أحرق الصوره وتاخذني افكاري بعيد *** وتنهض العبره من العين ويطيح اجلدي
لامتى والوعد مفهوق والدنيا وعيد *** لامتى والليل من غير صبح سرمدي
لامتي نفسي تريد ونصيبي ما يريد *** لامتى والحظ يزحف والايام تعدي
والله اني لو حسدت الشقي قبل السعيد *** ما بلاي الا عذابي وهمي ونكدي
ودي افرح والحزن داخلي شرس وعنيد *** لايصد ولاقدرت امتنع منه بيدي
كلما قلت انتهينا كفاية لاتزيد *** قال يامستعجل توني معك ابتدي
لي سنه والحال واقف عندي ولاجديد *** تايه مادلني لاسهيل ولالجدي
حاير بين الوسايل تفيد ولاماتفيد *** ومن مشى مايجهله مادري وين يغدي
ماهقيت أني على فطنتي بارجع بليد *** يوم طاوعت المحبة من الحظ الردي
شفت في عينه ملاك وشيطان مريد *** واحد وده يسالم والاخر معتدي
لي سنة بس اتذكر سواليفه واعيد *** واشغل بها الناس واهذي بها في مرقدي
كن عنده علم بالغيب يتركني وحيد *** اذكر انه مره قال تسلم يابعدي
اذكر انه وقتها كان يسمع لي قصيد *** وكان ينشدني ولاعلمه وش مقصدي
قال وش موقفك لو مات لك حب وليد *** تو ماتم السنة ياغلاي المبتدي
تعتقد تبكي عيونك عليه وقلت اكيد *** كيف ماتبكي عيوني على موت ولدي
كم تبيد احباب قلب وحبه مايبيد *** مثل نمر ابطى وقلبه على وضحا ندي
كانت افراحي عضيدي وصارت لي ضديد *** ليتني صكيت باب اشتياقي وسهدي
وقبل ترديد المراثي على روح الفقيد *** ليتني ريحت قلبي وفكري وجسدي
اقلب الصفحة واقول احسن ابدا بالمفيد *** واحرق الصورة واقول استريح وارقدي
وفي خيالي صورة تصهر القلب الحديد *** بس تحرقني ولاتحترق في موقدي