكي الباب على عمرج لين نيي..لا تواجهينهم بروحج ..لاتنسين كل واحد يبي مصلحته ..
دانه حمد شقصدك؟؟
حمد افهميها عاد ..يلا مع السلامه ...
احتارت دانه ...شقصده حمد؟؟ شمصلحتهم في زواجها من ضاحي ؟؟ ((أكييد.شلون مافكرت جي..يبون يفتكون مني ..محد يبي يشيل مسؤوليتي...وحريم اخواني يبون الفكه ...ياربي ...وين أروح ..وين اقط ويههي ..بيت خالي مستحيل ..مالي ويهه ارجع ...يبون يزوجوني يعني؟؟ لا ..لا ..((
دخل ناصر الغرفه دانه تعالي أبيج ..
دانه أبي أنام ..
ناصر قومي ثامر وسعود ونايف تحت ..قومي ..
دانه تذكرت كلام حمد ..لايستفردون فيج ..بس ماعندها حيله ..
********
عبير راحت دون ما تسلم علي الخايسه أراويها ..
خالد من..... دانه؟؟
عبير اييه اليوم اخر امتحان عندها ..وجوالها صاكته ...ماتبي تفتحه الحماره ..
ماعلق خالد ..كان يبي يرجع لها الملف ..بس الظاهر انها راحت ..ارتاح نفسيا انها راحت ..كان يحس بضيق لما يشوفها ...ويتشاءم منها ..
عبير وين سرحان؟؟ قوولي لي ..متى بتخطبها؟
خالد أخطب مين؟
عبير دانه ...
خالد لا ..أنا ما أبي دانه .أني أبي بنت اخوها ..أعجبتني وايد ..
عبير مدت بوز قمور؟؟ صدقني ماتستاهل ..دلوعه وايد ..
خالد يعني دانه خاليه من الدلع ؟؟
عبير دانه احلى من قمر ..
خالد الحين الدانه احلى من قمر؟؟
عبير قمر الزمان هذا اسمها ...دانه عيونها احلى ..سود ..ما شفت عيون بهالسواد من قبل ...وشعرها اغمج من عيونها ..وحرير ..مثل ظلمه الليل ..وبياضها ياي العكس تماما من لون عيونها وشعرها ..تحس انه كاسر لون شعرها ..ومابتكلم عن الخشم ..أنت شفته ...قد مره شفت خشم بهالحلاة؟؟ ..
خالد لا توصفينها لي .أنا ما أبيها ..أبي قمر ..
عبير ايش شايف بقمر علشان تتعلق فيها جي ؟؟ ملامحها عادية ..ودلوعه ..ولاعندها اي طموح..دخلت علمي بس علشان تغيض اختها بدور ..
خالد بدور ؟
عبير بدر البدور ..النسخه من قمر..بس متغطرسه وشايفه عمرها ..من اتذكرها انغث ... كانت تبي قمر تدخل ادبي علشان يسوون كبل..بس قمر عناد فيها دخلت علمي ...دلوعات بشكل كبير ... لكن دانه عاقل وحبوبه ..وروحها طيبه ..وعاجبه امي ..هذا هو المهم ..
********************
سعود ها شقلتي؟؟
دانه ليش أنا في مزاد؟؟؟ شلون تبوني أختار؟؟
ثامر ليش مصعبتها وايد ؟؟ اختاري من تبين ؟؟ خالد ولا عامر ولا ضاحي ؟؟
دانه الحين بس هذي خياراتي؟؟ من اختار؟؟ أنا ما أبي أتزوج ..افهموا ..
ثامر دانه ..بلا تدلع ..ترا محد رايق لج ..
نايف ما علق ..تقريبا الحنون بين اخوانها هو نايف ...بالاحرى اللي شخصيته ضعيفه ..
ناصر أنا من راي اخوانج ..تتزوجين احسن ..
دانه ليش تبون تحذفوني على الناس...عامر مايبي يتزوج عقب اختي نوير الله يرحمها.. وضاحي سمعت انه مايبي يتزوجني ..وخالد في باله وحده ثانية مايبي يتزوجني ..غصب تطيحوني في جبود الناس؟؟
ناصر هالموضوع مو صحيح ..
دانه ليش مو طايقيني يا اخواني؟؟ ثامر يوم زوجتك مريم دخلت المستشفى ..من اللي بقت قرب عيالك لين قامت بالسلامه؟؟ سعود..لما سافرت انت وزوجتك لبنان ..من اللي حذفتوها مع اليهال رغم ان اليهال صغار؟؟ و ماتطلعون لبلد ثاني اكون عند الطلب..ناصر..بناتك من دايما تكون معاهم لما تطلع انت وزوجتك ؟؟ من اتللي تاخذهم السوق وتتشرى لهم؟؟ نايف..بناتك أنا اللي كنت دايما معاهم ..وهم في عز حاجتهم لكم ..كنتوا تتجاهلونهم ..انا الللي كنت اقول لهم شالصح وشالغلط..وانت ومنيرة ماكلفتوا عمركم تسألونهم عن دراستهم ...ودايما انا موجوده ..من بيت لبيت ..دايما عند الطلب ..مستعده اظل على هالحال وأنا في قمه سعادتي بس لاتدفنوني مع ناس ما ابيهم..ماكان لازم تبيعون بيت امي ..ماكان لازم اخليكم دام بيوتكم ضاقت علي وحريمكم تتشكى مني ..
ناصر بلا كلام ماله داعي .. كل اللي سويتيه كان واجبج كعمه ,,,وهالكلام لا تمين تمنين علينا فيه ..
دانه ناصر ..ما ابي اتزوج ..ما ابي ..ارحمني ..
ناصر دانه ..أنا وأخوانج نشوف ان الزواج افضل الطرق انج تكملين حياتج ..
قاطعته دانه ناصر ...لاتأثر عليك هناء ...وانت يانايف لاتاثر عليك منيرة ..ولامريم ..أنا أختكم ..أنا اللي باقيه لكم .. ماعندي غيركم حرام عليكم ..
ناصر لاتقلبينه فيلم هندي ...من تبين اختاري ..
طالعت دانه اخوها الكبير نايف ..وشافته يتهرب من نظراتها ..
دانه اول ..شي ..اتصلوا في خالد ..واسألوه يبيني ولا لا ..ونفس الشي ..بضاحي وعامر ..
نايف ضاحي يبيج اكييد ..وعامر حنا نبيج تربين ولده ..خالد ..لام خالي كلمني انه يبيج له ...
ناصر بتصل في خالد واساله ..ما طلبتي شي ..
مسك جواله واتصل في خالد ..
***
خالد زين وين ريموت التلفزيون؟؟
عبير هذا..خالد ..جوالك يرن ..
خالد خذ جواله وطلع بره يكلم ناصر ..
خالد ألو ...هلا ناصر بولد عمتي ..
ناصر هلا ..خالد شخبارك؟؟
خالد بخير الحمدالله ..وانت والعيال؟؟
ناصر كلنا بخير الحمدالله ...شوف خالد ...
خالد لبيه ...
ناصر ياني خاطب لدانه..وأنا من زمان كنت مكلم خالي وقال يبيها لك ..والريال انا شاريه اذا غيرت رايك ..بس انت اولى ..ها شقلت ؟؟
(احتار خالد ..ماعرف شيقول ..يرخصها ولا لا ؟؟ مايقدر على زعل ابوه ...وامه تبيها ..(
ناصر ها خالد ؟؟؟
خالد كيفك ..
ناصر ترخصها؟؟
خالد ما ودي بس ماعندي اي خطط زواج حاليا . شوف رايها اذا تنطر لين ما استقر ...الامر بيدها ..
ناصر زين ...ما فهمت ..تبيها ولا لا؟؟
خالد كيفها ..
ناصر ايش كيفها هاذي؟؟ مالها راي تبيها انت ولا لا؟
خالد خلاص خلي تروح لنصيبها ..
ناصر خلاص ..مع السلامه ..
**********
ناصر رخصها ....يعني من اليوم دانه لضاحي وضاحي لدانه ..
دانه شلون؟؟
ناصر ضاحي مناسب لج ..قريب من عمرج ..عمره24سنه بس ..اما عامر .. كبير عليج ...حسبتها انسب واحد لج هو ضاحي دام رخصج خالد.
دانه ودموع عيونها غرقها ما فهمت ليش ناديتوني بالاساس ..لو نايمه كان احسن لي من وجع الراس ..قررتوا وسويتوا اللي تبون ..
ناصر نايف دق على نسيبك ..وقوله انا وافقنا ..
نايف ما تكلم ..بس هز راسه ..ودانه ركضت لغرفتها تصيح ..
***********
خالد موضوع الدانه وخلصنا منه ..
عبير شلون؟؟
خالد اتصل ناصر ..يقول اخطبوها ناس ..
عبير لا ...من ؟؟
خالد نسيت اسأل من ...مو مهم ..
عبير لا يا خالد ..لا تفرط في دانه ..خالد اذا لي غلا في قلبك ..لا ياخالد ..ارجوك ..
خالد ما اشوف في دانه اي شي يجذب ..وأنا أكرهها من كانت طفله ..
عبير طبعا ماتشوف ..قمر مدلعه ..ولاشافت التشتت اللي شافته دانه ..فتبين لك جذابه وويهها منور ..لكن الدانه مسكينه ..ماتقدر تنام من الهم ..وتسأل نفسها بكره في اي بيت من اخوانها بتنام ..ارجوك ..خالد والله ما تستاهل ..
خالد يمكن يكون ريلها احسن مني؟؟ وعلى الاقل يحبها !!؟...
عبير يمكن ...بس ..
خالد لا تبسبسين ...خلاص صار اللي صار ...
طلع خالد لغرفته ....كلام عبير اثر فيه شوي ...طالع ملف الدانه ..وفتحه ..وقلب في اوراقه ...

((مع نسيم الفجر..احتارت روحي.. الى اين ستطير اليوم..هل الى المحيط الهادي ام الشمالي؟؟ ام الاطلسي ..((
(يمه ...ارجوج ..غفر لي ..ادري بسبتي متي ...اسفه يمه ..والله ما كان قصدي ..انا ما كنت ابيه بس ...يمه .أكرهه لانه هو السبب في التعب اللي انتي فيه ما اقدر يمه .لليوم شايله ذنب موتج ..ليتني مارفضت ولا صار اللي صار ..(
احتار خالد ..شقصدها الدانه ؟؟ شلون هي السبب في موت عمته؟؟ يمكن هالملف فيه الاجابه !



الله يعطيكم العافية بإذن الله احط الحلقة الخامسة في اقرب وقت

يسلموووو حبي على البارت الجديد


وننتظر الباقي

ايه حبيبتى كملى

ما احب اقطع

كمليها بسرعه