امس العصر مع صافي الجو غنيت

مغير انا وهموم قلبن خلاوي


وأبيات شعرن جاوبتني وونيت

ونة غريم العشق طاويه طاوي


اشكي وليفن صد عني ووليت

اخفي حنيني بس ماني بقاوي


يا ليتني بالحب ما قد تماديت

كان الخفوق مريحن وامتشاوي


عز الله اني من غيابه ترديت

ومال القلوب إلا الطبيب المداوي


باسباب حبه والله اني تبلويت

يا لله تكافيني جميع البلاوي


ودي بشوفه لو على شرفة البيت

وانا لشوفه والله اني شقاوي


من شافني ماني بحين ولا ميت

وهذي سوات اللي خفوقه هواوي


حب وغرام وعشق لاصبحت وامسيت

والهم دايم لا ظلم الليل ضاوي


راحت حياتي بين يا ليت يا ليت

يا لله لا تقطع رجات الرجاوي


اللي عشق والعشق عشقن على صت

ما هوب عشق اهل الدروب الملاوي


ياربي يا جامع قلوبن مشاتيت

انك تجيب الزين حسن الحكاوي


وامس العصر مع صافي الجو غنيت

وابديت مافي وسط قلبن خلاوي

,,,,,,,
,,,,
,