رواية فارس أحلامي ( للكاتبه بنت السعوديه )كامله

**wat** · 27-08-2007, 11:18 PM

بعد الموقف الي صار لمشاعل هذي اول لحظه تكون لوحدها وبدت تفكر في طلال وضحكت
لما تذكرت الموقف
مشاعل" مسكين اكيد الحين معصب ,,, وبطته الي يقول عنها اكيد قال لها عن السالفه ,,,
والا مسكينه ماتدري ,, مسوي عندها انه الولد القوي الي محد يقدر يهزه مسكين,, الحين
بس انام وانا مرتاحه ,,, واصلا بعد هالموقف ماتوقع انه اصلا يفكر يطلع من الفشيله
تذكرت ان حسين دق عليها 7 مرات لما كانت نايمه في بيت ساره
اخذت موبايلها ودقت على حسين
مشاعل: هلا حسونه
حسين:هلا بالنصابه
مشاعل: ليش نصابه؟
حسين:خويتك ماردت علي والا بس عطيتيني رقمها تسكيته؟؟
مشاعل: لالا انا قلت لها ماترد عليك ,, لاني كنت نايمه عندها ومانبي نخرب السهره
حسين:اه يالبجيحه بعد تقوليها بوجهي المهم ماعلينا كانت عندي اخبار لك عن خوينا طلال
مشاعل: ايش قول؟؟
حسين:مو انا اخرب السهرات مارح اقول
مشاعل: حسينوه بتقول والا شلون
حسين:لا
مشاعل: عادي اصلا خلاص الموضوع مايهمني
حسين:شلون؟؟
مشاعل: اليوم انتقمت منه وماراح اقول لك شلون
حسين:احلفي
شاعل: والله
حسين:ايش صار ؟؟؟ قولي لاتتغلين
مشاعل: اول قول الي عندك
حسين:مو خلاص مايهمك؟؟؟ والا عشش في القلب وبنا قصور ؟؟؟
مشاعل: والله انك سخيف اقول لك اكرهه تقول في القلب
حسين: مابعد كره الا محبه والا؟؟ بس الولد يستاهل فلوس.. وشكل.. واسلوب.. ورجل ..
يعني صراحه مايعيبه شي ,,,كامل والكامل وجه الله ... الا انه مايطيقك بس
مشاعل بنتباه وتركيز: ايش عرفك؟؟
حسين:ابد امس سولفت انا وياه وحكى لي عنك
مشاعل: ايش قال؟؟
حسين: قال انه مايطيقك وانه اذا طلع وشاف سيارتك يرجع للبيت وانك شينه مره وثقيله دم
مشاعل عصبت: من زينه هو عاد مصدق نفسه احسن اليوم سويت فيه حركه اسمع ايش
سويت وبدت تحكي له كل شي
حسين: هههههههههههههه ,, وربي انك مجنونه ياليتني كنت هناك اشوف ,,, بس عموما ترى
الكلام الي قلت عنه كذب اصلا الولد ماكلمني ولاعرفه الا من بعيد امس رحت عنده مع
واحد من الشباب قلت بشوف بيته والله مشالله الولد كاش ومؤدب ومحترم غريبه يسوي
معك كذا
مشاعل: يالنصاب تكذب بعد كل هذا علشان تعرف السالفه يالملقوف ,, المهم قول لي ماصار
شي هناك؟؟؟
حسين: لا عادي شباب ومجتمعين ايش الشي الي ممكن يصير
مشاعل: يعني جو بنات شي
حسين: لالا الولد واضح عليه مو راعي هالحركات ابد ,,, يمكن فيه واحده يحبها ,, بس
واضح الولد مو راعي ابد حركات الغزل والهبال,, علشان كذا انا مستغرب
مشاعل: ايش عرفك ان فيه وحده يحبها؟؟؟
حسين:هذا الي همك؟؟؟ اقول ترى سلمان يسال عنك شكلك ساحبه عليه حرام عليك ترى
سلوم يحبك لا تصيري ثقيله عليه
مشاعل: ايش جاب طاري سلمان الحين انا اسالك عن طلال
حسين: ميشو ماتلاحظي انك مهتمه فيه بزياده تبين اجيب لك رقمه
مشاعل: الشرهه مو عليك الشرهه على الي يسولف معاك
حسين: ادري انك ماتقدري تزعلي علي لاني سكرتيرك وماتقدري تستغني عن خدماتي الشبابيه
مشاعل: لاتصير واثق مره ,,, اصلا انا خلاص نويت اترك كل الي اعرفهم خلاص مليت من
المكالمات
حسين: والله باين السناره غرزت ,,, طحتي ياميشو ولا احد سمى عليك ,, اقول انسي الولد
ترى والله مايصلح لك ابد
مشاعل: يووووووووه باي بس انت سخيف وتفسر الامور على كيفك
حسين: اوكي باي باي بس بتدقين علي وانتي تعترفين بحبك له ادري
مشاعل: باي

**wat** · 27-08-2007, 11:19 PM

مره ايام الاسبوع عاديه من الجامعه للبيت ومشاكل ام سلطان الي ماتخلص ومن البيت
للجامعه
مشاعل قلت طلعاتها وبدت شوي تنتبه لدروسها لان الامتحانات قربت
دق موبايل مشاعل المتصل حسين
مشاعل:الو
حسين:هلا براعيه الالو
مشاعل: هلا والله كيفك
حسين: سلمان ماخلاني انام ولارتاح بس قلقان عليك ,, ردي وريحيني منه
مشاعل: انا قلت له عندي اختبارات مايقدر؟؟؟
حسين:المهم ماعلينا غريبه ماصرت اشوفك تدوري كثير ايش عندك؟؟؟
مشاعل: مليت قلت اخذ فتره نقاهه ههههههههههه
حسين: نقاهه والا خايفه من بعض الناس؟؟؟
مشاعل مو فاهمه قصده: بعض الناس ؟؟؟؟؟
حسين: علينا ,,, طلال,,, لو تشوفيه كل يوم بالعليا احس انه يدورك ,,, والله شكله بيقتلك
مشاعل: من جدك انت اخاف انا من هالاشكال اصلا مايهز شعره مني
حسين: طيب اذا انتي مو خايفه اطلعي اليوم
مشاعل: واذا طلعت وهو مو موجود كذا ماراح استفيد لامذاكره ولا اثبت لك اني مو خايفه منه
حسين: لا تخافي سيارته قدامي معه واحد وشكلهم يدورون يرقمو يعني ماتوقع يرجعوا بدري
مشاعل: يرقموا مو انت تقول انه مو راعي هالحركات؟؟؟؟
حسين: مدري يمكن فطرتي قلبه هههههههههههههه
مشاعل: اوكي انا طالعه بس خلك قريب منه علشان0 ماجلس ادور عليه
حسين: انتظرك ميشو لاتطولي
مشاعل: باي
ولبست مشاعل في ظرف 10 دقايق وطلعت من البيت
مشاعل بعد ماوصلت العليا والزحمه قالت ادق على حسين اشوف وينه
حسين: هاه وينك ؟؟؟
مشاعل: انا عند ستار بوكس العليا وينك انت؟؟
حسين: انا ورا حبيب القلب
مشاعل: حبيب القلب بعينك ,, انت باي شارع
مشاعل كانت متحمسه تبي تشوفه يمكن علشان تقهره بعد الحركه الي سوتها فيه ويمكن شي
ثاني بس الي تعرفه انها من اخر مره شافته فيها وهي ماتفكر الا فيه
حسين: الو الو وين رحتي
مشاعل: معاك ,, ايه وين قلت لي
حسين: تعالي تقاطع الثلاثين مع الضباب بسرعه
مشاعل: اوكي اذا وصلت دقيت
وقفت ميشو عند توتي كوفي وكان المكان مره زحمه كله سيارات وقالت ادق على حسين
اشوف وينه ورفعت الموبايل بتدق بس سمعت بوري سياره,, التفتت لقت حسين ياشر لها ,,
فتحت الشباك
حسين: هلا والله ايش عندك كل يوم تحلوين
مشاعل: هههههههههه ياملحك بس مين معاك
حسين: معاي واحد لازم تعرفي كل اخوياي ,,, مو معقوله انتي ياميشو لهدرجه تغاري علي
حتى من اصحابي؟؟؟
مشاعل: انا اغار عليك انت,,, ليش خلصوا الشباب؟؟
حسين:ههههههههههههههههههه
مشاعل: ماودك ترد على موبايلك انا اتصل
حسين:ايه ايه مانتبهت ,, يالله ميشو حتى اتصال تتصلي علي مايكفيك اني قدامك خلاص
خنقتيني بهالحب
مشاعل: حسينوه ايش فيك اليوم صاير لعقلك شي,, رد يادرج
رد على موبايله وقفل الشباك
حسين: ياغبيه طلال جنبك ويسمع كل شي ,, حبيت اقهره ,, لانه مبين عليه متحمس يبي يسمع
مشاعل: احلف وينه
حسين: السياره الي على يمينك بس مو الفراري طالع بسيارته الثانيه ترى مو مضلله بس
لا تلتفتي الحين علشان مايحس اننا نتكلم عنه
مشاعل: اوكي باي
قفلت واستنت شوي والتفتت
لقته يطالعها ارتبكت شوي من المشاعر الي حستها جد كانت مشتاقه تشوفه حست نبضات
قلبها بدت تسرع حست قلبها بيطلع من صدرها نفسها تبتسم له وتقول خلنا ننسى الي راح ...
بس المشكله هي ماتعجبه ويكرهها مو معقوله تذل نفسها له ,, واكيد بعد الي سوت له
مستحيل يفكر فيها
رجعت طالعت لقته يحاسب عن الكوفي الي طلبه له ولصاحبه
مشاعل: يالله ,, يابخت الي يحبها ,,, اكيد اسعد وحده بالدنيا,, شلون ماتكون مبسوطه وفيه
كل معاني الرجوله ... لو انا حبيبته تكفيني بس عيونه ,, يابختها خويته
بعد مادفع الحساب طالع طلال مشاعل واشر للفلبيني على سياره بنات كانت واقفه جنب طلال
والبنات كانوا كاشفين ويطالعوا طلال وخويه
انتظرت ميشو تبي تشوف ايش راح يصير ,,, رجع الفلبيني لطلال وتكلم معاه ,,, وابتسم
طلال للكلام اللي قاله الفلبيني واخذ موبايله طلال وكانه يتصل او يمكن يرسل رساله ,,
لاحظت مشاعل ان وحده من البنات كانت تطالع موبايلها وكأنها تنتظر شي
مشاعل خافت ان اللي في بالها يكون صح ان طلال يرقم البنت
البنت الي كانت بالسياره طالعت طلال وابتسمت واشرت له انها خلاص وصلها الرقم
مشاعل"يعني كان يرسلها بالبلوتوث رقمه الحقير مسوي اخلاق طيب"
طالعته لقته يطالعها وهو ماسك ضحكته,,, فتحت شباكها وقالت له
مشاعل: الله لايعمينا اذا تبي ترقم اعرف مين تختار مو هالشينه الي ماتعرف الحلا
طلال: يمكن تكون شينه ,, بس احلى منك. وابتسم
مشاعل: انت اصلا مغرور وشايف نفسك وهذي الشينه كفوك صدق الطيور على اشكالها تقع
طلال: ههههههههه صادقه لاني ماوقعت عليك لانك مو من اشكالي ,, بس اهنيك على خويك
باين عليه خرووف تتحكمي فيه زي ماتبي
مشاعل تذكرت ان حسين موجود وتمنت ينقذ الموقف ماودها تدخل في مشاكل مع طلال
طلال: اسمعي يابنت الناس
مشاعل: خير
طلال: بليز اذا شفتيني تخيلي اني مو موجود وانا كمان نفس الشي ,, خلاص اخذتي بثارك
المره الي فاتت ,, وماتوقع بينا كلام ,,, علشان كذا خلينا نتحاشى بعض احسن
اتفقنا
مشاعل حست بحزن ماتدري ايش سببه يمكن علشان يطلب منها انها تبتعد عنه,, اشمعنا انا مايبيني ,,, ليه
مشاعل: اتفقنا ,, بس مو اذا شفتني بمكان تتميلح عندي اوكي
طلال ابتسم ابتسامه استهتار ورفع حواجبه: ابشري ماراح اتميلح على قولتك ,, تبين شي ثاني؟؟؟
مشاعل: ايه
طلال حس انه عطاها وجه : خير
مشاعل: لاترقم صاحباتي اوكي
طلال: وليش انا اي بنت برقمها لازم اسالها اذا تعرف مشاعل او لا؟
ايش عرفه باسمي ... الحين تاكدت انه يعرفني قبل
مشاعل: كيف عرفت اسمي؟؟
طلال: الي يسال مايتوه .. وانتي اشهر من نار على علم
مشاعل: ايش قصدك مشهوره؟؟؟
طلال: انتي اعرف بنفسك.. اسمعي مشاعل انا مو فاضي لسوالفك خلاص مثل ماتفقنا
مشاعل: اوكي لي الشرف اني اتجاهلك,,, واصلا ماراح اطلع الايام هذي ارتاح عندي اختبارات
كانت تبي تتكلم معاه باي موضوع يمكن تخف حده التوتر الي بينهم
طلال: الله يوفقك .. مع السلامه
مشاعل: باي
ابتعد طلال بسيارته البنتلي وهي تطالعه
مشاعل" يالله ليش انا حريصه عليه ابي اطلعه من راسي مو قادره"
حسين كان يدق ويدق ,,, التفتت جنبها لقته واقف بسيارته معصب ويأشر على موبايله
ردت عليه وهو متضايقه
حسين: خلاص اذا هو جنبك تصفطيني على جنب؟؟
مشاعل: خلاص اصلا اتفقنا اننا مانكلم بعض وكل واحد يتحاشى الثاني
حسين: وليش تقوليها بمراره
مشاعل: حسين
حسين: هلا
مشاعل: احس اني مقدر اشوفه يرقم بنات ... مقدر اسمعه يكلم اي بنت ,,, احس الغيره بتذبحني
مقدر اشوفه وماكلمه ...مقدر اشوفه وماحط عيني بعينه
حسين: يالله كل هذا وانا مدري,,, كل هالمشاعر ماطلعتيها الا لهذا,,, والله الي منتي لاقيه منه ريق حلو
مشاعل: حسين الله يخليك اوقف معاي
حسين: والله ياميشو ماتوقعت انك رومانسيه لهدرجه
مشاعل: حسين قول له اني ابيه بليز
حسين: وكرامتك يالمجنونه
مشاعل: حسين شسوي ... طيب جيب لي رقمه وانت ماعليك
حسين: مشاعل فكري زين بالموضوع لاتتسرعي يمكن يردك وهذيك الساعه بتكرهي نفسك
مشاعل: تتوقع يرفضني؟؟
حسين: لا انا متاكد
مشاعل: ايش اللي يخليك متاكد؟؟
حسين: نظراته لك وكلامه معاك.. لو يبيك كان رقمك اول مره شافك فيها
مشاعل: حسين يمكن هو يعرفني لانه يعرف اسمي
حسين: اذا هو يعرفك انا ابصم لك على المليون انه ماراح يتعرف عليك
مشاعل: ليش انشالله
حسين: ببساطه بيعرف انك مغزلجيه واكيد ماراح يدخل نفسه في متاهات مع وحده تعرف
غيره 10000000 واحد
مشاعل: حسين حرام عليك انا مو كذا
حسين: اجل انتي ايش ؟؟ ماتكلمي؟؟ ماتعرفتي على نص الشباب الي يدورا اذا ماكنوا كلهم
تتوقعي يكلمك ليه علشان انتي حلوه؟؟؟ فيه غيرك حلوات ... علشان اسلوبك معاه؟؟؟ انتي
شفتي شلون تعامليه .. بالله قولي لي ليش يكلمك؟؟؟
مشاعل تتكلم وصوتها مبحوح كانت العبره تخنق صوتها: حسين ,,,بعدين اكلمك
وغطت وجهها بالطرحه وهذي اول مره تسويها ماكانت تبي حسين يشوف دموعها
وقتها عرف حسين انها كانت جاده بكلامها وانه اكيد جرحها بس حسين يحب مشاعل كصديقه
ولازم يصارحها ماوده يكذب عليها

**wat** · 27-08-2007, 11:21 PM

وصلت البيت وهي شبه منهاره تفكر ايش الي خلاها تكلم شباب وتتعرف على هذا وذاك
يمكن وضعها في البيت او يمكن تبي تحس انها مرغوبه ,, وفيه شباب يتمنوها ...طيب كانت
حياتها ماشيه حلو لحد ماطلع طلال ,, اشمعنا طلال ,, يمكن علشان هو غير الشباب,,, ماكانت
تهمه او تحرك فيه شي... يمكن... ليش ماتعتبره مثل اي واحد,,, لانه حسسها انها ولاشي وهذي
اول مره تحس بهالاحساس ,,, اكيد هذا السبب الي خلاها تتعلق فيه ,, بس مجرد ماتتعرف
عليه اكيد راح يكون مثله مثل غيره
-------------------------------------------------------------------------------
في سياره طلال
عبدالله: اقول شفت خوي مشاعل
طلال: ايه ايش فيه
عبدالله: ماعرفته
طلال: لا
عبدالله: هذا الي سالتك عنه بالمجلس
طلال باستغراب: كان عندي بالمجلس
عبدالله: ايه شلون مانتبهت له, قلت لك ان فيه ناس يجوك وانت ماتدري عنهم ,, شكله هو
الي عطاها معلومات عنك,, لما اقول لك لاتدخل مجلسك ناس ماتعرفهم تسمع كلامي
طلال: صادق والله ... بس غريبه شلون دخل مجلسي اكيد يعرف احد من العيال
عبدالله: ايه شكله يعرف ابو خليل لاني شفته يسولف معاه
طلال: ماعلينا خله يقول لها اي شي انا مو خايف من شي,,, بعدين خلاص انا حددت موقفي
معاها وماظنها بتضايقني او تفكر فيني حتى
عبدالله: اشك ,,, انت ماشفت لما رقمت البنات كيف كانت بتاكلك بعيونها,,, تدري لو انا
ماعرف شخصيتها كويس,,, كان قلت انها تحبك
طلال: هههههههههههههههه حب مره وحده والله كلمه الحب اشوفها سهله على لسانك
عبدالله: لو انت شفتها كان قلت اكبر من هالكلمه
طلال: يمكن تكون انقهرت لاني مارقمتها وهي متعوده انها تترقم دايما علشان كذا حست بالغيره
من البنات بس حب ماتوصل ابد
عبدالله: بصراحه البنت هذي احس حتى ابوها ماتحبه
طلال: بعكسي احس عندها مشاعر ماتملكها اي انثى ,, بس محتاجه من يفجرها
عبدالله يتكلم بخوف: ومن الي بيفجرها لايكون انت بس؟؟
طلال ضحك على خويه الي خاف: يمكن ليش لا ههههههههههه
عبدالله: اقول بس خلك بعيد عن الشر وغني له
طلال: تدري من كثر ماتهاجموها بديت ارحمها
عبدالله: اقول ترى طاريها يحسسني بالاشمئزاز غير السالفه تكفى
طلال: احلى ياشمئزاز , ليش حامل؟؟
عبدالله: هههههههههههههههههههه , ايش دخل الحمل يالدلخ
طلال: مدري عنك ,, تدري ابو عابد حسيت في عيونها كلام كان ودي اسمع ايش تبي تقول
عبدالله: طلال,, انت الي عندك كلام تبي تقوله ,,, قول وخلصني,, تبيها؟؟؟
طلال: مجنون انت ,, ولا افكر حتى ,, اول شي انا مشغول بالمؤسسه ,, وبعدين مع امي واخواتي
الي مو قادرين يتأقلمون هنا ,, تعرف احنا عايشين برا وتعودنا على بيتنا هناك والبيئه والناس
هناك غير هنا يمكن انا قدرت اتاقلم لاني اجي هنا كثير علشان المؤسسه بس هم لسى ,, وبعدين
لو فكرت احب مستحيل احب البنت هذي لسببين اول شي انا ماثق فيها ثانيا مستحيل اخون غسان
عبدالله: بس غسان انتهت العلاقه بينهم من زمان
طلال: ادري بس كانت خويته بيوم من الايام
عبدالله: افهم من كلامك انك كنت مفكر بالموضوع
طلال: اممممممممم يمكن لو كانت الظروف غير يمكن ,, بس في هالاوضاع مستحيل
عبدالله: الحمدلله انه مستحيل,, مدري ليش البنت هذي عندها سحر اي واحد يشوفها يحبها
طلال: المشكله ياعبودي المظاهر دايما خداعه
عبدالله: ماعلينا البنات الي شفناهم هاه رقمتهم
طلال: ههههههههههههه ايه ارسلت لهم الرقم ناقص
عبدالله: مجنون ليش؟
طلال: انت عارف اني ماحب ارقم بس كنت ابي اقهر مشاعل,,, بشوف ايش راح تسوي
عبدالله: وتقوم تنقص رقم كان عطيتهم رقمي انا ياشيخ
طلال: مره ثانيه انشالله اذا شفت مشاعل اعطيهم رقمك
عبدالله: وليش انت ماترقم الا اذا شفتها
طلال: تدري عبودي احب نظرتها لما تشوفني ارقم غيرها
عبدالله: الله يستر شكلك بتقلب غسان الثاني
طلال: لاتقارني بغسان ,, يمكن غسان ماعرف شلون يوصل لقلبها
عبدالله: وانت ناوي توصل انشالله
طلال: قلت لك البنت ماتصلح لي بس مومعنى كلامي اني ماقدر اوصل لقلبها
عبدالله: مصدقك انك تقدر بس الله يخليك فكنا من المشاكل اخاف بعدين هي الي توصل لقلبك
طلال: هههههههههههههههههههههههههههههه تبطي
ورفعوا على صوت الاغاني وكملوا مشوارهم
==============================

**wat** · 27-08-2007, 11:22 PM

كل هذا علشانك يابو سامي والبقية غدا ان شاء الله ........

**خالد العتيبي** · 28-08-2007, 01:45 AM

مشكور والله بس كمل الله يخليك

انا اعتبرك اخوي يا الله..

**خالد العتيبي** · 28-08-2007, 06:00 PM

بسرررررررررررررررررررررررررررررررررررررررررررررعه كمل بنجن خلصني بو خالد

يالله بسرعه

أنا أترجاك بسرعه

**ωђάţ εvεя** · 28-08-2007, 09:50 PM

مشكوره ع القصه

**wat** · 28-08-2007, 11:49 PM

وصلت مشاعل للبيت وكانت ام سلطان وابوها جالسين بالصاله قررت تسلم على ابوها لان
مالها خلق تلبس قناع الطيبه قدام ابوها ,, ملها خلق المجاملات ,, والكلمات الحب الي تقولها لها ام
سلطان سلمت على ابوها وباست راسه وسلمت على ام سلطان واعتذرت منهم لان عندها مذاكره
دخلت غرفتها ,,, غيرت ملابسها ,,, وفتحت التلفزيون ,,, كان فيه فلم (فورتي ير اولد فيرجن)
الفلم كان كوميدي عن رجل اعزب عمره 40 يخجل من النساء ,,, واصحابه يحاولوا يطلعوه من عزلته
ضحكت من قلب ,, حست ان اخوها فهد عنده نفس المشكله
قطع انسجامها رنه الموبايل
مشاعل: هلا حسين
حسين بحزن: هلا ميشو
مشاعل: حسونه,, ايش فيه صوتك؟؟؟ خرعتني
حسين: ميشو ابي فزعتك
مشاعل: من عيوني ,, بس ايش فيك؟؟؟
حسين: ميشو انا في ورطه ومحد يقدر يساعدني الانتي... ميشو انا تعرفت على وحده من
3 سنين ,,, ومدري شصار لها يرد اخوها على موبايلها
مشاعل: ههههههههههههه, احسن
حسين: ميشو لاتضحكي .. احر ماعندي ابرد ماعندك
مشاعل: طيب واذا ,,,,, يمكن اخوها موبايله مفصول هههههههههههه
حسين: يووووووه ميشو,, لالا مره وانا اكلمها قفلت بسرعه ومن بعدها واخوها يرد
مشاعل: يعني المطلوب؟؟؟
حسين: ابيك تدقين على موبايلها وتطلبيها
مشاعل: طيب هات رقمها ,, بس لحظه اذا كلمتني ايش اقول لها
حسين: قولي لها انك مشاعل ال.. هي على طول بتعرف انك من طرفي
مشاعل: طيب وبعدين ايش راح تستفيد
حسين: اعرف ايش فيها
مشاعل: طيب عطني رقمها
دقت ميشو على البنت
مشاعل: الو
: نعم
مشاعل: السلام عليكم
: عليكم السلام,, من انتي
مشاعل: انا مشاعل صاحبه العنود,, مو هذا موبايلها
: لا,, غلطانه
مشاعل: غريبه ,, متاكده ان هذا رقمها ,, مين انت
: انا واحد
((شكل الولد مغزلجي))
مشاعل بدلع: تصدق حسبتك ثنين ,, اخلص بس بتنادي البنت والا لا؟؟؟
: ليش مو راضيه تصدقين ان هذا مو رقم العنود,, بس اصير العنود لعيونك
مشاعل: مشالله عليك, ايش تشرب ع الصبح دمك خفيف
: حليب نياق
مشاعل: اه يامصلك,,, اقول بتعطيني العنود والا اقفل؟؟؟
: قلت لك انا العنود
مشاعل: هاي العنود كيفك؟؟؟
: تمام ,, هلا والله بصوت الغزال
مشاعل: ليش انت سامع صوت الغزال؟؟؟احس حدك صوت الضب
: اكيد عندنا مزرعه كلها غزلان
مشاعل: ايه عاد انتم شكلكم غزلانكم شغالات هههههههههههههههههههههه
: هههههههههههه ,, مقبوله ممكن نتعرف ياقمر
مشاعل: اقول شوي واطلبك طيب
: لاتطولين ياقمر
طوط طوط
مشاعل ماقدرت تتحمل مصالته
دقت على حسين
مشاعل: حسينوه ,,, ايش هالي مخليني اكلمه,,,, مو طبيعي
حسين:ليش؟؟؟
مشاعل:جالس يغازل,,, حتى ماعنده اسلوب
حسين: طيب مانادى العنود
مشاعل:لا يقول هو العنود
حسين: يالله اكيد صار لها شي ,, اجل ليش اخذ موبايلها
مشاعل:والله مدري عنك,,, بس انا الي علي سويته
حسين:ميشو تكفين طلبتك
مشاعل:ايش؟؟؟
حسين:كلميه كم يوم يمكن تقدري تعرفي ايش صار
مشاعل:مستحيل هذا لو اكلمه 5 دقايق رجعت كل اكلي ,,,, لالا مستحيل
حسين: تكفين طلبتك ,,, لو انتي طالبه مني شي وربي ماردك,,, تكفين ميشو ماعمري طلبت منك شي
مشاعل: طيب طيب لاتبكي,,,, بس اسمع هي مكالمه وحده ولو ماقال لي شي ماراح ادق
حسين: طيب انتي بس كلميه
مشاعل: اقول حسين يقول عندهم مزرعه كلها غزلان جد؟.؟؟؟
حسين:ههههههههههههه والله عندهم حوش كله غنم هههههههههه
مشاعل:هههههههههههههههههههه

**wat** · 28-08-2007, 11:50 PM

مشاعل (اضطرت)تكلم اخو العنود (حاتم)على امل تعرف اي شي عن العنود علشان اعز
صديق لها حسين ماكانت تبي حسين يزعل عليها لان له معزه ,,, تغليه مثل اخوانها,,, ويكفي
انه متفهم,,,وهو الانسان الوحيد الي تقدر تحكي له كل شي يخصها,,,, ولاممكن تخبي عنه
اي شي,,, حتى هو تعرف عنه اشياء مايعرفوها اخوياه,,,, كانوا اكثر من اخوان,,, بس
مسكله حسين فالها مع مشاعل يعني مخليها تكلم وتطلع ولاعمره نصحها ,, يمكن لانه مراهق
وعنده كل شي (قدام) كان عمره 18,,, اصغر من مشاعل بسنتين
قفلت مشاعل من حاتم الي استمرت مكالمته 45 دقيقه ,, بس حست انها 45 سنه
استعدت للنوم وقفلت الانوار والابجوره ,,, طبعا هي متعوده قبل تنام تخلي موبايلها على
السايلنت ,, كانت الغرفه ظلام ,,,, حست بنور ياشر في غرفتها,,, طالعت موبايلها لقت فيه
رساله وصلتها فتحت الرساله لقتها من ساره وكتبت فيها
"ميشو انا سويت حاجه مدري هي غلط او صح بس تاكدي انا ما سويتها الا لاني احبك"
استغربت مشاعل" مجنونه ساره ايش فيها اكيد غلطانه بالرساله كانت بترسلها لاحد وبالغلط
ارسلتها لي ,,, بس لا اسمي مكتوب فيها؟؟؟؟"
جتها رساله ثانيه من ساره
"ميشو انا بقفل موبايلي وبكره ماراح اجي للجامعه,,,بصراحه خايفه منك ,,, المهم انتظري اتصال راح يجيك بعد شوي"
مشاعل" انهبلت ,, ايش فيها قامت تخبط بالحكي؟؟؟ بدق عليها اشوف ايش قصتها"
دقت لقت كلامها صدق ,,, ساره قفلت موبايلها
استنت الاتصال الي تحكي عنه ساره ماحد اتصل ,,, رجعت موبايلها على الصوت ,,, وقفلت النور
واستعدت للنوم
مشاعل" سخيفه ياسارونه مسويه بتخوفيني ,,, تشوفين بتروحين مني وين"
جاها مسج
مشاعل" اكيد هذا سويره ,, اف منها ماراح تخليني انام"
فتحت المسج لقته رقم غريب وكان مضمون الرساله
"صباح الخير مشاعل انا اسف اني ازعجك بهالوقت بس حبيت اشكرك على الرسمه بصراحه
روعه تسلم ايدك (طلال)"
يمكن كلمه انصعقت شويه ,, لاشعوريا راحت تركض تدور الرسمه بكل مكان مو لاقيتها
على طول اتصلت على ساره موبايلها مقفل,,, اتصلت على حنان ,,, والحمدلله موبايلها مفتوح
ظل يدق ويدق ومحد يرد
ارسلت رساله لحنان
"لو سمحتي حنان ردي ابيك ضروري"
جتها رساله من حنان
"ميشو انا مالي شغل سارونه هي صاحبه الفكره ,, اذا عندك كلام كلمي سارونه,,,انا كنت
رافضه بس هي اصرت,,, ميشو والله انا مالي شغل"
مشاعل مو فاهمه اي فكره واي خرابيط,,, طلال كيف عرف رقمها,,, وشلون عرف بالرسمه
,,,, لالا سارونه ماتسويها,,,,,,, ووين الرسمه كانت معاها,,,,وايش قصه المسج ,,,, معقوله
طلال؟؟؟؟؟؟؟؟؟؟؟؟
ارسلت مشاعل للرقم الي ارسل لها الرساله
"مين انت؟؟"
ارسل لها مسج
"ليش كم طلال تعرفي ؟؟ وكم طلال رسمتي صورته؟؟؟ شكلهم كثير!!!!"
حست انه مقلب
ارسلت له مسج
"ايش السالفه؟؟؟؟؟؟؟؟؟؟؟؟"
ارسل لها
"ممكن اكلمك لاني مو شاطر بالمسجات؟؟ اذا انتي فاضيه"
هنا مشاعل خافت وحست الموضوع جدي ,,,لو ماكان طلال ماكان تجرأ يقول لها انه بيتصل
اكيد وقتها بتكتشف انه مقلب,, بس الي يرسل المسجات واثق من نفسه
ارسلت له
"انا فاضيه"
ثواني ودق نفس الرقم ,,, كان قلب مشاعل بيوقف من الخوف ,,, معقوله طلال يدق عليها؟؟
ردت عليه
مشاعل بلهفه: الو
طلال:صباح الخير
عرفت انه هو على طول لان محد يملك هالصوت العذب الا طلال الي عذبها
مشاعل بنعومه: صباح النور
طلال: ليش مانمتي وعندك بكره جامعه؟؟؟
مشاعل: اممممم كنت بنام ,,, بس مسجاتك ماخلتني انام
طلال:......................... .
مشاعل: .........................
طلال:......................
مشاعل: بتطول ساكت؟
طلال: وليش انتي ماتحكي؟
مشاعل: انت الي عندك كلام مو انا ,,, ابي اعرف ايش قصه الرسمه؟؟
طلال:يعني ماتعرفي؟؟؟
مشاعل: لا وربي, سارونه ارسلت لي مسج غريب وقفلت موبايلها,, وحنان مو راضيه ترد
طلال بكل ادب: اول حاجه انا اسف اني ازعجك بالهوقت,,, انا ادري ان عندك جامعه الساعه 9
مشاعل انصدمت وقاطعته: ايش عرفك؟؟؟؟
طلال بخبث: مو صعب علي اعرف اي شي عنك
مشاعل ارتبكت طلال يكلمها واول مره بدون مشاكل ,,, وكان صوته هادي
مشاعل: طلال
طلال:سمي
مشاعل: ممكن تحكي ايش صار
طلال: انا ححكي بس انتي تقاطعيني ... اذا وعدتيني انك تسكتي لما اخلص كلامي .. راح اقول لك كل شي
مشاعل بنعومه وكانت فرحانه انها تسمع كلامه : وعد
طلال: اليوم شفت صاحبتك ساره ,,, وبالصدفه كان معاي واحد من الشباب ,,, المهم ان
صاحبتك كلمته وقالت ابي اسلم ,,,,على صاحبك طلال,, وبعد ماسلمت عليها ,, قالت لي معي امانه لك
وابتسم طلال:والامانه كانت الرسمه,,, وكانت خايفه اني اخذها معاي لانها كانت خايفه تفقديها
وطلبت مني ارجعها,, بس بصراحه ماقدرت ارجعها تعرفي لي؟؟؟
مشاعل حست بغصه من الربكه وطلع صوتها مخنوق: ليه؟؟؟؟
طلال: لانها اعجبتني ,,,, بصراحه توني اعرف اني وسيم
مشاعل حست بخيبه امل كانت تتوقع يقول لها لانك انتي رسمتيها
طلال:بصراحه مشالله عليك جد فنانه ,,, بس كيف تذكرتي شكلي ,, وخاصه انك ماشفتني كثير
مشاعل تجرأت: انا مانسيتك من اول يوم شفتك فيه وانت شكلك ماغاب عني ولا لحظه
طلال:......................... .
مشاعل:.......................ا نحرجت من الكلام الي قالته وندمت حست انها تسرعت
طلال: مشاعل شرايك اخليك تنامي علشان تصحي بكره
مشاعل ندمت على كلامها ,, ايش راح يقول عنها: اوكي ,, وانت اكيد عندك دوام؟؟؟
طلال: دوامي الساعه 8
مشاعل: يالله مجنون,, وللحين مانمت ,,,, الساعه 1 ونص
طلال: مو رسمتك مو مخليتني انام
مشاعل بخجل: ليش؟
طلال: مدري بس احس اني مقدر اشيل عيني عنها
مشاعل تضحك: ههههههه لهدرجه معجب بنفسك؟؟
طلال: لا عندي النسخه الاصليه,, الي هي انا ,, بس الرسمه فيها شي حلو غير النسخه الاصليه
مشاعل: ايه انت مو حلو بس انا حاولت لما رسمتك اخفي عيوبك هههههههههههههه
طلال: لالا مو على الحلاوه ,,, يمكن الايد الي رسمتها فيها سحر يخلي الشخص مايقدر يشيل عينه عنها
مشاعل انحرجت وصار وجهها احمر ,, كانت دايما تسمع كلام غزل ومدح بس ماكنت تهتم
بس طلال اي كلمه يقولها تهز مشاعل مهما كانت بسيطه,,, الكلام مو بحلاته ,, لا اكيد بالشخص الي يقوله
مشاعل: .................. ماكانت تقدر ترد اول مره تحس بفرحه مالها حدود كان نفسها تصرخ
طلال ابتسم: فيه ناس خدودهم صارت حمر,,, ناس اول حرف من اسمهم ميشو
لا خلاص مشاعل انجنت بعد يدلعها اول مره تحس ان كلمه ميشو تجنن
طلال: خلاص بقفل لايغمى عليك
مشاعل: لا تخاف الشينات مايغمى عليهم
كانت تبي تذكره بالكلام الي قاله لها
طلال: اكيد علشان كذا انا امدحك لانك شينه ,, احاول ارفع معنوياتك
ماحست مشاعل بالزعل من الكلام الي قاله ,,, يمكن علشان هو معاها وهذا يكفيها
طلال: اوكي مشاعل ,,, انا اسف اذا طولت عليك ,,, بس جد انا شاكر لك على الرسمه ,,,واحلام سعيده
اكيد راح تكون احلام سعيده بعد ماسمعت صوتك
مشاعل: لاعادي اصلا انا اسهر كل يوم,,, وبخصوص الرسمه انا اسفه اني رسمتك بدون ماستاذن
طلال: لالا انا متبرع بوجهي ,,, الي يبي يتدرب عليه ماعندي مانع
مشاعل: هههههههههههههههههههههههه
طلال: مشاعل
مشاعل: هلا
طلال: تعرفين ان ضحكتك جنان
مشاعل:.....................((ا نحرجت وماقدرت ترد))
طلال: مشاعل الساعه متاخره ,,, اذا ماصحيت بكره بدعي عليك
مشاعل: تبيني اصحيك؟؟؟
طلال: لالا شكرا انشالله انتي الي تصحي
مشاعل: لا مو مشكله اذا تبي اصحيك وارجع انام
طلال: لالا انا عندي الي يصحيني ,,, اهم شي انتي اصحي,,,لاتطنشي الجامعه
مشاعل: اوكي تصبح على خير
طلال: وانتي من اهل الخير
مشاعل:باي
طلال: باي
قفلت مشاعل وراحت ركض لغرفة الملابس وقفلتها وصارخت باعلي صوتها خافت تصحي اهلها
رجعت لسريرها
" مو قادره اصدق ان طلال داق علي لا ا,,, ساره وربي احبك
,,, لو انا عارفه ان هالرسمه لها هالتاثير الحلو,, كان رسمته من زمان,,, سارونه خدمتيني خدمه
العمر ,,,, عمري ماراح انسى لك هالموقف,,,,,,,,,,,, بس ايش قصده لما قال عندي الي يصحيني؟؟
اكيد هذي بطته الي يقول عنها؟؟؟؟؟؟؟؟؟؟مو مهم ,,, اهم شي انه كلمني ,,, طيب بيدق بكره,,,
والا بس مجرد شكر على اللوحه وخلاص,,,,,, يالله طلال والله احبك ,, احبك ,, احبك,, من بعد
ماماتت امها مافرحت فرحه قد فرحتها اليوم
----------------------------------------------

**wat** · 28-08-2007, 11:52 PM

صحت الساعه 7ونص على صوت المنبه لانها تصحى قبل المحاظره بساعه ونص ,, لزوم الكشخه
كانت مره تعبانه,, فيها نوم.,,, اخرت الساعه للساعه 8
مشاعل" ساعه تكفيني البس"
وكملت نومها ,, والساعه 8 دق المنبه
مشاعل" اوووووووووووووووووووه فيني نوم,, بلا جامعه بلا هم"
قفلت المنبه وكملت نومها
-----------------------------------------------------------------------------------
العصر كانت في الصاله تحاول تتصل على ساره الي ذبحتها ماترد ,, اكيد خايفه
مشاعل ارسلت لها مسج
"سارونه ,, من قلبي اشكرك على الي سويته,, سويتي حاجه انا ماكنت بتجرا اسويها
بليز ردي بقول لك ايش صار"
ومثل ماتوقعت ساره دقت علطول
مشاعل:الو
ساره بخوف:هلا
مشاعل:بصراحه انتي بايخه وبزر على هالحركه تدرين انه دق يضحك ويقول مصدقه انك تعرفي ترسمي
ساره مصدومه: احلفي,,, شلون ,, لما اعطيته الرسمه ,,, كان منجن عليها ,, يقول مره تجنن
مشاعل: هذا الي صار ,,, يله ايش تبريرك للي سويتيه,, وين اودي اجهي الحين اكيد كل الناس عرفوا
ساره:ميشو لاتكبرين الموضوع ,,, ترى محد عرف الا هو وصاحبه
مشاعل:لاوحضرتك ,,, شغاله تاخذي ارقام,, حتى خويه اخذتي رقمه
ساره: مين قال لك؟؟؟
مشاعل:مو مهم بس انتي خنتيني
ساره:ميشو قسم بالله ماسويت كذا الي اني حسيت انك منجذبه له ,,, ماودي اشوفك تفكرين فيه
وماقدر اسوي شي
مشاعل:تدرين انك احسن خويه بالدنيا
ساره منصدمه: مو فاهمه الحين انتي زعلانه والى فرحانه
مشاعل: والله انا مو فرحانه الا بطير من الفرحه
ساره: يله انقلعي المفروض تشكريني مو تهزئيني
مشاعل:اووووووووه سارونه شسوي احبك.... تدري امس جلسنا نسولف ربع ساعه
ساره: مشالله حاسبتها
مشاعل:شلون ماتبيني احسبها
ساره:هاه قولي ايش حكيتوا فيه وايش صار
مشاعل قالت لساره كل شي
مشاعل:الاتعالي انتي الي احكي لي شلون عطيته الصوره
ساره: ابد امس لما طلعت مع حنونه بالصدفه شفته وتعرفين خويتك شويت تميلح عند خويه
رقمني ودقيت علطول وقلت له يالله عطني طلال بسلم عليه ,, خويه خاف ايش عرفني بطلال
قلت لالا خوي وحده من البنات
مشاعل:هههههههههههههههههههههههه
ساره:المهم ,,, وكلمته وسلمت عليه,, هو كان منجن ,, ماعرفني اول شي لاننا بسياره حنونه
,,, قال لي مين انتي,, قلت انا خويه مشاعل,, قال مشاعل مين,,, قلت له تبي كلمه السر,,,
تخيلي ايش قلت له كلمه السر
مشاعل:ايش؟؟؟
ساره:ههههههههههههههههههه الكيكه
مشاعل:هههههههههههههههههههههههه هههه
ساره:هو مات ضحك,,, قلت عرفتها ,, قال اكيد احد مايعرف ام الشر,,, قلت تراها تسلم عليك
مشاعل:متى قلت لك سلميني عليه
ساره: انتي عاد لاتدققي مره,,, المهم قال الزبده ايش تبي ,,, قلت له عندي لك امانه تدري ايش قال
مشاعل:ايش؟؟؟؟
ساره: قال لا مابي اماناتكم خليها لك ,, قلت والله شي يخصك,, وبالموت وافق ,,واحنا عند الاشاره
عطيته الرسمه ولما فتحها انجن ,, قال لي من وين جبتيها ,, قلت له قول اول مين الي رسمها
انصدم لما قلت له كذا ,,, قلت له عموما هذي لوحه مسروقه من غرفه مشاعل بدون ماتدري
وبليز لاتقول لها شي لانها بتذبحني ,,و انا شفتها قلت لازم تشوفها انت تعرف هذا وجهك,,, وحقوق الوجه محفوظه
اخاف بكره ترفع قضيه ملكيه على صاحبتي,, مات ضحك,, وماصدق انك رسمتيها ,,, بس لما شافني اترجاه مايقول لك شي
.. استغرب ايش الي يخليك ترسمين صورته,, ضحكت وقلت لك انا اعز وحده من صاحباتها ماعمرها
رسمتني ,, وانت رسمتك,, عاد انت شاطر وتفهمها ,, اكيد لك مكان عندها كبير,,, وقتها تعرفي ايش قال لي
مشاعل:ايش ,, والله احس بتجيني سكته قلبيه من كلامك
ساره:سلامتك ,, المهم قال اوكي الموضوع بيني وبينك بس الصوره انا ابيها,, قلت تكفى اذا سالتني ايش راح اقول لها
قال عطيني رقمها وانا استاذن منها ,, هو لما قال عطيني رقمها انا ماصدقت خير وعطيته ,,وبس
مشاعل:سارونه انا خايفه مايدق اليوم
ساره:امممم انتي طيب دقي,, هو بدا ودق ,, انتي عليك الباقي
مشاعل:مجنونه تبيه يقول عني مشفوحه
ساره:والله بكيفك ,, بس لو انا مكانك والله لازعجه ,, تدرين ميشو لما اشوف طلال ماتخيل الا
انك زوجته
مشاعل:الله يخليك لاتعيشيني احلام ,,, اصدقها بعدين واتحطم

رواية فارس أحلامي ( للكاتبه بنت السعوديه )كامله

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget