حرّ الفجيعة ...!!

ازريت من تطنيش حكي المطافيق
واستر عليهم بالملا ما تزريت


كل ما ابتعد ردوا بكثر التعاويق
ولو زاد غبني مالتفت كن ما اوحيت


صارت سنين الغدر غبر ٍ مماحيق
وكني بحر لوزادبي هم غطيت


امسح دموع الناس لوهي مهاريق
واليا سمعت المشتكي قمت لبيت


ولامن لفوا عند اللحن و الطواريق
زادوا من الغيبة بليا تثابيت


في الغي والغيبة حضور ومشافيق
مثل الذي يأكل لحم مسلم ميت


والمشكلة ماعاد لي بان تفريق
بين الصديق وخصم لو ماتجنيت


والمشكلة ماهي كلام وتلافيق
اذا صدمك اللي على شأنه اوفيت


والمشكلة ماهي بحظ وتوافيق
لكن في وقت ٍ به اعطيت وامضيت


حر الفجيعة باقي ٍ بالمعاليق
يشبه رحيل اللي له اوفيت واشفيت


جيّة عدانا والعلوج الزناديق
اهون ولا جية منافق وعفريت


ان شمت عن هرج الردا والمشافيق
ماهو بضعف ٍ بس شمت وتعليت


طيبي كما غيث الشمال المسابيق
والامر للي صمت له ثم صليت


اهلي وربعي كالجبال الشواهيق
وهم عزوتي لامن زبنت وتعزويت


لابة فخر وافعال ربعي مشاريق
وفي مدحهم ما وفيت مهما تقصيت


يارب ياموجد جميع المخاليق
عفوك وتوفيقك اليا اقبلت واقفيت

الزمن ماله امان

كيف اببدا والزمن ماله أمان والمحاني من الوناسة مقفره
والفواجع والقصص مثل الخيال والوجيه من الماسي مشهبه


مشهد ٍ صوته تكرر للانام لين جسّد حسرته في منبره
ومنه ضج وزاد بالضيق المكان والصبر وهو الصبر زاد تعبه


ياقلم معذور واصرخ لاتهاب وزيد صرخاتك بوجه المحبرة
دامها الأفراح ماتبقى دوام تحت طعنات الظروف المرعبه


جيت ابكتب للشعر عذب الكلام واصبحت كل الدروب مغبرة
وجيت ألم الشمل واجعل له كيان واترجى الخير في اللي اكتبه


للعذاب اوادم وأرض وأوان وللجروح اصناف جات مبعثرة
وللحياة هموم والام وصعاب تجعل الايام دايم مجدبه


الغبن واسقوط ناس من العوال وقل ذوق ٍ في بعضهم وثمره
والمرض والظلم واجحاف الزمان واكتئاب ٍ من أمور ٍ متعبه


مع طعون ٍفي القرايب ماتبان من قريب ٍ في قريبه بظهره
وبنت ترجي مثل باقي هالبنات حلم زوج ٍ والمهر حيل ارهبه


وأم تبكي غدر وقت وضعف حال من ولدها وخاطر من يجبره
وذا غريبٍ حار في دربه وهام و الالم به زاد جرحه والهبه


وكم فقير ٍ شايل ٍ هم العيال ضم قرشه لليالي وذخره
قرش ٍ ابيض دسه لسود الليال والظروف وجور وقت ٍ ما اصعبه


وكم تعيس أتعبه حظه ومال جا زمانه ضد حلمه وقهره
وكم لقيط شاف حاله كيف صار حاير يومه جهل وش منسبه


وكم يتيم بهالزمن ذاق الضياع عايش والوقت دايم يكسره
وكم هنوف ٍ بالتغنج والدلال تغوي اللي شاف زينه واعجبه


والبيوت اسرار و الزوجة امان لو يخون الزوج دايم تستره
صابرة من شان أطفال ٍ صغار مالهم ياحول ذنب ٍ تنسبه


وبالمحاكم جرجروا بنت الرجال والسبب زوج ابتلي بالهستره
غاوي ويزود في غيه ضلال وبين كل الناس فعله عذربه


وكم معاق انعاق لله الكمال ومن عناه يحس ماله مقدره
وكم ردي نذل مذموم الخصال كثر شره والنصايح تغضبه


والطلاق بزود واصبح ما يطاق ومن لفظ به كنه اشهر خنجره
والوساطة في بلدنا بازدياد تلعب بنص النظام وتقلبه


والنسا اهل الدلع واهل الدلال بالتحرر والفتن مستعمره
والحجاب انزاح ياوين الحجاب وكم حقير ذا مناه ومطلبه


والمبادي والمكارم والخصال كنها حمر ٍ غدت مستنفره
والذنوب استصغرت بين العباد وان دعت هالناس لبوا موجبه


وفي الختام انا ارتجي رب العباد والتجي له في خضوع ٍ واشكره
انه يفرج عن عيال الحلال ويغني اللي يشتكي من مسغبه

سقوووطك

مات الهنا وماتت جميع السواليف
من يوم شفتك وانت تعكس رياحك..


كنت اعتقد واثر اعتقادي تخاريف
وياقلب بعض الود كيف استباحك..


الكل حولي وانت مشغول بالزيف
رغم اني ابذر دنيتي من جراحك..


عرّيت حلم ٍ لاذ بك بس ياحيف
حلم ٍ وشاحه طول عمره وشاحك..


الحقت نفسي بالعتب زود تكليف
وش ذنبي امشي واتصدى لرماحك..


كنت اول ٍ ياطير راعي مهاديف
الدار دارك واسعد الله صباحك


ماكنت لاطارش ولاطرقي وضيف
واليوم انا اشوفك تكسّرجناحك


غلاك زايل زايل ٍ كنه الطيف
ولاطحت محد ٍ نافعك في مطاحك


وباكر يعلمك الزمن والزمن سيف
وشلون تبني من سقوطك نجاحك

ღ سِليلَة مَجْ د ღ

حروف القاف بك تختال وبإسمك حيل مغروره
ومادام إن القصايد فيك تجي لك طوع تنقادي

يانبع الذوق والطيبة يانور البدر وحضوره
سليلة مجد معروفة يابنت كرام الأجوادي

لأجلك تخضع القيفان على معناي وسطوره
لأنك دايم ٍ نورة وفيك الطيب معتادي

يدينك بالوفا والجود وفعل الخير مغموره
وفيك المدح له معنى وشوفك غاية إمرادي

فنورة والابو بندر بفعل الطيب مذكوره
وغيثك فوق توصيفي بنو الخير يزدادي

رعاك الله حيث إنك بكل إحسان مشهوره
الا يانورة الإحسان نورك نوّر بلادي

كتبت الشعر من شأنك وقلبي وضح شعوره
مشاعر صادقة لاجلك ولك ينبض بها فوادي

عسى تبقين يانورة بكل أحوال مسروره
ولك ودي وتقديري من الأعماق ينقادي